ಪೂರ್ಣ ರಿಸಲ್ಟ್ ಅಧಿಕೃತವಾಗಿ ಪ್ರಕಟವಾಗಿದ್ದು ನಿನ್ನೆ ರಾತ್ರಿ!| ವಿವಿಪ್ಯಾಟ್ ಮತಗಳ ಎಣಿಕೆಯಿಂದ ಭಾರಿ ವಿಳಂಬ
ನವದೆಹಲಿ[ಮೇ.25]: ಲೋಕಸಭೆ ಚುನಾವಣೆ ನಡೆದ 542 ಲೋಕಸಭಾ ಕ್ಷೇತ್ರಗಳ ಸಂಪೂರ್ಣ ಫಲಿತಾಂಶ ಅಧಿಕೃತವಾಗಿ ಪ್ರಕಟಗೊಂಡಿದ್ದು ಶುಕ್ರವಾರ ರಾತ್ರಿ!
ಹೌದು. ಗುರುವಾರ ಬೆಳಗ್ಗೆ ಮತ ಎಣಿಕೆ 8ಕ್ಕೆ ಆರಂಭವಾಯಿತಾದರೂ, ರಾತ್ರಿಯಾದರೂ ಎಲ್ಲ ಕ್ಷೇತ್ರಗಳ ಫಲಿತಾಂಶವನ್ನು ಪ್ರಕಟಿಸಲು ಆಯೋಗಕ್ಕೆ ಸಾಧ್ಯವಾಗಿರಲಿಲ್ಲ. ಶುಕ್ರವಾರ ಬೆಳಗ್ಗೆ ವೇಳೆಗೆ ಬಹುತೇಕ ಕ್ಷೇತ್ರಗಳ ಫಲಿತಾಂಶ ಬಹಿರಂಗವಾಯಿತು. ಮಧ್ಯಾಹ್ನ 12 ಗಂಟೆಯಾದರೂ ಇನ್ನೂ 4 ಕ್ಷೇತ್ರಗಳ ಫಲಿತಾಂಶ ಬಾಕಿ ಉಳಿದಿತ್ತು. ಸಂಜೆ ಹೊತ್ತಿಗೆ ಅದು 1 ಕ್ಷೇತ್ರಕ್ಕೆ ಇಳಿಯಿತು. ರಾತ್ರಿ 8ರ ವೇಳೆಗೆ ಆ ಕ್ಷೇತ್ರದ ಫಲಿತಾಂಶವೂ ಪ್ರಕಟವಾಯಿತು. ಇದರೊಂದಿಗೆ ದೇಶದ ಎಲ್ಲ ಲೋಕಸಭಾ ಕ್ಷೇತ್ರಗಳ ಫಲಿತಾಂಶ ಅಧಿಕೃತವಾಗಿ ಪ್ರಕಟಗೊಂಡಂತೆ ಆಯಿತು.
ಇದೇ ಮೊದಲ ಬಾರಿಗೆ ಲೋಕಸಭೆ ಚುನಾವಣೆಯಲ್ಲಿ ವಿವಿಪ್ಯಾಟ್ ಬಳಸಲಾಗಿತ್ತು. ಪ್ರತಿ ವಿಧಾನಸಭಾ ಕ್ಷೇತ್ರದಲ್ಲಿ 5 ವಿವಿಪ್ಯಾಟ್ಗಳನ್ನು ಲಾಟರಿ ಮೂಲಕ ಆಯ್ಕೆ ಮಾಡಿ, ಅದರಲ್ಲಿನ ಚೀಟಿಯನ್ನು ವಿದ್ಯುನ್ಮಾನ ಮತಯಂತ್ರಗಳ ಜತೆ ತುಲನೆ ಮಾಡಿ ನೋಡಬೇಕಾಗಿದ್ದ ಕಾರಣ ಫಲಿತಾಂಶ ವಿಳಂಬವಾಯಿತು. ಆದರೆ ಶುಕ್ರವಾರ ಸಂಜೆವರೆಗೂ ಸಮಯ ತೆಗೆದುಕೊಂಡ ಕ್ಷೇತ್ರಗಳು ಯಾವುವು ಎಂಬುದನ್ನು ಆಯೋಗ ತಿಳಿಸಿಲ್ಲ.
