ಲಡಾಖ್‌ ಗಡಿಯಲ್ಲಿ ಭಾರತ-ಚೀನಾ ನಡುವೆ ಮತ್ತಷ್ಟು ಸಂಘರ್ಷ..?
ಪೂರ್ವ ಲಡಾಖ್‌ನಲ್ಲಿ ಹಲವು ಪ್ರದೇಶಗಳ ಹಕ್ಕಿನ ವಿಷಯದಲ್ಲಿ ಭಾರತ ಮತ್ತು ಚೀನಾ ನಡುವೆ ಹಲವು ವರ್ಷಗಳಿಂದ ವಿವಾದ ಇದೆ. ಅದರ ಬೆನ್ನಲ್ಲೇ 2020ರಲ್ಲಿ ನಡೆದ ಗಲ್ವಾನ್‌ ಬಿಕ್ಕಟ್ಟು ಈ ಸಂಘರ್ಷವನ್ನು ತೀವ್ರಗೊಳಿಸಿದೆ.
ನವದೆಹಲಿ (ಜನವರಿ 28, 2023): ಪೂರ್ವ ಲಡಾಖ್‌ನ 26 ಪಹರೆ ಕೇಂದ್ರಗಳ ಮೇಲಿನ ಹಿಡಿತವನ್ನು ಭಾರತೀಯ ಸೇನೆ ಕಳೆದುಕೊಂಡಿದೆ ಎಂಬ ಆತಂಕಕಾರಿ ವರದಿ ಬೆನ್ನಲ್ಲೇ, ಈ ಪ್ರದೇಶದಲ್ಲಿ ಭಾರತ ಮತ್ತು ಚೀನಾ ಸೇನೆಯ ನಡುವೆ ಮತ್ತಷ್ಟು ಸಂಘರ್ಷ ನಡೆಯುವ ಸಾಧ್ಯತೆ ಇದೆ ಎಂದು ಗುಪ್ತಚರ ವರದಿಯೊಂದು ಎಚ್ಚರಿಸಿದೆ.
ಪೂರ್ವ ಲಡಾಖ್‌ನಲ್ಲಿ (East Ladakh) ಹಲವು ಪ್ರದೇಶಗಳ ಹಕ್ಕಿನ ವಿಷಯದಲ್ಲಿ ಭಾರತ (India) ಮತ್ತು ಚೀನಾ (China) ನಡುವೆ ಹಲವು ವರ್ಷಗಳಿಂದ ವಿವಾದ ಇದೆ. ಅದರ ಬೆನ್ನಲ್ಲೇ 2020ರಲ್ಲಿ ನಡೆದ ಗಲ್ವಾನ್‌ (Galwan) ಬಿಕ್ಕಟ್ಟು ಈ ಸಂಘರ್ಷವನ್ನು ತೀವ್ರಗೊಳಿಸಿದೆ. ಅದರ ಬಳಿಕ ಚೀನಾ ಪೂರ್ವ ಲಡಾಖ್‌ನಲ್ಲಿ ತನ್ನ ಮಿಲಿಟರಿ (Military) ಮೂಲಸೌಕರ್ಯ ಹೆಚ್ಚಿಸಿಕೊಂಡಿದೆ. ಜೊತೆಗೆ ಕಳೆದ 2 ವರ್ಷಗಳಲ್ಲಿ ಚೀನಾ ಪದೇ ಪದೇ ಗಡಿಯಲ್ಲಿ ಕ್ಯಾತೆ ತೆಗೆಯುತ್ತಿದೆ. ಹೀಗಾಗಿ ಜಾಗದ ಮೇಲಿನ ಹಕ್ಕಿನ ಕುರಿತಾಗಿ ಮುಂದಿನ ದಿನಗಳಲ್ಲಿ ಉಭಯ ಸೇನೆಗಳ ನಡುವೆ ಇನ್ನಷ್ಟು ಸಂಘರ್ಷದ ಸಾಧ್ಯತೆ ದಟ್ಟವಾಗಿದೆ ಎಂದು ವರದಿ ಹೇಳಿದೆ.
ಇದನ್ನು ಓದಿ: ಗಡಿಯಲ್ಲಿ ಮತ್ತೆ ಚೀನಾ ತಗಾದೆ: ಭಾರತಕ್ಕೆ ಸೇರಿದ ಭಾಗದಲ್ಲಿ 200 ಟೆಂಟ್‌ಗಳ ನಿರ್ಮಾಣ
ಸ್ಥಳೀಯ ಪೊಲೀಸ್‌ ಗುಪ್ತಚರರು ಸಂಗ್ರಹಿಸಿರುವ ಮತ್ತು ಇತ್ತೀಚಿನ ದಿನಗಳಲ್ಲಿ ಉಭಯ ದೇಶಗಳ ನಡುವಿನ ಬಿಕ್ಕಟ್ಟಿನ ಸ್ವರೂಪ ಆಧರಿಸಿ ಈ ವರದಿಯನ್ನು ತಯಾರಿಸಲಾಗಿದ್ದು, ಅದನ್ನು ಇತ್ತೀಚೆಗೆ ಪ್ರಧಾನಿ ನರೇಂದ್ರ ಮೋದಿ ಅಧ್ಯಕ್ಷತೆಯಲ್ಲಿ ದೆಹಲಿಯಲ್ಲಿ ನಡೆದ ಹಿರಿಯ ಐಪಿಎಸ್‌ ಅಧಿಕಾರಿಗಳ ಸಭೆಯಲ್ಲಿ ಮಂಡಿಸಲಾಗಿದೆ ಎಂದು ಸುದ್ದಿಸಂಸ್ಥೆಯೊಂದು ವರದಿ ಮಾಡಿದೆ.
ಮೈನಸ್‌ 40 ಡಿಗ್ರಿ ಚಳೀಲಿ 3 ಈಡಿಯಟ್ಸ್‌ ಖ್ಯಾತಿ ವಾಂಗ್ಚುಕ್‌ ಉಪವಾಸ
ಲೇಹ್‌: ಲಡಾಖ್‌ ಪರಿಸರದಲ್ಲಿ ಉಂಟಾಗಿರುವ ಅಸಮತೋಲನಕ್ಕೆ ಕಳವಳ ವ್ಯಕ್ತಪಡಿಸಿ ಲಡಾಖ್‌ನ ಸಾಮಾಜಿಕ ಹೋರಾಟಗಾರ ಸೋನಂ ವಾಂಗ್ಚುಕ್‌ ನಡೆಸುತ್ತಿರುವ ಉಪವಾಸ ಸತ್ಯಾಗ್ರಹ ಶುಕ್ರವಾರ 2ನೇ ದಿನ ಪೂರೈಸಿದೆ. ಬಾಲಿವುಡ್‌ನ ‘3 ಈಡಿಯಟ್ಸ್‌’ಗೆ ಪ್ರೇರಣೆಯಾಗಿದ್ದ ವಾಂಗ್ಚುಕ್‌ ಇದೀಗ ಖಾರ್ದೋಂಗ್ಲಾ ಪಾಸ್‌ ಬಳಿ ಮೈಸನ್‌ 40 ಡಿಗ್ರಿ ಚಳಿಯಲ್ಲಿ ಉಪವಾಸ ಸತ್ಯಾಗ್ರಹ ನಡೆಸುತ್ತಿದ್ದಾರೆ. ಲಡಾಖ್‌ನಲ್ಲಿ ಹೆಚ್ಚಾಗಿರುವ ಔದ್ಯಮೀಕರಣದಿಂದಾಗಿ ಇಲ್ಲಿರುವ ನೀರ್ಗಲ್ಲುಗಳು ಅಳಿವಿನಂಚಿಗೆ ತಲುಪಿವೆ. ಒಂದು ವೇಳೆ ಇವು ನಾಶವಾದರೆ ಈ ಭಾಗಕ್ಕೆ ಭಾರಿ ಪ್ರಮಾಣದಲ್ಲಿ ಕುಡಿಯುವ ನೀರಿನ ಬರ ಎದುರಾಗಲಿದೆ ಎಂದು ಅವರು ಹೇಳಿದ್ದಾರೆ.
ಇದನ್ನೂ ಓದಿ: ಚೀನಾ ಗಡಿಗಳನ್ನು ಬಲಪಡಿಸಲು 2000 Drone ಖರೀದಿಸಲಿದೆ ಮೋದಿ ಸರ್ಕಾರ
