ಕಿರುತೆರೆ ಆಯ್ತು, ಬೆಳ್ಳಿತೆರೆಯಲ್ಲೂ ಮೋಡಿ ಮಾಡಲು ‘ಕನ್ಯಾಕುಮಾರಿ’ ಆಸಿಯಾ ರೆಡಿ!
ಕನ್ನಡ ಕಿರುತೆರೆಗೂ - ಹಿರಿತೆರೆಗೂ ಆಳವಾದ ಸಂಬಂಧ ಇದೆ. ಹಲವಾರು ಸ್ಟಾರ್ ನಟರು ತಮ್ಮ ನಟನೆಯ ಜರ್ನಿ ಆರಂಭಿಸಿದ್ದೇ ಈ ಕಿರುತೆರೆಯಿಂದ, ಇತ್ತೀಚೆಗೂ ಹಲವಾರು ಕಿರುತೆರೆ ನಟಿಯರು ಚಿತ್ರರಂಗದಲ್ಲಿ ಕಾಣಿಸಿಕೊಂಡಿದ್ದಾರೆ, ಅದಕ್ಕೀಗ ಹೊಸ ಸೇರ್ಪಡೆ ಆಸಿಯಾ ಫಿರ್ದೋಸೆ.
ಆಸಿಯಾ ಫಿರ್ದೋಸೆ ಅಂದ್ರೆ ಹೆಚ್ಚಿನ ಜನಕ್ಕೆ ಯಾರು ಎಂದು ಗೊತ್ತಾಗುವುದೇ ಇರಬಹುದು, ಆದರೆ ಕನ್ನಿಕಾ ಎಂದರೆ ಕಿರುತೆರೆಯ (small screen) ಪ್ರತಿಯೊಬ್ಬರಿಗೂ ಗೊತ್ತಿರೋ ಹೆಸರು. ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿದ್ದ ಕನ್ಯಾಕುಮಾರಿ ಧಾರಾವಾಹಿಯಲ್ಲಿ ಕನ್ನಿಕಾ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವ ನಟಿ ಆಸಿಯಾ ಫಿರ್ದೋಸೆ.
ಬಿಬಿಎ ಪದವಿಧರೆ ಆಗಿರುವ ಆಸಿಯಾ ಫಿರ್ದೋಸೆ ಆಪ್ ಆ್ಯಕ್ಟಿಂಗ್ ಸಂಸ್ಥೆಯಲ್ಲಿ ನಟನೆ ಕಲಿತು ಬಳಿಕ ಮಾಡೆಲಿಂಗ್ (Modeling), ನಂತರ ಸಿರಿಯಲ್ ನಲ್ಲೂ ಸಣ್ಣಪುಟ್ಟ ಪಾತ್ರಗಳಲ್ಲಿ ಕನ್ಯಾಕುಮಾರಿ ಧಾರವಾಹಿಗೂ ಮುನ್ನ ಅಭಿನಯಿಸಿದ್ದರು.
ಇವರು ಬಿಬಿಎ ಕೊನೆ ವರ್ಷದಲ್ಲಿರುವಾಗ 'ನಾನು ನನ್ನ ಕನಸು' ಧಾರಾವಾಹಿಯಲ್ಲಿ ಸಣ್ಣ ಪಾತ್ರದಲ್ಲಿ ನಟಿಸುವ ಅವಕಾಶ ಪಡೆದುಕೊಂಡರು. ಆದರೆ ಕೊರೋನಾ ಲಾಕ್ಡೌನ್ನಿಂದ ಆ ಧಾರಾವಾಹಿ ಸಂಪೂರ್ಣವಾಗಿ ನಿಂತುಬಿಟ್ಟಿತ್ತು. ಇದಾದ ಮೇಲೆ ಇವರು ನಿರೂಪಕಿಯಾಗಿ (anchor), ನಂತರ ಮಾಡಲಿಂಗ್ ನಲ್ಲಿ ಹೆಚ್ಚಾಗಿ ಕಾಣಿಸಿಕೊಂಡರು.
ಕನ್ಯಾಕುಮಾರಿ ಧಾರಾವಾಹಿಗೆ ಆಯ್ಕೆಯಾಗಿದ್ದೇ ವಿಚಿತ್ರ ಸನ್ನಿವೇಶದ ಮೂಲಕ. ವಿಲನ್ ಯಾಮಿನಿ ಪಾತ್ರಕ್ಕೆ ಮೊದಲು ಆಡಿಷನ್ ಕೊಟ್ಟು ವಿಫಲವಾಗಿ ಆಸಿಯಾ ಸುಮ್ಮನಾಗಿದ್ದರಂತೆ. ಆದರೆ ನಂತರ ಟೀಮಿನಿಂದ ನಾಯಕಿ ಪಾತ್ರಕ್ಕೆ ಆಡಿಷನ್ ಕೊಡುವಂತೆ ಹೇಳಿದಾಗ, ಆ ಪಾತ್ರಕ್ಕೆ ಆಡೀಶನ್ ಕೊಟ್ಟು, ಕೊನೆಗೆ ಹಲವು ಜನರ ಮಧ್ಯೆ ಆಸಿಯಾ ಆಯ್ಕೆಯಾಗಿದ್ದರು.
ಆಸಿಯಾ ತಮ್ಮ ಮುಗ್ಧ ಅಭಿನಯದಿಂದಲೇ ಜನ ಮನ ಗೆಲ್ಲುವಲ್ಲಿ ಯಶಸ್ವಿಯಾಗಿದ್ದರು. ಕನ್ನಿಕಾ ಮತ್ತು ಚರಣ್ ಕೆಮೆಸ್ಟ್ರಿಯೂ ಜನರಿಗೆ ಇಷ್ಟವಾಗಿತ್ತು. ಆಸಿಯಾ ಫಿರ್ದೋಸೆ ಇನ್ಸ್ಟಾಗ್ರಾಂನಲ್ಲಿ 1 ಲಕ್ಷ ಫಾಲೋವರ್ಸ್ನ ಹೊಂದಿದ್ದಾರೆ. ಧಾರಾವಾಹಿ, ಫೋಟೋಶೂಟ್ ಮತ್ತು ಮಾಡಲಿಂಗ್ ಮಾಹಿತಿಗಳನ್ನು ಹಂಚಿಕೊಳ್ಳುತ್ತಾರೆ.
ಇದೀಗ ಆಸಿಯಾ ಸಿನಿಮಾದಲ್ಲಿ ಮಿಂಚಲು (ready to shiney in big screen) ರೆಡಿಯಾಗಿದ್ದಾರೆ. ಇವರು ಎಲ್. ಭರತ್ ಕಥೆ, ಚಿತ್ರಕಥೆ ಬರೆದು ನಿರ್ದೆಶಿಸಿರುವ ಮೊದಲ ಚಿತ್ರ ‘ದ್ವಂದ್ವ’ದಲ್ಲಿ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಇದೊಂದು ಪೊಲಿಟಿಕಲ್ ಡ್ರಾಮ ಜೊತೆಗೆ ಸೈನ್ಸ್ ಫಿಕ್ಷನ್ ಎಳೆ ಹೊಂದಿರುವ ಚಿತ್ರ.
ಈ ಚಿತ್ರ 12 ಗಂಟೆಗಳ ನಡುವೆ ನಡೆಯುವ ಕಥೆಯನ್ನು ಹೊಂದಿದೆ. ಹೈಪರ್ ಟೈಮೀಸಿಯಾ ಎಂಬ ಅಪರೂಪದ ಕಾಯಿಲೆ ಇರುವ ಹುಡುಗಿಯು ಒಮ್ಮೆ ಏನನ್ನಾದರೂ ನೋಡಿದರೆ, ಹತ್ತಿಪ್ಪತ್ತು ವರ್ಷಗಳ ಕಾಲ ಅದನ್ನು ಜ್ಞಾಪಕದಲ್ಲಿಟ್ಟುಕೊಳ್ಳುವ ಶಕ್ತಿ ಹೊಂದಿರುತ್ತಾಳೆ. ಇದರಿಂದ ಏನೆಲ್ಲಾ ನಡೆಯುತ್ತದೆ ಅನ್ನೋದು ಕಥೆಯಾಗಿದೆ.
ಈ ಚಿತ್ರದಲ್ಲಿ ತಿಲಕ್ ಶೇಖರ್ ನಾಯಕನಾಗಿ ನಟಿಸುತ್ತಿದ್ದಾರೆ, ಅವರಿಗೆ ನಾಯಕಿಯರಾಗಿ ಆಸೀಯಾ ಫಿರ್ದೋಸೆ ಮತ್ತು ನಯನಾ ತೆರೆ ಹಂಚಿಕೊಂಡಿದ್ದಾರೆ. ಚಿತ್ರೀಕರಣ ಬಹುತೇಕ ಮುಗಿದಿದ್ದು, ಶೀಘ್ರದಲ್ಲಿ ತೆರೆ ಮೇಲೆ ಬಂದು ನಿಮ್ಮನ್ನು ರಂಜಿಸಲು ರೆಡಿಯಾಗ್ತಿದ್ದಾರೆ ಆಸಿಯಾ.
ಅಷ್ಟೇ ಅಲ್ಲ ಆಸಿಯಾ ನಟ ಕೋಮಲ್ ನಟಿಸುತ್ತಿರುವ ‘ಕಾಲಾಯ ತಸ್ಮಯೇ ನಮಃ’ ಚಿತ್ರದಲ್ಲೂ ಕೋಮಲ್ ಗೆ ನಾಯಕಿಯಾಗಿ (heroine) ನಟಿಸುತ್ತಿದ್ದಾರೆ. ಕಿರುತೆರೆಯಲ್ಲಿ ಮಿಂಚಿದಂತೆ ಆಸಿಯಾ ಹಿರಿತೆರೆಯಲ್ಲೂ ಹೆಸರು ಮಾಡುತ್ತಾರಾ? ಜನರನ್ನು ರಂಜಿಸಲು ಯಶಸ್ವಿಯಾಗ್ತಾರ? ಅನ್ನೋದನ್ನು ಕಾದು ನೋಡಬೇಕು.