ಭೂತಾನ್ನಲ್ಲಿ ಚೀನಾ ಡೋಕ್ಲಾಂ ಕಿರಿಕ್: ಭಾರತದ ಭದ್ರತೆಗೆ ಅಪಾಯ!
* ಡೋಕ್ಲಾಂ ಪ್ರದೇಶದ ಮೇಲೆ ಹಕ್ಕು ಸಾಧಿಸಲು ಚೀನಾ ಈ ಕುತಂತ್ರ
* ಭೂತಾನ್ ಗಡಿಯಲ್ಲಿ ಚೀನಾ ಕಾಮಗಾರಿ: ಭಾರತಕ್ಕೆ ಆಪತ್ತು
* 2 ಅಂತಸ್ತಿನ ಕಟ್ಟಡ ಸೇರಿ 200ಕ್ಕೂ ಹೆಚ್ಚು ಕಟ್ಟಡಗಳ ನಿರ್ಮಾಣ
ನವದೆಹಲಿ(ಜ.13): ವಿವಾದಿತ ಭೂತಾನ್ ಗಡಿ ಪ್ರದೇಶದ 6 ಕಡೆಗಳಲ್ಲಿ 2 ಅಂತಸ್ತಿನ ಕಟ್ಟಡಗಳು ಸೇರಿದಂತೆ ಒಟ್ಟಾರೆ 200ಕ್ಕೂ ಹೆಚ್ಚು ಕಟ್ಟಡಗಳ ನಿರ್ಮಾಣ ಕಾಮಗಾರಿಯನ್ನು ಚೀನಾ ಮತ್ತಷ್ಟುತ್ವರಿತಗೊಳಿಸಿದೆ. ಭೂತಾನ್ ಗಡಿಯಲ್ಲಿನ ಚೀನಾದ ಈ ಚಟುವಟಿಕೆಗಳನ್ನು ಖಚಿತಪಡಿಸುವ ಕ್ಯಾಪೆಲಾ ಸ್ಪೇಸ್ ಮತ್ತು ಪ್ಲಾನೆಟ್ ಲ್ಯಾಬ್ಸ್ನ ಉಪಗ್ರಹ ಫೋಟೋಗಳು ಅಮೆರಿಕದ ‘ಹಾಕ್ಐ360’ ದತ್ತಾಂಶ ವಿಶ್ಲೇಷಣಾ ಸಂಸ್ಥೆಗೆ ಲಭ್ಯವಾಗಿದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ಸುದ್ದಿ ಸಂಸ್ಥೆಯೊಂದು ವರದಿ ಮಾಡಿದೆ.
ಚೀನಾದ ಈ ಅಭಿವೃದ್ಧಿ ಕಾಮಗಾರಿಗಳು 2017ರಲ್ಲಿ ಭಾರತ ಮತ್ತು ಚೀನಾ ಯೋಧರ ಮಧ್ಯೆ 2 ತಿಂಗಳ ಶೀತಲ ಸಮರಕ್ಕೆ ಕಾರಣವಾಗಿದ್ದ ಡೋಕ್ಲಾಂ ಪ್ರದೇಶಕ್ಕೆ ಕೇವಲ 9 ರಿಂದ 27 ಕಿ.ಮೀ ಇದೆ. ಹೀಗಾಗಿ ಡೋಕ್ಲಾಂನ ಚಿಕನ್ ನೆಕ್ ಎಂದೇ ಖ್ಯಾತವಾಗಿರುವ ಪ್ರದೇಶದ ಮೇಲೆ ತನ್ನ ಸ್ವಾಮ್ಯ ಸಾಧಿಸಲು ಚೀನಾ ಈ ನಿರ್ಮಾಣ ಕಾಮಗಾರಿಗಳನ್ನು ಕೈಗೊಂಡಿರಬಹುದು ಎಂಬ ಅನುಮಾನಗಳು ವ್ಯಕ್ತವಾಗಿವೆ.
ಭೂತಾನ್ನ ಪಶ್ಚಿಮ ಗಡಿಯ ಕೆಲವು ಸ್ಥಳಗಳಲ್ಲಿ ರಸ್ತೆ ಮತ್ತು ರೈಲು ಹಳಿಗಳು ನಿರ್ಮಾಣ ಮತ್ತು ಸ್ಥಳಗಳ ಶುಚೀಕರಣಗಳ ಮೂಲಕ ಚೀನಾ ನಿರ್ಮಾಣ ಕಾಮಗಾರಿ ಚಟುವಟಿಕೆಗಳನ್ನು 2020ರಿಂದಲೇ ಆರಂಭಿಸಿದ್ದು, 2021ರಲ್ಲಿ ಈ ಕಾಮಗಾರಿಗಳಿಗೆ ಹೆಚ್ಚು ಚುರುಕು ನೀಡಿರುವುದು ಉಪಗ್ರಹ ಫೋಟೋಗಳಿಂದ ದೃಢಪಟ್ಟಿದೆ. ಅಲ್ಲದೆ ಈ ಬಗ್ಗೆ ಅಧ್ಯಯನ ನಡೆಸಿದ ಇತರೆ ಇಬ್ಬರು ತಜ್ಞರು, ಚೀನಾ ಕೈಗೊಂಡಿರುವ ಕಾಮಗಾರಿಗಳು ಭೂತಾನ್ ಮತ್ತು ಚೀನಾ ಮಧ್ಯೆ ವಿವಾದಕ್ಕೆ ಕಾರಣವಾದ ಸುಮಾರು 110 ಚದರ ಕಿ.ಮೀ ವ್ಯಾಪ್ತಿಯ ಭಾಗದಲ್ಲೇ ಇವೆ ಎಂದು ಹೇಳಿದ್ದಾರೆ.