ಕೊರೋನಾ ಎಫೆಕ್ಟು: ಗಾಳಿಪಟ 2 ಚಿತ್ರತಂಡದ ವಿದೇಶಿ ಪ್ರಯಾಣ ರದ್ದು!
ಮಾರ್ಚ್ ತಿಂಗಳ ಎರಡನೇ ವಾರದಿಂದ ವಿದೇಶಕ್ಕೆ ಶೂಟಿಂಗ್‌ಗೆ ತೆರಳಬೇಕಿದ್ದ ಗಣೇಶ್ ನಟನೆಯ ‘ಗಾಳಿಪಟ-2’ ಚಿತ್ರತಂಡ ತನ್ನ ಹೊರ ದೇಶದ ಪ್ರಯಾಣವನ್ನು ರದ್ದುಗೊಳಿಸಿದೆ. 25 ದಿನಗಳ ಕಾಲ ಜಾರ್ಜಿಯಾ ಹಾಗೂ ಪೋಲೆಂಡ್‌ನಲ್ಲಿ ಶೂಟಿಂಗ್‌ ಮಾಡಬೇಕಿದ್ದ ತಂಡಕ್ಕೆ ಕೊರೋನಾ ವೈರಸ್‌ ರೆಡ್‌ ಸಿಗ್ನಲ್‌ ಕೊಟ್ಟಿದೆ.
ವೈರಸ್‌ ಸದ್ದು ಅಡಗುವ ತನಕ ‘ಗಾಳಿಪಟ-2’ ಚಿತ್ರಕ್ಕೆ ವಿದೇಶಿ ಪ್ರಯಾಣದ ಶೂಟಿಂಗ್‌ ಭಾಗ್ಯ ದೊರಯಲ್ಲ. ಯೋಗರಾಜ್‌ ಭಟ್‌ ನಿರ್ದೇಶಿಸಿ, ಸೂರಜ್‌ ಪ್ರೊಡಕ್ಷನ್‌ನಲ್ಲಿ ರಮೇಶ್‌ ರೆಡ್ಡಿ ನಂಗ್ಲಿ ನಿರ್ಮಾಣ ಮಾಡುತ್ತಿರುವ ಈ ಚಿತ್ರಕ್ಕೆ ಈಗಾಗಲೇ 32 ದಿನಗಳ ಕಾಲ ಕುದುರೆಮುಖ ಸುತ್ತಮುತ್ತ ಶೂಟಿಂಗ್‌ ಮಾಡಲಾಗಿದೆ.
ಕುದುರೆಮುಖದಲ್ಲಿ 'ಗಾಳಿಪಟ' ಹಾರಿಸಿದ ಗಣೇಶ್-ದಿಗಂತ್-ಪವನ್!
‘ಇನ್ನೂ 30 ದಿನ ಶೂಟಿಂಗ್‌ ಬಾಕಿ ಇದೆ. ಆದರೆ, ಕೊರೋನಾ ಎಫೆಕ್ಟ್ನಿಂದ ಶೂಟಿಂಗ್‌ ನಿಲ್ಲಿಸಿದ್ದೇವೆ. ಈಗ ಶೂಟಿಂಗ್‌ ಆಗಿರುವ ಬಗ್ಗೆ ಹೇಳಬೇಕು ಎಂದರೆ ‘ಗಾಳಿಪಟ’ ಚಿತ್ರದ ಒಂದು ಸಣ್ಣ ಎಳೆ ಪಾರ್ಟ್‌-2ನಲ್ಲೂ ಮುಂದುವರೆಯಲಿದೆ. ಈ ಕಾರಣಕ್ಕೆ ಮೊದಲ ಭಾಗದಲ್ಲಿ ಇದ್ದ ಪ್ರಮುಖ ಕಲಾವಿದರೂ ‘ಗಾಳಿಪಟ-2’ ಚಿತ್ರದಲ್ಲೂ ಮುಂದುವರೆದಿದ್ದಾರೆ. ಅನಂತ್‌ನಾಗ್‌, ಪದ್ಮಜಾ ರಾವ್‌, ಸುಧಾ ಬೆಳವಾಡಿ, ರಂಗಾಯಣ ರಘು ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಏಳು ಹಾಡುಗಳನ್ನು ಒಳಗೊಂಡಿದ್ದು, ಒಂದು ಕಲರ್‌ಫುಲ್‌ ಆಲ್ಬಂ ಸಿನಿಮಾ ಆಗಲಿದೆ. ನನ್ನ ಮತ್ತು ಗಣೇಶ್ ಕಾಂಬಿನೇಷನ್‌ನ ಈ ಸಿನಿಮಾ ಅದ್ದೂರಿಯಾಗಿ ಮೂಡಿ ಬರಲು ಕಾರಣ ನಿರ್ಮಾಪಕ ರಮೇಶ್‌ ರೆಡ್ಡಿ ಕಾರಣ’ ಎನ್ನುತ್ತಾರೆ ಯೋಗರಾಜ್‌ ಭಟ್‌.
ಗಾಳಿಪಟ-2 ಚಿತ್ರತಂಡ ವಿದೇಶಕ್ಕೆ ತೆರಳಬೇಕಿತ್ತು. ಈ ತಯಾರಿ ಮಾಡಿಕೊಳ್ಳುವಾಗ ಸಿಂಪಲ್‌ ಸುನಿ ನಿರ್ದೇಶನದಲ್ಲಿ ‘ಸಖತ್‌’ ಒಂದು ಶೆಡ್ಯೂಲ್‌ ಮುಗಿಸಿದೆ. ಆದರೆ, ವಿದೇಶಕ್ಕೆ ಹೋಗಬೇಕು ಎನ್ನುವಷ್ಟರಲ್ಲಿ ಕೊರೋನಾ ಎಫೆಕ್ಟ್ ಶುರುವಾಗಿದೆ. ಹೀಗಾಗಿ ಚಿತ್ರೀಕರಣ ಮುಂದೂಡಿದ್ದೇವೆ.- ಗಣೇಶ್
ವೈಭವಿ ಶ್ಯಾಂಡಿಲ್ಯ, ಶರ್ಮಿಳಾ ಮಾಂಡ್ರೆ, ಸಂಯುಕ್ತ ಮೆನನ್‌ ಚಿತ್ರದ ನಾಯಕಿಯರು. ನಿಶ್ವಿಕಾ ನಾಯ್ಡು ವಿಶೇಷ ಪಾತ್ರಧಾರಿ.
'ಗಾಳಿಪಟ 2'ಗೆ ನಾಯಕಿಯರು ಬದಲಾದರು!
‘ಹಿಂದಿ ಸೇರಿದಂತೆ ನನ್ನ ನಿರ್ಮಾಣದಲ್ಲಿ ಮೂರು ಚಿತ್ರಗಳು ಇವೆ. ಈ ಪೈಕಿ ರಮೇಶ್‌ ಅರವಿಂದ್‌ ಅವರೇ ನಟಿಸಿ, ನಿರ್ದೇಶಿಸುತ್ತಿರುವ ‘100’ ಚಿತ್ರಕ್ಕೆ ಶೂಟಿಂಗ್‌ ಮುಗಿದಿದೆ. ಕೊರೋನಾ ಹೋದ ಮೇಲೆ ಈ ಚಿತ್ರ ತೆರೆಗೆ ಬರಲಿದೆ. ಇದೇ ಚಿತ್ರದ ಹಿಂದಿ ಅವತರಣಿಕೆ ಚಿತ್ರಕ್ಕೆ ಪೋಸ್ಟ್‌ ಪ್ರೊಡಕ್ಷನ್‌ ನಡೆಯುತ್ತಿದೆ. ‘ಗಾಳಿಪಟ-2’ ಚಿತ್ರ ವಿದೇಶಕ್ಕೆ ಹೋಗಬೇಕಿತ್ತು. ಸದ್ಯಕ್ಕೆ ನಿಲ್ಲಿಸಲಾಗಿದೆ. ನಿರ್ಮಾಪಕನಾಗಿ ತುಂಬಾ ತೃಪ್ತಿ ಮತ್ತು ಖುಷಿಯಿಂದ ಮಾಡಿರುವ ಚಿತ್ರಗಳಿವು.’ ಎಂಬುದು ನಿರ್ಮಾಪಕ ರಮೇಶ್‌ ರೆಡ್ಡಿ ನಂಗ್ಲಿ ಮಾತು.
