ಶಾಲೆ, ಆನ್‌ಲೈನ್‌ ತರಗತಿ ಇಲ್ಲದಿದ್ರೂ ಜಿಲ್ಲೆಗೆ ರ‍್ಯಾಂಕ್!
* 10ನೇ ತರಗತಿಯಲ್ಲಿ ಶೇ.98.06 ಅಂಕ
* ಜಿಲ್ಲೆಗೇ ಪ್ರಥಮ ಸ್ಥಾನ ಪಡೆದು ಸಾಧನೆ
* ಶಾಲೆ, ಆನ್‌ಲೈನ್‌ ತರಗತಿ ಇಲ್ಲದಿದ್ರೂ ಜಿಲ್ಲೆಗೆ ರ‍್ಯಾಂಕ್
ಶ್ರೀನಗರ(ಜು.05): ಜಮ್ಮು-ಕಾಶ್ಮೀರದ ಉಧಾಂಪುರದ ವಿದ್ಯಾರ್ಥಿ ಮನ್‌ದೀಪ್‌ ಸಿಂಗ್‌ ಕೊರೋನಾ ಲಾಕ್‌ಡೌನ್‌ ಕಾರಣದಿಂದ ಶಾಲೆಗೂ ತೆರಳದೆ, ಆನ್‌ಲೈನ್‌ ಪಾಠದಲ್ಲಿ ಭಾಗಿಯಾಗಲೂ ಸಾಧ್ಯವಾಗದೆ 10ನೇ ತರಗತಿಯಲ್ಲಿ ಶೇ.98.06 ಅಂಕ ಪಡೆದಿದ್ದಾನೆ. ಈ ಮೂಲಕ ಜಿಲ್ಲೆಗೇ ಪ್ರಥಮ ಸ್ಥಾನ ಪಡೆದು ಸಾಧನೆ ಮಾಡಿದ್ದಾನೆ.
ರಾಜ್ಯ ಶಿಕ್ಷಣ ಮಂಡಳಿ ಭಾನುವಾರ 10ನೇ ತರಗತಿ ಫಲಿತಾಂಶ ಪ್ರಕಟಿಸಿದ್ದು, ಈ ಬಗ್ಗೆ ಪ್ರತಿಕ್ರಿಯಿಸಿರುವ ಮನ್‌ದೀಪ್‌, ‘ಲಾಕ್‌ಡೌನ್‌ನಿಂದಾಗಿ ಕಳೆದ ವರ್ಷ ಶಾಲೆಗೆ ಹೋಗಲು ಸಾಧ್ಯವಾಗಿರಲಿಲ್ಲ. ಮನೆಯಲ್ಲಿ ಫೋನ್‌, ಕಂಪ್ಯೂಟರ್‌ ಯಾವುದೂ ಇಲ್ಲದ ಕಾರಣ ಆನ್‌ಲೈನ್‌ ಕ್ಲಾಸ್‌ನಲ್ಲಿ ಪಾಲ್ಗೊಳ್ಳಲಾಗಲಿಲ್ಲ.
ಆದರೆ ಕುಟುಂಬಸ್ಥರು, ಶಿಕ್ಷಕರ ನೆರವು ಮತ್ತು ಶ್ರದ್ಧೆ ಓದಿನಿಂದಾಗಿ ಈ ಅಂಕ ಲಭಿಸಿದೆ’ ಎಂದಿದ್ದಾನೆ. ಓದಿನ ಜೊತೆಗೆ ಮನೆಗೆಲಸದಲ್ಲೂ ನೆರವಾಗುವ ಮನ್‌ದೀಪ್‌ ಭವಿಷ್ಯದಲ್ಲಿ ವೈದ್ಯರಾಗುವ ಕನಸು ಕಂಡಿದ್ದಾನೆ.
