* ಎರಡೂ ಡೋಸ್ಗಳ ಮಧ್ಯೆ 3-4 ತಿಂಗಳ ಅಂತರವಿರಬೇಕು ಎಂಬುದು ಸರಿಯಲ್ಲ* ಲಸಿಕೆ ಅಭಾವದಿಂದ ಕೋವಿಶೀಲ್ಡ್ನ ಎರಡು ಡೋಸ್ಗಳ ನಡುವಿನ ಅಂತರ ವಿಸ್ತರಣೆ * ದೇಶದಲ್ಲಿ ಲಸಿಕೆಗಳ ಕೊರತೆ ಕಾರಣದಿಂದಾಗಿ ಭಾರತ ಸರ್ಕಾರ ಕೋವಿಶೀಲ್ಡ್ ಲಸಿಕೆಯ ಅಂತರವನ್ನು 12-16 ವಾರಗಳಿಗೆ ವಿಸ್ತರಿಸಿದೆ
ಮುಂಬೈ(ಆ.15): ಲಸಿಕೆ ಅಭಾವದಿಂದ ಕೋವಿಶೀಲ್ಡ್ನ ಎರಡು ಡೋಸ್ಗಳ ನಡುವಿನ ಅಂತರ ವಿಸ್ತರಣೆ ಮಾಡಲಾಗಿದೆ ಎಂದು ಕೋವಿಶೀಲ್ಡ್ ತಯಾರಿ ಸೀರಂ ಸಂಸ್ಥೆಯ ಅಧ್ಯಕ್ಷ ಸೈರಸ್ ಪೂನಾವಾಲಾ ಹೇಳಿದ್ದಾರೆ.
ಇಲ್ಲಿ ಸಭೆಯೊಂದರಲ್ಲಿ ಮಾತನಾಡಿದ ಪೂನಾವಾಲಾ, ಎರಡೂ ಡೋಸ್ಗಳ ಮಧ್ಯೆ 3-4 ತಿಂಗಳ ಅಂತರವಿರಬೇಕು ಎಂಬುದು ಸರಿಯಲ್ಲ. ಆದರೆ ಕೋವಿಡ್ನಿಂದ ಗುಣಮುಖರಾದ ವ್ಯಕ್ತಿಯು 3-4 ತಿಂಗಳ ಅಂತರದಲ್ಲಿ ಲಸಿಕೆ ಪಡೆಯಬಹುದು. ಸಾಮಾನ್ಯ ಪ್ರಕರಣಗಳಲ್ಲಿ ಇದು ಮರುಕಳಿಸಬಾರದು. ಆದಾಗ್ಯೂ, ದೇಶದಲ್ಲಿ ಲಸಿಕೆಗಳ ಕೊರತೆ ಕಾರಣದಿಂದಾಗಿ ಭಾರತ ಸರ್ಕಾರ ಕೋವಿಶೀಲ್ಡ್ ಲಸಿಕೆಯ ಅಂತರವನ್ನು 12-16 ವಾರಗಳಿಗೆ ವಿಸ್ತರಿಸಲಾಗಿತ್ತು ಎಂದರು.
ಅಲ್ಲದೆ ಎರಡೂ ಡೋಸ್ಗಳನ್ನು ಪಡೆದ ವ್ಯಕ್ತಿಯಲ್ಲಿ 6 ತಿಂಗಳ ಬಳಿಕ ಕೋವಿಡ್ ವಿರುದ್ಧ ಹೋರಾಡುವ ಪ್ರತಿಕಾಯಗಳ ಸಾಮರ್ಥ್ಯ ಕುಸಿಯುತ್ತದೆ. ಹೀಗಾಗಿ ಎರಡೂ ಡೋಸ್ ಪಡೆದ 6 ತಿಂಗಳ ಬಳಿಕ 3ನೇ ಡೋಸ್(ಬೂಸ್ಟರ್) ಅನ್ನು ಪಡೆಯಬಹುದು ಎಂದರು.
ಈ ಹಿಂದೆ ವೈಜ್ಞಾನಿಕ ಕಾರಣ ಹಿನ್ನೆಲೆಯಲ್ಲಿ 4-8 ವಾರಗಳ ಅಂತರದಲ್ಲಿ ಪಡೆಯಬಹುದಾಗಿದ್ದ ಕೋವಿಶೀಲ್ಡ್ ಲಸಿಕೆಯ 2 ಡೋಸ್ಗಳ ಅಂತರವನ್ನು 12-16 ವಾರಗಳಿಗೆ ವಿಸ್ತರಿಸಲಾಗಿದೆ ಎಂದು ಕೇಂದ್ರ ಸರ್ಕಾರ ಹೇಳಿತ್ತು.
