ದಕ್ಷಿಣ ಏಷ್ಯನ್ ಗೇಮ್ಸ್: ಪದಕ ಪಟ್ಟಿಯಲ್ಲಿ ಭಾರತಕ್ಕೆ ಅಗ್ರಸ್ಥಾನ

ದಕ್ಷಿಣ ಏಷ್ಯನ್ ಗೇಮ್ಸ್ ಕೂಟದಲ್ಲಿ ಮೂರನೇ ದಿನವೂ ಭಾರತ ಪದಕಗಳನ್ನು ಭರ್ಜರಿಯಾಗೆಯೇ ಬೇಟೆಯಾಡಿದೆ. ಇದರೊಂದಿಗೆ ಪದಕಗಳ ಪಟ್ಟಿಯಲ್ಲಿ ಭಾರತ ಅಗ್ರಸ್ಥಾನಕ್ಕೇರಿದೆ. ಈ ಕುರಿತಾದ ವರದಿ ಇಲ್ಲಿದೆ ನೋಡಿ..

sports meet

ಕಾಠ್ಮಂಡು[ಡಿ.05]: 13ನೇ ದಕ್ಷಿಣ ಏಷ್ಯನ್‌ ಕ್ರೀಡಾಕೂಟದಲ್ಲಿ ಭಾರತ ಸ್ಪರ್ಧಿಗಳ ಪದಕದ ಬೇಟೆ ಮುಂದುವರೆದಿದೆ. 3ನೇ ದಿನವಾದ ಬುಧವಾರ, ಭಾರ​ತ 15 ಚಿನ್ನದೊಂದಿಗೆ ಒಟ್ಟು 29 ಪದ​ಕ ಗೆದ್ದು​ಕೊಂಡಿತು. 

32 ಚಿನ್ನ, 26 ಬೆಳ್ಳಿ, 13 ಕಂಚಿ​ನೊಂದಿಗೆ ಒಟ್ಟು 71 ಪದ​ಕ​ಗ​ಳನ್ನು ಗೆದ್ದಿರುವ ಭಾರತ, ಆತಿ​ಥೇಯ ನೇಪಾ​ಳ​ವನ್ನು ಹಿಂದಿಕ್ಕಿ ಪದಕ ಪಟ್ಟಿ​ಯಲ್ಲಿ ಅಗ್ರಸ್ಥಾ​ನ​ಕ್ಕೇ​ರಿದೆ. 29 ಚಿನ್ನ ಸಮೇತ ಒಟ್ಟು 67 ಪದಕ ಗೆದ್ದಿ​ರುವ ನೇಪಾಳ 2ನೇ ಸ್ಥಾನ​ದ​ಲ್ಲಿ​ದ್ದರೆ, 9 ಚಿನ್ನದೊಂದಿಗೆ ಒಟ್ಟು 41 ಪದಕ ಜಯಿ​ಸಿ​ರುವ ಪಾಕಿ​ಸ್ತಾನ 3ನೇ ಸ್ಥಾನ​ಕ್ಕೇ​ರಿದೆ.

ಬುಧ​ವಾರ ಭಾರತ ಅಥ್ಲೆ​ಟಿಕ್ಸ್‌ನಲ್ಲಿ 5 ಚಿನ್ನ ಸೇರಿ ಒಟ್ಟು 10 ಪದಕ ಗಳಿ​ಸಿತು. ಟೇಬಲ್‌ ಟೆನಿಸ್‌ನಲ್ಲಿ 3 ಚಿನ್ನ, 3 ಬೆಳ್ಳಿ, ಟೇಕ್ವಾಂಡೋ​ನಲ್ಲಿ 3 ಚಿನ್ನ, 2 ಬೆಳ್ಳಿ ಹಾಗೂ 1 ಕಂಚು, ಟ್ರಯ​ಥ್ಲಾನ್‌ನಲ್ಲಿ 2 ಚಿನ್ನ, 2 ಬೆಳ್ಳಿ, 1 ಕಂಚು ಹಾಗೂ ಖೋ-ಖೋನಲ್ಲಿ 2 ಚಿನ್ನ ಗಳಿ​ಸಿತು. ಫೈನಲ್‌ನಲ್ಲಿ ಭಾರತ ಪುರು​ಷರ ತಂಡ ಬಾಂಗ್ಲಾ​ದೇಶ ವಿರುದ್ಧ 16-9 ಅಂಕ​ಗ​ಳಲ್ಲಿ ಗೆದ್ದರೆ, ಮಹಿಳಾ ತಂಡ ನೇಪಾಳ ವಿರುದ್ಧ 17-5ರಲ್ಲಿ ಗೆಲುವು ಸಾಧಿ​ಸಿತು.

ಅಥ್ಲೆಟಿಕ್ಸ್‌ನ ಮೊದಲ ದಿನದ ಸ್ಪರ್ಧೆ​ಯಲ್ಲಿ 10 ಪದಕ ಜಯಿ​ಸಿದ್ದ ಭಾರತ, 2ನೇ ದಿನ​ವೂ ಭರ್ಜರಿ ಪದಕ ಬೇಟೆ ನಡೆ​ಸಿತು. ಇದೇ ವೇಳೆ ಭಾರ​ತದ ಬ್ಯಾಡ್ಮಿಂಟನ್‌ ಆಟ​ಗಾ​ರರು ಆಕ​ರ್ಷಕ ಪ್ರದ​ರ್ಶನ ತೋರುತ್ತಿದ್ದು, ಒಟ್ಟು 8 ಪದ​ಕ​ಗ​ಳನ್ನು ಖಚಿತ ಪಡಿ​ಸಿ​ಕೊಂಡಿ​ದ್ದಾರೆ. ಕಬ​ಡ್ಡಿ​ಯಲ್ಲಿ ಭಾರತ ಪುರುಷ ಹಾಗೂ ಮಹಿಳಾ ತಂಡ​ಗಳು ಚಿನ್ನ ಗೆಲ್ಲುವ ನೆಚ್ಚಿನ ತಂಡ​ಗ​ಳೆ​ನಿ​ಸಿ​ಕೊಂಡಿವೆ. ಈಜು, ವೇಟ್‌ಲಿಫ್ಟಿಂಗ್‌, ಕುಸ್ತಿ, ವುಶು, ಫುಟ್ಬಾಲ್‌, ಬಾಕ್ಸಿಂಗ್‌, ಆರ್ಚ​ರಿ ಕ್ರೀಡೆಗಳಲ್ಲೂ ಭಾರತ ಹೆಚ್ಚಿನ ಪದ​ಕ​ಗ​ಳನ್ನು ಗೆಲ್ಲಲು ಎದುರು ನೋಡು​ತ್ತಿದೆ.

ಕ್ರೀಡಾ​ಕೂಟದಲ್ಲಿ ಒಟ್ಟು 7 ರಾಷ್ಟ್ರಗಳ 2715 ಕ್ರೀಡಾ​ಪ​ಟು​ಗಳು ಪಾಲ್ಗೊಂಡಿ​ದ್ದಾರೆ. ಭಾರ​ತ​ದಿಂದ 487 ಕ್ರೀಡಾ​ಪ​ಟು​ಗಳು ಸ್ಪರ್ಧಿ​ಸು​ತ್ತಿದ್ದು, ಪದಕ ಪಟ್ಟಿ​ಯಲ್ಲಿ ಭಾರತ ಮೊದಲ ಸ್ಥಾನ ಕಾಪಾ​ಡಿ​ಕೊ​ಳ್ಳುವ ವಿಶ್ವಾಸದಲ್ಲಿದೆ. ಕಳೆದ ಆವೃ​ತ್ತಿ​ಯಲ್ಲಿ (2016) ಭಾರತ 188 ಚಿನ್ನದೊಂದಿಗೆ ಬರೋ​ಬ್ಬರಿ 308 ಪದ​ಕ​ಗ​ಳ​ನ್ನು ಗೆದ್ದು ಅಗ್ರ​ಸ್ಥಾನ ಪಡೆ​ದಿತ್ತು.