ಚಂದ್ರನ ಮೇಲೆ 2 ಎಕರೆ ಭೂಮಿ ಖರೀದಿಸಿ ಇಬ್ಬರು ಹೆಣ್ಣುಮಕ್ಕಳ ಹೆಸರಿಗೆ ನೋಂದಾಯಿಸಿದ ಎನ್‌ಆರ್‌ಐ

ಅನಿವಾಸಿ ಭಾರತೀಯ ಚಂದ್ರನ ಮೇಲೆ ಎರಡು ಎಕರೆ ಭೂಮಿಯನ್ನು ಖರೀದಿಸಿ, ಅದನ್ನು ತನ್ನ ಇಬ್ಬರು ಹೆಣ್ಣುಮಕ್ಕಳ ಹೆಸರಿಗೆ ನೋಂದಾಯಿಸುವ ಮೂಲಕ ವಿಶಿಷ್ಟ ಹೆಜ್ಜೆ ಇಟ್ಟಿದ್ದಾರೆ.

ಭಾರತದ  'ಚಂದ್ರಯಾನ-3' ಮಿಷನ್‌ ಯಶಸ್ವಿಯಾದ ಬೆನ್ನಲ್ಲೇ ಇಸ್ರೋ ಮತ್ತೊಂದು ಮಹತ್ವದ ಯೋಜನೆಗೆ ಸಜ್ಜಾಗಿದೆ. ಅದೇನು ಅಂತೀರಾ..? ಮಾನವರನ್ನು ಚಂದ್ರನತ್ತ ಕಳುಹಿಸುವುದು. ಈ ಪ್ರಯತ್ನವು ಚಂದ್ರನ ಮೇಲ್ಮೈಯಲ್ಲಿ ಮಾನವ ವಾಸಕ್ಕೆ ಅನುಕೂಲಕರವಾದ ಪರಿಸ್ಥಿತಿಗಳನ್ನು ಸೃಷ್ಟಿಸುವುದರ ಮೇಲೆ ಕೇಂದ್ರೀಕರಿಸಿದ ಪ್ರಯೋಗಗಳನ್ನು ಒಳಗೊಂಡಂತೆ ವಿವಿಧ ಬೆಳವಣಿಗೆಗಳನ್ನು ಉತ್ತೇಜಿಸಿದೆ.

ಈ ಮಧ್ಯೆ, ಭೂಮಿಯ ಉಪಗ್ರಹ ಚಂದ್ರನಲ್ಲಿ ಭೂಮಿ ಖರೀದಿಸಲು ರಿಯಲ್‌ ಎಸ್ಟೇಟ್‌ನಲ್ಲಿ ಆಸಕ್ತಿ ಹೆಚ್ಚಾಗ್ತಿದೆ. ಚಂದ್ರನ ಮೇಲೆ ಭೂಮಿಯ ಮಾಲೀಕತ್ವದ ಸಾಧ್ಯತೆಯನ್ನು ಜನರು  ಅನ್ವೇಷಿಸುತ್ತಿದ್ದಾರೆ. ಈ ಪೈಕಿ ಒಬ್ಬರು ತೆಲುಗು ಅನಿವಾಸಿ ಭಾರತೀಯ (ಎನ್‌ಆರ್‌ಐ) ಚಂದ್ರನ ಮೇಲೆ ಎರಡು ಎಕರೆ ಭೂಮಿಯನ್ನು ಖರೀದಿಸಿ, ಅದನ್ನು ತನ್ನ ಇಬ್ಬರು ಹೆಣ್ಣುಮಕ್ಕಳ ಹೆಸರಿಗೆ ನೋಂದಾಯಿಸುವ ಮೂಲಕ ವಿಶಿಷ್ಟ ಹೆಜ್ಜೆ ಇಟ್ಟಿದ್ದಾರೆ.

ಆಂಧ್ರಪ್ರದೇಶದ ಕೃಷ್ಣಾ ಜಿಲ್ಲೆಯ ಬಾಪುಲಪಾಡು ಮಂಡಲದ ವೀರವಲ್ಲಿ ಮೂಲದ ಬೊಡ್ಡು ಜಗನ್ನಾಥ ರಾವ್ ಅಮೆರಿಕದಲ್ಲಿ ವಾಸಿಸುತ್ತಿದ್ದಾರೆ. ಇವರು ಚಂದ್ರನ ಮೇಲೆ ಜಮೀನುಗಳು ಮಾರಾಟವಾಗುತ್ತಿರುವ ವಿಚಾರ ತಿಳಿದು ಅಚ್ಚರಿಗೊಂಡರು. ಆದರೆ ಅವರು ಭವಿಷ್ಯವನ್ನು ಮುಂಗಾಣಿದರು ಮತ್ತು ಚಂದ್ರನ ಮೇಲೆ ವಾಸವು ಸಾಧ್ಯ ಎಂದು ನಂಬಿದ್ದರು. 2005 ರಲ್ಲಿ, ಅವರು ಚಂದ್ರನ ಮೇಲೆ ಭೂಮಿಯನ್ನು ಮಾರಾಟ ಮಾಡುತ್ತಿದ್ದ ಲೂನಾರ್ ಲ್ಯಾಂಡ್ ರಿಜಿಸ್ಟ್ರಿಯನ್ನು ಸಂಪರ್ಕಿಸಿದರು.

ಎನ್ ಆರ್ ಐ ಜಗನ್ನಾಥ ರಾವ್ ನ್ಯೂಯಾರ್ಕ್ ನಲ್ಲಿರುವ ಲೂನಾರ್ ರಿಪಬ್ಲಿಕ್ ಸೊಸೈಟಿಯ ಕೇಂದ್ರ ಕಚೇರಿಗೆ ತೆರಳಿ ಚಂದ್ರನ ಮೇಲಿನ ಭೂಮಿ ಮಾರಾಟದ ಸಂಪೂರ್ಣ ವಿವರಗಳನ್ನು ತಂದರು. ಕೂಡಲೇ ತಮ್ಮ ಇಬ್ಬರು ಹೆಣ್ಣು ಮಕ್ಕಳ ಹೆಸರಿಗೆ ಚಂದ್ರನ ಮೇಲೆ ಎರಡು ಎಕರೆ ಜಮೀನು ಖರೀದಿಸಿದರು. ಜಮೀನಿನ ಜಮೀನು ಸಂಖ್ಯೆಗಳು ಮತ್ತು ವಿವಿಧ ಅಂತರಾಷ್ಟ್ರೀಯ ಸಂಶೋಧನಾ ಸಂಸ್ಥೆಗಳು ಗುರುತಿಸಿದ ಪ್ರದೇಶಗಳ ಹೆಸರುಗಳನ್ನು ನಮೂದಿಸುವ ನೋಂದಣಿ ಹಕ್ಕು ಪತ್ರವನ್ನು ಅವರಿಗೆ ನೀಡಲಾಯಿತು. ಇದಲ್ಲದೆ, ಎರಡು ಎಕರೆ ಭೂಮಿಯ ಅಕ್ಷಾಂಶ ಮತ್ತು ರೇಖಾಂಶವನ್ನು ಸ್ಪಷ್ಟವಾಗಿ ಹೇಳುವ ನೋಂದಣಿ ಪ್ರಮಾಣಪತ್ರವನ್ನು ಲೂನಾರ್ ರಿಪಬ್ಲಿಕ್ ಸೊಸೈಟಿ ನೀಡಿದೆ. 

ಇಸ್ರೋ ಜೊತೆಗೆ ಹಲವು ಅಂತಾರಾಷ್ಟ್ರೀಯ ಸಂಸ್ಥೆಗಳು ಸಹ ಚಂದ್ರನತ್ತ ಮನುಷ್ಯರನ್ನು ಕಳುಹಿಸುವ ಸಂಶೋಧನೆಗೆ ಸಿದ್ಧವಾಗಿವೆ. ಚಂದ್ರ ಮಾತ್ರವಲ್ಲದೆ ಇತರೆ ಗ್ರಹಗಳ ಮೇಲೆ ಮನುಷ್ಯರನ್ನು ಕಳಿಸಲು ಸಿದ್ಧತೆ ನಡೆಸಿವೆ. 

ಇದೇ ರೀತಿ, ತಾನೂ ಸಹ ಚಂದ್ರನ ಮೇಲೆ ಕಾಲಿಡುತ್ತೇನೆ ಎಂಬ ಭರವಸೆಯನ್ನು ಜಗನ್ನಾಥ ರಾವ್ ವ್ಯಕ್ತಪಡಿಸುತ್ತಾರೆ. ಆ ಆಸೆಯಿಂದ ಹಲವು ವರ್ಷಗಳ ಹಿಂದೆ ಚಂದ್ರನ ಮೇಲೆ ಭೂಮಿ ಖರೀದಿಸಿದ್ದೆ ಎಂದರು. ಹಾಗೂ, ಚಂದ್ರಯಾನ 3 ಯಶಸ್ಸಿನ ನಂತರ ಜಗನ್ನಾಥ್ ರಾವ್ ತಮ್ಮ ಆಸೆ ಶೀಘ್ರದಲ್ಲೇ ಈಡೇರುವ ಭರವಸೆಯನ್ನು ಸಹ ವ್ಯಕ್ತಪಡಿಸಿದ್ದಾರೆ.