ಇಸ್ರೋ-ನಾಸಾ ಜಂಟಿ ಸ್ಪೇಷ್ ಮಿಷನ್ ಜೂ.10ಕ್ಕೆ ಉಡಾವಣೆ, ಭಾರತೀಯ ಪೈಲೆಟ್
ಇಸ್ರೋ ಸಹಯೋಗದೊಂದಿಗೆ ಆಕ್ಸಿಯಮ್ ಮಿಷನ್-4 ಜೂನ್ 10 ರಂದು ಉಡಾವಣೆಗೊಳ್ಳಲಿದೆ. ಭಾರತದ ಗಗನಯಾತ್ರಿ ಶುಭಾಂಶು ಶುಕ್ಲಾ ಈ ಮಿಷನ್ನ ಪೈಲಟ್ ಆಗಿ ಕಾರ್ಯನಿರ್ವಹಿಸಲಿದ್ದಾರೆ. ಇದು ಭಾರತ ಮತ್ತು ಅಮೆರಿಕದ ಬಾಹ್ಯಾಕಾಶ ಸಹಕಾರದ ಮಹತ್ವದ ಹೆಜ್ಜೆಯಾಗಿದೆ.
ಇಸ್ರೋ ಸಹಯೋಗದ ಭಾಗವಾಗಿ ‘ಆಕ್ಸಿಯಮ್ ಮಿಷನ್-4’ ಅನ್ನು ಜೂನ್ 10ರಂದು ಪ್ರಾರಂಭಿಸಲಾಗುವುದು ಎಂದು ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ (ನಾಸಾ) ಶನಿವಾರ (ಸ್ಥಳೀಯ ಸಮಯ) ಪ್ರಕಟಿಸಿದೆ. ಖಾಸಗಿ ಬಾಹ್ಯಾಕಾಶ ಸಂಸ್ಥೆಯಾದ ಆಕ್ಸಿಯಮ್ ಸ್ಪೇಸ್ನಿಂದ ಇದು ನಾಲ್ಕನೇ ಖಾಸಗಿ ಗಗನಯಾತ್ರಿ ಮಿಷನ್ ಆಗಿದ್ದು, ಭಾರತದ ಗಗನಯಾತ್ರಿ ಶುಭಾಂಶು ಶುಕ್ಲಾ ಈ ಮಿಷನ್ನ ಪೈಲಟ್ ಆಗಿ ಕಾರ್ಯನಿರ್ವಹಿಸಲಿದ್ದಾರೆ. ಈ ಮಿಷನ್ ಮೂಲಕ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಭಾರತದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಘೋಷಿಸಿದ್ದ ಇಸ್ರೋ ಗಗನಯಾತ್ರಿಯನ್ನು ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ ಕಳುಹಿಸುವ ಬದ್ಧತೆಯನ್ನೂ ಪೂರೈಸಲಾಗುತ್ತಿದೆ.
ಇಸ್ರೋ ಮತ್ತು ನಾಸಾ ಈ ಮಿಷನ್ನಲ್ಲಿ ಐದು ಜಂಟಿ ವೈಜ್ಞಾನಿಕ ಅಧ್ಯಯನಗಳು ಹಾಗೂ ಎರಡು ಎಸ್ಟಿಇಎಮ್ (ವಿಜ್ಞಾನ, ತಂತ್ರಜ್ಞಾನ, ಎಂಜಿನಿಯರಿಂಗ್ ಮತ್ತು ಗಣಿತ) ಪ್ರದರ್ಶನದಲ್ಲಿ ಪಾಲ್ಗೊಳ್ಳಲಿವೆ. ಬಾಹ್ಯಾಕಾಶ ಕ್ಷೇತ್ರದಲ್ಲಿ ದೀರ್ಘಕಾಲದ ಸಹಯೋಗವಿರುವ ಇಸ್ರೋ ಮತ್ತು ನಾಸಾ, ಈ ಕಾರ್ಯಾಚರಣೆಯ ಮೂಲಕ ವೈಜ್ಞಾನಿಕ ಜ್ಞಾನ ವಿಸ್ತರಣೆ ಮತ್ತು ಬಾಹ್ಯಾಕಾಶ ಸಹಕಾರವನ್ನು ಇನ್ನಷ್ಟು ಬಲಪಡಿಸುತ್ತಿವೆ ಎಂದು ನಾಸಾ ತಿಳಿಸಿದೆ.
ಜೂನ್ 10, ಮಂಗಳವಾರ ಬೆಳಿಗ್ಗೆ 8:22 ಕ್ಕೆ (ಅಮೆರಿಕದ ಪೂರ್ವ ಕಾಲಮಾನ) ನಾಸಾದ ಫ್ಲೋರಿಡಾ ರಾಜ್ಯದ ಕೆನಡಿ ಬಾಹ್ಯಾಕಾಶ ಕೇಂದ್ರದಲ್ಲಿರುವ ಲಾಂಚ್ ಪ್ಯಾಡ್ 39A ನಿಂದ ಆಕ್ಸಿಯಮ್ ಮಿಷನ್-4 ಅನ್ನು ಸ್ಪೇಸ್ಎಕ್ಸ್ ಕಂಪನಿಯ ಫಾಲ್ಕನ್-9 ರಾಕೆಟ್ ಮೂಲಕ ಉಡಾವಣೆಗೊಳಿಸಲಾಗುತ್ತದೆ. ಈ ಮಿಷನ್ನ ಸಿಬ್ಬಂದಿ ಹೊಸ ಸ್ಪೇಸ್ಎಕ್ಸ್ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆಯಲ್ಲಿ ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದತ್ತ ಪ್ರಯಾಣಿಸುತ್ತಾರೆ. ನಾಸಾ ಪ್ರಕಾರ, ಡಾಕಿಂಗ್ (ಬಾಹ್ಯಾಕಾಶ ನೌಕೆಯ ನಿಲ್ದಾಣಕ್ಕೆ ಜೋಡಿಸುವ ಕ್ರಿಯೆ) ಜೂನ್ 11, ಬುಧವಾರ ಮಧ್ಯಾಹ್ನ 12:30ರ ಸುಮಾರಿಗೆ ನಡೆಯಲಿದೆ.
ಬಾಹ್ಯಾಕಾಶ ನೌಕೆ ನಿಲ್ದಾಣದ ಸಮೀಪದಲ್ಲಿ ಚಲಿಸುತ್ತಿರುವಾಗ ಪ್ರಾರಂಭವಾಗುವ ಸಮಗ್ರ ಕಾರ್ಯಾಚರಣೆಗಳು, ನೌಕೆ ನಿರ್ಗಮಿಸುವವರೆಗೂ ನಾಸಾದ ಮಾರ್ಗದರ್ಶನದಲ್ಲಿ ವಿಜ್ಞಾನ, ಶಿಕ್ಷಣ ಮತ್ತು ವಾಣಿಜ್ಯ ಚಟುವಟಿಕೆಗಳನ್ನು ನಿರ್ವಹಿಸುತ್ತವೆ. ಈ ವೇಳೆ ಸಿಬ್ಬಂದಿ ಸುಮಾರು ಎರಡು ವಾರಗಳ ಕಾಲ ಬಾಹ್ಯಾಕಾಶ ನಿಲ್ದಾಣದಲ್ಲಿ ವಾಸ್ತವ್ಯವಿರುತ್ತಾರೆ.
ಈ ಮಿಷನ್ನ ನೇತೃತ್ವವನ್ನು ನಾಸಾದ ಮಾಜಿ ಗಗನಯಾತ್ರಿಯಾದ ಪೆಗ್ಗಿ ವಿಟ್ಸನ್ (ಇತ್ತೀಚೆಗಿನ ಕಾಲದಲ್ಲಿ ಆಕ್ಸಿಯಮ್ ಸ್ಪೇಸ್ನಲ್ಲಿ ಮಾನವ ಬಾಹ್ಯಾಕಾಶ ಹಾರಾಟ ವಿಭಾಗದ ನಿರ್ದೇಶಕಿ) ವಹಿಸಿಕೊಳ್ಳಲಿದ್ದು, ಭಾರತದ ಇಸ್ರೋ ಗಗನಯಾತ್ರಿ ಶುಭಾಂಶು ಶುಕ್ಲಾ ಪೈಲಟ್ ಆಗಿ ಸೇವೆ ಸಲ್ಲಿಸುತ್ತಾರೆ. ಜೊತೆಗೆ ಪೋಲೆಂಡ್ನ ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆ (ESA) ಗಗನಯಾತ್ರಿಯಾದ ಸ್ಲಾವೋಸ್ಜ್ ಉಜ್ನಾನ್ಸ್ಕಿ-ವಿಸ್ನಿಯೆವ್ಸ್ಕಿ ಮತ್ತು ಹಂಗೇರಿಯ ಟಿಬೋರ್ ಕಾಪು ಮಿಷನ್ ತಜ್ಞರಾಗಿರುತ್ತಾರೆ.
ಇವರು ಬಾಹ್ಯಾಕಾಶ ನಿಲ್ದಾಣಕ್ಕೆ ಪ್ರಯಾಣಿಸುವ ಮೊದಲ ಹಂಗೇರಿಯನ್ ಮತ್ತು ಪೋಲಿಷ್ ಖಾಸಗಿ ಗಗನಯಾತ್ರಿಗಳೂ ಹೌದು. ಈ ಕುರಿತು X ಪ್ಲಾಟ್ಫಾರ್ಮ್ನಲ್ಲಿ (ಹಳೆ ಟ್ವಿಟ್ಟರ್) ಅಂತರರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಿಂದ ಪ್ರಕಟಣೆ ಹೊರಬಿದ್ದಿದ್ದು:
“ಆಕ್ಸಿಯಮ್ ಸ್ಪೇಸ್ನ ನಾಲ್ಕನೇ ಖಾಸಗಿ ಗಗನಯಾತ್ರಿ ಮಿಷನ್, ಆಕ್ಸಿಯಮ್ ಮಿಷನ್ 4 ಅನ್ನು ಜೂನ್ 10, ಮಂಗಳವಾರ ಬೆಳಿಗ್ಗೆ 8:22 ET ಕ್ಕೆ ನಾಸಾದ ಕೆನಡಿ ಬಾಹ್ಯಾಕಾಶ ಕೇಂದ್ರದಿಂದ ಉಡಾವಣೆ ಮಾಡುವ ಗುರಿಯನ್ನು ಹೊಂದಿದೆ” ಎಂದು ಹೇಳಲಾಗಿದೆ.