ಆಧ್ಯಾತ್ಮಿಕತೆ ವಿಚಾರ ಬಂದಾಗ ಭಾರತದ ಈ 5 ಸ್ಥಳಗಳನ್ನ ಮಿಸ್‌ ಮಾಡ್ಲೇಬೇಡಿ!

ಭಾರತದ ವಿವಿಧ ರಾಜ್ಯಗಳಲ್ಲಿ ಆಧ್ಯಾತ್ಮಿಕ ಪ್ರವಾಸಕ್ಕೆ ಸೂಕ್ತವಾದ ಅನೇಕ ಸ್ಥಳಗಳಿವೆ.

ಆಧ್ಯಾತ್ಮಿಕ ಪ್ರವಾಸೋದ್ಯಮ

ಜೀವನದಲ್ಲಿ ಕಷ್ಟಕರ ಪರಿಸ್ಥಿತಿಗಳನ್ನು ಎದುರಿಸುತ್ತಿರುವವರು, ಆಧ್ಯಾತ್ಮಿಕ ಪ್ರವಾಸಗಳ ಮೂಲಕ ತಮ್ಮನ್ನು ತಾವು ಕಂಡುಕೊಳ್ಳಲು ಪ್ರಯತ್ನಿಸುತ್ತಾರೆ. ಆಧ್ಯಾತ್ಮಿಕ ಪ್ರವಾಸವು ಕೇವಲ ಧರ್ಮಕ್ಕೆ ಸೀಮಿತವಾಗಿರಬೇಕೆಂದೇನಿಲ್ಲ. ಕೆಲವರಿಗೆ ಇದು ಧಾರ್ಮಿಕ ಯಾತ್ರೆಯಾದರೆ, ಇನ್ನು ಕೆಲವರಿಗೆ ಆಳವಾದ ಒಳನೋಟವನ್ನು ನೀಡಲು ಸಹಾಯ ಮಾಡುತ್ತದೆ. ಪ್ರತಿಯೊಬ್ಬರಿಗೂ ಅವರ ಆಧ್ಯಾತ್ಮಿಕ ಪ್ರಯಾಣದ ಹಿಂದಿನ ಉದ್ದೇಶಗಳು ಬೇರೆಯಿರಬಹುದು. ಆದರೆ ಎಲ್ಲರ ಆಧ್ಯಾತ್ಮಿಕ ಪ್ರಯಾಣದ ಅಂತಿಮ ಗುರಿ ಶಾಂತಿಯನ್ನು ಕಂಡುಕೊಳ್ಳುವುದಾಗಿರುತ್ತದೆ. ಭಾರತದಲ್ಲಿ ಆಧ್ಯಾತ್ಮಿಕ ಪ್ರವಾಸಕ್ಕೆ ಸೂಕ್ತವಾದ ಹಲವು ಸ್ಥಳಗಳಿವೆ. ಅವುಗಳಲ್ಲಿ ಕೆಲವನ್ನು ಇಲ್ಲಿ ನೀಡಲಾಗಿದೆ.

ಋಷಿಕೇಶ (ಉತ್ತರಾಖಂಡ)

ನೀವು ಆಧ್ಯಾತ್ಮಿಕತೆಯಲ್ಲಿ ಮುಳುಗೇಳಲು ಬಯಸಿದರೆ, ಭಾರತದಲ್ಲಿ ನೀವು ಭೇಟಿ ನೀಡಲೇಬೇಕಾದ ಸ್ಥಳಗಳಲ್ಲಿ ಋಷಿಕೇಶವೂ ಒಂದು. ಇಲ್ಲಿನ ಗಂಗಾ ಆರತಿಯು ಪ್ರಮುಖ ಆಕರ್ಷಣೆಯಾಗಿದ್ದು, ಇದರಲ್ಲಿ ಅನೇಕ ಜನರು ಭಾಗವಹಿಸುತ್ತಾರೆ. ಇಲ್ಲಿ ನೀವು ಹಲವಾರು ಯೋಗ ಮತ್ತು ಧ್ಯಾನ ಕೇಂದ್ರಗಳನ್ನು ಕಾಣಬಹುದು.

ಹರಿದ್ವಾರ (ಉತ್ತರಾಖಂಡ)

ಪ್ರತಿದಿನ ಸೂರ್ಯಾಸ್ತದ ನಂತರ ಹರಿದ್ವಾರದಲ್ಲಿ ನಡೆಯುವ ಗಂಗಾ ಆರತಿಯು ವಿಭಿನ್ನ ಅನುಭವವನ್ನು ನೀಡುತ್ತದೆ. ಶಂಖ ಮತ್ತು ಗಂಟೆಗಳ ನಾದದೊಂದಿಗೆ ಕಳೆಯುವ ಸಮಯ ವ್ಯರ್ಥವಾಗುವುದಿಲ್ಲ. ಹರ್-ಕಿ-ಪೌರಿ ಎಂಬ ಪುಣ್ಯಕ್ಷೇತ್ರಕ್ಕೆ ಭೇಟಿ ನೀಡಿದ ನಂತರ ಗಂಗಾ ಸ್ನಾನ ಮಾಡಬಹುದು. ಮಾಯಾ ದೇವಿ ದೇವಸ್ಥಾನ, ದರ್ಶ ಮಹಾದೇವ ದೇವಸ್ಥಾನ, ಪವನ್ ಧಾಮ್ ಮುಂತಾದ ದೇವಾಲಯಗಳು ಹರಿದ್ವಾರದಲ್ಲಿವೆ.

ಅಮೃತಸರ (ಪಂಜಾಬ್)

ಅಮೃತಸರ ಎಂದು ಕೇಳಿದ ತಕ್ಷಣ ನೆನಪಿಗೆ ಬರುವುದು ಸ್ವರ್ಣ ಮಂದಿರ. ಸಿಖ್ ಧರ್ಮದ ಅತ್ಯಂತ ಪವಿತ್ರ ಸ್ಥಳವೆಂದು ಪರಿಗಣಿಸಲ್ಪಟ್ಟಿರುವ ಈ ದೇವಾಲಯಕ್ಕೆ ಪ್ರತಿದಿನ ಬಹಳಷ್ಟು ಜನರು ಭೇಟಿ ನೀಡುತ್ತಾರೆ. ಅನೇಕ ಜನರು ನಿಸ್ವಾರ್ಥವಾಗಿ ಸೇವೆ ಸಲ್ಲಿಸುವುದನ್ನು ನೋಡುವುದು ಅದ್ಭುತವಾಗಿದೆ. ಇದರ ಜೊತೆಗೆ, ಮಿನಿ ಸ್ವರ್ಣ ಮಂದಿರ ಎಂದೂ ಕರೆಯಲ್ಪಡುವ ದುರ್ಗಿಯಾನ ಮಂದಿರಕ್ಕೂ ನೀವು ಹೋಗಬಹುದು.

ಹಂಪಿ (ಕರ್ನಾಟಕ)

ಕರ್ನಾಟಕದ ಹಂಪಿಯು ಯುನೆಸ್ಕೋ ವಿಶ್ವ ಪರಂಪರೆಯ ತಾಣವಾಗಿದೆ. ಶಿವನಿಗೆ ಸಮರ್ಪಿತವಾದ ವಿರೂಪಾಕ್ಷ ದೇವಸ್ಥಾನ, ಆದಿಶಂಕರರಿಗೆ ಸಂಬಂಧಿಸಿದ ಮಠ, ವಿಷ್ಣುವಿಗೆ ಸಮರ್ಪಿತವಾದ ಹಂಪಿ ದೇವಸ್ಥಾನ ಸೇರಿದಂತೆ ಅನೇಕ ಪ್ರಾಚೀನ ದೇವಾಲಯಗಳು ಇಲ್ಲಿವೆ. ಪ್ರತಿ ವರ್ಷ ಬಹಳಷ್ಟು ಯಾತ್ರಾರ್ಥಿಗಳು ಇಲ್ಲಿಗೆ ಬರುತ್ತಾರೆ. ಆಧ್ಯಾತ್ಮಿಕ ಪ್ರವಾಸಗಳ ಜೊತೆಗೆ ಪ್ರವಾಸಿಗರು ಕೂಡ ಹೆಚ್ಚಾಗಿ ಭೇಟಿ ನೀಡುವ ಸ್ಥಳವಾಗಿದೆ ಹಂಪಿ.

ವೃಂದಾವನ (ಉತ್ತರ ಪ್ರದೇಶ)

ವೃಂದಾವನವು ಯಮುನಾ ನದಿಯ ದಡದಲ್ಲಿರುವ ಒಂದು ಪವಿತ್ರ ನಗರ. ಭಗವಾನ್ ಕೃಷ್ಣನು ತನ್ನ ಬಾಲ್ಯದ ಬಹುಭಾಗವನ್ನು ಈ ನಗರದಲ್ಲಿ ಕಳೆದನೆಂದು ನಂಬಲಾಗಿದೆ. ಇಲ್ಲಿ ನೀವು ಭಗವಾನ್ ಕೃಷ್ಣನ ಅನೇಕ ದೇವಾಲಯಗಳನ್ನು ನೋಡಬಹುದು. ಬಂಕೆ ಬಿಹಾರಿ ದೇವಸ್ಥಾನ ಮತ್ತು ರಾಧಾ ರಮಣ ದೇವಸ್ಥಾನಕ್ಕೆ ಭೇಟಿ ನೀಡಲೇಬೇಕು. ಭಕ್ತಿಯ ಭಾಗವಾಗಿ ದಿನವಿಡೀ ಭಜನೆಗಳನ್ನು ಹಾಡುವ ಅನೇಕ ಜನರನ್ನು ನೀವು ಇಲ್ಲಿ ನೋಡಬಹುದು. ಅಲ್ಲದೆ, ನದಿ ತೀರದಲ್ಲಿ ನಡೆಸುವ ಆರತಿಯಲ್ಲಿಯೂ ಭಾಗವಹಿಸಬಹುದು.