ಚುನಾವಣೆಗೆ : ಬಿಜೆಪಿ ಅಭ್ಯರ್ಥಿ ಅತ್ಯಂತ ಶ್ರೀಮಂತ- ಕೈ ಅಭ್ಯರ್ಥಿ ಬಳಿ ಸ್ವಂತ ಮನೆಯೂ ಇಲ್ಲ
ಚುನಾವಣೆಗೆ ಸ್ಪರ್ಧಿಸಿರುವ ಅಭ್ಯರ್ಥಿಗಳ ಪೈಕಿ ಬಿಜೆಪಿ ಅಭ್ಯರ್ಥಿ ಶ್ರೀಮಂತರಾಗಿದ್ದರೆ, ಕಾಂಗ್ರೆಸ್ ಅಭ್ಯರ್ಥಿ ಬಳಿ ಒಂದು ಮನೆಯೂ ಇಲ್ಲ.
 )
Followರಾಮನಗರ (ಅ.12): ವಿಧಾನ ಪರಿಷತ್‌ನ ಬೆಂಗಳೂರು ಶಿಕ್ಷಕರ ಕ್ಷೇತ್ರದಿಂದ ಸ್ಪರ್ಧೆ ಬಯಸಿರುವ ಪ್ರಮುಖ ರಾಜಕೀಯ ಪಕ್ಷಗಳ ಅಭ್ಯರ್ಥಿಗಳ ಪೈಕಿ ಬಿಜೆಪಿಯ ಪುಟ್ಟಣ್ಣ ಅತಿ ಹೆಚ್ಚು ಆಸ್ತಿ ಘೋಷಿಸಿಕೊಂಡು ಸಿರಿವಂತ ಅಭ್ಯರ್ಥಿ ಎನಿಸಿಕೊಂಡಿದ್ದಾರೆ.
ಚುನಾವಣಾ ಆಯೋಗಕ್ಕೆ ಸಲ್ಲಿಸಿರುವ ಅಫಿಡೆವಿಟ್‌ನಲ್ಲಿ ಬಿಜೆಪಿ ಅಭ್ಯರ್ಥಿ ಪುಟ್ಟಣ್ಣ 44 ಕೋಟಿ 70 ಲಕ್ಷ ರು., ಜೆಡಿಎಸ್‌ ಅಭ್ಯರ್ಥಿ ಎ.ಪಿ.ರಂಗನಾಥ್‌ 10.43 ಕೋಟಿ ಹಾಗೂ ಕಾಂಗ್ರೆಸ್ ಅಭ್ಯರ್ಥಿ ಪ್ರವೀಣ್‌ ಪೀಟರ್‌ 22 ಲಕ್ಷ ಆಸ್ತಿ ಘೋಷಿಸಿಕೊಂಡಿದ್ದಾರೆ.
ಸಾಲಗಾರನಾದರು ಸಾಹುಕಾರ: ಪುಟ್ಟಣ್ಣರವರು 2018-19ನೇ ಸಾಲಿಗೆ 1 ಕೋಟಿ 25 ಲಕ್ಷ ರು.ಗಳಿದ್ದ ಆದಾಯವನ್ನು 2019-20ನೇ ಸಾಲಿಗೆ ವಾರ್ಷಿಕ 62 ಲಕ್ಷ ರುಪಾಯಿ ಎಂದು ಘೋಷಿಸಿಕೊಂಡಿದ್ದಾರೆ. ಚರಾಸ್ಥಿ 18,48,41,097 ರು., ಸ್ಥಿರಾಸ್ತಿಗಳ ಸದ್ಯದ ಮಾರುಕಟ್ಟೆಮೌಲ್ಯ 26,22,54,578 ರು. ಸೇರಿ ಒಟ್ಟು 44 ಕೋಟಿ 70 ಲಕ್ಷ ರು. ಮೌಲ್ಯದ ಆಸ್ತಿಯನ್ನು ಹೊಂದಿದ್ದಾರೆ. ಬ್ಯಾಂಕು, ಕ್ರೆಡಿಟ್‌ ಕೋ-ಆಪರೇಟಿವ್‌ ಸೊಸೈಟಿ ಹಾಗೂ ಖಾಸಗಿ ವ್ಯಕ್ತಿಗಳಿಂದ ಪುಟ್ಟಣ್ಣರವರು, 9,07,14,116 ರು. ಸಾಲ ಪಡೆದುಕೊಂಡಿದ್ದಾರೆ. ಚನ್ನಪಟ್ಟಣ ಹಾಗೂ ಬೆಂಗಳೂರು ಮಲ್ಲೇಶ್ವರಂನಲ್ಲಿ ಮನೆ ಹೊಂದಿದ್ದಾರೆ. ಚನ್ನಪಟ್ಟಣದಲ್ಲಿ ಮತ್ತು ಕೆಂಗೇರಿ ಹೋಬಳಿಯಲ್ಲಿ ಕೃಷಿ ಭೂಮಿ ಇದೆ. ಟೊಯೋಟಾ ಫಾರ್ಚುನರ್‌ ಕಾರು ಮತ್ತು ಮೆರ್ಸಿಡಿಸ್‌ ಬೆನ್‌್ಜ ಕಾರಿನ ಮಾಲೀಕರು. ಇವರ ಬಳಿ 550 ಗ್ರಾಂ ಚಿನ್ನ, 4 ಕೆ.ಜಿ. ಬೆಳ್ಳಿ ಆಭರಣ ಇದೆ ಎಂದು ಪುಟ್ಟಣ್ಣ ಘೋಷಿಸಿಕೊಂಡಿದ್ದಾರೆ.
10 ಕೋಟಿ ಆಸ್ತಿಯ ಒಡೆಯ: ಜೆಡಿಎಸ್‌ ಅಭ್ಯರ್ಥಿ ಎ.ಪಿ. ರಂಗನಾಥ್‌ ಅವರು ಚರಾಸ್ತಿ ಮೌಲ್ಯ 35,55,103 ರು., ಸ್ಥಿರಾಸ್ತಿಯ ಸದ್ಯದ ಮಾರುಕಟ್ಟೆಮೌಲ್ಯ 10,07,50,000 ರು. ಸೇರಿ ಒಟ್ಟು 10.43 ಕೋಟಿ ರುಪಾಯಿ ಆಸ್ತಿಯ ಒಡೆಯರಾಗಿದ್ದಾರೆ.
2018-19ನೇ ಸಾಲಿಗೆ 3.54 ಲಕ್ಷ ರು. ಆದಾಯವಿತ್ತು. ಅದು 2019-20ನೇ ಸಾಲಿಗೆ 5.99 ಲಕ್ಷ ರು.ಗಳಷ್ಟಾಗಿದೆ. ಬ್ಯಾಂಕುಗಳು ಸೇರಿದಂತೆ ವಿವಿಧ ಮೂಲಗಳಿಂದ ಪಡೆದಿರುವ 23,79,626 ರು. ಸಾಲವನ್ನು ಬಾಕಿ ಉಳಿಸಿಕೊಂಡಿದ್ದಾರೆ. ಕೆಂಗೇರಿ ಹೋಬಳಿ, ಸೇರಿದಂತೆ ವಿವಿಧೆಡೆ ಇವರಿಗೆ ಕೃಷಿ ಭೂಮಿ ಇದೆ. ಇನ್ನೋವಾ ಕಾರು, 150 ಗ್ರಾಂ ಚಿನ್ನ ಮತ್ತು 3.5 ಕೇಜಿ ಬೆಳ್ಳಿ ಆಭರಣಗಳಿವೆ ಎಂದು ಹೇಳಿಕೊಂಡಿದ್ದಾರೆ.
ನಮ್ಮಿಂದಲೇ ಯಡಿಯೂರಪ್ಪ ಸಿಎಂ ಆಗಿದ್ದು: ಎಂಟಿಬಿ ...
ಸ್ವಂತ ಮನೆಯೂ ಇಲ್ಲ: ಕಾಂಗ್ರೆಸ್ ಅಭ್ಯರ್ಥಿ ಆರ್‌ .ಪ್ರವೀಣ್‌ ಕುಮಾರ್‌ ಅವರ ಹೆಸರಿನಲ್ಲಾಗಲಿ ಅಥವಾ ಪತ್ನಿಯ ಹೆಸರಿನಲ್ಲಾಗಲಿ ಸ್ವಂತ ಮನೆಯನ್ನೂ ಹೊಂದಿಲ್ಲ. 22,37,683 ರು.ಮೌಲ್ಯದ ಚರಾಸ್ಥಿ ಹೊಂದಿದ್ದಾರೆ.
2019-18ನೇ ಸಾಲಿಗೆ 4.16 ಲಕ್ಷ ರು., 2018-19ನೇ ಸಾಲಿಗೆ 3.94 ಲಕ್ಷ ರು. ವಾರ್ಷಿಕ ಆದಾಯ ಘೋಷಿಸಿಕೊಂಡಿದ್ದಾರೆ. ಬ್ಯಾಂಕಿನಿಂದ ಪಡೆದಿರುವ 15 ಸಾವಿರದ 704 ರು. ಮಾತ್ರ ಸಾಲ ಮರುಪಾವತಿ ಮಾಡಬೇಕಾಗಿದೆ. ಟೊಯೋಟಾ ಇನ್ನೋವಾ ಕಾರು, 200 ಗ್ರಾಂ ಚಿನ್ನ ಮತ್ತು 1 ಕೆಜಿ ಬೆಳ್ಳಿ ಆಭರಣಗಳಿವೆ ಎಂದು ಪ್ರವೀಣ್‌ ಘೋಷಣೆ ಮಾಡಿಕೊಂಡಿದ್ದಾರೆ.
