ನಿವೃತ್ತಿ ಸುದ್ದಿ ಬೆನ್ನಲ್ಲೇ ಧೋನಿ ನಂ.7 ಜರ್ಸಿ ಹರಾಜು!
ಎಂ ಎಸ್ ಧೋನಿ ಜರ್ಸಿ ಇದೇ ಆಗಸ್ಟ್ 9 ರಂದು ಹರಾಜಾಗಲಿದೆ. ಹರಾಜಿನ ಮೂಲಕ ಬರೋ ಹಣವನ್ನ ಕ್ಯಾನ್ಸರ್ ಪೀಡಿತರ ಚಿಕಿತ್ಸೆಗೆ ಬಳಸಲು ನಿರ್ಧರಿಸಲಾಗಿದೆ. ಧೋನಿ ನಿವೃತ್ತಿ ಮಾತುಗಳು ಕೇಳಿ ಬಂದ ಬೆನ್ನಲ್ಲೇ, ಜರ್ಸಿ ಹರಾಜಿಗೆ ಮುಂದಾಗಿರೋದು ಹಲವು ಅನುಮಾನಗಳಿಗೆ ಎಡೆಮಾಡಿದೆ. ಹಾಗಾದರೆ ಧೋನಿ ಜರ್ಸಿ ಹರಾಜಿಗೂ -ನಿವೃತ್ತಿ ಸುದ್ದಿಗೆ ಇದೆಯಾ ಸಂಬಂಧ? ಇಲ್ಲಿದೆ ವಿವರ.
ಅಮೇರಿಕಾ(ಜು.17): ಎಂ ಎಸ್ ಧೋನಿ ಕ್ರಿಕೆಟ್‌ಗೆ ನಿವೃತ್ತಿ ಹೇಳಲಿದ್ದಾರೆ ಅನ್ನೋ ಮಾತುಗಳು ಕೇಳಿಬಂದ ಬೆನ್ನಲ್ಲೇ, ಇದೀಗ ಧೋನಿ ಜರ್ಸಿ ಹರಾಜು ನಡೆಯಲಿದೆ. ಎಂ ಎಸ್ ಧೋನಿ ನಂಬರ್ 7 ಜರ್ಸಿ ಇದೇ ಅಗಸ್ಟ್ 9ರಂದು ಹರಾಜಾಗಲಿದೆ.
ಇಂಗ್ಲೆಂಡ್ ವಿರುದ್ಧದ ಏಕದಿನ ಪಂದ್ಯದಲ್ಲಿ ಎಂ ಎಸ್ ಧೋನಿ ಬ್ಯಾಟಿಂಗ್‌ಗೆ ಟೀಕೆ ವ್ಯಕ್ತವಾಗಿದೆ. ಧೋನಿ ಫಾರ್ಮ್ ಕಳೆದುಕೊಂಡಿದ್ದಾರೆ ಅನ್ನೋ ಮಾತುಗಳು ಬೆನ್ನಲ್ಲೇ, ಕ್ರಿಕೆಟ್‌ಗೆ ನಿವೃತ್ತಿಯಾಗಲಿದ್ದಾರೆ ಅನ್ನೋ ಸುದ್ದಿಗಳು ಹರಡಿದೆ. ಆದರೆ ಬಿಸಿಸಿಐ ಅಥವಾ ಧೋನಿ ಈ ಕುರಿತು ಯಾವುದೇ ಸ್ಪಷ್ಠನೆ ನೀಡಿಲ್ಲ. ಆದರೆ ಧೋನಿ ಜರ್ಸಿ ಹರಾಜು ಮಾತ್ರ ಸತ್ಯ.
ಇದನ್ನು ಓದಿ: ಕ್ರಿಕೆಟ್‌ನಿಂದ ನಿವೃತ್ತಿಗೆ ಸಜ್ಜಾದ್ರಾ ಎಂ ಎಸ್ ಧೋನಿ ?
ಎಂ ಎಸ್ ಧೋನಿ ಇತ್ತೀಚೆಗೆ ಸ್ನಿಕರ್ ಚಾಕಲೇಟ್ ಜಾಹೀರಾತಿನಲ್ಲಿ ಕಾಣಿಸಿಕೊಂಡಿದ್ದರು. ಈ ಜಾಹಿರಾತಿನಲ್ಲಿ ಧೋನಿ ತಮ್ಮ ನಂಬರ್ 7 ಜರ್ಸಿ ಹಾಗೂ ಸೈನಿಕನ ಧಿರಿಸಿನಲ್ಲಿ ಕಾಣಿಸಿಕೊಂಡಿದ್ದರು. ಇದೀಗ ಈ ಜಾಹೀರಾತಿನಲ್ಲಿ ಧೋನಿ ಬಳಸಿದ ಜರ್ಸಿ ಹಾಗೂ ಸೈನಿಕನ ಉಡುಪನ್ನ ಹರಾಜು ಹಾಕಲು ನಿರ್ಧರಿಸಲಾಗಿದೆ. ಸೈನಿಕರ ಉಡುಪಿನಲ್ಲಿ ಧೋನಿ ಹಸ್ತಾಕ್ಷರ ಇರಲಿದೆ.
ಇದನ್ನು ಓದಿ: ಅಭಿಮಾನಿಗೆ ಎಂ ಎಸ್ ಧೋನಿ ಕೀಪಿಂಗ್ ಗ್ಲೌಸ್ ಗಿಫ್ಟ್ ನೀಡಿದ್ದೇಕೆ?
ಈ ಹರಾಜಿನಿಂದ ಬರೋ ಹಣ ಕ್ಯಾನ್ಸರ್ ಪೀಡಿತರ ಚಿಕಿತ್ಸೆಗೆ ಬಳಲಾಗುವುದು. ಹರಾಜಿನಿಂದ ಬರೋ ಹಣ ಅಮೇರಿಕಾದ ಲೆಕುಮಿಯಾ ಲೆಂಫೋಮಾ ಫೌಂಡೇಶನ್ ಸೇರಲಿದೆ. ಈ ಮೂಲಕ ಭಾರತದಲ್ಲಿ ಕ್ಯಾನ್ಸರ್ ಪೀಡಿತರ ಚಿಕಿತ್ಸೆಗೆ ಬಳಸಲು ನಿರ್ದರಿಸಲಾಗಿದೆ. 30 ಸಾವಿರ ರೂಪಾಯಿ ಕಡಿಮೆ ಆದಾಯವಿರೋ ಕುಟುಂಬದ ಕ್ಯಾನ್ಸರ್ ಪೀಡಿತರಿಗೆ ಈ ಹಣ ಬಳಸಲು ನಿರ್ಧರಿಸಲಾಗಿದೆ.
ಸಾಲ್ಟ್ ಸ್ಕೌಟ್ ಹರಾಜಿನ ಜವಾಬ್ದಾರಿ ಹೊತ್ತಿದೆ. ಈಗಾಗಲೇ ಆನ್ ಲೈನ್ ಮೂಲಕ ಬಿಡ್ಡಿಂಗ್ ಕರೆಯಲಾಗಿದೆ. ಆಸಕ್ತ ಅಭಿಮಾನಿಗಳು ಈಗಲೇ ಅರ್ಜಿ ಹಾಕಿ ಹರಾಜಿನಲ್ಲಿ ಪಾಲ್ಗೊಳ್ಳಬಹುದು.
