ಬೆಂಗಳೂರು (ಏ.15): ಬೆಂಗಳೂರಿಗರ ಜೀವನಾಡಿಯಾಗಿರುವ ಬಿಎಂಟಿಸಿ ಸಂಸ್ಥೆ ಲಕ್ಷ ಲಕ್ಷ ಕೊಟ್ಟು ಖರೀದಿ ಮಾಡಲಾಗಿರುವ ವೋಲ್ವೋ ಬಸ್’ಗಳನ್ನು ಗುಜರಿಗೆ ಹಾಕಿದೆ.
ಸುಮಾರು ಐವತ್ತಕ್ಕೂ ಹೆಚ್ಚು ವೋಲ್ವೋ ಬಸ್’ಗಳು ರಸ್ತೆಗೆ ಇಳಿಯದೆ ನಿಂತ ಜಾಗದಲ್ಲೇ ನಿಂತು ಗುಜುರಿಗೆ ಸೇರಿವೆ.
ಮೆಜೆಸ್ಟಿಕ್’ನ ಡಿಪೋ ನಂಬರ್ 7 ರಲ್ಲಿ 95 ಲಕ್ಷ ರೂಪಾಯಿ ಕೊಟ್ಟು ಖರೀದಿ ಮಾಡಿರುವ ವೋಲ್ವೋ ಬಸ್’ಗಳು ಚಾಲ್ತಿಯಲ್ಲಿ ಇಲ್ಲದೇ ಕಳೆದ ಒಂದು ವರ್ಷದಿಂದ ರಿಪೇರಿನೂ ಆಗದೆ ನಿಂತಲ್ಲೇ ನಿಂತಿವೆ.
ಹೀಗಿರುವಾಗಲೇ ಬಿಎಂಟಿಸಿ ಸಂಸ್ಥೆ ಮತ್ತೆ ಹೊಸ ಬಸ್’ಗಳನ್ನ ಖರೀದಿ ಮಾಡಲು ಮುಂದಾಗಿದೆ. ಇರುವ ಬಸ್’ಗಳನ್ನ ರಿಪೇರಿಮಾಡದೆ, ಹೊಸ ವೋಲ್ವೋ ಬಸ್ಗಳನ್ನು ಖರೀದಿ ಮಾಡಲು ಬಿಎಂಟಿಸಿ ಸಂಸ್ಥೆ, ತುದಿಕಾಲಲ್ಲಿ ನಿಂತಿದೆ.
ಯಾರದೋ ದುಡ್ಡು ಎಲ್ಲಮ್ಮನ ಜಾತ್ರೆ ಅನ್ನುವ ಹಾಗೆ ಬಿಎಂಟಿಸಿ ಸಂಸ್ಥೆ ಸಾರ್ವಜನಿಕರ ಹಣವನ್ನು ಈ ರೀತಿ ಹಾಳು ಮಾಡುತ್ತಿದೆ. ಈ ಬಗ್ಗೆ ಬಿಎಂಟಿಸಿ ಅಧ್ಯಕ್ಷರನ್ನು ಕೇಳಿದಾಗ, ನಾನು ಬಂದ ಮೇಲೆ ಅರ್ಧದಷ್ಟು ಬಸ್’ಗಳನ್ನು ರಿಪೇರಿ ಮಾಡಿಸಿದ್ದೇನೆ. ಉಳಿದ ಬಸ್’ಗಳನ್ನ ರಿಪೇರಿ ಮಾಡದೇ ವೊಲ್ವೋ ಕಂಪನಿಯವರು ಸಬೂಬು ಹೇಳುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.
(ಸಾಂದರ್ಭಿಕ ಚಿತ್ರ)
