ಇರಾನ್ ಯುದ್ಧದ ಕೆನ್ನಾಲಿಗೆಗೆ ಬೆಂದು ಹೋದ ಗಲ್ಫ್‌ ರಾಷ್ಟ್ರಗಳು: ಯುದ್ಧ ಮಾಡದೇ ಇದ್ದರೂ ಸೌದಿ, ಯುಎಇಗೆ ಕೋಟ್ಯಂತರ ನಷ್ಟ!

ಇರಾನ್-ಇಸ್ರೇಲ್ ಯುದ್ಧದಿಂದಾಗಿ, ನೇರ ಸಂಬಂಧವಿಲ್ಲದಿದ್ದರೂ ಗಲ್ಫ್ ದೇಶಗಳು ಭಾರಿ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿವೆ. ಸೌದಿ ಅರೇಬಿಯಾ ಮತ್ತು ಯುಎಇ ತಲಾ ₹42,000 ಕೋಟಿಗೂ ಅಧಿಕ ನಷ್ಟ ಅನುಭವಿಸಿದ್ದು, ಇಂಧನ ಆದಾಯ ಮತ್ತು ಪ್ರವಾಸೋದ್ಯಮ ಕ್ಷೇತ್ರಗಳು ತೀವ್ರವಾಗಿ ಹಾನಿಗೊಳಗಾಗಿವೆ.

Image Credit : Getty

ಯುದ್ಧ ಮಾಡದಿದ್ದರೂ ಸೋಲು ಕಂಡ ಗಲ್ಫ್‌

ಇರಾನ್ ಯುದ್ಧದ ಪರಿಣಾಮವಾಗಿ ಗಲ್ಫ್ ದೇಶಗಳು ಅತಿ ಹೆಚ್ಚು ಆರ್ಥಿಕ ಹೊಡೆತ ಅನುಭವಿಸಿವೆ. ಈ ಯುದ್ಧಕ್ಕೂ ತಮಗೂ ಯಾವುದೇ ನೇರ ಸಂಬಂಧವಿಲ್ಲದಿದ್ದರೂ ಸಹ, ಈ ರಾಷ್ಟ್ರಗಳು ಭಾರಿ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿವೆ. ಇರಾನ್ ಮೇಲೆ ಇಸ್ರೇಲ್-ಯುಎಸ್ ಜಂಟಿ ದಾಳಿಯ ನಂತರ, ಸೌದಿ ಅರೇಬಿಯಾ ಮತ್ತು ಯುಎಇ (UAE) ಅತಿ ಹೆಚ್ಚು ನಷ್ಟ ಅನುಭವಿಸಿವೆ ಎಂದು ಇತ್ತೀಚಿನ ಅಂಕಿಅಂಶಗಳು ಬಹಿರಂಗಪಡಿಸಿವೆ.

Image Credit : Getty

ಸೌದಿ ಅರೇಬಿಯಾಗೆ ಗರಿಷ್ಠ ಪೆಟ್ಟು

ಸೌದಿ ಅರೇಬಿಯಾದ ಇಂಧನ ಮತ್ತು ಪ್ರವಾಸೋದ್ಯಮ ಕ್ಷೇತ್ರಗಳು ಕನಿಷ್ಠ ₹42,000 ಕೋಟಿಗೂ ಅಧಿಕ ನಷ್ಟವನ್ನು ಅನುಭವಿಸಿವೆ. ಅದೇ ರೀತಿ, ಯುಎಇ ಕೂಡ ಇದುವರೆಗೆ ಸುಮಾರು ₹42,000 ಕೋಟಿ ನಷ್ಟ ಅನುಭವಿಸಿದೆ. ಇವುಗಳ ನಂತರ ಕತಾರ್ ಮತ್ತು ಇರಾಕ್ ಕೂಡ ಭಾರಿ ಆರ್ಥಿಕ ಪೆಟ್ಟು ಅನುಭವಿಸಿವೆ.

Image Credit : X

ಗಲ್ಫ್‌ ದೇಶಗಳಿಗೆ 1.26 ಲಕ್ಷ ಕೋಟಿ ನಷ್ಟ

ಫೈನಾನ್ಷಿಯಲ್ ಟೈಮ್ಸ್ ವರದಿಯ ಪ್ರಕಾರ, ಇರಾನ್ ಯುದ್ಧದಿಂದಾಗಿ ಗಲ್ಫ್ ದೇಶಗಳ ಇಂಧನ ಆದಾಯದಲ್ಲಿ ಅಂದಾಜು ₹1.26 ಲಕ್ಷ ಕೋಟಿ ನಷ್ಟ ಉಂಟಾಗಿದೆ. ಇದರಲ್ಲಿ ಸೌದಿ ಅರೇಬಿಯಾ ಅತಿ ಹೆಚ್ಚು ಅಂದರೆ ಸುಮಾರು ₹37,800 ಕೋಟಿ ಕಳೆದುಕೊಂಡಿದೆ. ಸೌದಿ ಅರೇಬಿಯಾದ ಅತಿದೊಡ್ಡ ತೈಲ ಕಂಪನಿ 'ಅರಾಮ್ಕೊ' (Aramco) ಯುದ್ಧದ ಕಾರಣದಿಂದಾಗಿ ತನ್ನ ಕಾರ್ಯಾಚರಣೆ ಸ್ಥಗಿತಗೊಳಿಸಿದೆ.

Image Credit : ChatGPT

ಇಂಧನ ಆದಾಯದ ನಷ್ಟ

ಫೈನಾನ್ಷಿಯಲ್ ಟೈಮ್ಸ್ ಪ್ರಕಾರ, ಸೌದಿ ಅರೇಬಿಯಾ ಇಂಧನ ಆದಾಯದಲ್ಲಿ ₹37,800 ಕೋಟಿ ಕಳೆದುಕೊಂಡಿದ್ದರೆ, ಕತಾರ್ ₹4,200 ಕೋಟಿ ನಷ್ಟ ಅನುಭವಿಸಿದೆ. ಕುವೈತ್, ಬಹ್ರೇನ್ ಮತ್ತು ಯುಎಇ ರಾಷ್ಟ್ರಗಳು ಒಟ್ಟಾಗಿ ಇಂಧನ ಆದಾಯದಲ್ಲಿ ಸುಮಾರು ₹84,000 ಕೋಟಿ ಕಳೆದುಕೊಂಡಿವೆ. ಜಗತ್ತಿಗೆ ಇಂಧನ ರಫ್ತು ಮಾಡುವ ಪ್ರಮುಖ ಮಾರ್ಗವಾದ ಹಾರ್ಮುಜ್ ಜಲಸಂಧಿ ಮುಚ್ಚಲ್ಪಟ್ಟಿರುವುದೇ ಈ ಭಾರಿ ನಷ್ಟಕ್ಕೆ ಕಾರಣ.

Image Credit : Getty

ಯುಎಇಯಲ್ಲಿ 12 ನಾಗರಿಕರು ಬಲಿ

ಯುದ್ಧದ ಕಿಚ್ಚಿಗೆ ಗಲ್ಫ್ ರಾಷ್ಟ್ರಗಳ ನಾಗರಿಕರು ಬಲಿಯಾಗುತ್ತಿದ್ದಾರೆ. ಇದುವರೆಗೆ ಯುಎಇನಲ್ಲಿ 12 ನಾಗರಿಕರು, ಕುವೈತ್‌ನಲ್ಲಿ 8, ಬಹ್ರೇನ್ ಮತ್ತು ಸೌದಿ ಅರೇಬಿಯಾದಲ್ಲಿ ತಲಾ 2 ನಾಗರಿಕರು ಸಾವನ್ನಪ್ಪಿದ್ದಾರೆ. ಕತಾರ್‌ನಲ್ಲಿ ಯಾವುದೇ ನಾಗರಿಕ ಸಾವು ವರದಿಯಾಗಿಲ್ಲ. ಇನ್ನು ಇರಾಕ್‌ನಲ್ಲಿ 59 ನಾಗರಿಕರು ಈ ಯುದ್ಧಕ್ಕೆ ಬಲಿಯಾಗಿದ್ದಾರೆ.

Image Credit : X

ಪ್ರವಾಸೋದ್ಯಮ ಕ್ಷೇತ್ರಕ್ಕೆ ಭಾರಿ ಪೆಟ್ಟು

ಪ್ರವಾಸೋದ್ಯಮ ಏಜೆನ್ಸಿಗಳ ಪ್ರಕಾರ, ಯುಎಇ ಪ್ರವಾಸೋದ್ಯಮದಲ್ಲಿ ಸುಮಾರು ₹21,000 ಕೋಟಿ ನಷ್ಟ ಅನುಭವಿಸಿದೆ. ಸೌದಿ ಅರೇಬಿಯಾ ಕೂಡ ಸುಮಾರು ₹16,800 ಕೋಟಿ ಹಾನಿ ಅನುಭವಿಸಿದೆ. ಯುದ್ಧದ ಭೀತಿಯಿಂದಾಗಿ ಈ ರಾಷ್ಟ್ರಗಳಿಗೆ ಪ್ರವಾಸಿಗರ ಭೇಟಿ ಸಂಪೂರ್ಣ ಸ್ಥಗಿತಗೊಂಡಿದೆ.

Image Credit : X

ಯುದ್ಧಕ್ಕಾಗಿ ಅಮೆರಿಕ ಮಾಡಿದ ಖರ್ಚು ಎಷ್ಟು?

ಅಮೆರಿಕದ ರಕ್ಷಣಾ ಇಲಾಖೆ 'ಪೆಂಟಗನ್' ಮಾಹಿತಿ ಪ್ರಕಾರ, ಯುದ್ಧದ ಮೊದಲ 10 ದಿನಗಳಲ್ಲಿ ಅಮೆರಿಕ ಮದ್ದುಗುಂಡುಗಳಿಗಾಗಿ ಮಾತ್ರ ಸುಮಾರು ₹92,400 ಕೋಟಿ ಖರ್ಚು ಮಾಡಿದೆ. ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ನಿರಂತರ ದಾಳಿ ನಡೆಸುತ್ತಿವೆ. ಈ ದಾಳಿಗಳಲ್ಲಿ ಇದುವರೆಗೆ 2,000 ಕ್ಕೂ ಹೆಚ್ಚು ಇರಾನಿನ ನಾಗರಿಕರು ಸಾವನ್ನಪ್ಪಿದ್ದಾರೆ. ಇರಾನ್‌ನ ಪರಮೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಮತ್ತು 40 ಉನ್ನತ ಕಮಾಂಡರ್‌ಗಳು ಈ ಯುದ್ಧದಲ್ಲಿ ಹತರಾಗಿದ್ದಾರೆ ಎಂದು ವರದಿಯಾಗಿದೆ.