ಆರ್ಸಿಬಿ ವಿಜಯೋತ್ಸವದ ಕಾಲ್ತುಳಿತದಲ್ಲಿ ಮೃತಪಟ್ಟವರ ಕುಟುಂಬಗಳಿಗೆ 25 ಲಕ್ಷ ರೂ. ಪರಿಹಾರ ನೀಡಲಾಗಿದೆ. ಚೆಕ್ಗಳನ್ನು ಸ್ವೀಕರಿಸುವಾಗ ಪೋಷಕರ ನೋವು ಮಿತಿಮೀರಿತ್ತು, ಮಕ್ಕಳನ್ನು ಕಳೆದುಕೊಂಡ ದುಃಖದಲ್ಲಿ ಕಣ್ಣೀರಿಟ್ಟರು.
ಕೋಲಾರ/ಮಂಡ್ಯ (ಜೂ. 9): ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಆರ್ಸಿಬಿ ವಿಜಯೋತ್ಸವದ ವೇಳೆ ನಡೆದ ದುರಂತ ಕಾಲ್ತುಳಿತದಲ್ಲಿ ಮೃತಪಟ್ಟವರ ಕುಟುಂಬಗಳಿಗೆ ರಾಜ್ಯ ಸರ್ಕಾರದಿಂದ ತಲಾ 25 ಲಕ್ಷ ರೂ. ನೆರವನ್ನು ನೀಡಲಾಗಿದೆ. ಆದರೆ ಈ ಪರಿಹಾರ ಚೆಕ್ಗಳನ್ನು ಸ್ವೀಕರಿಸುವಾಗ, ತಮ್ಮ ಮಗಳು ಮತ್ತು ಪುತ್ರನನ್ನು ಕಳೆದುಕೊಂಡ ಪೋಷಕರ ನೋವು ಮಿತಿಮೀರಿದ್ದು, ಅವರು ಕಣ್ಣೀರಿನಲ್ಲಿ ಮುಳುಗಿದರು. ನಮಗೆ ಸರ್ಕಾರದ ಪರಿಹಾರದ ಹಣ ಬೇಡ ಮಕ್ಕಳನ್ನು ವಾಪಸ್ ಕೊಡಿ ಎಂದು ತಂದೆ-ತಾಯಿ ಗೋಳಾಡಿದ ಘಟನೆಗಳು ನಡೆದಿವೆ.
ಕೋಲಾರದಲ್ಲಿ ಸಹನಾ ತಂದೆತಾಯಿ ಕಣ್ಣೀರಿನ ಸಾಂತ್ವನ:
ಆರ್ಸಿಬಿ ಸೆಲಬ್ರೇಷನ್ ವೇಳೆ ಕಾಲ್ತುಳಿತದಲ್ಲಿ ಸಾವಿಗೀಡಾದ ಕೋಲಾರ ಮೂಲದ 23 ವರ್ಷದ ಸಹನಾ ಅವರ ಮನೆಗೆ ಜಿಲ್ಲಾಧಿಕಾರಿ ಡಾ. ಎಂ.ಆರ್. ರವಿ ಭೇಟಿ ನೀಡಿ ರೂ. 25 ಲಕ್ಷ ಪರಿಹಾರ ಚೆಕ್ ವಿತರಿಸಿದರು. ಈ ಸಂದರ್ಭ ಸಹನಾ ತಂದೆ ಸುರೇಶ್ ಬಾಬು ಹಾಗೂ ತಾಯಿ ಮಂಜುಳಾ ಅವರು ಮಾತನಾಡಲು ಆಗದೇ, ಕೇವಲ ಕಣ್ಣೀರಿನಲ್ಲಿ ತಮ್ಮ ನೋವನ್ನು ತೋರುತ್ತಿದ್ದ ದೃಶ್ಯ ಎಲ್ಲರ ಮನ ಕಲಕುವಂತಿತ್ತು. ಹೆಚ್ಚುವರಿ ಜಿಲ್ಲಾಧಿಕಾರಿ ಮಂಗಳಾ, ತಹಶಿಲ್ದಾರ್ ನಯನ, ಎಎಸ್ಪಿ ರವಿಶಂಕರ್ ಸಹ ಡಿಸಿಗೆ ಜೊತೆಯಾಗಿದ್ದರು. ಕುಟುಂಬವು ಮೊದಲು "ಚೆಕ್ ಬೇಡ ಸರ್, ಮಗಳನ್ನೇ ಕಳೆದುಕೊಂಡೆವೆ" ಎಂದು ನಿರಾಕರಿಸಿದರೂ, ಸ್ನೇಹಿತರ ಮನವೊಲಿಕೆಯಿಂದ ಕೊನೆಗೆ ಪರಿಹಾರ ಚೆಕ್ ಸ್ವೀಕರಿಸಲಾಯಿತು.
Related Articles
ಮಂಡ್ಯದಲ್ಲಿ ಪೂರ್ಣಚಂದ್ರ ಕುಟುಂಬಕ್ಕೆ ಸಾಂತ್ವನ:
ಮಂಡ್ಯದ ಕೆ.ಆರ್.ಪೇಟೆ ತಾಲೂಕಿನ ರಾಯಸಮುದ್ರ ಗ್ರಾಮಕ್ಕೆ ತೆರಳಿದ ಕೃಷಿ ಸಚಿವ ಎನ್. ಚಲುವರಾಯಸ್ವಾಮಿ, ಕಾಲ್ತುಳಿತದಲ್ಲಿ ಮೃತಪಟ್ಟ ಪೂರ್ಣಚಂದ್ರ ಅವರ ಮನೆಗೆ ತೆರಳಿ ಪರಿಹಾರದ 25 ಲಕ್ಷ ರೂಗಳ ಚೆಕ್ ವಿತರಿಸಿದರು. ಈ ಸಂದರ್ಭದಲ್ಲಿ ಮಂಡ್ಯ ಜಿಲ್ಲಾಧಿಕಾರಿ ಡಾ. ಕುಮಾರ್ ಹಾಗೂ ಶಾಸಕ ಎಚ್.ಟಿ. ಮಂಜು ಉಪಸ್ಥಿತರಿದ್ದರು. ಸರ್ಕಾರಿ ಮಟ್ಟದಲ್ಲಿ ಮೊದಲು ಘೋಷಿಸಿದ್ದ 10 ಲಕ್ಷ ಪರಿಹಾರವನ್ನು ತದನಂತರ ಸಿಎಂ ಚರ್ಚೆಯಿಂದ 25 ಲಕ್ಷಕ್ಕೆ ಹೆಚ್ಚಿಸಲಾಗಿದೆ ಎಂದು ಸಚಿವರು ತಿಳಿಸಿದರು.
ಸಚಿವರು ಸಭೆಯಲ್ಲಿ ಹೇಳಿದಂತೆ, ಆರ್ಸಿಬಿ ಮತ್ತು ಕೆಎಸ್ಸಿಎ ಬೇರೆಬೇರೆಯಾಗಿ 10 ಲಕ್ಷ ಮತ್ತು 5 ಲಕ್ಷ ಪರಿಹಾರ ನೀಡುವುದಾಗಿ ತಿಳಿಸಿದ್ದಾರೆ. ಪೂರ್ಣಚಂದ್ರ ಅವರ ಕುಟುಂಬ ಸದಸ್ಯರಿಗೆ ಫುಡ್ ಪಾರ್ಕ್ನಲ್ಲಿ ಉದ್ಯೋಗ ನೀಡುವ ಸೂಚನೆ ಡಿಸಿಗೆ ನೀಡಲಾಗಿದೆ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಸಂಭವಿಸಿದ ಕಾಲ್ತುಳಿತ ದುರಂತದಲ್ಲಿ ಪ್ರಾಣವನ್ನೇಕಳೆದುಕೊಂಡ ಕುಟುಂಬಗಳಿಗೆ ಪರಿಹಾರ ಚೆಕ್ ನೀಡಿದರೂ, ಪೋಷಕರ ಕಣ್ಣೀರನ್ನು ಒಪ್ಪಿಸುವುದು ನಿಶ್ಚಯವಾಗಿಲ್ಲ. ಈ ಘಟನೆ ರಾಜ್ಯವ್ಯಾಪಿ ನೊಂದುಕೊಳ್ಳುವಂತಹ ಆಘಾತಕಾರಿ ಘಟನೆ ಎಂಬುದು ಸ್ಪಷ್ಟವಾಗಿದೆ.
ಮೃತರೆಲ್ಲರೂ ಯುವಜನರು:
ಕಾಲ್ತುಳಿತಕ್ಕೆ ಬಲಿಯಾದವರೆಲ್ಲರೂ 20-30 ವರ್ಷ ವಯಸ್ಸಿನವರಾಗಿದ್ದು, ಬಾಲಕಿ ದಿವ್ಯಾಂಶಿ (14), ದೊರೇಶಾ (32), ಭೂಮಿಕ್ (20), ಸಹನಾ (24), ಅಕ್ಷತಾ (27), ಮನೋಜ್ (33), ಶ್ರವಣ್ (20), ದೇವಿ (29), ಶಿವಲಿಂಗ (17) ಮತ್ತು ಚಿನ್ಮಯಿ (19) ಮತ್ತು ಪ್ರಜ್ವಲ್ (20). ಈ ಹಿಂದೆ ಕರ್ನಾಟಕ ಸರ್ಕಾರ ತಲಾ 10 ಲಕ್ಷ ರೂಪಾಯಿ ಪರಿಹಾರ ಘೋಷಿಸಿತ್ತು, ನಂತರ ಅದನ್ನು ಪ್ರತಿ ಕುಟುಂಬಕ್ಕೆ 25 ಲಕ್ಷ ರೂಪಾಯಿಗಳಿಗೆ ಹೆಚ್ಚಿಸಲಾಯಿತು.