ನವದೆಹಲಿ(ಆ.28): ‘ನಾವು ಹಾಲಿ ಚಾಂಪಿ​ಯನ್ಸ್‌. ನಾವು ಯಾರಿಗೂ ಹೆದ​ರು​ವು​ದಿಲ್ಲ. ನಮ್ಮನ್ನು ನೋಡಿ ಎದು​ರಾ​ಳಿ​ಗಳು ಹೆದ​ರು​ತ್ತಾರೆ’ ಇದು ಬೆಂಗ​ಳೂ​ರು ಬುಲ್ಸ್‌ನ ರೈಡ್‌ ಮಷಿನ್‌ ಪವನ್‌ ಶೆರಾ​ವತ್‌ ಕೆಚ್ಚೆ​ದೆಯ ಮಾತು. ಪ್ರೊ ಕಬಡ್ಡಿ 7ನೇ ಆವೃ​ತ್ತಿ​ಯಲ್ಲಿ ಪವನ್‌, ಬುಲ್ಸ್‌ನ ಒನ್‌ ಮ್ಯಾನ್‌ ಆರ್ಮಿಯಂತಾ​ಗಿ​ದ್ದಾರೆ. ಅವರು ಮಿಂಚಿದರಷ್ಟೇ ಬುಲ್ಸ್‌ಗೆ ಗೆಲುವು ಎನ್ನು​ವಂತಾ​ಗಿದೆ. ತಮ್ಮ ಮೇಲೆ ಎಷ್ಟೇ ಒತ್ತ​ಡ ಬಿದ್ದರೂ ಸರಿ, ತಲೆ ಕೆಡಿ​ಸಿ​ಕೊ​ಳ್ಳು​ವು​ದಿಲ್ಲ ಎಂದಿ​ರುವ ಪವನ್‌, ‘ಎದು​ರಾಳಿ ಅಂಕಣಕ್ಕೆ ನುಗ್ಗಿ, ಅಂಕ ಹೆಕ್ಕಿ ತಂಡವನ್ನು ಗೆಲ್ಲಿ​ಸು​ವುದೇ ನನ್ನ ಗುರಿ’ ಎಂದು ‘ಕ​ನ್ನ​ಡ​ಪ್ರ​ಭ’ದೊಂದಿಗೆ ತಮ್ಮ ಅನು​ಭವ ಹಾಗೂ ಯೋಜನೆಗಳನ್ನು ಹಂಚಿ​ಕೊ​ಳ್ಳುತ್ತಾ ಹೇಳಿ​ದರು.

ಇದನ್ನೂ ಓದಿ: PKL 2019: ಜೈಪುರ ಮಣಿಸಿ ಗೆಲುವಿನ ಹಳಿಗೆ ಮರಳಿದ ಬೆಂಗಳೂರು ಬುಲ್ಸ್

ಸೆಂಚುರಿ ಸ್ಟಾರ್‌ ಪವನ್‌!
6ನೇ ಆವೃ​ತ್ತಿಯಲ್ಲಿ 271 ರೈಡಿಂಗ್‌ ಅಂಕ ಗಳಿಸಿ ಬೆಂಗ​ಳೂರು ಬುಲ್ಸ್‌ ಚಾಂಪಿ​ಯನ್‌ ಆಗು​ವಲ್ಲಿ ಪ್ರಮುಖ ಪಾತ್ರ ವಹಿ​ಸಿದ್ದ ಪವನ್‌, ತಾರಾ ಆಟ​ಗಾರನಾಗಿ ಬದ​ಲಾ​ದರು. ಕಳೆದ ಆವೃ​ತ್ತಿ​ಯಲ್ಲಿ ಆಡು​ವಾಗ ಅವರ ಮೇಲಿದ್ದ ಒತ್ತ​ಡ, ನಿರೀಕ್ಷೆಗೂ ಈ ಆವೃ​ತ್ತಿ​ಯಲ್ಲಿ ಅವರ ಮೇಲಿರುವ ಒತ್ತಡ ಹಾಗೂ ನಿರೀಕ್ಷೆಗೂ ವ್ಯತ್ಯಾಸವಿದೆ. ಈ ಆವೃ​ತ್ತಿಯ ಮೊದಲ ಪಂದ್ಯ​ದಿಂದಲೇ ಪವನ್‌ ಮೇಲೆ ಅಭಿ​ಮಾ​ನಿ​ಗಳು, ಲೀಗ್‌ ಆಯೋ​ಜ​ಕರು, ತಂಡ ಎಲ್ಲ​ರೂ ಭಾರೀ ನಿರೀಕ್ಷೆ ಇರಿ​ಸಿ​ದ್ದಾರೆ. ಪವನ್‌ ಶ್ರೇಷ್ಠ ಆಟ​ಗಾರ ಎನಿ​ಸಿ​ಕೊ​ಳ್ಳಲು ಕಾರಣ, ಅವರು ಎಲ್ಲರ ನಿರೀಕ್ಷೆಗೆ ಮೀರಿದ ಆಟವಾಡು​ತ್ತಿ​ದ್ದಾರೆ. ಏಕಾಂಗಿಯಾಗಿ ತಂಡ​ವನ್ನು ಗೆಲ್ಲಿ​ಸು​ತ್ತಿ​ದ್ದಾರೆ.

ಇದನ್ನೂ ಓದಿ: PKL7: ಬೆಂಗಳೂರು ಬುಲ್ಸ್ ನೆಗೆತಕ್ಕೆ ಅಪ್ಪಚ್ಚಿಯಾದ ತಮಿಳ್ ತಲೈವಾಸ್!

ಪವನ್‌ ಈ ಆವೃ​ತ್ತಿ​ಯಲ್ಲಿ 100 ರೈಡಿಂಗ್‌ ಅಂಕ ಗಳಿ​ಸಿದ ಮೊದಲ ಆಟ​ಗಾರ ಎನ್ನುವ ಹಿರಿಮೆಗೂ ಪಾತ್ರ​ರಾ​ಗಿ​ದ್ದಾರೆ. 11 ಪಂದ್ಯ​ಗ​ಳಿಂದ 128 ರೈಡ್‌ ಅಂಕ ಗಳಿ​ಸಿ​ರುವ ಪವನ್‌ ಅಗ್ರ ಸ್ಥಾನ​ದ​ಲ್ಲಿ​ದ್ದಾರೆ. ಪವನ್‌ ಹೊರ​ತು ಪಡಿಸಿ ಅತಿ​ಹೆಚ್ಚು ರೈಡ್‌ ಅಂಕ ಗಳಿ​ಸಿದ ಅಗ್ರ 10 ಆಟ​ಗಾ​ರರ ಪಟ್ಟಿ​ಯಲ್ಲಿ ಬುಲ್ಸ್‌ನ ಮತ್ತ್ಯಾವ ಆಟ​ಗಾ​ರರೂ ಇಲ್ಲ. ನಾಯಕ ರೋಹಿತ್‌ ಕುಮಾರ್‌ 11 ಪಂದ್ಯ​ಗ​ಳಿಂದ 53 ಅಂಕ ಕಲೆಹಾಕಿ​ದ್ದಾರೆ. ಇದೊಂದೇ ಅಂಕಿ-ಅಂಶ ಸಾಕು, ಬೆಂಗ​ಳೂರು ತಂಡ ಪವನ್‌ ಮೇಲೆ ಎಷ್ಟರ ಮಟ್ಟಿಗೆ ಅವ​ಲಂಬಿತಗೊಂಡಿದೆ ಎನ್ನು​ವು​ದನ್ನು ತಿಳಿ​ಯಲು.

ಇದನ್ನೂ ಓದಿ:  PKL7: ಬೆಂಗಾಲ್ ವಿರುದ್ಧ ಬೆಂಗಳೂರು ಬುಲ್ಸ್‌ಗೆ ರೋಚಕ ಗೆಲುವು!

ಪವನ್‌ ಒನ್‌ ಮ್ಯಾನ್‌ ಆರ್ಮಿ ಯಾಕೆ?
ಬುಲ್ಸ್‌ನ ಪ್ರಮುಖ ರೈಡರ್‌ಗಳಲ್ಲಿ ಒಬ್ಬ​ರಾದ ನಾಯಕ ರೋಹಿತ್‌ ಈ ಬಾರಿ ಸ್ಥಿರ ಪ್ರದರ್ಶನ ಕಾಯ್ದುಕೊಳ್ಳುವಲ್ಲಿ ವಿಫಲವಾಗಿದ್ದಾರೆ. ಇತ್ತೀ​ಚೆಗೆ ದಬಾಂಗ್‌ ಡೆಲ್ಲಿ ವಿರುದ್ಧದ ಪಂದ್ಯ​ದಲ್ಲಿ ಅಂಕ ಖಾತೆಯನ್ನೇ ತೆರೆ​ಯದ ರೋಹಿತ್‌, ಕಳೆದ ಪಂದ್ಯ​ದಲ್ಲಿ ಜೈಪುರ ವಿರುದ್ಧ 13 ಅಂಕ ಗಳಿ​ಸಿ​ದ್ದರು. ಬುಲ್ಸ್‌ ಸದ್ಯ ಆಡಿರುವ 11 ಪಂದ್ಯಗಳಲ್ಲಿ 6ರಲ್ಲಿ ಜಯ ಸಾಧಿಸಿದ್ದು, 5ರಲ್ಲಿ ಸೋತಿದೆ. ಪವನ್‌ ಹಿನ್ನಡೆ ಅನು​ಭ​ವಿ​ಸಿದ ಪಂದ್ಯ​ಗ​ಳಲ್ಲಿ ತಂಡಕ್ಕೂ ಹಿನ್ನಡೆಯಾಗಿದೆ.

ಬುಲ್ಸ್‌ 11 ಪಂದ್ಯ​ಗ​ಳಿಂದ 211 ರೈಡ್‌ ಅಂಕ ಗಳಿ​ಸಿ​ದೆ. ಇದ​ರಲ್ಲಿ 128 ಅಂಕ​ಗ​ಳನ್ನು ಪವನ್‌ ಒಬ್ಬರೇ ಗಳಿ​ಸಿ​ದ್ದಾರೆ. ಎಂದರೇ ಶೇ.50ಕ್ಕಿಂತ ಹೆಚ್ಚು ಅಂಕಗಳನ್ನು ಪವನ್‌ ಒಬ್ಬರೇ ತಂದು​ಕೊ​ಟ್ಟಿ​ದ್ದಾರೆ. ತಂಡ ನಡೆ​ಸಿ​ರುವ ಒಟ್ಟು 451 ರೈಡ್‌ಗಳಲ್ಲಿ ಪವನ್‌ 199 ರೈಡ್‌ಗಳನ್ನು ಮಾಡಿ​ದ್ದಾರೆ. ಈ ಅಂಕಿ-ಅಂಶಗಳು ಅವರೆಷ್ಟರ ಮಟ್ಟಿಗೆ ಶ್ರಮ ವಹಿ​ಸು​ತ್ತಿ​ದ್ದಾರೆ ಎನ್ನು​ವು​ದನ್ನು ತೋರಿ​ಸು​ತ್ತದೆ.

ಪವನ್‌ ಮೇಲೆ ಒತ್ತಡ ಬೀಳ​ಲು ಕಾರ​ಣ​?
ಕಳೆದ ಆವೃ​ತ್ತಿ​ಯಲ್ಲಿ ಪವನ್‌ ಜತೆ ರೋಹಿತ್‌ ಸಹ ಉತ್ತಮ ಆಟವಾಡಿದ್ದರು. ಇವ​ರಿ​ಬ್ಬ​ರ​ಲ್ಲದೇ 3ನೇ ರೈಡರ್‌ ಆಗಿ ಕಾಶಿ​ಲಿಂಗ್‌ ಅಡಕೆ ಇದ್ದರು. ಪವನ್‌ ಹಾಗೂ ರೋಹಿತ್‌ ಇಬ್ಬರೂ ಅಂಕ​ಣ​ದಲ್ಲಿ ಇಲ್ಲ​ದಿ​ದ್ದಾಗ ಕಾಶಿ ಅಂಕ ಗಳಿಸಿ, ಇಬ್ಬ​ರನ್ನು ಅಂಕ​ಣಕ್ಕೆ ಕರೆ ತರು​ತ್ತಿ​ದ್ದರು. ಆದರೆ ಈ ಬಾರಿ ಹಾಗಾ​ಗು​ತ್ತಿಲ್ಲ. ರೋಹಿತ್‌ ಸ್ಥಿರ​ತೆ ಕಾಯ್ದು​ಕೊ​ಳ್ಳು​ತ್ತಿಲ್ಲ. 3ನೇ ರೈಡರ್‌ ಸಮಸ್ಯೆ ಇದೆ. ಪವನ್‌ ಎಷ್ಟುಹೊತ್ತು ಅಂಕ​ಣ​ದಲ್ಲಿ ಇರು​ತ್ತಾರೆ, ಎಷ್ಟುಅಂಕ ಗಳಿ​ಸು​ತ್ತಾರೆ ಎನ್ನು​ವು​ದರ ಮೇಲೆ ಪಂದ್ಯದ ಫಲಿ​ತಾಂಶ ನಿರ್ಧಾ​ರ​ವಾ​ಗ​ಲಿದೆ.

‘ಒಬ್ಬನ ಮೇಲೆಯೇ ಹೆಚ್ಚು ಜವಾಬ್ದಾರಿ ಬಿದ್ದಿರುವ ಕಾರಣ, ಒಮ್ಮೊಮ್ಮೆ ಕೊಂಚ ಆತಂಕವಾಗುತ್ತದೆ. ಆದರೆ, ರೋಹಿತ್‌ ಲಯ ಕಂಡು​ಕೊ​ಳ್ಳು​ತ್ತಿ​ರು​ವುದು ತಂಡದ ಪಾಲಿ​ಗೆ ಅತ್ಯು​ತ್ತಮ ಸುದ್ದಿ. ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಗಳಿಸುವವರಿಗೆ ಹೆಚ್ಚು ಲಾಭವಿರುವ ಕಾರಣ, ಸದ್ಯ ನಮ್ಮ ಕಣ್ಣು ಅದರ ಮೇಲಿದೆ. 2 ಆವೃತ್ತಿಗಳ ಬಳಿಕ ಬೆಂಗ​ಳೂ​ರಲ್ಲಿ ತಂಡ ಆಡ​ಲಿದೆ. ನಮ್ಮ ಮೇಲೆ ಸ್ವಲ್ಪ ಒತ್ತ​ಡ​ವಿದೆ. ಆದರೆ ಅಭಿ​ಮಾ​ನಿ​ಗಳ ನಿರೀಕ್ಷೆ ಉಳಿ​ಸಿ​ಕೊ​ಳ್ಳು​ತ್ತೇವೆ’ಎಂಜು ಬುಲ್ಸ್ ಸ್ಟಾರ್ ಪ್ಲೇಯರ್ ಪವನ್ ಶೆರಾವತ್ ಹೇಳಿದ್ದಾರೆ 

ವರದಿ: ವಿನಯ್‌ ಕುಮಾರ್‌ ಡಿ.ಬಿ.