ವಿದ್ಯಾರ್ಥಿಗಳ ಮಧ್ಯಾಹ್ನ ಊಟಕ್ಕೆ ದನದ ಮೇವು ಕಳಿಸಿದ ಪುಣೆ ನಗರ ಪಾಲಿಕೆ!
ವಿದ್ಯಾರ್ಥಿಗಳ ಮಧ್ಯಾಹ್ನ ಊಟಕ್ಕೆ ದನದ ಮೇವು ಕಳಿಸಿದ ಪುಣೆ ನಗರ ಪಾಲಿಕೆ!| 58 ವಿದ್ಯಾರ್ಥಿಗಳಿರುವ ಶಾಲೆಗೆ ದನದ ಆಹಾರಗಳ ಪೂರೈಕೆ| ಘಟನೆಗೆ ಕಾರಣರಾದವರ ವಿರುದ್ಧ ಕಠಿಣ ಕ್ರಮ: ಮೇಯರ್
ಪುಣೆ(ಮಾ.20): ದೇಶದ ಅತೀ ಶ್ರೀಮಂತ ನಗರ ಪಾಲಿಕೆಗಳಲ್ಲಿ ಒಂದಾಗಿರುವ ಮಹಾರಾಷ್ಟ್ರದ ಪುಣೆ ನಗರ ಪಾಲಿಕೆಯು ತನ್ನ ವ್ಯಾಪ್ತಿಯ ಶಾಲೆಯೊಂದಕ್ಕೆ ಮಧ್ಯಾಹ್ನದ ಊಟ ಕಳಿಸುವ ಬದಲಿಗೆ ದನದ ಪೌಷ್ಠಿಕಾಂಶ ಆಹಾರ ರವಾನಿಸಿ ಎಡವಟ್ಟು ಮಾಡಿದೆ.
ಈ ಬಗ್ಗೆ ಶುಕ್ರವಾರ ಮಾತನಾಡಿದ ಪುಣೆ ಮೇಯರ್ ಮುರಳೀಧರ್ ಮೊಹಲ್, ‘ವಿದ್ಯಾರ್ಥಿಗಳ ಮಧ್ಯಾಹ್ನದ ಊಟಕ್ಕೆ ದನದ ಮೇವು ಕಳಿಸಿರುವುದು ಅಕ್ಷಮ್ಯ. ಈ ಘಟನೆಗೆ ಕಾರಣರಾದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುತ್ತದೆ’ ಎಂದು ಹೇಳಿದ್ದಾರೆ.
ಆಗಿದ್ದೇನು?: ಕೊರೋನಾ ಲಾಕ್ಡೌನ್ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರದಾದ್ಯಂತ ಇರುವ ಶಾಲೆಗಳನ್ನು ಮುಚ್ಚಲಾಗಿದೆ. ಆದಾಗ್ಯೂ, ಶಾಲಾ ಮಕ್ಕಳಿಗೆ ಮಧ್ಯಾಹ್ನದ ಊಟ ಸರಬರಾಜು ಆಗುವಂತೆ ನೋಡಿಕೊಳ್ಳುವ ಜವಾಬ್ದಾರಿಯನ್ನು ಶಾಲೆಗಳಿಗೆ ವಹಿಸಲಾಗಿದೆ. ಈ ಪ್ರಕಾರ ರಾಜ್ಯದೆಲ್ಲೆಡೆ ಎಲ್ಲಾ ಮಕ್ಕಳಿಗೂ ಮಧ್ಯಾಹ್ನದ ಊಟಕ್ಕಾಗಿ ಆಹಾರ ಧಾನ್ಯಗಳನ್ನು ಪೂರೈಸಲಾಗುತ್ತಿದೆ. ಅದೇ ರೀತಿ ಪುಣೆ ನಗರ ಪಾಲಿಕೆ ವ್ಯಾಪ್ತಿಗೆ ಬರುವ 58 ವಿದ್ಯಾರ್ಥಿಗಳನ್ನು ಒಳಗೊಂಡ ಪಾಲಿಕೆ ಶಾಲೆಗೆ ಇತ್ತೀಚೆಗಷ್ಟೇ ದನಗಳಿಗೆ ಇಡಬಹುದಾದ ಪೋಷ್ಠಿಕಾಂಶದ ಆಹಾರಗಳನ್ನು ಪೂರೈಸಲಾಗಿದೆ.
ಈ ಆಹಾರದ ಪೊಟ್ಟಣಗಳನ್ನು ಕಂಡು ಶಾಲಾ ಸಿಬ್ಬಂದಿಯೇ ಒಂದು ಕ್ಷಣ ದಂಗಾಗಿದ್ದಾರೆ. ಈ ವಿಚಾರ ಭಾರತೀಯ ಆಹಾರ ಗುಣಮಟ್ಟಮತ್ತು ಸುರಕ್ಷತಾ ಪ್ರಾಧಿಕಾರ(ಎಪ್ಎಸ್ಎಸ್ಎಐ)ಕ್ಕೆ ಮುಟ್ಟಿದ್ದು, ದನದ ಆಹಾರವನ್ನು ವಶಕ್ಕೆ ಪಡೆದುಕೊಂಡಿದೆ