Microsoft Layoffs: ಮೈಕ್ರೋಸಾಫ್ಟ್‌ನಲ್ಲಿ ದೊಡ್ಡ ಮಟ್ಟದ ಉದ್ಯೋಗ ಕಡಿತ: ಕೋಡಿಂಗ್ ತಜ್ಞರಿಗೆ ಶಾಕ್!

ಮೈಕ್ರೋಸಾಫ್ಟ್ 6,000 ಉದ್ಯೋಗಿಗಳನ್ನು ವಜಾಗೊಳಿಸಿದೆ, ಇದರಲ್ಲಿ ಹೆಚ್ಚಿನವರು ಕೋಡಿಂಗ್ ಮತ್ತು ಯೋಜನಾ ನಿರ್ವಹಣಾ ವಿಭಾಗದವರು. ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನಗಳಲ್ಲಿ ಹೂಡಿಕೆ ಹೆಚ್ಚಿಸುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.

  ಮೈಕ್ರೋಸಾಫ್ಟ್‌ನಲ್ಲಿ ವಜಾಗೊಳಿಸುವಿಕೆ ಪರ್ವ ಆರಂಭವಾಗಿದೆ! ಕೋಡಿಂಗ್ ತಜ್ಞರು ಹಾಗೂ ಯೋಜನಾ ನಿರ್ವಹಣಾ ಸಿಬ್ಬಂದಿಗೆ  ಶಾಕ್ ನೀಡಿರುವ ಟೆಕ್ ಜೈಂಟ್ ಮೈಕ್ರೋಸಾಫ್ಟ್ ಇತ್ತೀಚೆಗೆ  ಕೆಲಸಗಾರರನ್ನು ತೆಗೆದು ಹಾಕುವ ಕ್ರಮವು ಸಾವಿರಾರು ಉದ್ಯೋಗಿಗಳ ಬದುಕಿಗೆ ಹೊಡೆತ ನೀಡಿದೆ. ಅದರಲ್ಲೂ ಮುಖ್ಯವಾಗಿ  ಸಾಫ್ಟ್‌ವೇರ್ ಎಂಜಿನಿಯರ್‌ಗಳು ಹಾಗೂ ಪ್ರಾಜೆಕ್ಟ್ ಮ್ಯಾನೇಜ್‌ಮೆಂಟ್‌ ಸಿಬ್ಬಂದಿ ಮೇಲೆ ಹೆಚ್ಚು ಪರಿಣಾಮ ಬೀರಿದೆ. ಬ್ಲೂಮ್‌ಬರ್ಗ್ ವರದಿಯ ಪ್ರಕಾರ, ವಾಷಿಂಗ್ಟನ್ ರಾಜ್ಯದಲ್ಲಿ ಮಾತ್ರ 2,000 ಕ್ಕೂ ಹೆಚ್ಚು ಹುದ್ದೆಗಳಿಂದ 40% ಕ್ಕಿಂತ ಹೆಚ್ಚು ಕೋಡಿಂಗ್ ವೃತ್ತಿಪರರನ್ನು ವಜಾ ಮಾಡಲಾಗಿದೆ. ಯೋಜನಾ ನಿರ್ವಹಣೆ, ಉತ್ಪನ್ನ ನಿರ್ವಹಣೆ ಹಾಗೂ ತಾಂತ್ರಿಕ ಕಾರ್ಯಕ್ರಮ ನಿರ್ವಹಣಾ ಹುದ್ದೆಗಳು  ಸೇರಿ 30%  ವಜಾಗೊಳಿಸಲಾಗಿದೆ.

ಕಂಪನಿಯ 6,000 ಉದ್ಯೋಗಿಗಳ ವಜಾ ಘೋಷಣೆ
ಮಂಗಳವಾರ ಮೈಕ್ರೋಸಾಫ್ಟ್ ತನ್ನ ಪ್ರಪಂಚದಾದ್ಯಂತ ಸುಮಾರು 6,000 ಉದ್ಯೋಗಿಗಳನ್ನು ಕಡಿತಗೊಳಿಸುತ್ತಿರುವುದಾಗಿ ಅಧಿಕೃತವಾಗಿ ಘೋಷಿಸಿತು. ಈ ಸಂಖ್ಯೆ ಒಟ್ಟು 2.28 ಲಕ್ಷ ಉದ್ಯೋಗಿಗಳಲ್ಲಿ ಸುಮಾರು 3% ಕ್ಕೆ ಸಮಾನವಾಗಿದೆ. ಈ ಕಡಿತದಲ್ಲಿ ವಾಷಿಂಗ್ಟನ್ ರಾಜ್ಯದ ಉದ್ಯೋಗಿಗಳು ಮೂರನೇ ಭಾಗದಷ್ಟು ಪಾಲು ಹೊಂದಿದ್ದಾರೆ. ಮೈಕ್ರೋಸಾಫ್ಟ್ ತನ್ನ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನಗಳಿಗೆ ಹೆಚ್ಚಿನ ಹೂಡಿಕೆಯನ್ನು ಮಾಡುತ್ತಿರುವ ಬೆನ್ನಲ್ಲೇ ಈ ವಜಾಗೊಳಿಸುವಿಕೆ ನಡೆದಿದೆ. ಸಿಇಒ ಸತ್ಯ ನಾಡೆಲ್ಲಾ ಅವರ ಪ್ರಕಾರ, "ಇತ್ತೀಚಿನ ಯೋಜನೆಗಳಲ್ಲಿ AI ಈಗಾಗಲೇ ಸುಮಾರು 30% ಕೋಡ್ ಅನ್ನು ಬರೆಯುತ್ತಿದೆ." ಇದರಿಂದ ಸಾಫ್ಟ್‌ವೇರ್ ಅಭಿವೃದ್ಧಿಯ ಅನೇಕ ಅಂಶಗಳು ಸ್ವಯಂಚಾಲಿತವಾಗುತ್ತಿವೆ, ಮತ್ತು ಫಲಿತಾಂಶವಾಗಿ ಕೋಡಿಂಗ್ ಹುದ್ದೆಗಳ ಅಗತ್ಯ ಕಡಿಮೆಯಾಗುತ್ತಿದೆ ಎಂದಿದ್ದಾರೆ.

ವೆಚ್ಚ ತಗ್ಗಿಸುವ ಮಹತ್ವದ ಹೆಜ್ಜೆ
AI ಮೂಲಸೌಕರ್ಯ ನಿರ್ಮಾಣಕ್ಕೆ ಮೈಕ್ರೋಸಾಫ್ಟ್ ಶತಕೋಟಿ ಡಾಲರ್‌ಗಳನ್ನು ಹೂಡಿಕೆ ಮಾಡುತ್ತಿದೆ. ಈ ಹಣಕಾಸು ವರ್ಷದಲ್ಲಿ ಕಂಪನಿಯು ಡೇಟಾ ಸೆಂಟರ್‌ಗಳಿಗಾಗಿ ಮಾತ್ರ $80 ಬಿಲಿಯನ್  ಹೂಡಿಕೆ ಮಾಡಿದೆ. ಈ ಹೂಡಿಕೆಯ ಜೊತೆಗೆ ಕಂಪನಿಯು ವೆಚ್ಚ ತಗ್ಗಿಸಲು ಹಲವು ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಂಡಿದೆ. ಈ ಕಡಿತದ ಹಿಂದೆ “ವ್ಯವಸ್ಥಾಪನಾ ಹಂತಗಳನ್ನು ಕಡಿಮೆ ಮಾಡುವುದು” ಎಂಬ ಉದ್ದೇಶವಿದೆ ಎಂದು ಮೈಕ್ರೋಸಾಫ್ಟ್ ತಿಳಿಸಿದ್ದರೂ, ವಜಾಗೊಳಿಸಲಾದ ಉದ್ಯೋಗಿಗಳಲ್ಲಿ ಕೇವಲ 17% ಮಾತ್ರ ವ್ಯವಸ್ಥಾಪಕರಾಗಿದ್ದಾರೆ, ಎಂದು ಬ್ಲೂಮ್‌ಬರ್ಗ್ ವಿಶ್ಲೇಷಣೆ ಹೇಳುತ್ತದೆ.

ಮಾರುಕಟ್ಟೆ ಮತ್ತು ಗ್ರಾಹಕ ಸಂಪರ್ಕದ ಉದ್ಯೋಗಿಗಳಿಗೆ ತಾತ್ಕಾಲಿಕ ರಕ್ಷಣೆ
ಮಾರುಕಟ್ಟೆ ಮತ್ತು ಗ್ರಾಹಕ ಸಂಬಂಧಿತ ಕೆಲಸಗಳಲ್ಲಿ ತೊಡಗಿದ್ದ ಉದ್ಯೋಗಿಗಳಿಗೆ ಈ ಬಾರಿ ತುಲನಾತ್ಮಕವಾಗಿ ಕಡಿಮೆ ಹೊಡೆತ ತಲಪಿದೆ. ಆದರೆ, ಕೆಲವು AI ಯೋಜನೆಗಳ ನಿರ್ವಹಕರಿಗೂ ಈ ವಜಾಗೊಳಿಸುವಿಕೆ ತಟ್ಟಿದೆ. ಮೈಕ್ರೋಸಾಫ್ಟ್‌ ಮಾತ್ರವಲ್ಲದೆ, ಇತರ ಪ್ರಮುಖ ಟೆಕ್ ಕಂಪನಿಗಳೂ ತಮ್ಮ AI ಸಾಮರ್ಥ್ಯಗಳ ಸುತ್ತ ಉದ್ಯೋಗಗಳನ್ನು ಮರುರೂಪಿಸುತ್ತಿವೆ. ಉದಾಹರಣೆಗೆ: ಸೆಲ್ಸ್‌ಫೋರ್ಸ್- ಇದು 2025ರಲ್ಲಿ ಎಂಜಿನಿಯರಿಂಗ್ ಹುದ್ದೆಗಳಲ್ಲಿ ನೇಮಕಾತಿ ಕಡಿಮೆ ಮಾಡುವ ಯೋಜನೆ. ವರ್ಕ್‌ಡೇ (Workday): ಫೆಬ್ರವರಿಯಲ್ಲಿ ಉಂಟಾದ ವಜಾಗೊಳಿಸುವಿಕೆಯ ಹೊರತಾಗಿಯೂ AI ಕ್ಷೇತ್ರದಲ್ಲಿ ನೇಮಕಾತಿಯನ್ನು ಮುಂದುವರಿಸುವ ನಿರ್ಧಾರ.

ಮೈಕ್ರೋಸಾಫ್ಟ್‌ ಪ್ರತಿಕ್ರಿಯೆ
ವಜಾಗೊಳಿಸುವಿಕೆ ಯಾವ ವಿಭಾಗಗಳನ್ನು ಹೆಚ್ಚು ತಟ್ಟಿದೆ ಎಂಬುದರ ಬಗ್ಗೆ ಪ್ರತಿಕ್ರಿಯಿಸಲು ಮೈಕ್ರೋಸಾಫ್ಟ್ ನಿರಾಕರಿಸಿದೆ. ಆದರೆ, ಕಂಪನಿಯು ಮುಂದಿನ ಮಾರುಕಟ್ಟೆಗೆ ತಕ್ಕಂತೆ ತನ್ನ ತಂಡಗಳನ್ನು ಪುನರ್ರಚಿಸುವ ನಿಟ್ಟಿನಲ್ಲಿ ಈ ತೀರ್ಮಾನಗಳನ್ನು ತೆಗೆದುಕೊಳ್ಳುತ್ತಿದೆ ಎಂಬುದನ್ನು ಮಾತ್ರ ಸ್ಪಷ್ಟಪಡಿಸಿದೆ. ಮೈಕ್ರೋಸಾಫ್ಟ್‌ನ ಇತ್ತೀಚಿನ ವರ್ಗಾವಣೆಗಳು ಮತ್ತು AI ಆಧಾರಿತ  ತಂತ್ರಜ್ಞಾನ ಭವಿಷ್ಯಕ್ಕೆ  ಒಂದು ದೊಡ್ಡ ಹೆಜ್ಜೆಯಾಗಿದ್ದರೂ, ಸಾವಿರಾರು ಉದ್ಯೋಗಿಗಳ ಬದುಕಿನ ಮೇಲೆ ತೀವ್ರ ಪರಿಣಾಮ ಬೀರಿದೆ.