ವಿಶ್ವದ ನಂ. 1 ಶ್ರೀಮಂತ ವ್ಯಕ್ತಿಯಾಗಿದ್ರೂ 2 ಬೆಡ್‌ರೂಮ್‌ನ ಪುಟ್ಟ ಮನೆಯಲ್ಲಿ ವಾಸ: ಇದು ಎಲಾನ್ ಮಸ್ಕ್ ಸರಳ ಜೀವನ
ಜಗತ್ತಿನ ನಂ. 1 ಶ್ರೀಮಂತ ವ್ಯಕ್ತಿ ಎಲಾನ್ ಮಸ್ಕ್ ತಮ್ಮ ಎಲ್ಲಾ ಮನೆಗಳನ್ನು ಮಾರಾಟ ಮಾಡಿ ರಾಕೆಟ್, ಎಲೆಕ್ಟ್ರಿಕ್ ಕಾರುಗಳು ಮತ್ತು ಅವರ ಇತರ ಉದ್ಯಮಗಳ ನಿರ್ಮಾಣದ ಮೇಲೆ ಕೇಂದ್ರೀಕರಿಸಲು ಅಮೆರಿಕದ ಟೆಕ್ಸಾಸ್‌ನಲ್ಲಿ ಒಂದು ಸಣ್ಣ ಮನೆ ಖರೀದಿಸಿದ್ದಾರೆ.
 )
Followನವದೆಹಲಿ (ಆಗಸ್ಟ್‌ 8, 2023): ಟೆಸ್ಲಾ ಮತ್ತು ಸ್ಪೇಸ್‌ಎಕ್ಸ್ ಹಾಗೂ ಟ್ವಿಟ್ಟರ್‌ ಖರೀದಿಸಿ ಎಕ್ಸ್‌ ಎಂದು ಮರುನಾಮಕರಣ ಮಾಡಿದ ಸಿಇಒ ಎಲಾನ್ ಮಸ್ಕ್ ವಿಶ್ವದ ನಂ. 1 ಶ್ರೀಮಂತ ವ್ಯಕ್ತಿ. ಜಗತ್ತಿನ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿದ್ರೂ ಇವರು ಸರಳ ಜೀವನ ನಡೆಸ್ತಿದ್ದಾರೆ. ತಮ್ಮ ಎಲ್ಲ ಮನೆಗಳನ್ನೂ ಮಾರಾಟ ಮಾಡಿದ ಎಲಾನ್ ಮಸ್ಕ್, ಟೆಕ್ಸಾಸ್‌ನಲ್ಲಿ ಒಂದು ಸಣ್ಣ ಮನೆಯನ್ನು ಖರೀದಿಸಿ ವಾಸ ಮಾಡ್ತಿದ್ದಾರೆ. ಇದು ನಿಜಕ್ಕೂ ಅಚ್ಚರಿ ಅಲ್ಲವೇ.
ಹೌದು, ಫೋರ್ಬ್ಸ್‌ ಪ್ರಕಾರ ಜಗತ್ತಿನ ನಂ. 1 ಶ್ರೀಮಂತ ವ್ಯಕ್ತಿ ಎಲಾನ್ ಮಸ್ಕ್. ಇವರು ತಮ್ಮ ಎಲ್ಲಾ ಮನೆಗಳನ್ನು ಮಾರಾಟ ಮಾಡಿದರು ಮತ್ತು ರಾಕೆಟ್, ಎಲೆಕ್ಟ್ರಿಕ್ ಕಾರುಗಳು ಮತ್ತು ಅವರ ಇತರ ಉದ್ಯಮಗಳ ನಿರ್ಮಾಣದ ಮೇಲೆ ಕೇಂದ್ರೀಕರಿಸಲು ಅಮೆರಿಕದ ಟೆಕ್ಸಾಸ್‌ನಲ್ಲಿ ಒಂದು ಸಣ್ಣ ಮನೆ ಖರೀದಿಸಿದ್ದಾರೆ. ಎಲಾನ್ ಮಸ್ಕ್ ಅವರ ಜೀವನಚರಿತ್ರೆಕಾರ ವಾಲ್ಟರ್ ಐಸಾಕ್ಸನ್ ಈಗ ಟೆಕ್ಸಾಸ್‌ನ ಬೊಕಾ ಚಿಕಾದಲ್ಲಿರುವ ಈ ಮನೆಯ ಅಪರೂಪದ ಚಿತ್ರವನ್ನು ಹಂಚಿಕೊಂಡಿದ್ದಾರೆ. ಅವರು ಈ ಮನೆಯನ್ನು 'ಸ್ಪಾರ್ತಾನ್‌ನ ಎರಡು ಮಲಗುವ ಕೋಣೆ ಮನೆ' ಎಂದು ಎಕ್ಸ್‌ನಲ್ಲಿನ ಪೋಸ್ಟ್‌ನಲ್ಲಿ ವಿವರಿಸಿದ್ದಾರೆ (ಟ್ವಿಟ್ಟರ್‌ ಅನ್ನು ಎಕ್ಸ್‌ ಎಂದು ಮರುನಾಮಕರಣ ಮಾಡಲಾಗಿದೆ.). SpaceX ನ ಅಭಿವೃದ್ಧಿ ಮತ್ತು ಪರೀಕ್ಷಾ ಸೈಟ್ ಟೆಕ್ಸಾಸ್‌ನಲ್ಲಿರುವುದರಿಂದ ಅಲ್ಲೇ 2 ಬೆಡ್‌ರೂಂ ಮನೆ ಖರೀದಿಸಿದ್ದಾರೆ.
ಇದನ್ನು ಓದಿ: ಥ್ರೆಡ್ಸ್‌ ಲಾಂಚ್‌ ಬಳಿಕ ಕಂಗಾಲಾದ ಎಲಾನ್ ಮಸ್ಕ್: ಟ್ವಿಟ್ಟರ್‌ ಖರೀದಿಗೆ ಒತ್ತಾಯಿಸಿದ ಕಾನೂನು ಸಂಸ್ಥೆ ಮೇಲೆ ಕೇಸ್‌!
ವಾಲ್ಟರ್ ಐಸಾಕ್ಸನ್ ಹಂಚಿಕೊಂಡಿರುವ ಫೋಟೋದಲ್ಲಿ ಅಡಿಗೆ ಮನೆ ಮತ್ತು ಮರದ ಟೇಬಲ್ ಹೊಂದಿರುವ ಲಿವಿಂಗ್‌ ರೂಮಿನ ಭಾಗವನ್ನು ತೋರಿಸುತ್ತದೆ. ಮರದ ಟೇಬಲ್ ಮೇಲೆ ಕುಳಿತು ಫೋನ್ ಕರೆಗಳನ್ನು ಮಾಡುತ್ತಿದ್ದ ಈ ಮನೆಯಲ್ಲಿ ನಾನು ಎಲಾನ್ ಮಸ್ಕ್ ಅವರನ್ನು ಭೇಟಿಯಾಗುತ್ತಿದ್ದೆ ಎಂದು ವಾಲ್ಟರ್ ಐಸಾಕ್ಸನ್ ಬಹಿರಂಗಪಡಿಸಿದ್ದಾರೆ.
ಈ ಮನೆಯು ಅಚ್ಚುಕಟ್ಟಾಗಿದ್ದರೂ ಅಸ್ತವ್ಯಸ್ತಗೊಂಡಂತೆ ಕಾಣುತ್ತದೆ. ಜಾಕೆಟ್ ಅನ್ನು ಕುರ್ಚಿಯ ಮೇಲೆ ನೇತುಹಾಕಲಾಗಿರುತ್ತದೆ. ಅಲ್ಲದೆ, ಈ ಫೋಟೋದಲ್ಲಿ ಮೇಜಿನ ಮೇಲೆ ಇರಿಸಲಾಗಿರುವ ರಾಕೆಟ್ ಕಲಾಕೃತಿಯನ್ನು ನೋಡಬಹುದು. ಇದರ ಜತೆಗೆ ಬಿಳಿ ಜಪಾನೀ ಕತ್ತಿ ಅಥವಾ ಕಟಾನಾವನ್ನೂ ನೋಡಬಹುದು.
ಇದನ್ನೂ ಓದಿ: ಮಾನವನ ಮೆದುಳಿಗೆ ಚಿಪ್‌ ಜೋಡಿಸಿ ಪ್ರಯೋಗ: ಎಲಾನ್ ಮಸ್ಕ್ ಕಂಪನಿಗೆ ಅಮೆರಿಕ ಅಸ್ತು
ಜಗತ್ತಿನ ನಂ. 1 ಶ್ರೀಮಂತ ಎಲಾನ್ ಮಸ್ಕ್ ತನ್ನ ಪ್ರಾಥಮಿಕ ನಿವಾಸವಾಗಿ ಅಂತಹ ಸಣ್ಣ ಮನೆಯನ್ನು ಏಕೆ ಖರೀದಿಸಲು ನಿರ್ಧರಿಸಿದರು ಅನ್ನೋ ಅನುಮಾನ ನಿಮ್ಮಲ್ಲೂ ಕಾಡುತ್ತಲ್ವಾ..? ಈ ಬಗ್ಗೆ ಐಸಾಕ್ಸನ್ ಬರೆದ ಎಲೋನ್ ಮಸ್ಕ್ ಅವರ ಜೀವನಚರಿತ್ರೆಯಲ್ಲಿ ಬಹಿರಂಗಗೊಳ್ಳುತ್ತದೆ ಎಂದು ತಿಳಿದುಬಂದಿದೆ.. ಈ ಪುಸ್ತಕವು ಈಗ Amazon ನಲ್ಲಿ ಪ್ರೀ - ಆರ್ಡರ್‌ಗೆ ಲಭ್ಯವಿದೆ ಮತ್ತು ಸೆಪ್ಟೆಂಬರ್ 12 ರಂದು ಮಾರಾಟ ಆರಂಭವಾಗಲಿದೆ.
ಈ ಮಧ್ಯೆ, ಜಗತ್ತಿನಾದ್ಯಂತ ನೆಟ್ಟಿಗರು ಈ ಫೋಟೋಗೆ ಪ್ರತಿಕ್ರಿಯೆ ನೀಡಿದ್ದಾರೆ. ಟೆಕ್ ಬಿಲಿಯನೇರ್ ಅಂತಹ ಚಿಕ್ಕ ಮತ್ತು ಸರಳವಾದ ಮನೆಯಲ್ಲಿ ವಾಸಿಸುತ್ತಿರುವುದನ್ನು ನೋಡಿ ಅನೇಕರು ಶಾಕ್‌ ಆಗಿದ್ದು, ಇತರರು ಅವರ ಆಲೋಚನೆಯನ್ನು ಮೆಚ್ಚಿದರು. ಒಬ್ಬ ಬಳಕೆದಾರರು ’’ನೀವು ಇಷ್ಟು ಕಡಿಮೆ ವಸ್ತುಗಳನ್ನು ಹೇಗೆ ಹೊಂದಬಹುದು?" ಎಂದು ಕಾಮೆಂಟ್ ಮಾಡಿದ್ದರೆ, ಇನ್ನೊಬ್ಬರು "ಇಷ್ಟು ಸರಳವಾದರೂ ತುಂಬಾ ಆಳವಾದದ್ದು" ಎಂದು ಬರೆದಿದ್ದಾರೆ.
ಇದನ್ನೂ ಓದಿ: ಜಗತ್ತಿನ ಸಿರಿವಂತರು ಬಡವರಾದ್ರೆ ಹೇಗೆ ಕಾಣ್ತಾರೆ ನೋಡಿ..!
ಇನ್ನೊಂದೆಡೆ, 2018 ರಲ್ಲಿ ಎಲಾನ್ ಮಸ್ಕ್ ತನ್ನ ಮಾಜಿ ಗರ್ಲ್‌ಫ್ರೆಂಡ್‌ ಗ್ರಿಮ್ಸ್ ಅವರನ್ನು ಹೇಗೆ ಭೇಟಿಯಾದರು ಎಂಬುದನ್ನು ಐಸಾಕ್ಸನ್ ಅವರ ಮತ್ತೊಂದು ಪೋಸ್ಟ್ ಬಹಿರಂಗಪಡಿಸಿದೆ. ಇದರ ಜೊತೆಗೆ, ಎಲಾನ್ ಮಸ್ಕ್ ಅವರು ಮಗುವಾಗಿದ್ದಾಗ ದಕ್ಷಿಣ ಆಫ್ರಿಕಾದಲ್ಲಿ ನಿಯಮಿತವಾಗಿ ಬೆದರಿಕೆಗೆ ಹಾಗೂ ಥಳಿತಕ್ಕೆ ಒಳಗಾಗುತ್ತಿದ್ದರು ಎಂದು ಪುಸ್ತಕವು ಬಹಿರಂಗಪಡಿಸುತ್ತದೆ.
ಹಾಗೆ, ಎಲಾನ್ ಮಸ್ಕ್ ಕೃತಕ ಬುದ್ಧಿಮತ್ತೆಯನ್ನು ಹೇಗೆ ನೋಡುತ್ತಾರೆ ಎಂಬುದರ ಕುರಿತು ಈ ಪುಸ್ತಕವು ಮಾತನಾಡುತ್ತದೆ. ಒಂದು ಪೋಸ್ಟ್‌ನಲ್ಲಿ, "ಎಲಾನ್ ಮಸ್ಕ್ ಅವರು AI ಯಂತ್ರಗಳನ್ನು ಮಾನವನ ಮನಸ್ಸಿಗೆ ಜೋಡಿಸುವುದೇ ಸುರಕ್ಷತೆಯ ಮಾರ್ಗ ಎಂದು ನಂಬಿದ್ದರು’’ ಎಂದು ಹೇಳುತ್ತದೆ. ಅಮೆಜಾನ್ ವೆಬ್‌ಸೈಟ್‌ನಲ್ಲಿ ಎಲಾನ್ ಮಸ್ಕ್ ಜೀವನಚರಿತ್ರೆಯ ಬೆಲೆ $28 (ಅಂದಾಜು ರೂ 2,300) ಆಗಿದೆ.
ಇದನ್ನೂ ಓದಿ: ಟ್ವಿಟ್ಟರ್‌ ಕಚೇರಿ ಬಾಡಿಗೆ ಕಟ್ಟೋಕೂ ದುಡ್ಡಿಲ್ಲದೆ ಕಾಫಿ ಮೇಕರ್, ಲೋಗೋವನ್ನೂ ಹರಾಜಿಗೆ ಹಾಕಿದ ಎಲಾನ್ ಮಸ್ಕ್..!
