ರತನ್ ಟಾಟಾ ಮ್ಯಾನೇಜರ್ ಶಾಂತನು ನಾಯ್ಡು ಓದುಗರಿಗಾಗಿ ಹೊಸ ಪ್ರಾಜೆಕ್ಟ್ ಶುರು ; ಏನಿದು 'ಬುಕ್ಕೀಸ್' ?

ಭಾರತದ ಗೌರವಾನ್ವಿತ ಉದ್ಯಮಿಗಳಲ್ಲಿ ಒಬ್ಬರಾದ ರತನ್ ಟಾಟಾ ಅವರ ನಿಧನರಾಗಿ ಎರಡು ತಿಂಗಳು ಕಳೆದಿದೆ. ಅವರ ಅಗಲಿಕೆ ಅಭಿಮಾನಿಗಳು ಮತ್ತು ಆಪ್ತರಲ್ಲಿ ಶೂನ್ಯ ಸೃಷ್ಟಿಸಿದೆ. ಟಾಟಾ ಅವರ ಮ್ಯಾನೇಜರ್ ಶಾಂತನು ನಾಯ್ಡು ಕೂಡ ಒಬ್ಬರು. ರತನ್ ಟಾಟಾ ಮತ್ತು ಶಾಂತನು ನಾಯ್ಡು ಇಬ್ಬರಿಗೂ ಪ್ರಾಣಿಗಳ ಮೇಲಿನ ಪ್ರೀತಿಯಿಂದ ಆತ್ಮೀಯ ಬಾಂಧವ್ಯವಿತ್ತು.

ಶಾಂತನು ನಾಯ್ಡು ರತನ್ ಟಾಟಾ ಜೊತೆ ವರ್ಷಗಳ ಕಾಲ ಕೆಲಸ ಮಾಡಿದ್ದಾರೆ. ಇಬ್ಬರೂ ಒಳ್ಳೆಯ ಗೆಳೆಯರಾಗಿದ್ದರು. ಶಾಂತನು ನಾಯ್ಡು ಅವರ ವೃತ್ತಿಜೀವನದಲ್ಲಿ ಟಾಟಾ ಪ್ರಮುಖ ಪಾತ್ರ ವಹಿಸಿದ್ದರು. ಓದುವ ಹವ್ಯಾಸವನ್ನೇ ವೃತ್ತಿಯನ್ನಾಗಿ ಮಾಡಿಕೊಂಡ ಶಾಂತನು, ಹೊಸ ಯೋಜನೆ ಶುರು ಮಾಡಿದ್ದಾರೆ.

'ಬುಕ್ಕೀಸ್' ಎಂಬ ಈ ಪ್ರಾಜೆಕ್ಟ್, ಸಾರ್ವಜನಿಕ ಸ್ಥಳಗಳಲ್ಲಿ ಜನರು ಒಟ್ಟಾಗಿ ಓದುವಂತೆ ಪ್ರೋತ್ಸಾಹಿಸುತ್ತದೆ ಎಂದು ಲಿಂಕ್ಡ್ಇನ್ ನಲ್ಲಿ ಬರೆದಿದ್ದಾರೆ. ಮುಂಬೈನಲ್ಲಿ ಆರಂಭವಾದ ಈ ಯೋಜನೆ, ಪುಣೆ ಮತ್ತು ಬೆಂಗಳೂರಿಗೂ ವಿಸ್ತರಿಸಿದೆ.

ಡಿಸೆಂಬರ್ 8 ರಂದು ಬುಕ್ಕೀಸ್ ಜೈಪುರದಲ್ಲಿ ಆರಂಭವಾಗಲಿದೆ. ಕೋಲ್ಕತ್ತಾ, ದೆಹಲಿ, ಅಹಮದಾಬಾದ್ ಮತ್ತು ಸೂರತ್ ನಗರಗಳಿಗೂ ವಿಸ್ತರಿಸುವ ಯೋಜನೆ ಇದೆ. "ಒಂದು ಪ್ರಯೋಗದಂತೆ ಶುರುವಾದ ಯೋಜನೆ ಈಗ ಒಂದು ಆಂದೋಲನವಾಗಿದೆ. ಪುಸ್ತಕಗಳನ್ನು ಮತ್ತೆ ಜನಪ್ರಿಯಗೊಳಿಸುವುದು ಇದರ ಉದ್ದೇಶ. ಈ ನಗರಗಳಲ್ಲಿ ಜನರು ಶಾಂತವಾಗಿ ಓದಬಹುದು" ಎಂದು ಶಾಂತನು ಬರೆದಿದ್ದಾರೆ.

ಜೈಪುರದ ಓದುವ ಕಾರ್ಯಕ್ರಮವನ್ನು ಶಾಂತನು ನಾಯ್ಡು ಘೋಷಿಸಿದ್ದಾರೆ. "ಜೈಪುರದ ಓದುಗರಿಗೆ ಪುಸ್ತಕ ಓದಲು ಇದು ಸಕಾಲ. ಈಗಲೇ ನೋಂದಾಯಿಸಿ" ಎಂದು ಬರೆದಿದ್ದಾರೆ. ಓದುವ ಹವ್ಯಾಸ ಬೆಳೆಸುವುದು ಮತ್ತು ಸಮುದಾಯದಲ್ಲಿ ಓದುವಿಕೆ ಹೆಚ್ಚಿಸುವುದು ಇದರ ಉದ್ದೇಶ. "ಈ ಯೋಜನೆಯ ಮೂಲ ಉದ್ದೇಶ ಓದುವ ಹವ್ಯಾಸ ಮರುಸ್ಥಾಪಿಸುವುದು. ಓದುವುದು ಮಾನವ ಅನುಭವಕ್ಕೆ ಮುಖ್ಯ. ಆದರೆ ಈಗ ಓದುವವರ ಸಂಖ್ಯೆ ಕಡಿಮೆಯಾಗುತ್ತಿದೆ. ಸಮುದಾಯದಲ್ಲಿ ಓದುವ ಹವ್ಯಾಸ ಬೆಳೆಸಲು ಇದು ಸಹಾಯ ಮಾಡುತ್ತದೆ" ಎಂದಿದ್ದಾರೆ.

ಶಾಂತನು ನಾಯ್ಡು ಯಾರು?

ಶಾಂತನು ನಾಯ್ಡು ರತನ್ ಟಾಟಾ ಅವರ ವಿಶ್ವಾಸಿ ಮ್ಯಾನೇಜರ್. ಟಾಟಾ ಅವರ ಉಯಿಲಿನಲ್ಲಿ ಶಾಂತನು ಹೆಸರಿದೆ. ಟಾಟಾ ಅಗಲಿಕೆಗೆ ಶಾಂತನು ಲಿಂಕ್ಡ್ಇನ್ ನಲ್ಲಿ ಭಾವನಾತ್ಮಕ ಪೋಸ್ಟ್ ಹಾಕಿದ್ದರು. "ಈ ಸ್ನೇಹದಿಂದ ಉಂಟಾದ ಶೂನ್ಯವನ್ನು ನನ್ನ ಜೀವಮಾನ ಪೂರ್ತಿ ತುಂಬಲು ಪ್ರಯತ್ನಿಸುತ್ತೇನೆ. ದುಃಖ ಅನ್ನೋದು ಪ್ರೀತಿಗೆ ಕೊಡಬೇಕಾದ ಬೆಲೆ. ವಿದಾಯ, ನನ್ನ ಪ್ರೀತಿಯ ದಾರಿದೀಪ" ಎಂದು ಬರೆದಿದ್ದರು.