ನಾಚೋಸ್‌, ಚಪಾತಿ ನೂಡಲ್ಸ್‌,ಕಾರ್ನ್‌ ಕಟ್ಲೆಟ್‌: ಸಂಜೆಯ ತಿಂಡಿಗಳು
ಕೊರೋನಾ ಕಾಲದ ಸಂಜೆಗಳ ಏಕತಾನತೆಯನ್ನು ಹೋಗಲಾಡಿಸೋದು ಗರಿಮುರಿ ತಿಂಡಿಗಳು. ಸಖತ್‌ ಟೇಸ್ಟಿಯಾದ ಐದು ಬಗೆಯ ಈವ್ನಿಂಗ್‌ ಸ್ನಾಕ್ಸ್‌ ರೆಸಿಪಿ ಇಲ್ಲಿದೆ. ಪಾಕಸ್ವಾದ ಯೂಟ್ಯೂಬ್‌ ಚಾನೆಲ್‌ನಲ್ಲೂ ಈ ರೆಸಿಪಿ ವೀಕ್ಷಿಸಬಹುದು.
ದಿವ್ಯಾ ಹೆಗಡೆ
1. ನಾಚೋಸ್‌
ಬೇಕಾಗುವ ಸಾಮಗ್ರಿಗಳು
ಮೈದಾ ಹಿಟ್ಟು - 1 ಕಪ್‌
ಅಕ್ಕಿ ಹಿಟ್ಟು- 1/4 ಕಪ್‌
ಅರಿಶಿನ- ಅರ್ಧ ಚಮಚ
ಚಾಟ್‌ ಮಸಾಲ- ಅರ್ಧ ಚಮಚ
ಅಚ್ಚಖಾರದ ಪುಡಿ - ಅರ್ಧ ಚಮಚ
ಓಂಕಾಳು - ಅರ್ಧ ಚಮಚ
ಉಪ್ಪು
ಎಣ್ಣೆ - ಕರಿಯಲು
ಪರ್ಫೆಕ್ಟ್ ಆಲೂ ಪರೋಟಾ ಮಾಡೋ ಈಸಿ ವಿಧಾನ!ಮಾಡುವ ವಿಧಾನ
*ಮೊದಲಿಗೆ ಮೈದಾ ಹಿಟ್ಟು, ಅಕ್ಕಿ ಹಿಟ್ಟು, ಅರಿಶಿನ, ಓಂಕಾಳು, ಉಪ್ಪು ಹಾಗೂ ಒಂದು ಚಮಚ ಎಣ್ಣೆ ಹಾಕಿ, ನಿಧಾನಕ್ಕೆ ನೀರು ಸೇರಿಸುತ್ತಾ ಹಿಟ್ಟನ್ನು ಕಲೆಸಿ 20 ನಿಮಿಷ ಮುಚ್ಚಿಡಿ
*20 ನಿಮಿಷದ ನಂತರ, ಹಿಟ್ಟನ್ನು ಮತ್ತೊಮ್ಮೆ ನಾದಿ, ಚಪಾತಿ ಆಕಾರಕ್ಕೆ ಲಟ್ಟಿಸಿ, ತ್ರಿಕೋನಾಕಾರದಲ್ಲಿ ಕತ್ತರಿಸಿ, ಫೋರ್ಕ್ ಸಹಾಯದಿಂದ ಚುಚ್ಚಿ.
* ಕಾದ ಎಣ್ಣೆಯಲ್ಲಿ ಕರಿಯಿರಿ.
* ಒಂದು ತಟ್ಟೆಯಲ್ಲಿ ಉಪ್ಪು, ಅಚ್ಚ ಖಾರದ ಪುಡಿ, ಚಾಟ್‌ ಮಸಾಲ ಕಲೆಸಿ, ಕರಿದಿಟ್ಟನಾಚೋಸ್‌ ಮೇಲೆ ಉದುರಿಸಿ.
* ಕಾಫಿ ಅಥವಾ ಚಹಾದೊಂದಿಗೆ ಸವಿಯಿರಿ.
2. ಚಪಾತಿ ನೂಡಲ್ಸ್‌
ಬೇಕಾಗುವ ಸಾಮಗ್ರಿಗಳು
ಚಪಾತಿ - 4
ಜೀರಿಗೆ - 1 ಚಮಚ
ಅರಿಶಿನ- ಅರ್ಧ ಚಮಚ
ಒಗ್ಗರಣೆಗೆ ಎಣ್ಣೆ
ಈರುಳ್ಳಿ - 1
ಶುಂಠಿ ಬೆಳ್ಳುಳ್ಳಿ ಪೇಸ್ಟ್‌ - 1 ಚಮಚ
ಎಲೆಕೋಸು - ಅರ್ಧ
ಕ್ಯಾರೆಟು - 1
ಬೀನ್ಸ್‌ - 4
ಟೊಮೆಟೊ - 2
ಉಪ್ಪು
ಗರಮ್‌ ಮಸಾಲೆ- ಅರ್ಧ ಚಮಚ
ಖಾರ ಪುಡಿ - 1 ಚಮಚ
ಪೆಪ್ಪರ್‌ ಪುಡಿ - ಅರ್ಧ ಚಮಚ
ಸಿಪ್ಪೆ ತೆಗೆದು ಮೊಟ್ಟೆ ಬೇಯಿಸುವ ಈ ಸುಲಭ ವಿಧಾನ ಆಗಿದೆ ವೈರಲ್!ಮಾಡುವ ವಿಧಾನ
- ಮೊದಲಿಗೆ ಚಪಾತಿಗಳನ್ನ ಸಣ್ಣಗೆ(ನೂಡಲ್ಸ್‌) ಆಕಾರದಲ್ಲಿ ಕತ್ತರಿಸಿಟ್ಟುಕೊಳ್ಳಿ.
- ಒಂದು ಕಡಾಯಿಯಲ್ಲಿ ಎಣ್ಣೆ, ಜೀರಿಗೆ, ಸಾಸ್ವೆ, ಅರಿಶಿನದ ಪುಡಿ ಹಾಕಿ ಹುರಿಯಿರಿ.
- ಒಗ್ಗರಣೆ ಬೆಂದ ನಂತರ ಈರುಳ್ಳಿ, ಶುಂಠಿ ಬೆಳ್ಳುಳ್ಳಿ ಪೇಸ್ಟ್‌ ಹಾಕಿ ಬಾಡಿಸಿ.
- ಈರುಳ್ಳಿ ಬೆಂದ ನಂತರ ಸಣ್ಣಗೆ ಹೆಚ್ಚಿರುವ ಎಲೆಕೋಸು, ಬೀನ್ಸ್‌, ಕ್ಯಾರೆಟು ಹಾಕಿ ಹುರಿಯಿರಿ.
- ಈಗ ಟೊಮೆಟೊ ಹಾಕಿ ಬಾಡಿಸಿ, ಅಚ್ಚ ಖಾರದ ಪುಡಿ, ಪೆಪ್ಪರ್‌ ಪುಡಿ, ಗರಮ್‌ ಮಸಾಲೆ ಹಾಕಿ ಹುರಿಯಿರಿ.
- ಕತ್ತರಿಸಿದ ಚಪಾತಿ ಹಾಕಿ, ರುಚಿಗೆ ತಕ್ಕಷ್ಟುಉಪ್ಪನ್ನು ಸೇರಿಸಿ ಕಲೆಸಿ.
- ತಕ್ಷಣ ಬಡಿಸಿ ಅಥವಾ ಸವಿಯಿರಿ.
3. ಕಾರ್ನ್‌ ಕಟ್ಲೆಟ್‌
ಬೇಕಾಗುವ ಸಾಮಗ್ರಿಗಳು
ಸ್ವಲ್ಪ ಬೆಳೆದಿರುವ ಜೋಳ - 1 ಕಪ್‌
ಈರುಳ್ಳಿ- 1
ಹಸಿಮೆಣಸಿನ ಕಾಯಿ - 2/3
ಕೊತ್ತಂಬರಿ ಸೊಪ್ಪು
ಕರಿಬೇವು
ಲಿಂಬೆರಸ - 1 ಚಮಚ
ಉಪ್ಪು
ಕಡ್ಲೆಹಿಟ್ಟು - 2 ಟೇಬಲ್‌ ಚಮಚ
ಕರಿಯಲು ಎಣ್ಣೆ
ಮಾಡುವ ವಿಧಾನ
- ಮೊದಲಿಗೆ ಜೋಳವನ್ನ ತರಿತರಿಯಾಗಿ ರುಬ್ಬಿ.
- ನಂತರ ಇದಕ್ಕೆ ಸಣ್ಣಗೆ ಹೆಚ್ಚಿದ ಈರುಳ್ಳಿ, ಹಸಿಮೆಣಸು, ಕೊತ್ತಂಬರಿ ಸೊಪ್ಪು, ಕರಿಬೇವು, ಲಿಂಬೆರಸ, ಉಪ್ಪು, ಕಡಲೆ ಹಿಟ್ಟು ಹಾಕಿ ಕಲೆಸಿ.
- ಒಂದೆರಡು ಚಮಚ ಕಾದ ಎಣ್ಣೆಯನ್ನು ಹಾಕಿ ಮತ್ತೆ ಕಲೆಸಿ. ಹೀಗೆ ಮಾಡೋದರಿಂದ ಕಟ್ಲೆಟ್‌ ಜಾಸ್ತಿ ಗರಿಗರಿಯಾಗುತ್ತೆ.
- ಈ ಹಿಟ್ಟಿಗೆ ವಡೆಯಾಕಾರ ಕೊಟ್ಟು ಕಾದ ಎಣ್ಣೆಯಲ್ಲಿ ದೊಡ್ಡ ಉರಿಯಲ್ಲಿ ಕರಿಯಿರಿ.
- ಸಾಸ್‌ ಅಥವಾ ಚಟ್ನಿಯೊಂದಿಗೆ ಸವಿಯಿರಿ.
4. ಭಡಾಂಗ್‌
ಬೇಕಾಗುವ ಸಾಮಗ್ರಿಗಳು
ಚುರುಮುರಿ/ಮಂಡಕ್ಕಿ - 4 ಕಪ್‌
ಎಣ್ಣೆ - ಒಗ್ಗರಣೆಗೆ
ಸಾಸಿವೆ - ಅರ್ಧ ಚಮಚ
ಉದ್ದಿನಬೇಳೆ - 1 ಚಮಚ
ಶೇಂಗ - 1 ದೊಡ್ಡ ಚಮಚ
ಪುಟಾಣಿ - 1 ದೊಡ್ಡ ಚಮಚ
ಅರಿಶಿನ - 1 ಚಮಚ
ಬೆಳ್ಳುಳ್ಳಿ - 15-20 ಎಸಳು
ಸಕ್ಕರೆ ಫುಡಿ - 2 ಚಮಚ
ಉಪ್ಪು
ಮಾಡುವ ವಿಧಾನ
- ಮೊದಲಿಗೆ ಒಂದು ಕಡಾಯಿಗೆ ಎಣ್ಣೆ ಹಾಕಿಕೊಂಡು, ಅದಕ್ಕೆ ಶೇಂಗಾ ಹಾಕಿ ಹುರಿಯಿರಿ.
- ಶೇಂಗಾ ಕಂದುಬಣ್ಣ ಬಂದ ಬಳಿಕ ಪುಟಾಣಿ ಹಾಕಿ ಅದು ಗರಿಯಾಗುವವರೆಗೆ ಹುರಿಯಿರಿ.
- ಇದಕ್ಕೆ ಸಾಸಿವೆ ಕಾಳು, ಉದ್ದಿನಬೇಳೆ, ಅರಿಶಿನ, ಖಾರಪುಡಿ ಹಾಕಿ ಹುರಿಯಿರಿ.
- ಈಗ ಜಜ್ಜಿದ ಬೆಳ್ಳುಳ್ಳಿಯನ್ನ ಸೇರಿಸಿ.
- ಬೆಳ್ಳುಳ್ಳಿ ಬೆಂದ ನಂತರ ಒಲೆಯಾರಿಸಿ, ಮಂಡಕ್ಕಿ, ಉಪ್ಪು, ಸಕ್ಕರೆ ಪುಡಿ ಹಾಕಿ ಕಲೆಸಿ.
- ಗಾಳಿಯಾಡದ ಡಬ್ಬಿಯಲ್ಲಿ ಹಾಕಿಟ್ಟರೆ 15 ದಿನ ಕೆಡದೆ ಇರುತ್ತದೆ.
- ಕಾಫಿ ಅಥವಾ ಚಹಾದೊಂದಿಗೆ ತುಂಬಾ ರುಚಿ.
5. ಸೌತೆಕಾಯಿ ಮುರುಕ್ಕು
ಬೇಕಾಗುವ ಸಾಮಗ್ರಿಗಳು
ಸೌತೆಕಾಯಿ - 2
ಅಕ್ಕಿಹಿಟ್ಟು - 4 ಕಪ್‌
ಉಪ್ಪು
ಓಂಕಾಳು - 1 ಚಮಚ
ಹಸಿಮೆಣಸು - 3
ಕರಿಯಲು ಎಣ್ಣೆ
ಮಾಡುವ ವಿಧಾನ
- ಸೌತೆಕಾಯಿಯ ಸಿಪ್ಪೆ ತೆಗೆದು ತುರಿಯಿರಿ.
- ಇದಕ್ಕೆ ಮೆಣಸಿನಕಾಯಿ ಹಾಕಿ ನೀರು ಸೇರಿಸದೆ ನುಣ್ಣಗೆ ರುಬ್ಬಿ.
- ಈಗ ರುಚಿಗೆ ತಕ್ಕಷ್ಟುಉಪ್ಪು, ಓಂಕಾಳು ಹಾಕಿ ಕಲೆಸಿ.
- ಇದಕ್ಕೆ ನಿಧಾನಕ್ಕೆ ಅಕ್ಕಿ ಹಿಟ್ಟನ್ನ ಸೇರಿಸುತ್ತ ಹಿಟ್ಟು ಕಲೆಸಿಕೊಳ್ಳಿ.
- ಹಿಟ್ಟು ತೀರಾ ಗಟ್ಟಿಆಗಬಾರದು.
- ಹಿಟ್ಟಿನ ಸಣ್ಣ-ಸಣ್ಣ ಉಂಡೆ ಮಾಡಿ ಚಕ್ಕುಲಿ ಒರಳಿಗೆ ಹಾಕಿ. ಇದಕ್ಕೆ ಸಣ್ಣ ತೂತಿನ ಬ್ಲೇಡನ್ನ ಬಳಸಬೇಕು.
- ಕಾದ ಎಣ್ಣೆಗೆ ಸೀದಾ ಒತ್ತಿ. ಕಂದುಬಣ್ಣ ಬಂದಮೇಲೆ ತೆಗೆಯಿರಿ.
- ಗಾಳಿಯಾಡದ ಡಬ್ಬಿಯಲ್ಲಿಟ್ಟರೆ 15 ದಿನ ಇರುತ್ತದೆ.
