ದೇಶದಲ್ಲೇ ಅತೀ ಹೆಚ್ಚು ಸಂಭಾವನೆ ಪಡಿಯುವ ಸೀರಿಯಲ್ ನಟಿ: ಅನುಪಮಾ ಖ್ಯಾತಿಯ ರೂಪಾಲಿ ರಿಯಲ್ ಲೈಫ್‌ನಲ್ಲಿ ಹೇಗೆ?

ಇತ್ತೀಚೆಗೆ ಅವರು ಪಿಂಕ್‌ವಿಲ್ಲಾದೊಂದಿಗೆ ತಮ್ಮ ವೈಯಕ್ತಿಕ ಜೀವನದ ಬಗ್ಗೆ ಮಾತನಾಡಿದ್ದು, ಹಲವು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ಅಶ್ವಿನ್ ಕೆ ವರ್ಮಾ ಅವರನ್ನು ವಿವಾಹವಾಗಿರುವ ರೂಪಾಲಿ ಗಂಗೂಲಿ ಅವರಿಗೆ ರುದ್ರಾಂಶ್ ಎಂಬ ಪುತ್ರನಿದ್ದಾನೆ. ವಿವಾಹ ಹಾಗೂ ಮಗನ ಜನನದ ನಂತರ ಆರೂವರೆ ವರ್ಷಗಳ ಕಾಲ ನಟನೆಯಿಂದ ಬ್ರೇಕ್ ತೆಗೆದುಕೊಂಡಿದ್ದ ಅನುಪಮಾ ಆ ಆರು ವರ್ಷಗಳನ್ನು ಸಂಪೂರ್ಣ ತಮ್ಮ ಕುಟುಂಬ ಪತಿ ಮಗನಿಗಾಗಿ ಮೀಸಲಿಟ್ಟಿದ್ದರು. 

ಲಿಂಗ ಸಮಾನತೆ ಬಗ್ಗೆ ಮಾತನಾಡಿದ ಅನುಪಮಾ,  ನಾನು ಆರೂವರೆ ವರ್ಷಗಳ ಕಾಲ ಕೆಲಸದಿಂದ ಬ್ರೇಕ್‌ ಪಡೆದು ಕುಟುಂಬದಲ್ಲಿ ಬೆರೆತು ಹೋಗಿದ್ದೆ. ಭಾರತದಲ್ಲಿ ಇದು ಪ್ರತಿಯೊಬ್ಬ ಮಹಿಳೆಯೂ ಬದುಕುವ ರೀತಿ. ನಾನು ಕೇವಲ ಗೃಹಿಣಿಯಾಗಿದ್ದ ಈ  ಆರೂವರೆ ವರ್ಷಗಳ ಕಾಲ ನನ್ನ ಬದುಕು ನನಗೆ ಹೆಚ್ಚು ಒತ್ತಡದಿಂದ ಕೂಡಿದ, ಹೆಚ್ಚು ಕೆಲಸದಿಂದ ಕೂಡಿದ ದಿನಗಳಾಗಿದ್ದವು. 

ಮನೆಯಲ್ಲಿದ್ದ ಅಷ್ಟು ದಿನವೂ ನಾನು ಎಲ್ಲರೂ ಏಳುವ ಮೊದಲೇ ಬೇಗ ಏಳುತ್ತಿದ್ದೆ. ಬೇಗ ಏಳಬೇಕು ಅಂತ ಯಾರೂ ನನಗೆ ಹೇಳಿರಲಿಲ್ಲ. ನನ್ನ ಪತಿ ನಿಜವಾಗಿಯೂ ನನ್ನನ್ನು ತುಂಬಾ ಪ್ರೀತಿಸುತ್ತಾರೆ. ಆದರೆ ಗೃಹಿಣಿ ಎನಿಸಿದ ಕೂಡಲೇ ಈ ಜೀವನಶೈಲಿ ನಮಗೆ ಸಹಜವಾಗಿಯೇ ಬರುತ್ತದೆ.  ನಾವು ಅದನ್ನು ಮಾಡಲೇಬೇಕು ಎಂದು ನಮಗೆ ನಾವೇ ಶರತ್ತು ವಿಧಿಸಿಕೊಳ್ಳುತ್ತೇವೆ ಎಂದರು.

ಮನೆಗೆಲಸವೆಲ್ಲವನ್ನು ಹೆಣ್ಣೆ ಮಾಡಬೇಕೆಂಬ  ನಿಯಮಗಳನ್ನು ಮೀರಿ ತನ್ನ ಪತಿ ಯಾವುದೇ ತ್ರಾಸವಿಲ್ಲದೇ ಮನೆಯ ಎಲ್ಲಾ ಕೆಲಸಗಳನ್ನು ಮಾಡುತ್ತಾರೆ. ಅಡುಗೆ ಮಾಡುವುದರಿಂದ ಹಿಡಿದು ಮಗುವನ್ನು ನೋಡಿಕೊಳ್ಳುವವರೆಗೆ ಅವರೇ ಗೃಹಿಣಿಯಂತಾಗಿದ್ದಾರೆ ಎಂದು ರೂಪಾಲಿ ಹೇಳಿಕೊಂಡಿದ್ದಾರೆ. 

ಇಂದು ನನ್ನ ಪತಿಯೇ ಗೃಹಣಿಯ ಪಾತ್ರ ನಿರ್ವಹಿಸುತ್ತಿದ್ದಾರೆ ಅವರ ಬಗ್ಗೆ ನನಗೆ ಖುಷಿ ಇದೆ. ಅವರ ಈ ಉದಾರತೆಯಿಂದ ದಿನಕ್ಕೆ ಕನಿಷ್ಠ 12 ಗಂಟೆ ಕೆಲಸ ಮಾಡುವ ನಾನು ಕುಟುಂಬದೊಂದಿಗೂ ಸಮಯ ಕಳೆಯುವುದಕ್ಕೆ ಸಾಧ್ಯವಾಗುತ್ತಿದೆ ಎಂದಿದ್ದಾರೆ ರೂಪಾಲಿ

12 ಗಂಟೆ ಕೆಲಸ ಒಂದು ಗಂಟೆ ಹೋಗುವುದಕ್ಕೆ ಮತ್ತೊಂದು ಗಂಟೆ ಮರಳಿ ಬರಲು ಎರಡು ಗಂಟೆ ಪ್ರಯಾಣದಲ್ಲಿ ಕಳೆಯುವುದರಿಂದ ಬಹುತೇಕ 14 ಗಂಟೆ ಹೊರಗೆಯೇ ಕಳೆದು ಹೋಗುತ್ತದೆ. ನಂತರ ಮನೆ ತಲುಪಿ ಮಗ ಗಂಡನೊಂದಿಗೆ ಕಾಲ ಕಳೆಯುವೆ ಎನ್ನುತ್ತಾರೆ ರೂಪಾಲಿ

ಅಂದಹಾಗೆ ಹಿಂದಿಯ ಖ್ಯಾತ ಧಾರಾವಾಹಿ ಅನುಪಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸುವ ನಟಿ ರೂಪಾಲಿ ಗಂಗೂಲಿ ಅವರು ಧಾರಾವಾಹಿಯ ಒಂದು ಸಂಚಿಕೆಗೆ ಬರೋಬ್ಬರಿ 30 ಲಕ್ಷ ರು. ಸಂಭಾವನೆ ಪಡೆಯುತ್ತಾರೆ.  ಈ ಮೂಲಕ ಇವರು ದೇಶದಲ್ಲೇ ಅತಿ ಹೆಚ್ಚು ಸಂಭಾವನೆ ಪಡೆಯುವ ಧಾರಾವಾಹಿ ನಟಿಯಾಗಿದ್ದಾರೆ. 

ಚಿತ್ರ ನಿರ್ದೇಶಕ ಅನೀಲ್‌ ಗಂಗೂಲಿ ಪುತ್ರಿಯಾಗಿರುವ ರೂಪಾಲಿ ಇವರು ಬಾಲನಟಿಯಾಗಿ ವೃತ್ತಿಗೆ ಪಾದಾರ್ಪಣೆ ಮಾಡಿದ್ದರು. ಈ ಹಿಂದೆ ನಟ ಸಲ್ಮಾನ್‌ ಖಾನ್‌ ಹಿಂದಿ ಬಿಗ್‌ ಬಾಸ್‌ ಸೀಸನ್‌ 16ಕ್ಕೆ 1,000 ಕೋಟಿ ರು. ಸಂಭಾವನೆ ಪಡೆದಿದ್ದರು ಎನ್ನಲಾಗಿದೆ.

ರೂಪಾಲಿ (Rupali Ganguly) ವೈಯಕ್ತಿಕ ಜೀವನದ ಬಗ್ಗೆ ಹೇಳುವುದಾದರೆ ಅವರು ಜನಿಸಿದ್ದು ಕೋಲ್ಕತ್ತಾದಲ್ಲಿ. 5 ಏಪ್ರಿಲ್ 1977 ರಂದು  ಜನಿಸಿದ ರೂಪಾಲಿ 7 ವರ್ಷದವರಿದ್ದಾಗ  ನಟನಾ ಜಗತ್ತಿಗೆ ಪ್ರವೇಶಿಸಿದ್ದರು. ಆಕೆ ಮೊದಲು ಕಾಣಿಸಿಕೊಂಡಿದ್ದು ಅನಿಲ್ ಕಪೂರ್ ಮತ್ತು ಅಮೃತಾ ಸಿಂಗ್ ಅವರ ಸಾಹೇಬ್ ಚಿತ್ರದಲ್ಲಿ. 

ರೂಪಾಲಿ ಅವರ ತಂದೆ ಈ ಚಿತ್ರದ ನಿರ್ದೇಶಕರಾಗಿದ್ದರು. ರೂಪಾಲಿ ತನ್ನ ವೃತ್ತಿಜೀವನದಲ್ಲಿ ಅನೇಕ ಪ್ರಸಿದ್ಧ ಟಿವಿ ಧಾರಾವಾಹಿಗಳಲ್ಲಿ ಕೆಲಸ ಮಾಡಿದ್ದಾರೆ. ಆದರೆ, ಮದುವೆಯಾದ ನಂತರ ನಟನಾ ಲೋಕದಿಂದ ಕೊಂಚ ವಿರಾಮ ತೆಗೆದುಕೊಂಡಿದ್ದರು. ಅವರು ಉದ್ಯಮಿ ಅಶ್ವಿನ್ ವರ್ಮಾ ಅವರನ್ನು 10 ವರ್ಷಗಳ ಹಿಂದೆ ಮದುವೆಯಾಗಿದ್ದರು. 

ತಮ್ಮ ಮದುವೆಗೆ 12 ವರ್ಷಗಳ ಮೊದಲೇ ಉದ್ಯಮಿ ಅಶ್ವಿನ್ ವರ್ಮಾ  (Ashwin Verma) ಹಾಗೂ ರೂಪಾ ಗಂಗೂಲಿ (Rupa Ganguli) ಪರಸ್ಪರ ಪರಿಚಯಸ್ಥರಾಗಿದ್ದರು. ಇಬ್ಬರ ನಡುವೆ ಪ್ರೀತಿಯಿಲ್ಲದಿದ್ದರೂ ಇಬ್ಬರೂ ಒಳ್ಳೆಯ ಸ್ನೇಹಿತರಾಗಿದ್ದರು.

ನಮ್ಮ ನಡುವೆ ಸಾಕಷ್ಟು ಅಂಡರ್‌ಸ್ಟಾಂಡಿಗ್‌ ಇತ್ತು, ಹಾಗಾಗಿ ನಾವು ಒಬ್ಬರನ್ನೊಬ್ಬರು ಪ್ರಪೋಸ್‌ ಮಾಡಲಿಲ್ಲ. ಒಂದು ದಿನ ಮದುವೆಯಾಗಲು ನಿರ್ಧರಿಸಿದೆ ಎಂದು ಅಶ್ವಿನ್ ಜೊತೆಗಿನ ಸಂಬಂಧದ ಬಗ್ಗೆ ರೂಪಾಲಿ ಹೇಳಿಕೊಂಡಿದ್ದಾರೆ

ಮದುವೆಯ ನಂತರ ಗರ್ಭಿಣಿಯಾಗಲು (Pregnancy) ರೂಪಾಲಿ ಗಂಗೂಲಿ ಸಾಕಷ್ಟು ತೊಂದರೆಗಳನ್ನು ಎದುರಿಸಬೇಕಾಯಿತು. ಅವರಿಗೆ ಥೈರಾಯ್ಡ್ ಸಮಸ್ಯೆ ಇತ್ತು, ಇದರಿಂದಾಗಿ ಅವರು ಗರ್ಭಿಣಿಯಾಗಲು ಸಾಧ್ಯವಾಗಲಿಲ್ಲ. ಮತ್ತು ಈ ವಿಷಯದ ಬಗ್ಗೆ ಅವರು ಬಹಳ ಚಿಂತೆ ಮಾಡುತ್ತಿದ್ದರು.

ಆದರೆ, ವೈದ್ಯರ ಸಲಹೆಯನ್ನು ಪಾಲಿಸಿ ತುಂಬಾ ಕಷ್ಟದಲ್ಲಿ ಗರ್ಭಿಣಿಯಾದೆ ಎಂದು ರೂಪಾಲಿ ಗಂಗೂಲಿ ಹೇಳಿಕೊಂಡಿದ್ದರು ಮದುವೆಯಾದ ಸುಮಾರು 2-3 ವರ್ಷಗಳ ನಂತರ ಅವಳು ರುದ್ರಾಂಶ್ ಎಂಬ ಮಗನಿಗೆ ಜನ್ಮ ನೀಡಿದ್ದರು. 

ಮಗನ ಜನನದ ನಂತರ, ರೂಪಾಲಿ ಗಂಗೂಲಿ ನಟನೆಯಿಂದ ವಿರಾಮ ತೆಗೆದುಕೊಂಡು ತಮ್ಮ ಕುಟುಂಬಕ್ಕೆ ಆದ್ಯತೆ ನೀಡುತ್ತಾ, ಮಗನ ಪಾಲನೆಯಲ್ಲಿ ಸಮಯ ಕಳೆದಿದ್ದರು

ನಂತರ ಇದ್ದಕ್ಕಿದ್ದಂತೆ ಅನುಪಮಾ ಧಾರಾವಾಹಿಯ ಆಫರ್ ಬಂದಿದ್ದರಿಂದ ಆಕೆ ಮತ್ತೆ ಟಿವಿಗೆ ಬಂದರು. ಮೇರಾ ಯಾರ್ ಮೇರಾ ದುಷ್ಮನ್ ಚಿತ್ರದಲ್ಲಿ ರೂಪಾಲಿ ಗಂಗೂಲಿ ಬಾಲ ಕಲಾವಿದೆಯಾಗಿ ಕೆಲಸ ಮಾಡಿದ್ದಾರೆ.