ಬಾಲಿವುಡ್ ನಟಿ ಶ್ರೀದೇವಿಯ 60ನೇ ಹುಟ್ಟುಹಬ್ಬ; ಗೂಗಲ್ ಡೂಡಲ್ ಗೌರವ
ಇಂದು ದಿವಂಗತ ಬಾಲಿವುಡ್ ನಟಿ ಶ್ರೀದೇವಿ ಅವರ 60 ನೇ ಜನ್ಮ ವಾರ್ಷಿಕೋತ್ಸವ. ಈ ಪ್ರಯುಕ್ತ ಗೂಗಲ್ ವಿಶೇಷ ಡೂಡಲ್ನೊಂದಿಗೆ ಬಾಲಿವುಡ್ನ ಸೂಪರ್ ಸ್ಟಾರ್ ನಟಿಯ ಹುಟ್ಟು ಹಬ್ಬವನ್ನು ಆಚರಿಸುತ್ತಿದೆ. ಆ ಬಗ್ಗೆ ಹೆಚ್ಚಿನ ಮಾಹಿತಿ ಇಲ್ಲಿದೆ.
ಗೂಗಲ್ ಅಪ್ರತಿಮ ಬಾಲಿವುಡ್ ನಟಿ ಶ್ರೀದೇವಿ ಅವರ 60ನೇ ಹುಟ್ಟುಹಬ್ಬವನ್ನು ವರ್ಣರಂಜಿತ ಮತ್ತು ವಿಚಿತ್ರವಾದ ಗೂಗಲ್ ಡೂಡಲ್ ಮೂಲಕ ಆಚರಿಸುತ್ತಿದೆ. ಭಾರತೀಯ ಚಿತ್ರರಂಗದ ಮೊದಲ ಲೇಡಿ ಸೂಪರ್ ಸ್ಟಾರ್ ಎಂಬ ಬಿರುದನ್ನು ಪಡೆದಿರುವ ನಟಿ ಶ್ರೀದೇವಿ. ದಕ್ಷಿಣ ಭಾರತದಿಂದ ಸಿನಿ ಜರ್ನಿ ಆರಂಭಿಸಿ ಬಾಲಿವುಡ್ನಲ್ಲಿ ನೆಲೆ ಕಂಡುಕೊಂಡರು.
1963ರಲ್ಲಿ ತಮಿಳುನಾಡಿನಲ್ಲಿ ಜನಿಸಿದ ಶ್ರೀದೇವಿ ತಮ್ಮ ವೃತ್ತಿಜೀವನದ ನಾಲ್ಕು ದಶಕಗಳ ಅವಧಿಯಲ್ಲಿ ಸುಮಾರು ಮುನ್ನೂರು ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ. ಚಲನಚಿತ್ರ ನಿರ್ಮಾಪಕ ಬೋನಿ ಕಪೂರ್ ಅವರನ್ನು ಮದುವೆಯಾಗಿದ್ದು, ಇವರಿಗೆ ಜಾನ್ವಿ ಮತ್ತು ಖುಷಿ ಕಪೂರ್ ಎಂಬ ಮುದ್ದು ಹೆಣ್ಣುಮಕ್ಕಳಿದ್ದಾರೆ.
ಶ್ರೀದೇವಿಯವರ ಪೂರ್ಣ ಹೆಸರು ಶ್ರೀ ಅಮ್ಮ ಯಂಗೇರ್ ಅಯ್ಯಪ್ಪನ್, ಮತ್ತು ಅವರು ಆಗಸ್ಟ್ 13, 1963 ರಂದು ಮೀನಂಪಟ್ಟಿ ಎಂಬ ಸಣ್ಣ ತಮಿಳುನಾಡಿನ ಹಳ್ಳಿಯಲ್ಲಿ ಜನಿಸಿದರು. ನಟಿ ತಮ್ಮ ಪ್ರಯಾಣವನ್ನು ಆರಂಭದಲ್ಲಿಯೇ ಪ್ರದರ್ಶಕಿಯಾಗಿ ಪ್ರಾರಂಭಿಸಿದರು, ಕೇವಲ ನಾಲ್ಕನೇ ವಯಸ್ಸಿನಲ್ಲಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು.
1967ರಲ್ಲಿ ಕಂದನ್ ಕರುನೈ ಎಂಬ ತಮಿಳು ಚಲನಚಿತ್ರದ ಮೂಲಕ ಸಿನಿಲೋಕಕ್ಕೆ ಎಂಟ್ರಿ ಕೊಟ್ಟರು. ವೃತ್ತಿಜೀವನದ ಆರಂಭದಲ್ಲಿ ತಮಿಳು, ತೆಲುಗು ಮತ್ತು ಮಲಯಾಳಂ ಚಲನಚಿತ್ರಗಳಲ್ಲಿ ಹೆಚ್ಚಾಗಿ ನಟಿಸುತ್ತಿದ್ದರು. ಹಲವಾರು ಸ್ಟಾರ್ ನಟರ ಜೊತೆ ನಟಿಸಿದ ಹೆಗ್ಗಳಿಕೆ ಅವರದು.
ಒಂಬತ್ತನೇ ವಯಸ್ಸಿನಲ್ಲಿ ರಾಣಿ ಮೇರಾ ನಾಮ್ನಲ್ಲಿ ಬಾಲನಟಿಯಾಗಿ ಬಾಲಿವುಡ್ಗೆ ಪಾದಾರ್ಪಣೆ ಮಾಡಿದರು. ಹಲವಾರು ವರ್ಷಗಳ ನಂತರ, ಶ್ರೀದೇವಿ ಅವರು ಅಮೋಲ್ ಪಾಲೇಕರ್ ಅವರೊಂದಿಗೆ ಸೋಲ್ವ ಸಾವನ್ ಚಿತ್ರದ ಮೂಲಕ ಬಾಲಿವುಡ್ಗೆ ನಾಯಕಿಯಾಗಿ ಪಾದಾರ್ಪಣೆ ಮಾಡಿದರು ಮತ್ತು ನಂತರ 19 ನೇ ವಯಸ್ಸಿನಲ್ಲಿ ಹಿಮ್ಮತ್ವಾಲಾದಲ್ಲಿ ಜೀತೇಂದ್ರ ಅವರೊಂದಿಗೆ ನಟಿಸಿದರು.
ಹಿಮ್ಮತ್ವಾಲಾ ಆ ವರ್ಷದ ಅತಿ ಹೆಚ್ಚು ಗಳಿಕೆ ಮಾಡಿದ ಹಿಂದಿ ಚಲನಚಿತ್ರಗಳಲ್ಲಿ ಒಂದಾಗಿದೆ. ಶ್ರೀದೇವಿ ಜೀತೇಂದ್ರ ಅವರೊಂದಿಗೆ 16 ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ. ಅವರ ಚಲನಚಿತ್ರ ಸದ್ಮಾ ವಿಮರ್ಶಾತ್ಮಕ ಮೆಚ್ಚುಗೆಯನ್ನು ಗಳಿಸಿತು ಮತ್ತು ಫಿಲ್ಮ್ಫೇರ್ನ ಅತ್ಯುತ್ತಮ ನಟಿ ಪ್ರಶಸ್ತಿಯನ್ನು ಸಹ ಪಡೆದರು.
ಮಿಸ್ಟರ್ ಇಂಡಿಯಾ, ನಾಗಿನಾ ಮತ್ತು ಚಾಂದಿನಿ ಚಿತ್ರಗಳಲ್ಲಿನ ಅಪ್ರತಿಮ ಅಭಿನಯದ ನಂತರ, ಶ್ರೀದೇವಿ ಅವರು ತಮ್ಮ ವೃತ್ತಿಜೀವನದ ನಂತರದ ಹಂತದಲ್ಲಿ ಇಂಗ್ಲಿಷ್ ವಿಂಗ್ಲಿಷ್ ಮತ್ತು ಮಾಮ್ನಲ್ಲಿ ಪ್ರಭಾವಶಾಲಿ ಪಾತ್ರಗಳನ್ನು ಮಾಡಿದರು. ಆದಾಗ್ಯೂ, ಆಕೆಯ ವೃತ್ತಿಜೀವನವು ಶೀಘ್ರದಲ್ಲೇ ಅಕಾಲಿಕ ಮತ್ತು ದುರಂತ ಅಂತ್ಯವನ್ನು ಕಂಡಿತು.
ಶ್ರೀದೇವಿ ಫೆಬ್ರವರಿ 24, 2018 ರಂದು ದುಬೈನ ಜುಮೇರಾ ಎಮಿರೇಟ್ಸ್ ಟವರ್ನಲ್ಲಿ ನಿಧನರಾದರು. ಹೋಟೆಲ್ ರೂಮ್ ಬಾತ್ಟಬ್ನಲ್ಲಿ ಶವವಾಗಿ ಪತ್ತೆಯಾದರು. ಮೊದಲು ಆಕೆಯ ಸಾವನ್ನು ಹೃದಯ ಸ್ತಂಭನ ಎಂದು ಹೇಳಲಾಯಿತು. ಸಾವಿನ ಕಾರಣವನ್ನು ನಂತರ ನೀರಿನ ಮುಳುಗುವಿಕೆ ಎಂದು ನಿರ್ಧರಿಸಲಾಯಿತು. ಇದು ಆಕೆಯ ಅಕಾಲಿಕ ಮರಣದ ಪ್ರಮುಖ ನಿಗೂಢತೆಯನ್ನು ಹುಟ್ಟುಹಾಕಿತು.