ಬುಕ್‌ ಮೈ ಶೋದಲ್ಲಿ ಅಪರೂಪದ ವಿನೂತನ ದಾಖಲೆ ಬರೆದ ಪುಷ್ಪಾ-2

ಅಲ್ಲು ಅರ್ಜುನ್ ಮತ್ತು ಸುಕುಮಾರ್ ಅವರ ಪುಷ್ಪ 2 ದೇಶಾದ್ಯಂತ ಭರ್ಜರಿಯಾಗಿ ಪ್ರದರ್ಶನಗೊಳ್ಳುತ್ತಿದೆ. ವಿವಾದಗಳು ಎಷ್ಟೇ ಬಂದರೂ ಕಲೆಕ್ಷನ್‌ಗಳ ಮೇಲೆ ಪರಿಣಾಮ ಬೀರುತ್ತಿಲ್ಲ. ಬಾಕ್ಸ್ ಆಫೀಸ್‌ನಲ್ಲಿ ಪುಷ್ಪ ರಾಜ್ ಮಾಡುತ್ತಿರುವ ಸದ್ದು ಸಾಮಾನ್ಯವಲ್ಲ. ವಿಶೇಷವಾಗಿ ಉತ್ತರ ಭಾರತದಲ್ಲಿ ಊಹಿಸಿರದಷ್ಟು ಗಳಿಕೆ ಬರುತ್ತಿದೆ.

ಒಂದು ದಕ್ಷಿಣ ಭಾರತದ ಸಿನಿಮಾಕ್ಕೆ, ತೆಲುಗು ಸಿನಿಮಾಕ್ಕೆ ಹಿಂದಿ ಪ್ರೇಕ್ಷಕರು ಇಷ್ಟೊಂದು ಪ್ರತಿಕ್ರಿಯೆ ನೀಡುತ್ತಿರುವುದು ಆಶ್ಚರ್ಯಕರವಾಗಿದೆ ಎಂದು ಬಾಲಿವುಡ್ ಬಾಕ್ಸ್ ಆಫೀಸ್ ವಿಶ್ಲೇಷಕರು ಸಹ ಅಚ್ಚರಿ ವ್ಯಕ್ತಪಡಿಸುತ್ತಿದ್ದಾರೆ. ಬಾಲಿವುಡ್ ಗಣ್ಯರು ಮೆಚ್ಚುಗೆ ವ್ಯಕ್ತಪಡಿಸುತ್ತಾ ಪೋಸ್ಟ್‌ಗಳನ್ನು ಹಾಕುತ್ತಿದ್ದಾರೆ. ಇದೀಗ ಪುಷ್ಪ 2 ಚಿತ್ರ ಮತ್ತೊಂದು ದಾಖಲೆ ನಿರ್ಮಿಸಿದೆ.

ಬುಕ್‌ ಮೈ ಶೋದಲ್ಲಿ ಪುಷ್ಪ 2 ಮತ್ತೊಂದು ಅಪರೂಪದ ದಾಖಲೆಯನ್ನು ತನ್ನದಾಗಿಸಿಕೊಂಡಿದೆ.  ಬಿಡುಗಡೆಗೆ ಮುಂಚೆಯೇ  ಪುಷ್ಪ 2 ಚಿತ್ರದ ಬುಕಿಂಗ್‌ನಿಂದ ಬುಕ್ ಮೈ ಶೋದಲ್ಲಿ ಸಂಭ್ರಮ ಮನೆಮಾಡಿದೆ. ಗಂಟೆಗೆ ಒಂದು ಲಕ್ಷ, ಅದಕ್ಕಿಂತ ಹೆಚ್ಚು ಟಿಕೆಟ್‌ಗಳು ಬುಕ್ ಮೈ ಶೋದಲ್ಲಿ ಬುಕ್ ಆಗುತ್ತಲೇ ಇವೆ. ವಾರಾಂತ್ಯದಲ್ಲಿ ಅಂತೂ ರಾದ್ಧಾಂತವೇ. ಇದೀಗ ಬುಕ್ ಮೈ ಶೋದಲ್ಲಿ ಪುಷ್ಪ ಹೊಸ ದಾಖಲೆ ನಿರ್ಮಿಸಿದೆ. ಈ ಚಿತ್ರದ ಟಿಕೆಟ್‌ಗಳ ಮಾರಾಟ 2 ಕೋಟಿ ದಾಟಿದೆ ಎಂದು ಬುಕ್ ಮೈ ಶೋ ಸ್ವತಃ ಘೋಷಿಸಿದೆ. 

ಬುಕ್ ಮೈ ಶೋದಲ್ಲಿ ಪುಷ್ಪ 2 ಆರಂಭದಿಂದಲೂ ದಾಖಲೆಗಳನ್ನು ನಿರ್ಮಿಸುತ್ತಲೇ ಇದೆ. ಈ ಚಿತ್ರದ ಮೊದಲ ಐದು ದಿನಗಳು ಪೂರ್ಣಗೊಳ್ಳುವ ಮೊದಲೇ ಪುಷ್ಪ 2ಕ್ಕೆ ಬುಕ್‌ ಮೈ ಶೋದಲ್ಲಿ ಬರೋಬ್ಬರಿ 10 ಮಿಲಿಯನ್ ಟಿಕೆಟ್‌ಗಳು ಬುಕ್ ಆಗಿವೆ. ಅತಿ ಕಡಿಮೆ ಅವಧಿಯಲ್ಲಿ ಒಂದು ಕೋಟಿ ಟಿಕೆಟ್‌ಗಳು ಮಾರಾಟವಾದ ಚಿತ್ರ ಎಂಬ ಅಪರೂಪದ ದಾಖಲೆಯನ್ನು ಪುಷ್ಪ 2 ಚಿತ್ರ ತನ್ನದಾಗಿಸಿಕೊಂಡಿದೆ. ಈಗ ಎರಡು ಕೋಟಿ ಟಿಕೆಟ್‌ಗಳನ್ನು ಮಾರಾಟ ಮಾಡಿರುವ ದಾಖಲೆಯೊಂದಿಗೆ ಮತ್ತೊಂದು ಹಂತದಲ್ಲಿದೆ.

ಇದೆಲ್ಲದರ ನಡುವೆ  'ಪುಷ್ಪ 2'  ಚಿತ್ರ ನಾಲ್ಕು ವಾರಗಳಲ್ಲಿ ದಾಖಲೆಯ ಗಳಿಕೆ ಕಂಡಿದೆ ಎಂದು ನಿರ್ಮಾಪಕರು ಇತ್ತೀಚೆಗೆ ತಿಳಿಸಿದ್ದಾರೆ. ಈ ಚಿತ್ರ ಈವರೆಗೆ ₹1799 ಕೋಟಿ ಗಳಿಸಿದೆ. ಈ ಕುರಿತು ನಿರ್ಮಾಪಕರು ಒಂದು ಪೋಸ್ಟರ್ ಬಿಡುಗಡೆ ಮಾಡಿದ್ದಾರೆ. 'ಪುಷ್ಪ 2 : ದಿ ರೂಲ್ ದಾಖಲೆ ಮುರಿಯುವ ಓಟದೊಂದಿಗೆ ಭಾರತೀಯ ಬಾಕ್ಸ್ ಆಫೀಸ್‌ನ್ನು ಆಳುತ್ತಿದೆ. ಈ ಬ್ಲಾಕ್‌ಬಸ್ಟರ್ ನಾಲ್ಕು ವಾರಗಳಲ್ಲಿ ವಿಶ್ವಾದ್ಯಂತ ₹1799 ಕೋಟಿ ಗಳಿಸಿದೆ' ಎಂದು ಪೋಸ್ಟ್‌ನಲ್ಲಿ  ಬರೆಯಲಾಗಿದೆ.
 

ತೆಲುಗಿನಲ್ಲಿ ಅತಿ ಹೆಚ್ಚು ಗಳಿಕೆ ಕಂಡ 'ಬಾಹುಬಲಿ 2'ಕ್ಕೆ ಇದು ತುಂಬಾ ಹತ್ತಿರವಾಗಿದೆ. 2017ರಲ್ಲಿ ಬಿಡುಗಡೆಯಾದ ಬಾಹುಬಲಿ 2 ₹1810 ಕೋಟಿ ಗಳಿಸಿತ್ತು. ಈ ಲೆಕ್ಕದಲ್ಲಿ ಪುಷ್ಪ 2 ಮತ್ತೊಂದು ವಾರದಲ್ಲಿ 'ಬಾಹುಬಲಿ 2'ರ ಗಳಿಕೆಯನ್ನು ದಾಟುವುದು ಖಚಿತ ಎಂದು ವ್ಯಾಪಾರ ವಲಯಗಳು ಅಂದಾಜಿಸುತ್ತಿವೆ. ಪ್ರಸ್ತುತ ಬಾಕ್ಸ್ ಆಫೀಸ್‌ನಲ್ಲಿ ಯಾವುದೇ ದೊಡ್ಡ ಸಿನಿಮಾಗಳಿಲ್ಲ. ಮತ್ತೊಂದು ವಾರ ಪುಷ್ಪದ್ದೇ ಹವಾ ಇರುವ ಸಾಧ್ಯತೆ ಇದೆ. ಹೀಗಾದರೆ ₹2000 ಕೋಟಿ ಗಡಿ ದಾಟುವುದು ಕಷ್ಟವೇನಲ್ಲ ಎಂದು ವ್ಯಾಪಾರ ವಲಯಗಳು ಅಂದಾಜಿಸುತ್ತಿವೆ.
 

ಜಾಗತಿಕ ತಾರೆ ಅಲ್ಲು ಅರ್ಜುನ್, ಪ್ರತಿಭಾವಂತ ನಿರ್ದೇಶಕ ಸುಕುಮಾರ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದ 'ಪುಷ್ಪ-2: ದಿ ರೂಲ್' ಗಳಿಕೆಯ ಸುನಾಮಿ ಮುಂದುವರಿದಿದೆ. ಈ ಹಿನ್ನೆಲೆಯಲ್ಲಿ, ಬಾಲಿವುಡ್‌ನ ಪ್ರಸಿದ್ಧ ನಿರ್ಮಾಣ ಸಂಸ್ಥೆ ಯಶ್ ರಾಜ್ ಫಿಲ್ಮ್ಸ್ ಒಂದು ಹೇಳಿಕೆ ನೀಡಿದೆ. ಪುಷ್ಪ-2 ತಂಡಕ್ಕೆಲ್ಲ ಶುಭಾಶಯಗಳನ್ನು ತಿಳಿಸಿದೆ. "ದಾಖಲೆಗಳಿರುವುದು ಮುರಿಯಲು. ಹಳೆಯ ದಾಖಲೆಗಳು ಹೋಗುತ್ತವೆ... ಹೊಸ ದಾಖಲೆಗಳು ಬರುತ್ತವೆ. ಮತ್ತಷ್ಟು ಉತ್ತಮ ಪ್ರದರ್ಶನ ನೀಡುವಂತೆ ಪ್ರತಿಯೊಬ್ಬರನ್ನೂ ಹೊಸ ದಾಖಲೆಗಳು ಮುಂದಕ್ಕೆ ತಳ್ಳುತ್ತವೆ. ಇತಿಹಾಸ ಪುಟಗಳನ್ನು ಪುನಃ ಬರೆಯುತ್ತಿರುವ ಪುಷ್ಪ-2 ಚಿತ್ರತಂಡಕ್ಕೆ ಅಭಿನಂದನೆಗಳು. ಫೈರ್ ಅಲ್ಲ... ವೈಲ್ಡ್ ಫೈರ್" ಎಂದು ಯಶ್ ರಾಜ್ ಫಿಲ್ಮ್ಸ್ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.