ಗರ್ಭಪಾತಕ್ಕೆ ಕಾರಣವಾಗೋ ಆಹಾರಗಳು; ಗರ್ಭಿಣಿಯರು ದೂರ ಉಳಿಯೋದೊಳಿತು
ಹೊಟ್ಟೆಯೊಳಗೆ ಭ್ರೂಣವೊಂದು ಮಗುವಾಗಿ ಬೆಳೆದು ಹೊರ ಬರುವವರೆಗೆ ಕಾಪಾಡುವುದು ಸಣ್ಣ ಜವಾಬ್ದಾರಿಯಲ್ಲ. ಇದಕ್ಕಾಗಿ ತಾಯಿಯಾಗುವವಳು ಹಲವು ರೀತಿಯಲ್ಲಿ ಕಾಳಜಿ ವಹಿಸಬೇಕಾಗುತ್ತದೆ. ಅವುಗಳಲ್ಲಿ ಪ್ರಮುಖವಾದುದು ಆಹಾರ. ಈ ಸಂದರ್ಭದಲ್ಲಿ ಆಹಾರ ಅತಿಯಾದರೂ ಕಷ್ಟ, ಕಡಿಮೆಯಾದರೂ ಕಷ್ಟ. ಹೀಗಾಗಿ, ಉತ್ತಮ ಡಯಟ್ ಫಾಲೋ ಮಾಡಬೇಕಾಗುತ್ತದೆ. ಭ್ರೂಣದ ಬೆಳವಣಿಗೆಗೆ ಬೇಕಾದ ಪೋಷಕಸತ್ವಗಳನ್ನೊದಗಿಸುವುದು ಮುಖ್ಯವಾಗುತ್ತದೆ. ಇದಲ್ಲದೆ, ಮತ್ತೆ ಕೆಲ ಆಹಾರಗಳು ಹೆಚ್ಚಾಗಿ ಸೇವಿಸಿದರೆ, ಅದರಲ್ಲೂ ಪ್ರಗ್ನೆನ್ಸಿಯ ಆರಂಭಿಕ ಹಂತದಲ್ಲಿ ಇವುಗಳ ಅತಿಯಾದ ಸೇವನೆಯಿಂದ ಗರ್ಭಪಾತವಾಗುವ ಸಂಭವಗಳು ಹೆಚ್ಚು. ಅಂಥ ಅಪಾಯಕಾರಿ ಆಹಾರಗಳು ಯಾವುವು ನೋಡೋಣ.
Follow
ಕೆಫಿನ್: ಒಂದು ಮಿತಿಯಲ್ಲಿ ಕಾಫಿಯ ಸೇವನೆಯಿಂದ ಅಂಥ ತೊಂದರೆಯಾಗಲಾರದು. ಆದರೂ ಗರ್ಭಿಣಿಯರು ಸಾಧ್ಯವಾದಷ್ಟು ಕೆಫಿನ್‌ನಿಂದ ದೂರವಿರಬೇಕು. ಏಕೆಂದರೆ ಕೆಫಿನ್ ಬಳಕೆ ಹೆಚ್ಚಾದರೆ ಅದು ಗರ್ಭಪಾತಕ್ಕೆ ಇಲ್ಲವೇ ಮಗುವಿನ ಕಡಿಮೆ ತೂಕಕ್ಕೆ ಕಾರಣವಾಗುತ್ತದೆ.
ಪಪ್ಪಾಯ: ಈ ಬಗ್ಗೆ ನಿಮ್ಮ ಅಜ್ಜಿ ಹೇಳಿದ್ದನ್ನು ಕೇಳಿರಬಹುದು. ಸಂಪೂರ್ಣ ಹಣ್ಣಾಗದ ಪಪ್ಪಾಯದಲ್ಲಿರುವ ಎಂಜೈಮ್‌ಗಳು ಗರ್ಭಕೋಶದ ಕಾಂಟ್ರ್ಯಾಕ್ಷನ್‌ಗೆ ಕಾರಣವಾಗುತ್ತವೆ. ಅದರಿಂದ ಗರ್ಭಪಾತವಾಗಬಹುದು.
ಹಸಿ ಮೊಟ್ಟೆ: ಹಸಿಮೊಟ್ಟೆ ಅಥವಾ ಅದರಿಂದ ತಯಾರಿಸಿದಂಥ ಮಯೋನೀಸ್‌ನಂಥ ಪದಾರ್ಥಗಳಿಂದ ಗರ್ಭಿಣಿ ಮಹಿಳೆಯರು ದೂರ ಉಳಿಯಬೇಕು. ಇದರಿಂದ ಫುಡ್ ಪಾಯ್ಸನಿಂಗ್ ಆಗಬಹುದು. ಹಸಿ ಮೊಟ್ಟೆಯಷ್ಟೇ ಅಲ್ಲ, ಬೇಯಿಸದ ಬಹುತೇಕ ಆಹಾರಗಳನ್ನು ದೂರವಿಟ್ಟರೆ ಒಳಿತು.
ಪೈನಾಪಲ್: ಪ್ರಗ್ನೆನ್ಸಿಯ ಮೊದಲ ಮೂರು ತಿಂಗಳಲ್ಲಿ ಪೈನಾಪಲ್ ಅಥವಾ ಅದರ ಜ್ಯೂಸ್ ಸೇವನೆಯಿಂದ ದೂರವಿರುವುದೇ ಒಳಿತು. ಇದರಲ್ಲಿರುವ ಬ್ರೊಮೆಲೈನ್ ಗರ್ಭಿಣಿಯಲ್ಲಿ ಕಾಂಟ್ಯ್ರಾಕ್ಷನ್‌ಗೆ ಕಾರಣವಾಗಿ ಗರ್ಭಪಾತಕ್ಕೆ ಕಾರಣವಾಗಬಹುದು. ಇಲ್ಲವೇ ಹುಟ್ಟುವಾಗಲೇ ಮಗು ಜೀವ ಕಳೆದುಕೊಳ್ಳುವುದಕ್ಕೆ ಕಾರಣವಾಗಬಹುದು.
ಪ್ರಾಣಿಗಳ ಲಿವರ್: ಮಾಂಸಾಹಾರ ಇಷ್ಟಪಡುವವರು ನೀವಾಗಿದ್ದಲ್ಲಿ, ಗರ್ಭಿಣಿಯಾದಾಗ ಪ್ರತಿದಿನ ಪ್ರಾಣಿಗಳ ಯಕೃತ್ತು ಸೇವನೆ ಮಾಡುವ ತಪ್ಪು ಮಾಡಬೇಡಿ. ಇದರಿಂದ ದೇಹದಲ್ಲಿ ರೆಟಿನಾಲ್ ಅಂಶ ಹೆಚ್ಚಾಗಿ ಗರ್ಭಪಾತವಾಗಬಹುದು. ಎಲ್ಲೋ ಅಪರೂಪಕ್ಕೊಮ್ಮೆ ತಿಂದರೆ ತೊಂದರೆಯಿಲ್ಲ.
ಪಾಶ್ಚರೀಕರಿಸದ ಹಾಲಿನ ಪದಾರ್ಥಗಳು: ಪಾಶ್ಚರೀಕರಣಕ್ಕೆ ಒಳಗಾಗದ ಹಾಲು, ಚೀಸ್, ಪನ್ನೀರ್ ಮುಂತಾದವುಗಳಲ್ಲಿ ಲಿಸ್ಟೇರಿಯಾ ಎಂಬ ಬ್ಯಾಕ್ಟೀರಿಯಾ ಇರುತ್ತದೆ. ಈ ಬ್ಯಾಕ್ಟೀರಿಯಾವು ಬೇಯಿಸದ ಮೀನು ಹಾಗೂ ಕೋಳಿಗಳಲ್ಲೂ ಕಂಡುಬರುತ್ತದೆ. ಇದು ಗರ್ಭಿಣಿಯರಿಗೆ ಒಳ್ಳೆಯದಲ್ಲ.
ನುಗ್ಗೇಕಾಯಿ: ನುಗ್ಗೇಕಾಯಿಯಲ್ಲಿ ಪೊಟ್ಯಾಶಿಯಂ, ಐರನ್, ವಿಟಮಿನ್‌ಗಳು ಹೇರಳವಾಗಿರುತ್ತವೆ ನಿಜ. ಆದರೆ ಇದರಲ್ಲಿರುವ ಆಲ್ಫಾ ಸಿಟೋ ಸ್ಟೆರಾಲ್ ಎಂಬ ಪದಾರ್ಥವು ಗರ್ಭಿಣಿಯರಿಗೆ ಅಪಾಯಕಾರಿ.
ಎಳ್ಳು: ಗರ್ಭಿಣಿ ಮಹಿಳೆಯರು ಮಿತಿ ಮೀರಿ ಎಳ್ಳು ತಿನ್ನಬಾರದು. ಅದರಲ್ಲೂ ಎಳ್ಳು ಹಾಗೂ ಜೇನುತುಪ್ಪ ಒಟ್ಟಾದರೆ ಅಪಾಯ ಹೆಚ್ಚು. ಇದು ಗರ್ಭಪಾತಕ್ಕೆ ಕಾರಣವಾಗಬಹುದು. ಡೆಲಿವರಿ ಸಮಯ ಹತ್ತಿರ ಬಂದಾಗ ಕರಿಎಳ್ಳು ಸೇವನೆ ಒಳ್ಳೆಯದು. ಅದು ನಾರ್ಮಲ್ ಡೆಲಿವರಿಗೆ ಸಹಾಯ ಮಾಡುತ್ತದೆ.
ಮೊಳಕೆ ಬಂದ ಆಲೂಗಡ್ಡೆ: ಆಲೂಗಡ್ಡೆ ಒಳ್ಳೆಯದೇ. ಆದರೆ ಮೊಳಕೆ ಬಂದ ಆಲೂಗಡ್ಡೆಯಲ್ಲಿ ಸೋಲನಿನ್ ಎಂಬ ವಿಷಪದಾರ್ಥ ಇರುತ್ತದೆ. ಹಾಗಾಗಿ ಅದನ್ನು ಗರ್ಭಿಣಿಯರಷ್ಟೇ ಅಲ್ಲ, ಎಲ್ಲರೂ ದೂರವಿಡಬೇಕು.
ಅಲೋವೆರಾ: ಅಲೋವೆರಾವು ಕೂದಲು, ತ್ವಚೆ ಹಾಗೂ ಜೀರ್ಣಕ್ರಿಯೆಗೆ ಸಹಕಾರಿ. ಆದರೆ, ಗರ್ಭಿಣಿಯರಿಗೆ ಇದು ಒಳ್ಳೆಯದಲ್ಲ. ಗರ್ಭಿಣಿಯರು ಅಲೋ ವೆರಾ ಜ್ಯೂಸ್ ಸೇವಿಸುವುದರಿಂದ ಪೆಲ್ವಿಕ್ ಹ್ಯಾಮರೇಜ್ ಆಗುವ ಸಂಭವಗಳಿರುತ್ತದೆ. ಇದರಿಂದ ಭ್ರೂಣನಷ್ಟವಾಗಬಹುದು.
