40 ಗಂಟೆ ಹೋಟೆಲ್‌ ಕೋಣೆಯಲ್ಲೇ ಇದ್ದ ಸಂತೋಷ್ ಶವ, ಪೋಸ್ಟ್‌ಮಾರ್ಟಂಗೆ ಮನವೊಲಿಸಲು ಹರಸಾಹಸ
* ಈಶ್ವರಪ್ಪ ಬಂಧಿಸದೆ ಮರಣೋತ್ತರ ಪರೀಕ್ಷೆಗೆ ಬಿಡಲ್ಲವೆಂದು ಸಂಬಂಧಿಕರ ಪಟ್ಟು
* ಪೋಸ್ಟ್‌ಮಾರ್ಟಂಗೆ ಕುಟುಂಬಸ್ಥರ ಮನವೊಲಿಸಲು ಹರಸಾಹಸ
* 40 ಗಂಟೆ ಹೋಟೆಲ್‌ ಕೋಣೆಯಲ್ಲೇ ಇದ್ದ ಶವ
* ಸಂಬಂಧಿಕರ ಒಪ್ಪಿಗೆ ಬಳಿಕ ಪಂಚನಾಮೆ, ವಿಷದ ಬಾಟಲ್‌ ಜಪ್ತಿ, ಮಣಿಪಾಲದಲ್ಲಿ ಮರಣೋತ್ತರ ಪರೀಕ್ಷೆ, ಬೆಳಗಾವಿ ಕಳೇಬರ ರವಾನೆ
ಉಡುಪಿIಏ.14): ಗ್ರಾಮೀಣಾಭಿವೃದ್ಧಿ ಸಚಿವ ಕೆ.ಎಸ್‌.ಈಶ್ವರಪ್ಪ ಹೆಸರು ಬರೆದಿಟ್ಟು ಇಲ್ಲಿನ ಲಾಡ್ಜ್‌ವೊಂದರಲ್ಲಿ ಸೋಮವಾರ ರಾತ್ರಿ ಆತ್ಮಹತ್ಯೆ ಮಾಡಿಕೊಂಡಿದ್ದ ಬೆಳಗಾವಿ ಗುತ್ತಿಗೆದಾರ ಸಂತೋಷ್ ಪಾಟೀಲ್‌ ಅವರ ಮರಣೋತ್ತರ ಪರೀಕ್ಷೆಯನ್ನು ಬುಧವಾರ ರಾತ್ರಿ ಮಣಿಪಾಲದ ಕಸ್ತೂರ್ಬಾ ಆಸ್ಪತ್ರೆಯಲ್ಲಿ ನೆರವೇರಿಸಲಾಯಿತು. ನಂತರ ರಾತ್ರಿಯೇ ಮೃತದೇಹವನ್ನು ಆ್ಯಂಬುಲೆನ್ಸ್‌ ಮೂಲಕ ಬೆಳಗಾವಿಗೆ ಕೊಂಡೊಯ್ಯಲಾಯಿತು.
ಮರಣೋತ್ತರ ಪರೀಕ್ಷೆಗೆ ಕುಟುಂಬಸ್ಥರನ್ನು ಒಪ್ಪಿಸಲು ಪೊಲೀಸರು ಭಾರೀ ಪ್ರಯಾಸಪಡಬೇಕಾಯಿತು. ಈಶ್ವರಪ್ಪ ಬಂಧನ ಆಗುವವರೆಗೆ ಮರಣೋತ್ತರ ಪರೀಕ್ಷೆಗೆ ಅವಕಾಶ ನೀಡಲ್ಲ ಎಂದು ಸಂಬಂಧಿಕರು ಪಟ್ಟು ಹಿಡಿದು ಕೂತಿದ್ದರು. ಅಧಿಕಾರಿಗಳು ಎಷ್ಟೇ ಪಟ್ಟುಹಿಡಿದರೂ ಸಂಜೆವರೆಗೂ ಹಿಡಿದ ಪಟ್ಟು ಸಡಿಸಿರಲಿಲ್ಲ. ಕೊನೆಗೆ ಸಂಜೆ 5.30ರ ವೇಳೆಗೆ ಅಧಿಕಾರಿಗಳು ಸಂತೋಷ್ ಪಾಟೀಲರ ಮನವೊಲಿಸುವಲ್ಲಿ ಯಶಸ್ವಿಯಾದರು. ಈ ತಿಕ್ಕಾಟದಲ್ಲಿ ಲಾಡ್ಜ್‌ನ ಕೊಠಡಿ ಸಂಖ್ಯೆ207ರಲ್ಲಿ ಸಂತೋಷ್ ಪಾಟೀಲ್‌ ಮೃತದೇಹ ಸುಮಾರು 40 ಗಂಟೆ ಇತ್ತು.
ಮಣಿಪಾಲ ಆಸ್ಪತ್ರೆಯಲ್ಲಿ ಸುಮಾರು 3 ಗಂಟೆ ಮರಣೋತ್ತರ ಪರೀಕ್ಷೆ ನಡೆಸಿದ ವೈದ್ಯರು ನಂತರ ಶವವನ್ನು ಕುಟುಂಬಸ್ಥರಿಗೆ ಹಸ್ತಾಂತರಿಸಿದರು. ಗುರುವಾರ ಪರೀಕ್ಷೆಯ ಮಾಹಿತಿಗಳು ಮತ್ತು ವಿಧಿವಿಜ್ಞಾನ ಪ್ರಯೋಗಾಲಯದ ವರದಿಗಳು ಪೊಲೀಸರ ಕೈಗೆ ಸೇರಲಿವೆ.
ಇದಕ್ಕೂ ಮುನ್ನ, ಮಂಗಳವಾರ ಮಧ್ಯರಾತ್ರಿ ಹೊತ್ತಿಗೆ ಸಂತೋಷ್ ಪಾಟೀಲ್‌ ಸಹೋದರ ಬಸವನಗೋಡ ಪಾಟೀಲ…, ಸಹೋದರ ಸಂಬಂಧಿ ಪ್ರಶಾಂತ್‌ ಪಾಟೀಲ್‌ ಮತ್ತಿತರು ಉಡುಪಿ ನಗರ ಠಾಣೆಗೆ ತೆರಳಿ, ಗ್ರಾಮೀಣಾಭಿವೃದ್ಧಿ ಸಚಿವ ಕೆ.ಎಸ್‌.ಈಶ್ವರಪ್ಪ ಮತ್ತು ಅವರ ಇಬ್ಬರು ಆಪ್ತರ ಮೇಲೆ ದೂರು ಸಲ್ಲಿಸಿದರು.
ವಿಧಿವಿಜ್ಞಾನ ತಜ್ಞರ ಭೇಟಿ: ನಂತರ ಸಂತೋಷ್ ಉಳಿದುಕೊಂಡಿದ್ದ ಲಾಡ್ಜ್‌ನ 207ನೇ ಕೊಠಡಿಯನ್ನು ತನಿಖಾಧಿಕಾರಿ ಮೃತರ ಸಂಬಂಧಿಕರು, ಗೆಳೆಯರ ಸಮ್ಮುಖದಲ್ಲಿ ತೆರೆದು ಪಂಚನಾಮೆ ನಡೆಸಲಾಯಿತು. ಮಂಗಳೂರಿನಿಂದ ರಾಜ್ಯ ಗೃಹ ಇಲಾಖೆಯ ಪ್ರಾದೇಶಿಕ ವಿಧಿವಿಜ್ಞಾನ (ಫೋರೆನ್ಸಿಕ್‌) ಪರಿಣಿತರು ಹಾಗೂ ಮಣಿಪಾಲದ ತಜ್ಞರು ಕೊಠಡಿಯ ಕಸದಬುಟ್ಟಿಯಲ್ಲಿದ್ದ ವಿಷದ ಬಾಟಲು, ಸಂತೋಷ್ ಅವರ ಮೊಬೈಲ್‌ ಇತ್ಯಾದಿ ಸಾಕ್ಷ್ಯಗಳನ್ನು ಸಂಗ್ರಹಿಸಿ, ಮಂಗಳೂರು ಪ್ರಯೋಗಾಲಯಕ್ಕೆ ಸಾಗಿಸಿದರು. ಈ ಎಲ್ಲಾ ಪ್ರಕ್ರಿಯೆಗಳಿಗೆ ಸುಮಾರು 4 ಗಂಟೆ ತಗಲಿತು. ನಂತರ ಸಂತೋಷ್ ಉಡುಪಿಗೆ ಬಂದಿದ್ದ ಹುಂಡೈ ಐ10 ಕಾರಿನ ಪಂಚನಾಮೆಯನ್ನೂ ನಡೆಸಲಾಯಿತು. ನಂತರ ಕುಟುಂಬದವರ ಮನವೊಲಿಸಿ ಶವವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿಕೊಡಲಾಯಿತು.
ಕೇಸರಿ ಶಾಲು ಸುತ್ತಿಕೊಂಡೇ ಆತ್ಮಹತ್ಯೆ!
ಬಿಜೆಪಿ ಮತ್ತು ಹಿಂದೂ ಸಂಘಟನೆಗಳ ಸಕ್ರಿಯ ಕಾರ್ಯಕರ್ತನಾಗಿದ್ದ ಸಂತೋಷ್ ಪಾಟೀಲ್‌ ಗೆಳೆಯರೊಂದಿಗೆ ಪ್ರವಾಸಕ್ಕೆಂದು ಉಡುಪಿಗೆ ಬರುವಾಗ ಕೇಸರಿ ಶಾಲನ್ನು ತಂದಿದ್ದು, ಅದನ್ನು ಕುತ್ತಿಗೆಗೆ ಸುತ್ತಿಕೊಂಡೇ ವಿಷ ಸೇವಿಸಿ, ಮಂಚದ ಮೇಲೆ ಮಲಗಿದ್ದರು. ಸೊಂಟದವರೆಗೆ ಬ್ಲಾಂಕೆಟ್‌ ಹೊದ್ದುಕೊಂಡಿದ್ದರು. ಬಾಯಲ್ಲಿ ನೊರೆ ಹೊರಗೆ ಬಂದಿತ್ತು.
ತಡರಾತ್ರಿ ಉಡುಪಿ ತಲುಪಿದ ಸಂತೋಷ್ ಕುಟುಂಬಸ್ಥರು
ಗುತ್ತಿಗೆದಾರ ಸಂತೋಷ್ ಪಾಟೀಲ್‌ ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿ, ಪಾಟೀಲ್‌ ಕುಟುಂಬಿಕರು ಮಂಗಳವಾರ ತಡರಾತ್ರಿ ಉಡುಪಿಯ ಖಾಸಗಿ ಲಾಡ್ಜ್‌ ತಲುಪಿದರು.ಬೆಂಗಳೂರಿಂದ ಮತ್ತು ಬೆಳಗಾವಿಯಿಂದ ಬಂದಿರುವ ಸಹೋದರರು ಹಾಗೂ ಕುಟುಂಬಿಕರು ನೇರವಾಗಿ ಲಾಡ್ಜ್‌ನ 207ನೇ ಕೊಠಡಿಗೆ ತೆರಳಿದರು. ತಾವು ಬಾರದೆ ತನಿಖೆ ಮುಂದುವರಿಸಬೇಡಿ ಎಂದು ಸಂತೋಷ್ ಕುಟುಂಬಿಕರು ಮನವಿ ಮಾಡಿದ್ದ ಹಿನ್ನೆಲೆಯಲ್ಲಿ ಕಳೆದ 12 ಗಂಟೆಗಳಿಂದ ಸಹೋದರರಿಗೆ ಉಡುಪಿಯ ಪೊಲೀಸರು ಕಾಯುತ್ತಿದ್ದರು. ಮೃತದೇಹವನ್ನು ಕೊಠಡಿಯಲ್ಲೇ ಇರಿಸಲಾಗಿತ್ತು. ಕೊಠಡಿಗೆ ತೆರಳಿದ ಬಳಿಕ ಮೃತದೇಹವನ್ನು ವೀಕ್ಷಿಸಿದ ಬಳಿಕ ಕುಟುಂಬಿಕರು ಉಡುಪಿ ನಗರ ಠಾಣೆ ಪೊಲೀಸರಿಗೆ ದೂರು ನೀಡಿದ್ದಾರೆ. ಬುಧವಾರ ಮುಂಜಾನೆ ಶವದ ಪಂಚನಾಮೆ ಮತ್ತು ಮರಣೋತ್ತರ ಪರೀಕ್ಷೆ ನಡೆಯುವ ಸಾಧ್ಯತೆಯಿದೆ.
