ಹೊಸ SUV ಘೋಷಿಸಿದ ಮಹೀಂದ್ರಾ & ಮಹೀಂದ್ರಾ, ಮಾರುಕಟ್ಟೆಗೆ ಬರಲಿದೆ ಬೊಲೆರೊ EV

ಜನಪ್ರಿಯ ಎಸ್‌ಯುವಿ ಬ್ರಾಂಡ್ ಮಹೀಂದ್ರಾ & ಮಹೀಂದ್ರಾ, ತನ್ನ ಸಂಪ್ರದಾಯವನ್ನು ಮುಂದುವರೆಸುತ್ತಾ, ಈ ಸ್ವಾತಂತ್ರ್ಯ ದಿನದಂದು ಪ್ರಮುಖ ಘೋಷಣೆ ಮಾಡಲು ಸಜ್ಜಾಗಿದೆ. ಕಂಪನಿಯು ಹೊಸ ಫ್ಲಾಟ್‌ಫಾರ್ಮ್‌ಅನ್ನು ಪರಿಚಯಿಸಲಿದ್ದು, ಇದನ್ನು ಅದರ ಹೊಸ ಚಕನ್ ಉತ್ಪಾದನಾ ಘಟಕದಲ್ಲಿ ತಯಾರಿಸಲಾಗುತ್ತದೆ. ಹೊಸ ಮಹೀಂದ್ರಾ ಎಸ್‌ಯುವಿ ಪ್ಲಾಟ್‌ಫಾರ್ಮ್ ಬಗ್ಗೆ ಕಂಪನಿಯು ಇನ್ನೂ ವಿವರಗಳನ್ನು ಬಹಿರಂಗಪಡಿಸದಿದ್ದರೂ, ಇದು ನ್ಯೂ ಫ್ಲೆಕ್ಸಿಬಲ್‌ ಆರ್ಕಿಟೆಕ್ಚರ್‌ (ಎನ್‌ಎಫ್‌ಎ) ಆಗುವ ನಿರೀಕ್ಷೆಯಿದೆ. ಮಹೀಂದ್ರಾ ವರ್ಷಕ್ಕೆ 1.2 ಲಕ್ಷ ಎನ್‌ಎಫ್‌ಎ ಆಧಾರಿತ ಎಸ್‌ಯುವಿಗಳನ್ನು ಉತ್ಪಾದಿಸುವ ಗುರಿಯನ್ನು ಹೊಂದಿದೆ.

ಹೊಸ ಪೀಳಿಗೆಯ ಮಹೀಂದ್ರಾ ಬೊಲೆರೊ ಮತ್ತು ಬೊಲೆರೊ ಇವಿ ಹೊಸ ಎನ್‌ಎಫ್‌ಎ ಪ್ಲಾಟ್‌ಫಾರ್ಮ್ ಅನ್ನು ಆಧರಿಸಿದ ಮೊದಲ ಉತ್ಪನ್ನಗಳಾಗುವ ನಿರೀಕ್ಷೆಯಿದೆ. ಇದನ್ನು ಭವಿಷ್ಯದಲ್ಲಿ ಹಲವಾರು ಮಹೀಂದ್ರಾ ಎಸ್‌ಯುವಿಗಳು ಅನುಸರಿಸುತ್ತವೆ. ಈ ಆರ್ಕಿಟೆಕ್ಚರ್‌ ಐಸಿಇ (ಆಂತರಿಕ ದಹನಕಾರಿ ಎಂಜಿನ್), ಹೈಬ್ರಿಡ್ ಮತ್ತು ಎಲೆಕ್ಟ್ರಿಕ್ ಪವರ್‌ಟ್ರೇನ್‌ಗಳೊಂದಿಗೆ ಹೊಂದಿಕೊಳ್ಳುತ್ತದೆ. ಆಗಸ್ಟ್ 15 ರಂದು ಅಧಿಕೃತ ಪ್ರಕಟಣೆಯಲ್ಲಿ ಎನ್‌ಎಫ್‌ಎ ಪ್ಲಾಟ್‌ಫಾರ್ಮ್ ಕುರಿತು ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಲಾಗುತ್ತದೆ ಎಂದು ಕಂಪನಿ ಹೇಳಿದೆ. ಮಾರುಕಟ್ಟೆಯಲ್ಲಿ ತನ್ನ ಸ್ಥಾನವನ್ನು ಬಲಪಡಿಸುವ ದೃಷ್ಟಿಯಿಂದ, ದೇಶೀಯ ವಾಹನ ತಯಾರಕ ಕಂಪನಿಯು ಈ ದಶಕದ ಅಂತ್ಯದ ವೇಳೆಗೆ ಒಂದು ಡಜನ್ (12) ಹೊಸ ಎಸ್‌ಯುವಿಗಳನ್ನು ಬಿಡುಗಡೆ ಮಾಡಲು ಯೋಜಿಸಿದೆ.

ಈ ಸಾಲಿನಲ್ಲಿ 7 ICE ಮಾದರಿಗಳು, ಐದು ಬ್ಯಾಟರಿ ಎಲೆಕ್ಟ್ರಿಕ್ ವಾಹನಗಳು ಮತ್ತು ಐದು ಲಘು ವಾಣಿಜ್ಯ ವಾಹನಗಳು (LCV) ಸೇರಿವೆ. ಬೊಲೆರೊ, ಸ್ಕಾರ್ಪಿಯೋ ಮತ್ತು ಥಾರ್ ಸೇರಿದಂತೆ ಎಲ್ಲಾ ICE ಬ್ರ್ಯಾಂಡ್‌ಗಳು ಕಾಲಾನಂತರದಲ್ಲಿ ಎಲೆಕ್ಟ್ರಿಕಲ್‌ ಆಗಲಿದೆ ಎಂದು ಮಹೀಂದ್ರಾ ಈಗಾಗಲೇ ಘೋಷಿಸಿತ್ತು. ಮಹೀಂದ್ರಾ ಥಾರ್.ಇ ಕಾನ್ಸೆಪ್ಟ್ ಅನ್ನು 2023 ಆಗಸ್ಟ್ 15ರಂದು ಅದರ ಪರಿಕಲ್ಪನೆಯ ರೂಪದಲ್ಲಿ ಪ್ರದರ್ಶಿಸಲಾಯಿತು. ಥಾರ್.ಇ ಕಾನ್ಸೆಪ್ಟ್ ಮಹೀಂದ್ರಾದ INGLO ಸ್ಕೇಟ್‌ಬೋರ್ಡ್ ಪ್ಲಾಟ್‌ಫಾರ್ಮ್‌ನ ಸುಧಾರಿತ ಆವೃತ್ತಿಯನ್ನು ಆಧರಿಸಿದೆ. ಇದು 109bhp/135Nm ಮುಂಭಾಗದ ಎಲೆಕ್ಟ್ರಿಕ್ ಮೋಟಾರ್ ಮತ್ತು 286bhp/535Nm ಹಿಂಭಾಗದ ಎಲೆಕ್ಟ್ರಿಕ್ ಮೋಟಾರ್ ಅನ್ನು ಹೊಂದಿದ್ದು, AWD (ಆಲ್-ವೀಲ್ ಡ್ರೈವ್) ವ್ಯವಸ್ಥೆಯನ್ನು ಬೆಂಬಲಿಸುತ್ತದೆ.

ಇದರ ನಡುವೆ, ಮಹೀಂದ್ರಾ ಈ ವರ್ಷ ಎಲೆಕ್ಟ್ರಿಕ್ XUV300 ಮತ್ತು ಎಲೆಕ್ಟ್ರಿಕ್ XUV700 SUV ಗಳನ್ನು ಬಿಡುಗಡೆ ಮಾಡಲು ಸಜ್ಜಾಗಿದೆ, ಇದು ಟಾಟಾ ನೆಕ್ಸಾನ್ EV ಮತ್ತು ಮುಂಬರುವ ಟಾಟಾ ಸಫಾರಿ EV ಗಳಿಗೆ ನೇರವಾಗಿ ಪೈಪೋಟಿ ನೀಡುತ್ತದೆ. 2026 ರಲ್ಲಿ, ಕಂಪನಿಯು ಅಪ್‌ಡೇಟೆಡ್‌ XUV700 ಮತ್ತು ಥಾರ್ (3 ಡೋರ್‌) SUV ಗಳನ್ನು ಬಿಡುಗಡೆ ಮಾಡುತ್ತದೆ. ಎರಡೂ SUV ಗಳು ಸಣ್ಣ ವಿನ್ಯಾಸ ಬದಲಾವಣೆಗಳನ್ನು ಪಡೆಯುವ ನಿರೀಕ್ಷೆಯಿದೆ. ಅದೇ ಸಮಯದಲ್ಲಿ, ಅವುಗಳ ಒಳಾಂಗಣವನ್ನು ಗಮನಾರ್ಹವಾಗಿ ನವೀಕರಿಸಲಾಗುತ್ತದೆ. ವಾಹನಗಳಲ್ಲಿ ಯಾವುದೇ ಯಾಂತ್ರಿಕ ಬದಲಾವಣೆಗಳನ್ನು ನಿರೀಕ್ಷಿಸಲಾಗುವುದಿಲ್ಲ.