ಸಿಂಗಪುರ(ಸೆ.20): ಈ ಬಾರಿಯ ಎಎಫ್‌ಸಿ ಪುಟ್ಬಾಲ್‌ ಚಾಂಪಿಯನ್‌ಶಿಪ್‌ನ ಸೆಮಿಫೈನಲ್‌ ಹಂತಕ್ಕೆ ಸಾಗಲು ಇನ್ನೊಂದು ಗೆಲುವನ್ನು ಪಡೆಯಬೇಕಿರುವ ಬೆಂಗಳೂರು ಎಫ್‌ಸಿ ತಂಡ, ಸೆ. 21ರಂದು ನಡೆಯಲಿರುವ ತನ್ನ ಕ್ವಾರ್ಟರ್‌ ಫೈನಲ್‌ ಹಂತದ ದ್ವಿತೀಯ ಲೆಗ್‌ನ ಪಂದ್ಯದಲ್ಲಿ ಟಂಪೈನ್ಸ್‌ ರೋವರ್ಸ್ ತಂಡವನ್ನು ಎದುರಿಸಲಿದೆ.
ಕಳೆದ ವಾರ ಬೆಂಗಳೂರಿನ ಶ್ರೀ ಕಂಠೀರವ ಕ್ರೀಡಾಂಗಣದಲ್ಲಿ ನಡೆದಿದ್ದ ಕ್ವಾರ್ಟರ್‌ ಫೈನಲ್‌ ಪ್ರಥಮ ಲೆಗ್‌ನ ಪಂದ್ಯದಲ್ಲಿ ಬೆಂಗಳೂರು ಪಡೆ, 1-0 ಗೋಲಿನ ಅಂತರದಲ್ಲಿ ಸಿಂಗಪುರದ ದೈತ್ಯ ತಂಡವನ್ನು ಮಣಿಸಿತ್ತು. ಇದೀಗ, ಎದುರಾಳಿಗಳ ತವರಲ್ಲಿ ತನ್ನ ಕಸುವು ತೋರಲು ಆಗಮಿಸಿರುವ ಸುನಿಲ್‌ ಛೆಟ್ರಿ ಪಡೆ, ಮತ್ತೊಂದು ಜಯ ಪಡೆದು ಸೆಮಿಫೈನಲ್‌ ಹಂತಕ್ಕೆ ಕಾಲಿಡುವ ಸನ್ನಾಹದಲ್ಲಿದೆ.
ಆದರೆ, ಅತ್ತ ತವರಿನ ಪ್ರೇಕ್ಷಕರೆದುರು ಪ್ರವಾಸಿಗರನ್ನು ಹಣಿಯಲು ಸಿದ್ಧವಾಗಿರುವ ರೋವರ್ಸ್ ತಂಡ, ಸೆಮಿಫೈನಲ್‌ಗೆ ಕಾಲಿಡುವ ಮೂಲಕ 2004ರಿಂದೀಚೆಗೆ ಎಎಫ್‌ಸಿ ಫುಟ್ಬಾಲ್‌ ಚಾಂಪಿಯನ್‌ಶಿಪ್‌ ಉಪಾಂತ್ಯ ಸುತ್ತಿಗೆ ಕಾಲಿಟ್ಟಮೊದಲ ಫುಟ್ಬಾಲ್‌ ಕ್ಲಬ್‌ ಎಂಬ ಖ್ಯಾತಿಗೆ ಪಾತ್ರವಾಗಲು ಯೋಜಿಸಿದೆ. ಅಲ್ಲದೆ, ತವರು ಅಂಗಣದ ಲಾಭವನ್ನು ಪಡೆಯಲೂ ಅದು ಸಜ್ಜಾಗಿದೆ. ಇದು ಬೆಂಗಳೂರು ಎಫ್‌ಸಿಗೆ ಕೊಂಚ ಸವಾಲೆನಿಸಬಹುದು.
‘‘ಬೆಂಗಳೂರು ಎಫ್‌ಸಿ ಮಾತ್ರವಲ್ಲ, ನಮಗೂ ಒತ್ತಡವಿದೆ. ಮೊದಲ ಕ್ವಾರ್ಟರ್‌ ಫೈನಲ್‌ ಹಂತದಲ್ಲಿ ಬೆಂಗಳೂರು ಪಡೆಯ ಆಟವನ್ನು ನೋಡಿರುವ ನಮಗೆ ದ್ವಿತೀಯ ಕ್ವಾರ್ಟರ್‌ ಫೈನಲ್‌ ಪಂದ್ಯವು ಅಷ್ಟುಸುಲಭದ್ದಲ್ಲ ಎಂಬುದು ಮನದಟ್ಟಾಗಿದೆ. ಆದರೂ, ಗೆಲುವಿಗಾಗಿ ನಾವು ಪ್ರಯತ್ನ ಮಾಡುತ್ತೇವೆ’’ ಎಂದು ರೋವರ್ಸ್ ಕೋಚ್‌ ಅಕ್ಬರ್‌ ನವಾಜ್‌ ಹೇಳಿದ್ದಾರೆ.
ಇನ್ನು, ಬೆಂಗಳೂರು ಎಫ್‌ಸಿ ತಂಡದ ಕೋಚ್‌ ಆಲ್ಬರ್ಟ್‌ ರೋಕಾ, ‘‘ಈವರೆಗಿನ ಪಂದ್ಯಗಳಲ್ಲಿ ಅಳವಡಿಸಿದ್ದ ರಣತಂತ್ರಗಳಿಗಿಂತ ವಿಭಿನ್ನವಾದ ರಣತಂತ್ರದೊಂದಿಗೆ ಈ ಪಂದ್ಯದಲ್ಲಿ ಕಣಕ್ಕಿಳಿಯಬೇಕಿದೆ. ನಮಗಿಲ್ಲಿ ಗೆಲುವು ಅನಿವಾರ್ಯವಾಗಿದ್ದು ಅದನ್ನು ಪಡೆಯಲು ಪ್ರಯತ್ನಿಸುತ್ತೇವೆ’’ ಎಂದರು.
