ಜ್ಞಾನವ್ಯಾಪಿ ಮ್ಯಾಪ್ ಬದಲಾಯಿಸಲು ಸ್ಕೂಲ್‌ ಮನವಿ: ಸ್ಪಷ್ಟನೆ ನೀಡಿದ ಶಾಲೆ
* ಹೆಸರು ಬದಲಾವಣೆಗೆ ಹಳೆಯ ವಿದ್ಯಾರ್ಥಿಗಳಿಗೆ ಇ-ಮೇಲ್‌ ಕಳಿಸಿ ಪ್ರಮಾದ
* ಹೇಗೆ ಈ ಬದಲಾವಣೆ ಮಾಡಬೇಕೆಂಬ ಬಗ್ಗೆಯೂ ವಿವರಣೆಯೂ ನೀಡಿದ್ದ ಶಾಲೆ
* ಸ್ಪಷ್ಟನೆಯಲ್ಲಿ ತಪ್ಪಿಗೆ ಒಂದು ಕ್ಷಮೆ ಕೋರುವ ಸೌಜನ್ಯವನ್ನೂ ತೋರದ ಶಾಲೆ
Followಬೆಂಗಳೂರು(ಮೇ.25): ವಾರಣಾಸಿಯ ಜ್ಞಾನವಾಪಿ ಮಸೀದಿಯನ್ನು ‘ಜ್ಞಾನವಾಪಿ ಮಂದಿರ’ ಎಂದು ಗೂಗಲ್‌ ಮ್ಯಾಪ್‌ನಲ್ಲಿ ಹೆಸರು ಬದಲಾಯಿಸುವಂತೆ ತನ್ನ ಎಲ್ಲ ಹಳೆ ವಿದ್ಯಾರ್ಥಿಗಳಿಗೆ ಇ-ಮೇಲ್‌ ಕಳುಹಿಸಿ ವಿವಾದಕ್ಕೀಡಾಗಿರುವ ಬೆಂಗಳೂರಿನ ನ್ಯೂ ಹಾರಿಜನ್‌ ಪಬ್ಲಿಕ್‌ ಶಾಲೆ, ವಿವಾದದ ಬಳಿಕ ಎಚ್ಚೆತ್ತು ಕಣ್ತಪ್ಪಿನಿಂದ ಆದ ಪ್ರಮಾದ ಎಂದು ಸ್ಪಷ್ಟನೆ ನೀಡಿದೆ.
ಶಾಲೆಯ ಹಳೆ ವಿದ್ಯಾರ್ಥಿಗಳಿಗೆ ಇ-ಮೇಲ್‌ವೊಂದನ್ನು ಕಳುಹಿಸಿ ಜ್ಞಾನವಾಪಿ ಮಸೀದಿ ಬದಲು ಮಂದಿರ ಎಂದು ಗೂಗಲ್‌ ಮ್ಯಾಪ್‌ನಲ್ಲಿ ಹೆಸರು ಬದಲಿಸಲು ಸಲಹೆ ನೀಡಿ, ಹೇಗೆ ಈ ಬದಲಾವಣೆ ಮಾಡಬೇಕೆಂಬ ಬಗ್ಗೆಯೂ ವಿವರಣೆ ನೀಡಿತ್ತು. ಶಾಲೆಯ ಈ ಎಡವಟ್ಟನ್ನು ಸಾಮಾಜಿಕ ಜಾಲತಾಣದಲ್ಲಿ ಪ್ರಸ್ತಾಪಿಸಿದ ಕೆಲ ವಿದ್ಯಾರ್ಥಿಗಳು ಕಿಡಿ ಕಾರಿದ್ದಾರೆ. ಈ ಶಾಲೆ ದ್ವೇಷ ಬಿತ್ತುವ ಕೆಲಸ ಮಾಡುತ್ತಿದೆ. ಇಂತಹ ಶಾಲೆಯಲ್ಲಿ ನಾವು ಓದಿದ್ದೇವೆಯೇ ಎಂದು ನಾಚಿಕೆಯಾಗುತ್ತಿದೆ ಎಂದು ಅಸಮಾಧಾನ ಹೊರಹಾಕಿದ್ದಾರೆ. ಬಳಿಕ ಇದು ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು ಶಾಲೆಯ ವಿರುದ್ಧ ಎಲ್ಲೆಡೆ ಆಕ್ರೋಶ ಉಂಟಾಗಿದೆ.
ವಾರಾಣಸಿ: ಗ್ಯಾನವಾಪಿ ಮಸೀದಿಯಲ್ಲಿ ಮತ್ತೊಂದು ಶಿವಲಿಂಗ? ಕಾಶಿ ದೇವಸ್ಥಾನದ ಮಾಜಿ ಮಹಂತ್ ಹೇಳಿದ್ದಿಷ್ಟು
ಬಳಿಕ ಎಚ್ಚೆತ್ತ ಶಾಲೆಯ ಆಡಳಿತ ಮಂಡಳಿ ಶಾಲೆಯ ಇ-ಮೇಲ್‌ನಿಂದ ಕೆಲ ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯಾಗಿರುವ ಮಾಹಿತಿ ನಮ್ಮ ಗಮನಕ್ಕೆ ಬಂದಿದೆ. ಆದ್ಯತೆ ವಹಿಸಿ ಈ ಸಮಸ್ಯೆಯನ್ನು ಬಗೆಹರಿಸಲಾಗುತ್ತಿದೆ. ಇ-ಮೇಲ್‌ ಸರಿಯಾಗಿ ಪರಿಶೀಲಿಸದೆ ಕಳುಹಿಸಿರುವ ಪರಿಣಾಮ ಈ ತಪ್ಪಾಗಿದೆ. ಇದು ಕಣ್ತಪ್ಪಿನಿಂದ ಆದ ಪ್ರಮಾದ ಎಂದು ಸ್ಪಷ್ಟನೆ ನೀಡಿದೆ. ಆದರೆ, ಸ್ಪಷ್ಟನೆಯಲ್ಲಿ ತಪ್ಪಿಗೆ ಒಂದು ಕ್ಷಮೆ ಕೋರುವ ಸೌಜನ್ಯವನ್ನೂ ಶಾಲೆಯವರು ತೋರಿಲ್ಲ.
