ಸಿನಿಮಾ, ಓದು ಎರಡೂ ಸಮಾನ: 41ರಲ್ಲೂ ಸೈಕಾಲಜಿ ಪರೀಕ್ಷೆ ಬರೆಯಲು ರೆಡಿಯಾದ ಸನಮ್ ತೇರಿ ಕಸಮ್ ನಟ!

ಓದುವುದಕ್ಕೆ ವಯಸ್ಸಿನ ಮಿತಿಯಿಲ್ಲ ಎಂದು ಸಾಬೀತುಪಡಿಸಿದ್ದಾರೆ ಈ ನಟ. 41 ವಯಸ್ಸು ದಾಟಿದ್ದರೂ, ಸಿನಿಮಾಗಳ ಜೊತೆಗೆ ಓದನ್ನು ಮುಂದುವರೆಸಿದ್ದಾರೆ. ತಮ್ಮ ಆಸಕ್ತಿಯ ಡಿಗ್ರಿಯನ್ನು ಪೂರ್ಣಗೊಳಿಸಲು ಶೂಟಿಂಗ್ ಅಂತರದಲ್ಲಿ ಹೋಂವರ್ಕ್ ಮಾಡುತ್ತಿದ್ದಾರೆ. ಈ ನಟ ಯಾರೆಂದು ತಿಳಿದಿದೆಯೇ? 

ವಯಸ್ಸಾದವರು ವಿಶ್ವವಿದ್ಯಾಲಯಗಳಿಂದ ಪದವಿ ಪಡೆಯುವ ಅಥವಾ 10ನೇ ತರಗತಿ ಪರೀಕ್ಷೆ ಬರೆಯುವ ಸುದ್ದಿಗಳನ್ನು ನಾವು ಕೇಳುತ್ತಲೇ ಇರುತ್ತೇವೆ. ಇದರಲ್ಲಿ ಕೆಲವು ಸಿನಿಮಾ ತಾರೆಯರೂ ಇದ್ದಾರೆ. ಇತ್ತೀಚೆಗೆ ಮಲಯಾಳಂ ನಟರೊಬ್ಬರು 70ನೇ ವಯಸ್ಸಿನಲ್ಲಿ 10ನೇ ತರಗತಿ ಪರೀಕ್ಷೆ ಬರೆದು ತೇರ್ಗಡೆಯಾಗಿದ್ದರು. ಅವರು ಅನೇಕರಿಗೆ ಸ್ಫೂರ್ತಿ. ಈಗ ಟಾಲಿವುಡ್ ನಟರೊಬ್ಬರು 41ನೇ ವಯಸ್ಸಿನಲ್ಲಿ ಪದವಿ ಪರೀಕ್ಷೆಗೆ ತಯಾರಾಗುತ್ತಿದ್ದಾರೆ. ಶೂಟಿಂಗ್ ಅಂತರದಲ್ಲಿ ಓದುತ್ತಿದ್ದಾರೆ. ಈ ನಟ ಹರ್ಷವರ್ಧನ್ ರಾಣೆ. 

ಟಾಲಿವುಡ್‌ನಲ್ಲಿ ತನ್ನದೇ ಆದ ಛಾಪು ಮೂಡಿಸಿರುವ ಹರ್ಷವರ್ಧನ್ ರಾಣೆ ಈಗ ಬಾಲಿವುಡ್‌ನಲ್ಲೂ ಯಶಸ್ವಿಯಾಗಿದ್ದಾರೆ. ಸಿನಿಮಾ ವೃತ್ತಿಜೀವನದ ಜೊತೆಗೆ ವೈಯಕ್ತಿಕ ಬೆಳವಣಿಗೆಗೂ ಆದ್ಯತೆ ನೀಡುತ್ತಿರುವ ಈ ನಟ 41ನೇ ವಯಸ್ಸಿನಲ್ಲಿ ಪದವಿ ಪರೀಕ್ಷೆಗೆ ತಯಾರಾಗುತ್ತಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಈ ವಿಷಯವನ್ನು ಹಂಚಿಕೊಂಡ ರಾಣೆ ತಮ್ಮ ಶಿಕ್ಷಣದ ಬಗೆಗಿನ ಬದ್ಧತೆಯನ್ನು ತೋರಿಸಿದ್ದಾರೆ.

ಹರ್ಷವರ್ಧನ್ ಪ್ರಸ್ತುತ ಸೈಕಾಲಜಿ ಆನರ್ಸ್ ಪದವಿಯಲ್ಲಿ ಎರಡನೇ ವರ್ಷದಲ್ಲಿದ್ದಾರೆ. ಜೂನ್‌ನಲ್ಲಿ ಪರೀಕ್ಷೆಗಳಿರುವುದರಿಂದ ಶೂಟಿಂಗ್‌ಗಳ ನಡುವೆ ಸಿಗುವ ಸಮಯವನ್ನು ಓದಿಗೆ ಮೀಸಲಿಟ್ಟಿದ್ದಾರೆ. ಇತ್ತೀಚಿನ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಅವರು ಅಧ್ಯಯನ ಮೇಜಿನ ಬಳಿ ಟಿಪ್ಪಣಿಗಳನ್ನು ಓದುತ್ತಿರುವ ಫೋಟೋಗಳನ್ನು ಹಂಚಿಕೊಂಡಿದ್ದಾರೆ. ‘‘ಸಿನಿಮಾ ಶೂಟಿಂಗ್ ನಡೆಯುತ್ತಿದೆ, ಸೈಕಾಲಜಿ ಆನರ್ಸ್ ಎರಡನೇ ವರ್ಷದ ಪರೀಕ್ಷೆಗಳು ಜೂನ್‌ನಲ್ಲಿವೆ,’’ ಎಂದು ಬರೆದುಕೊಂಡಿದ್ದಾರೆ. ಸದ್ಯ ಈ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.

ಹರ್ಷವರ್ಧನ್ ರಾಣೆ 2010ರಲ್ಲಿ ‘ತಕಿಟ ತಕಿಟ’ ಚಿತ್ರದ ಮೂಲಕ ನಾಯಕ ನಟನಾಗಿ ಪಾದಾರ್ಪಣೆ ಮಾಡಿದರು. ನಂತರ ‘ನಾ ಇಷ್ಟಂ’, ‘ಅವುನು’, ‘ಪ್ರೇಮ ಇಷ್ಕ್ ಕಾದಲ್’, ‘ಮಾಯ’, ‘ಫಿದಾ’, ‘ಬೆಂಗಾಲ್ ಟೈಗರ್’, ‘ಅವುನು 2’, ‘ಅನಾಮಿಕ’, ‘ಬ್ರದರ್ ಆಫ್ ಬೊಮ್ಮಾಳಿ’ ಮುಂತಾದ ಚಿತ್ರಗಳಲ್ಲಿ ನಟಿಸಿ ತಮ್ಮ ನಟನಾ ಕೌಶಲ್ಯವನ್ನು ಪ್ರದರ್ಶಿಸಿದ್ದಾರೆ.

ಇತ್ತೀಚೆಗೆ ಬಾಲಿವುಡ್‌ನಲ್ಲಿ  ಬಿಡುಗಡೆಯಾದ ‘ಸನಮ್ ತೇರಿ ಕಸಮ್’ ಚಿತ್ರದ ಮರು-ಬಿಡುಗಡೆ ಭಾರಿ ಯಶಸ್ಸು ಗಳಿಸಿದೆ. ಈ ಚಿತ್ರ 50 ಕೋಟಿಗೂ ಹೆಚ್ಚು ಗಳಿಕೆ ಕಂಡಿದೆ. ಪ್ರಸ್ತುತ ಹರ್ಷವರ್ಧನ್ ‘ದೀವಾನಿಯಾತ್’ ಎಂಬ ಪ್ರಣಯ ಚಿತ್ರದ ಚಿತ್ರೀಕರಣದಲ್ಲಿ ನಿರತರಾಗಿದ್ದಾರೆ. ಇಂತಹ ಸಮಯದಲ್ಲೂ ಶಿಕ್ಷಣಕ್ಕೆ ಪ್ರಾಮುಖ್ಯತೆ ನೀಡಿ ಪದವಿ ಓದುತ್ತಿರುವುದು ಹರ್ಷವರ್ಧನ್ ಬಗ್ಗೆ ಅಭಿಮಾನಿಗಳಲ್ಲಿ ಗೌರವ ಹೆಚ್ಚಿಸಿದೆ. ಇಂದಿನ ಪೀಳಿಗೆಗೆ ಉತ್ತಮ ಸ್ಫೂರ್ತಿಯಾಗಿದ್ದಾರೆ ಹರ್ಷ.