ಬೆಂಗಳೂರು ಬುಲ್ಸ್ ತಂಡ ಗೆಲುವಿನೊಂದಿಗೆ ತವರಿನ ಅಭಿಯಾನ ಮುಗಿಸಿದೆ. ತೀವ್ರ ಜಿದ್ದಾಜಿದ್ದಿನಿಂದ ಕೂಡಿದ್ದ ಪಂದ್ಯದಲ್ಲಿ ತೆಲುಗು ಟೈಟಾನ್ಸ್ ತಂಡವನ್ನು ರೋಚಕವಾಗಿ ಮಣಿಸಿದ ಬುಲ್ಸ್ ಅಂಕಪಟ್ಟಿಯಲ್ಲಿ 2ನೇ ಸ್ಥಾನವನ್ನು ಮತ್ತಷ್ಟು ಭದ್ರಪಡಿಸಿಕೊಂಡಿದೆ. ಈ ಕುರಿತಾದ ವರದಿ ಇಲ್ಲಿದೆ ನೋಡಿ..

ಬೆಂಗ​ಳೂ​ರು[ಸೆ.07]: ಪ್ರೊ ಕಬ​ಡ್ಡಿಯ ಇಬ್ಬರು ತಾರಾ ರೈಡರ್‌ಗಳಾದ ಪವನ್‌ ಶೆರಾ​ವತ್‌ ಹಾಗೂ ಸಿದ್ಧಾರ್ಥ್ ದೇಸಾಯಿ ನಡು​ವಿನ ಜಿದ್ದಾ​ಜಿ​ದ್ದಿನ ಹೋರಾಟ, ಶುಕ್ರ​ವಾರ ಬೆಂಗ​ಳೂ​ರಿನ ಅಭಿ​ಮಾ​ನಿ​ಗ​ಳನ್ನು ತುದಿ​ಗಾ​ಲಲ್ಲಿ ನಿಲ್ಲಿ​ಸಿತ್ತು. ಅಂತಿಮ ಕ್ಷಣದಲ್ಲಿ ಅಂಕ ಗಳಿ​ಸಿ ಪವನ್‌, ತೆಲುಗು ಟೈಟಾನ್ಸ್‌ ವಿರುದ್ಧ ಬೆಂಗ​ಳೂರು ಬುಲ್ಸ್‌ಗೆ 40-39ರ ರೋಚ​ಕ ಗೆಲುವು ತಂದು​ಕೊ​ಟ್ಟರು.

ಸಂದರ್ಶನ: ಪ್ರೊ ಕಬಡ್ಡಿ ಕನಸು ಕಾಣುವ ಯುವಕರಿಗೆ ಪವನ್ ಶೆರಾವತ್ ಸಲಹೆ...

ಈ ಜಯ​ದೊಂದಿಗೆ ಬುಲ್ಸ್‌ ತವ​ರಿನ ಚರ​ಣಕ್ಕೆ ವಿದಾಯ ಹೇಳಿತು. 2 ವರ್ಷಗಳ ಬಳಿಕ ಬೆಂಗ​ಳೂ​ರಲ್ಲಿ ಪಂದ್ಯ​ಗ​ಳ​ನ್ನಾ​ಡಿದ ಬುಲ್ಸ್‌, ಪ್ರೇಕ್ಷ​ಕ​ರಿಗೆ ಭರ​ಪೂ​ರ ಮನ​ರಂಜನೆ ನೀಡಿತು. ಬುಲ್ಸ್‌ಗಿದು ಈ ಆವೃ​ತ್ತಿ​ಯಲ್ಲಿ 9ನೇ ಗೆಲು​ವಾ​ಗಿ​ದ್ದು, 48 ಅಂಕ​ಗ​ಳೊಂದಿಗೆ ಅಂಕ​ಪ​ಟ್ಟಿ​ಯಲ್ಲಿ 2ನೇ ಸ್ಥಾನ ಕಾಯ್ದು​ಕೊಂಡಿದೆ. 15 ಪಂದ್ಯ​ಗ​ಳನ್ನು ಆಡಿ​ರುವ ಬುಲ್ಸ್‌ಗೆ ರೌಂಡ್‌ ರಾಬಿನ್‌ ಹಂತ​ದಲ್ಲಿ ಇನ್ನು 7 ಪಂದ್ಯ ಬಾಕಿ ಇದ್ದು, ಪ್ಲೇ-ಆಫ್‌ಗೇರುವ ನೆಚ್ಚಿನ ತಂಡಗಳಲ್ಲಿ ಒಂದೆ​ನಿ​ಸಿದೆ.

ಮೊದ​ಲಾರ್ಧದಲ್ಲಿ ಎರಡೂ ತಂಡ​ಗಳು ಹೆಚ್ಚೇನೂ ಅಂಕ ಗಳಿ​ಸ​ಲಿಲ್ಲ. 20 ನಿಮಿಷಗಳ ಮುಕ್ತಾ​ಯಕ್ಕೆ ಬುಲ್ಸ್‌ 15-12ರ ಮುನ್ನಡೆ ಪಡೆ​ಯಿತು. ದ್ವಿತೀ​ಯಾರ್ಧ ಭಾರೀ ರೋಚ​ಕತೆಯಿಂದ ಕೂಡಿತ್ತು. 22ನೇ ನಿಮಿಷದಲ್ಲಿ ಟೈಟಾನ್ಸ್‌ ಆಲೌಟ್‌ ಮಾಡಿದ ಬುಲ್ಸ್‌ 19-12ರ ಮುನ್ನಡೆ ಪಡೆ​ಯಿತು. 27ನೇ ನಿಮಿಷದಲ್ಲಿ ಸೂಪರ್‌ ರೈಡ್‌ ಮಾಡಿದ ಪವನ್‌ ಅಂತ​ರ​ವನ್ನು 24-18ಕ್ಕೇರಿ​ಸಿ​ದರು. 33ನೇ ನಿಮಿ​ಷದಲ್ಲಿ ಟೈಟಾನ್ಸ್‌ 2ನೇ ಬಾರಿಗೆ ಆಲೌಟ್‌ ಆಯಿತು. ಬುಲ್ಸ್‌ ಮುನ್ನಡೆ 32-23ಕ್ಕೇರಿತು.

ಪ್ರೊ ಕಬ​ಡ್ಡಿಗೆ ಕಂಠೀ​ರವ ಕ್ರೀಡಾಂಗ​ಣ ಸಿಕ್ಕಿ​ದ್ದೇಗೆ?

ಸಿದ್ಧಾರ್ಥ್ 6 ಅಂಕ​ಗಳ ರೈಡ್‌!

37ನೇ ನಿಮಿಷದಲ್ಲಿ ಸಿದ್ಧಾರ್ಥ್ ಒಂದೇ ರೈಡ್‌ನಲ್ಲಿ ತಂಡಕ್ಕೆ ಬರೋ​ಬ್ಬರಿ 6 ಅಂಕ ತಂದು​ಕೊ​ಟ್ಟರು. ಸಿದ್ಧಾರ್ಥ್ ನಾಲ್ವ​ರನ್ನು ಔಟ್‌ ಮಾಡಿ​ದರೆ, ಬುಲ್ಸ್‌ ಆಲೌಟ್‌ ಆಗಿ​ದ್ದಕ್ಕೆ ಟೈಟಾನ್ಸ್‌ಗೆ 2 ಅಂಕ ದೊರೆ​ಯಿತು. 39ನೇ ನಿಮಿಷದಲ್ಲಿ ಮತ್ತೊಂದು ಸೂಪರ್‌ ರೈಡ್‌ ಮಾಡಿದ ಸಿದ್ಧಾರ್ಥ್, ಟೈಟಾನ್ಸ್‌ 36-36ರಲ್ಲಿ ಸಮ​ಬಲ ಸಾಧಿ​ಸ​ಲು ಕಾರ​ಣ​ರಾ​ದರು.

ಹೋರಾಟ ಬಿಡದ ಪವನ್‌

39ನೇ ನಿಮಿಷದಲ್ಲಿ ನಡೆ​ಸಿದ ರೈಡ್‌ನಲ್ಲಿ 2 ಅಂಕ ಗಳಿ​ಸಿದ ಪವನ್‌, 40ನೇ ನಿಮಿಷದಲ್ಲಿ ನಡೆ​ಸಿದ ರೈಡ್‌ನಲ್ಲೂ 2 ಅಂಕ ಹೆಕ್ಕಿ​ದರು. ಹೀಗಾಗಿ ಗೆಲುವು ಬುಲ್ಸ್‌ ಕೈತ​ಪ್ಪ​ಲಿಲ್ಲ. ಪವನ್‌ 23 ರೈಡ್‌ಗಳಿಂದ 22 ಅಂಕ ಗಳಿ​ಸಿ​ದರೆ, ಸಿದ್ಧಾರ್ಥ್ 22 ರೈಡ್‌ಗಳಲ್ಲಿ 22 ಅಂಕ ಪಡೆ​ದರು.

ಟರ್ನಿಂಗ್‌ ಪಾಯಿಂಟ್‌

40ನೇ ನಿಮಿಷದಲ್ಲಿ ಪವನ್‌ ಒಂದೇ ರೈಡ್‌ನಲ್ಲಿ 2 ಅಂಕ ಪಡೆ​ದರು. ಆ ರೈಡ್‌ನಲ್ಲಿ ಪವನ್‌ ಔಟಾ​ಗಿ​ದ್ದರೆ, ಪಂದ್ಯ ಟೈಟಾನ್ಸ್‌ ಪಾಲಾ​ಗು​ತ್ತಿತ್ತು.

ಶ್ರೇಷ್ಠ ರೈಡರ್‌: ಪವನ್‌, ಬುಲ್ಸ್‌, 22 ಅಂಕ

ಶ್ರೇಷ್ಠ ಡಿಫೆಂಡರ್‌: ಅಬೋ​ಜರ್‌, ಟೈಟಾನ್ಸ್‌, 04 ಅಂಕ

ಪಾಟ್ನಾ ಪೈರೇಟ್ಸ್‌ಗೆ 10ನೇ ಸೋಲು

3 ಬಾರಿ ಚಾಂಪಿ​ಯನ್‌ ಪಾಟ್ನಾ ಪೈರೇಟ್ಸ್‌ ಸೋಲಿನ ಗೋಳು ಮುಂದು​ವ​ರಿ​ದಿದೆ. ಶುಕ್ರ​ವಾರ ನಡೆದ ಮೊದಲ ಪಂದ್ಯ​ದಲ್ಲಿ ಪಾಟ್ನಾ, ಯು.ಪಿ.​ಯೋಧಾ ವಿರುದ್ಧ 29-41ರಲ್ಲಿ ಸೋಲುಂಡಿತು. 
ಪ್ರದೀಪ್‌ 14 ಅಂಕ ಗಳಿ​ಸಿ​ದರೂ ತಂಡ ಗೆಲ್ಲ​ಲಿಲ್ಲ. ಪಾಟ್ನಾಗಿದು 10ನೇ ಸೋಲಾ​ಗಿದ್ದು, ತಂಡ ಪ್ಲೇ-ಆಫ್‌ ರೇಸ್‌ನಿಂದ ಬಹು​ತೇಕ ಹೊರ​ಬಿ​ದ್ದಿದೆ.