ಟೆನಿಸ್ ದಿಗ್ಗಜ ರೋಜರ್ ಫೆಡರರ್ ಮಡಿಲಿಗೆ 103ನೇ ಪ್ರಶಸ್ತಿ!
ಸ್ವಿಸ್‌ ಒಳಾಂಗಣ ಟೂರ್ನಿಯಲ್ಲಿ ಟೆನಿಸ್ ದಿಗ್ಗಜ ರೋಜರ್ ಫೆಡರರ್, 10ನೇ ಬಾರಿ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ. ಈ ಮೂಲಕ ಒಟ್ಟು 103ನೇ ಪ್ರಶಸ್ತಿ ಗೆದ್ದ ಸಾಧನೆ ಮಾಡಿದ್ದಾರೆ.
Followಬಾಸೆಲ್‌ (ಸ್ವಿಜರ್‌ಲೆಂಡ್‌)(ಅ.29): 20 ಗ್ರ್ಯಾಂಡ್‌ಸ್ಲಾಂಗಳ ಒಡೆಯ, ಸ್ವಿಜರ್‌ಲೆಂಡ್‌ನ ಟೆನಿಸ್ ಮಾಂತ್ರಿಕ ರೋಜರ್ ಫೆಡರರ್ ತಮ್ಮ ವೃತ್ತಿಬದುಕಿನ 103ನೇ ಪ್ರಶಸ್ತಿ ಗೆದ್ದಿದ್ದಾರೆ. ಭಾನುವಾರ ಇಲ್ಲಿ ನಡೆದ ಸ್ವಿಸ್‌ ಒಳಾಂಗಣ ಟೂರ್ನಿಯ ಪುರುಷರ ಸಿಂಗಲ್ಸ್‌ ಫೈನಲ್‌ ಪಂದ್ಯದಲ್ಲಿ ಫೆಡರರ್, 20 ವರ್ಷದ ಆಸ್ಪ್ರೇಲಿಯಾದ ಅಲೆಕ್ಸ್‌ ಡಿ ಮಿನೌರ್‌ ವಿರುದ್ಧ 6-2, 6-2 ನೇರ ಸೆಟ್‌ಗಳಲ್ಲಿ ಗೆಲುವು ಸಾಧಿಸಿದರು.ಅಮೆರಿಕದ ಮಾಜಿ ಟೆನಿಸಿಗ ಜಿಮ್ಮಿ ಕಾನರ್‍ಸ್ರ ಸಾರ್ವಕಾಲಿಕ ದಾಖಲೆ ಸರಿಗಟ್ಟಲು ಫೆಡರರ್ ಇನ್ನು 6 ಪ್ರಶಸ್ತಿಗಳನ್ನು ಗೆಲ್ಲಬೇಕಿದೆ. ಕಾನರ್‍ಸ್ 109 ಟ್ರೋಫಿಗಳನ್ನು ಜಯಿಸಿದ್ದರು.
ಇದನ್ನೂ ಓದಿ: ಟೆನಿಸ್ ವಿಶ್ವ ರ‍್ಯಾಂಕಿಂಗ್; ಫೆಡರರ್‌ಗೆ ಶಾಕ್ ನೀಡಿದ್ದ ಸುಮಿತ್‌ಗೆ ಬಡ್ತಿ!
10ನೇ ಬಾರಿಗೆ ಸ್ವಿಸ್‌ ಒಳಾಂಗಣ ಟೂರ್ನಿಯಲ್ಲಿ ಚಾಂಪಿಯನ್‌ ಆಗಿ ಹೊರಹೊಮ್ಮಿದ ಫೆಡರರ್, 2019ರಲ್ಲಿ 4ನೇ ಪ್ರಶಸ್ತಿ ಜಯಿಸಿದರು. ಒಂದು ಟೂರ್ನಿಯಲ್ಲಿ 15 ಬಾರಿ ಫೈನಲ್‌ ಪ್ರವೇಶಿಸಿದ ವಿಶ್ವದ ಮೊದಲ ಪುರುಷ ಇಲ್ಲವೇ ಮಹಿಳಾ ಟೆನಿಸ್ ಪಟು ಎನ್ನುವ ದಾಖಲೆಯನ್ನು ಫೆಡರರ್ ಬರೆದರು. ಮಾರ್ಟಿನಾ ನವಾರ್ಟಿಲೋವಾ 14 ಬಾರಿ ಷಿಕಾಗೋ ಹಾಗೂ ಡಬ್ಲ್ಯುಟಿಎ ಟೂರ್‌ ಟೂರ್ನಿಗಳ ಫೈನಲ್‌ ಪ್ರವೇಶಿಸಿದ್ದರು.
ಇದನ್ನೂ ಓದಿ: 2 ವರ್ಷಗಳ ಬಳಿಕ ಮೊದಲ ಪ್ರಶಸ್ತಿ ಗೆದ್ದ ಮರ್ರೆ!
ಫೆಡರರ್ ಈ ಟೂರ್ನಿಯಲ್ಲಿ ತಮ್ಮ ವೃತ್ತಿಬದುಕಿನ 1500 ಪಂದ್ಯವನ್ನು ಸಹ ಆಡಿದರು. ಅವರು ಒಟ್ಟು 1233 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದಾರೆ. ಜಿಮ್ಮಿ ಕಾನರ್‍ಸ್ 1556 ಪಂದ್ಯಗಳನ್ನು ಆಡಿದ್ದು 1274 ಗೆಲುವುಗಳನ್ನು ಕಂಡಿದ್ದರು. ಅವರ ದಾಖಲೆ ಸರಿಗಟ್ಟಲು ಫೆಡರರ್ ಇನ್ನೂ 53 ಪಂದ್ಯಗಳನ್ನು ಆಡಬೇಕಿದ್ದು, 40 ಗೆಲುವುಗಳನ್ನು ಸಾಧಿಸಬೇಕಿದೆ.
