ಸಾಕ್ಷಾತ್ ಗೌರಿ ಗಣೇಶ ಕೈಲಾಸದಿಂದ ಧರೆಗಿಳಿದಂತೇ ಭಾಸವಾಗುತ್ತೆ ಸುಪ್ರಸಿದ್ಧ ಕಲಾವಿದ ಜಿ. ಡಿ. ಭಟ್ ಕೈಚಳಕ

ಒಮ್ಮೆ ನೋಡಿದರೆ ಮತ್ತೆ ಮತ್ತೆ ನೋಡಬೇಕೆನಿಸುವ ಆ ಕೈಚಳಕ ಜಿಡಿ ಭಟ್ಟರು ತಯಾರಿಸುವ ಮಣ್ಣಿನ ಮೂರ್ತಿಯಲ್ಲಡಗಿರುತ್ತದೆ. ಅಂತಹುದೇ ಸೃಷ್ಟಿ ಈ ಬಾರಿಯ ಗೌರಿ ಗಣೇಶ.  

ಕಳೆದ ಬಾರಿಯೂ ಅವರು ಗಣಪತಿಗೆ ಉಡಿಸಿದ ಪಂಚೆ ಸಾಕಷ್ಟು ಜಿಜ್ಞಾಸೆಗೆ ಕಾರಣವಾಗಿತ್ತು. ಈ ಬಾರಿ ಮತ್ತೆ ಗೌರಿ ಗಣೇಶ ಮೂರ್ತಿ ಆಕರ್ಷಣೆಯ ಕೇಂದ್ರವಾಗಿ, ಹಲವು ಪ್ರಶ್ನೆಗಳನ್ನು ಮೂಡಿಸಿವೆ.

ಉತ್ತರ ಕನ್ನಡ ಜಿಲ್ಲೆಯ ಹೊನ್ನಾವರ ತಾಲೂಕಿನ ಕೆಕ್ಕಾರು ಜಿಡಿ ಭಟ್ಟರು ಸರಳ ಸಜ್ಜನರು. ಅವರಿಗೆ ಕೆಕ್ಕಾರಿನಿಂದ ಕರುನಾಡಿನಾದ್ಯಂತ ಸಹಸ್ರಾರು ಅಭಿಮಾನಿಗಳಿದ್ದಾರೆ, ಹಲವು ಸಂಘ ಸಂಸ್ಥೆಗಳು ಅವರನ್ನು ಸನ್ಮಾನಿಸಿವೆ.

ಯಾವ ಹಿನ್ನೆಲೆಯೂ ಇಲ್ಲದೇ ಕಲೆಯ ಸೆಳೆತ ಆರಂಭವಾಗಿ ಪ್ರತಿ ಬಾರಿಯೂ ಪ್ರಯೋಗ ಮಾಡಿ ಯಶಸ್ಸು ಕಂಡವರು ಜಿ.ಡಿ. ಭಟ್ಟರು. ಹೊನ್ನಾವರ, ಕುಮಟಾ ಅಷ್ಟೇ ಅಲ್ಲ, ಚಿತ್ರದುರ್ಗ, ಕಡೂರು, ಗೋವಾ ಮೊದಲಾದೆಡೆ ಇವರು ಮಾಡಿದ ಗಣಪತಿ ಹಾಗೂ ಶಾರದೆಯ ವಿಗ್ರಹಗಳು ಪೂಜಿಸಲ್ಪಡುತ್ತಿವೆ. 

ಇವರ ಕಲಾ ನೈಪುಣ್ಯತೆಗೆ ಬೆರಗಾಗಿ ಮೂರ್ತಿಗಳಿಗೆ ಉಡಿಸಿದ ಸೀರೆ, ಪಂಚೆ ಮಣ್ಣಿನದೋ ಅಥವಾ ಒರಿಜಿನಲ್ಲೊ ಎಂದು ಬೆಟ್ ಹಾಕಿದವರೂ ಇದ್ದಾರೆ. ಅಷ್ಟು ನೈಜವಾಗಿ ಅವರ ಕುಸುರಿ ಕಲೆ ಪ್ರಸಿದ್ದಿ ಪಡೆದಿದೆ