ಕೆಂಪು ಗ್ರಹದಲ್ಲಿ ನಾಗರೀಕತೆ ಇತ್ತು ಅನ್ನೋದಕ್ಕೆ ಸಿಕ್ತಾ ಸಾಕ್ಷ್ಯ? ಮಂಗಳ ಗ್ರಹದಲ್ಲಿ ತೆರೆದ ಪುಸ್ತಕದ ರೀತಿಯ ಶಿಲೆ ಪತ್ತೆ!
ವಿಜ್ಞಾನಿಗಳು ಮಂಗಳ ಗ್ರಹದಲ್ಲಿ ಅಂದಾಜು ಒಂದು ಇಂಚು ಉದ್ದದ ಬಂಡೆಯ ಅಸಾಮಾನ್ಯ ಆಕಾರದ ಬಗ್ಗೆ ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ಇದು ನಿರ್ದಿಷ್ಟವಾದ ಸವೆತದಿಂದ ರಚಿಸಲ್ಪಟ್ಟಿದ್ದು ಎನ್ನಲಾಗಿದ್ದು, ತೆರೆದ ಪುಸ್ತಕದ ರೀತಿಯಲ್ಲಿದೆ.
ನವದೆಹಲಿ (ಮೇ.17): ನಾಸಾದ ಕ್ಯೂರಿಯಾಸಿಟಿ ರೋವರ್ "ಪುಸ್ತಕದ ತೆರೆದ ಪುಟ" ಗಳಂತೆ ಕಾಣುವ ಶಿಲೆಯ ಚಿತ್ರವನ್ನು ಸೆರೆಹಿಡಿದಿದೆ. 2023ರ ಏಪ್ರಿಲ್‌ 5 ರಂದು ಮಾರ್ಸ್‌ನಲ್ಲಿ ತನ್ನ 3800ನೇ ದಿನ ಅಥವಾ ಸೋಲ್‌ (SOL) ನಲ್ಲಿ ಈ ಚಿತ್ರವನ್ನು ರೋವರ್ ತೆಗೆದುಕೊಂಡಿದೆ ಎಂದು ನಾಸಾದ ಜೆಟ್ ಪ್ರೊಪಲ್ಷನ್ ಲ್ಯಾಬೊರೇಟರಿ (ಜೆಪಿಎಲ್) ತನ್ನ ವೆಬ್‌ಸೈಟ್‌ನಲ್ಲಿ ತಿಳಿಸಿದೆ. "ಟೆರ್ರಾ ಫರ್ಮ್" ಎಂಬ ಅಡ್ಡ ಹೆಸರನ್ನು ಈ ಬಂಡೆಗೆ ಇಡಲಾಗಿದೆ. ಕ್ಯೂರಿಯಾಸಿಟಿಯ ರೊಬೊಟಿಕ್ ತೋಳಿನ ತುದಿಯಲ್ಲಿರುವ ಮಾರ್ಸ್ ಹ್ಯಾಂಡ್ ಲೆನ್ಸ್ ಇಮೇಜರ್ (MAHLI) ಬಳಸಿ ಈ ಶಿಲೆಯ ಚಿತ್ರವನ್ನು ಸೆರೆಹಿಡಿಯಲಾಗಿದೆ. ಸ್ಯಾನ್ ಡಿಯಾಗೋದಲ್ಲಿನ ಮಾಲಿನ್ ಸ್ಪೇಸ್ ಸೈನ್ಸ್ ಸಿಸ್ಟಮ್ಸ್ MAHLI ಅನ್ನು ನಿರ್ಮಾಣ ಮಾಡಿದೆ. ಜೆಪಿಎಲ್ ಪ್ರಕಾರ, ಟೆರ್ರಾ ಫರ್ಮ್ ಸುಮಾರು 2.5 ಸೆಂಟಿಮೀಟರ್‌ಗಳಷ್ಟು ಅಗಲವಾಗಿ ಇದೆ ಎಂದು ಹೇಳಲಾಗಿದೆ. ರೆಡ್ ಪ್ಲಾನೆಟ್ ಅಸಾಮಾನ್ಯ ಆಕಾರಗಳೊಂದಿಗೆ ಹಲವಾರು ಬಂಡೆಗಳನ್ನು ಹೊಂದಿದೆ. ಪ್ರಾಚೀನ ಕಾಲದಲ್ಲಿ ಬಂಡೆಯ ಬಿರುಕುಗಳ ಮೂಲಕ ನೀರು ಸೋರಿಕೆಯ ಪರಿಣಾಮವಾಗಿ ಇವು ರೂಪುಗೊಂಡಿವೆ ಎನ್ನಲಾಗಿದೆ. ಈ ಬಿರುಕುಗಳ ಮೂಲಕ ನೀರು ಸೋರಿಕೆಯಾಗಿ, ಅದರೊಂದಿಗೆ ಗಟ್ಟಿಯಾದ ಖನಿಜಗಳನ್ನು ತಂದಿತು, ಅದು ಬಂಡೆಗಳ ಮೇಲೆ ಸಂಗ್ರಹವಾಯಿತು ಎನ್ನಲಾಗಿದೆ. ಅಯಾನುಗಳ ಕಾಲ ಬಂಡೆಗಳ ಮೇಲೆ ಮರಳನ್ನು ಬೀಸುವ ಗಾಳಿಯ ಪರಿಣಾಮವಾಗಿ ಮೃದುವಾದ ಬಂಡೆಯು ಸವೆದುಹೋಗಿದೆ. ಬಂಡೆಯಿಂದ ಉಳಿದಿರುವ ಏಕೈಕ ವಸ್ತುಗಳು ಗಟ್ಟಿಯಾದ ಭಾಗಗಳಾಗಿವೆ.
ಕ್ಯೂರಿಯಾಸಿಟಿಯ ಹಿಂದಿನ ಸಂಶೋಧನೆಗಳು: 2011ರ ನವೆಂಬರ್ 26 ರಂದು ಕ್ಯೂರಿಯಾಸಿಟಿಯನ್ನು ಮಂಗಳ ಗ್ರಹಕ್ಕೆ ಕಳುಹಿಸಿಕೊಡಲಾಗಿತ್ತು. ಕ್ಯೂರಿಯಾಸಿಟಿಯು ನಾಸಾದ ಮಂಗಳ ವಿಜ್ಞಾನ ಪ್ರಯೋಗಾಲಯದ ಕಾರ್ಯಾಚರಣೆಯ ಒಂದು ಭಾಗವಾಗಿದೆ ಮತ್ತು ಇದುವರೆಗೆ ರೆಡ್ ಪ್ಲಾನೆಟ್‌ಗೆ ಕಳುಹಿಸಲಾದ ಅತಿದೊಡ್ಡ ಮತ್ತು ಅತ್ಯಂತ ಸಮರ್ಥ ರೋವರ್ ಆಗಿದೆ. ಕ್ಯೂರಿಯಾಸಿಟಿಯು 2012ರ ಆಗಸ್ಟ್ 6 ರಂದು ಭಾರತೀಯ ಕಾಲಮಾನ ಬೆಳಗ್ಗೆ 11 ಗಂಟೆ 2 ನಿಮಿಷಕ್ಕೆ ಮಂಗಳನ ಮೇಲೆ ಇಳಿದಿತ್ತು. ಸೂಕ್ಷ್ಮಜೀವಿಗಳಂತಹ ಸಣ್ಣ ಜೀವ ರೂಪಗಳನ್ನು ಬೆಂಬಲಿಸಲು ಮಂಗಳವು ಸರಿಯಾದ ಪರಿಸರ ಪರಿಸ್ಥಿತಿಗಳನ್ನು ಹೊಂದಿದೆಯೇ ಎಂದು ತಿಳಿದುಕೊಳ್ಳುವ ಗುರಿಯೊಂದಿಗೆ ರೋವರ್ ಅನ್ನು ಉಡಾವಣೆ ಮಾಡಲಾಗಿತ್ತು. ಕ್ಯೂರಿಯಾಸಿಟಿಯು ಕೆಂಪು ಗ್ರಹದಲ್ಲಿ ಹಿಂದಿನ ವಾಸಯೋಗ್ಯ ಪರಿಸರದ ರಾಸಾಯನಿಕ ಮತ್ತು ಖನಿಜ ಪುರಾವೆಗಳನ್ನು ಕಂಡುಹಿಡಿದಿದೆ ಮತ್ತು ಬಂಡೆಗಳ ಅಧ್ಯಯನವನ್ನು ಮುಂದುವರೆಸಿದೆ.
ಕ್ಯೂ ರಿಯಾಸಿಟಿಯು 2016 ರಲ್ಲಿ ರೆಡ್ ಪ್ಲಾನೆಟ್‌ನ ಗೇಲ್ ಕ್ರೇಟರ್‌ನಲ್ಲಿ ಟ್ರೈಡೈಮೈಟ್ ಎಂಬ ಖನಿಜವನ್ನು ಕಂಡುಹಿಡಿದಿದೆ ಮತ್ತು ಅಂದಿನಿಂದ, ಕಳೆದ ವರ್ಷದವರೆಗೂ ಒಂದು ರಹಸ್ಯವು ಮಂಗಳ ಸಂಶೋಧನಾ ಸಮುದಾಯವನ್ನು ಗೊಂದಲಕ್ಕೀಡುಮಾಡಿತು. 2022 ರಲ್ಲಿ, ರೈಸ್ ವಿಶ್ವವಿದ್ಯಾಲಯ, ನಾಸಾದ ಜಾನ್ಸನ್ ಬಾಹ್ಯಾಕಾಶ ಕೇಂದ್ರ ಮತ್ತು ಕ್ಯಾಲಿಫೋರ್ನಿಯಾ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಗ್ರಹಗಳ ವಿಜ್ಞಾನಿಗಳು ಈ ರಹಸ್ಯಕ್ಕೆ ಉತ್ತರವನ್ನು ಕಂಡುಕೊಂಡರು.
ಟ್ರೈಡೈಮೈಟ್ ಸ್ಫಟಿಕ ಶಿಲೆಯ ಹೆಚ್ಚಿನ-ತಾಪಮಾನದ, ಕಡಿಮೆ-ಒತ್ತಡದ ರೂಪವಾಗಿದೆ ಮತ್ತು ಇದು ಭೂಮಿಯ ಮೇಲೆ ಅತ್ಯಂತ ಅಪರೂಪವಾಗಿದೆ. ಟ್ರೈಡೈಮೈಟ್‌ನ ಕೇಂದ್ರೀಕೃತ ಭಾಗವು ಗೇಲ್ ಕ್ರೇಟರ್‌ನಲ್ಲಿ ಹೇಗೆ ಕೊನೆಗೊಂಡಿತು ಎಂಬುದನ್ನು ನಿರ್ಧರಿಸಲು ವಿಜ್ಞಾನಿಗಳಿಗೆ ತಕ್ಷಣವೇ ಸಾಧ್ಯವಾಗಲಿಲ್ಲ.
ಮಂಗಳ ಗ್ರಹದಲ್ಲಿ ಏಲಿಯನ್ ರಹಸ್ಯ ದ್ವಾರ? ವೈರಲ್ ಚಿತ್ರದ ಅಸಲಿಯತ್ತೇನು?
ನಾಸಾ ಗೇಲ್ ಕ್ರೇಟರ್ ಅನ್ನು ಕ್ಯೂರಿಯಾಸಿಟಿಯ ಲ್ಯಾಂಡಿಂಗ್ ಸೈಟ್ ಆಗಿ ಆಯ್ಕೆ ಮಾಡಿತ್ತು. ಈವರೆಗೂ ಪಡೆದಿದ್ದ ದಾಖಲೆಗಳ ಪ್ರಕಾರ, ಇದು ದ್ರವ ನೀರನ್ನು ಹೊಂದಿದ್ದ ಏಕೈಕ ತಾಣ ಎನಿಸಿತ್ತು. ಗೇಲ್ ಕ್ರೇಟರ್ ಒಂದು ಶತಕೋಟಿ ವರ್ಷಗಳ ಹಿಂದೆ ಸರೋವರವಾಗಿತ್ತು ಎಂದು ದೃಢಪಡಿಸಿದ ಪುರಾವೆಗಳನ್ನು ಕೂಡ ರೋವರ್ ಕಂಡುಕೊಂಡಿದೆ. ರೈಸ್ ವಿಶ್ವವಿದ್ಯಾನಿಲಯದ ಸಂಶೋಧಕರ ನೇತೃತ್ವದ ಅಧ್ಯಯನವು ಸ್ಫೋಟಕ ಜ್ವಾಲಾಮುಖಿ ಸ್ಫೋಟದ ಪರಿಣಾಮವಾಗಿ ಮಂಗಳದಲ್ಲಿ ಟ್ರೈಡೈಮೈಟ್ ರೂಪುಗೊಂಡಿದೆ ಎಂದು ಕಂಡುಹಿಡಿದಿದೆ.
ನಾಸಾದ ಮಾರ್ಸ್ ರೋವರ್ ಸಂಪರ್ಕ ಕಡಿತಗೊಂಡಿದ್ದ ಆ ಕ್ಷಣ..!
