1997 ರಲ್ಲಿ ಮಹಿಳೆ ಮತ್ತು ಆಕೆಯ ಮಗ ಕಂದಾಯ ಅಧಿಕಾರಿಗಳ ಜೊತೆಗೂಡಿ ಖಾಸಗಿ ವ್ಯಕ್ತಿಗಳಿಗೆ ವಂಚನೆಯಿಂದ ಐಎಎಫ್ ರನ್ವೇ 'ಮಾರಾಟ' ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ. ಈಗ ಇಬ್ಬರ ವಿರುದ್ಧ ಎಫ್ಐಆರ್ ದಾಖಲಿಸಲಾಗಿದೆ.
ನವದೆಹಲಿ (ಜು.1): ದೇಶ ಎದುರಿಸಿದ ಅತ್ಯಂತ ಮಹತ್ವದ ಯುದ್ಧಗಳಾದ 1962, 1965 ಮತ್ತು 1971ರ ವಾರ್ ಸಮಯದಲ್ಲಿ ಭಾರತೀಯ ವಾಯುಪಡೆ (IAF) ಬಳಸುತ್ತಿದ್ದ ವಾಯುನೆಲೆಯನ್ನು ನಕಲಿ ದಾಖಲೆ ಬಳಸಿ ಅಮ್ಮ-ಮಗ ಮಾರಾಟ ಮಾಡಿರುವ ಅಪರೂಪದ ಘಟನೆ ನಡೆದಿದೆ. ಪಂಜಾಬ್ನ ನಿವೃತ್ತ ಕಂದಾಯ ಅಧಿಕಾರಿಯೊಬ್ಬರು ಈ ಬಗ್ಗೆ ದೂರು ನೀಡಿಲ್ಲದೆ ಹೋಗಿದ್ದರೆ, ಬಹುಶಃ ಈ ವಾಯುನೆಲೆ ಇತಿಹಾಸದ ಪುಸ್ತಕಗಳಿಂದ ಅಳಿಸಿಹೋಗಿರುತ್ತಿತ್ತು.
1997 ರಲ್ಲಿ ಕಂದಾಯ ಅಧಿಕಾರಿಗಳ ಸಹಕಾರದೊಂದಿಗೆ ಮಹಿಳೆ ಮತ್ತು ಆಕೆಯ ಮಗ ಈ ವಾಯುನೆಲೆಯನ್ನು ಖಾಸಗಿ ವ್ಯಕ್ತಿಗಳಿಗೆ ವಂಚನೆಯಿಂದ ಮಾರಾಟ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ. ಈಗ, 28 ವರ್ಷಗಳ ನಂತರ, ನ್ಯಾಯಾಲಯದ ಹಸ್ತಕ್ಷೇಪ ಮತ್ತು ದೀರ್ಘಕಾಲದ ತನಿಖೆಯ ನಂತರ ಉಷಾ ಅನ್ಸಾಲ್ ಮತ್ತು ಅವರ ಮಗ ನವೀನ್ ಚಂದ್ ವಿರುದ್ಧ ಎಫ್ಐಆರ್ ದಾಖಲಿಸಲಾಗಿದೆ.
ಪಾಕಿಸ್ತಾನ ಗಡಿಯ ಸಮೀಪದಲ್ಲಿರುವ ಫಿರೋಜ್ಪುರದ ಫಟ್ಟುವಾಲಾ ಗ್ರಾಮದಲ್ಲಿರುವ ಎರಡನೇ ಮಹಾಯುದ್ಧದ ಯುಗದ ವಾಯುನೆಲೆಯನ್ನು IAF ಅಡ್ವಾನ್ಸ್ ಲ್ಯಾಂಡಿಂಗ್ ಗ್ರೌಂಡ್ (ALG) ಆಗಿ ಬಳಸಿಕೊಳ್ಳಲಾಗಿತ್ತು.
Related Articles
ಐಪಿಸಿ ಸೆಕ್ಷನ್ 419 (ನಕಲಿ ವ್ಯಕ್ತಿ), 420 (ವಂಚನೆ), 465, 467 (ನಕಲಿ), 471 (ನಕಲಿ ದಾಖಲೆಗಳ ಬಳಕೆ) ಮತ್ತು 120-ಬಿ (ಕ್ರಿಮಿನಲ್ ಪಿತೂರಿ) ಅಡಿಯಲ್ಲಿ ಕುಲ್ಗರ್ಹಿ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿ ಡಿ ಮಂಜಿತ್ ಸಿಂಗ್ ತಿಳಿಸಿದ್ದಾರೆ. ಡೆಮ್ನಿವಾಲಾ ಗ್ರಾಮದ ನಿವಾಸಿಗಳಾದ ತಾಯಿ-ಮಗ ಜೋಡಿ ಪ್ರಸ್ತುತ ದೆಹಲಿಯಲ್ಲಿ ನೆಲೆಸಿದ್ದಾರೆ.
ನಿವೃತ್ತ ಕಂದಾಯ ಅಧಿಕಾರಿ ನಿಶಾನ್ ಸಿಂಗ್ ಅವರು ವಿಜಿಲೆನ್ಸ್ ಬ್ಯೂರೋಗೆ ದೂರು ನೀಡಿದ ನಂತರ ಈ ವಿಷಯ ಮೊದಲು ಬೆಳಕಿಗೆ ಬಂದಿತು. ಆದರೆ, ಪ್ರಾಥಮಿಕ ತನಿಖೆ ನಡೆಸಲಾಗಿದ್ದರೂ ವರ್ಷಗಳವರೆಗೆ ಅದರ ವಿರುದ್ಧ ಯಾವುದೇ ಗಂಭೀರ ಕ್ರಮ ಕೈಗೊಳ್ಳಲಿಲ್ಲ. 2021ರ ಏಪ್ರಿಲ್ 16ರಂದು, ಹಲ್ವಾರಾ ವಾಯುಪಡೆ ನಿಲ್ದಾಣದ ಕಮಾಂಡೆಂಟ್ ಫಿರೋಜ್ಪುರ ಉಪ ಆಯುಕ್ತರಿಗೆ ಔಪಚಾರಿಕವಾಗಿ ದೂರು ಸಲ್ಲಿಸಿ, ತನಿಖೆಗೆ ಒತ್ತಾಯಿಸಿದರು.
ಆದರೆ, ಸ್ಥಳೀಯ ಆಡಳಿತವು ಸಮಗ್ರ ವಿಚಾರಣೆ ನಡೆಸಿ ಕಂದಾಯ ದಾಖಲೆಗಳನ್ನು ಪರಿಶೀಲಿಸಲು ಐದು ವರ್ಷಗಳನ್ನು ತೆಗೆದುಕೊಂಡಿತು. ವಿಳಂಬದಿಂದ ಬೇಸತ್ತ ನಿಶಾನ್ ಸಿಂಗ್ ಪಂಜಾಬ್ ಮತ್ತು ಹರಿಯಾಣ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದರು. 2023 ಡಿಸೆಂಬರ್ 21ರಂದು, ನ್ಯಾಯಾಲಯವು ಫಿರೋಜ್ಪುರ ಉಪ ಆಯುಕ್ತರಿಗೆ ಆರು ತಿಂಗಳೊಳಗೆ ತನಿಖೆಯನ್ನು ಪೂರ್ಣಗೊಳಿಸಲು ನಿರ್ದೇಶಿಸಿತು.
ಇದಕ್ಕೆ ಪ್ರತಿಕ್ರಿಯೆಯಾಗಿ, ಜಿಲ್ಲಾಧಿಕಾರಿ ಮೂರು ಪುಟಗಳ ವರದಿಯನ್ನು ಸಲ್ಲಿಕೆ ಮಾಡಿದ್ದಾರೆ. 1958-59 ರ ಕಂದಾಯ ದಾಖಲೆಗಳ ಪ್ರಕಾರ ಭೂಮಿ ಇನ್ನೂ IAF ವಶದಲ್ಲಿದೆ ಎಂದು ಹೇಳಿದರು.ಆದರೆ, ನಿಶಾನ್ ಸಿಂಗ್ ವರದಿಯನ್ನು ಪ್ರಶ್ನಿಸಿ, ಪ್ರಮುಖ ವಿವರಗಳನ್ನು ಬಿಟ್ಟುಬಿಡಲಾಗಿದೆ ಮತ್ತು 2001 ರಲ್ಲಿ ಭೂ ರೂಪಾಂತರವನ್ನು ಖಾಸಗಿ ವ್ಯಕ್ತಿಗಳಿಗೆ ಮೋಸದಿಂದ ವರ್ಗಾಯಿಸಲಾಗಿದೆ ಎಂದು ಆರೋಪಿಸಿದರು. ಆಡಳಿತಾತ್ಮಕ ಪರಿಶೀಲನೆಯ ನಂತರ, ಮೇ 2025 ರಲ್ಲಿ ವಾಯುನೆಲೆಯನ್ನು ರಕ್ಷಣಾ ಸಚಿವಾಲಯಕ್ಕೆ ಮರುಸ್ಥಾಪಿಸಲಾಯಿತು.
"ಐತಿಹಾಸಿಕವಾಗಿ ಮಿಲಿಟರಿ ಬಳಕೆಗೆ ಮಹತ್ವದ್ದಾಗಿದ್ದ ಈ ಭೂಮಿಯನ್ನು ಮೋಸದಿಂದ ಮಾರಾಟ ಮಾಡಲಾಗಿತ್ತು, ಮತ್ತು ನಿರಂತರ ಒತ್ತಡ ಮತ್ತು ಕಾನೂನು ಕ್ರಮದಿಂದಾಗಿ ಸತ್ಯ ಹೊರಬಂದಿತು" ಎಂದು ನಿಶಾನ್ ಸಿಂಗ್ ವರದಿಗಾರರಿಗೆ ತಿಳಿಸಿದ್ದಾರೆ. ತನಿಖೆ ಇನ್ನೂ ಮುಂದುವರೆದಿದೆ. ಹೆಚ್ಚಿನ ಬಂಧನಗಳು ನಂತರ ನಡೆಯಲಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.