ಎಲ್ಲಾ ಸರಿ ಹೋದರೆ ನಟ ರಾಕಿಂಗ್‌ ಸ್ಟಾರ್‌ ಯಶ್‌ ಕಿರುತೆರೆಯ ದೊಡ್ಡ ಶೋ ಒಂದನ್ನು ನಿರ್ಮಿಸಲಿದ್ದಾರೆ! ಹೌದು , ಈಗಾಗಲೇ ತೆರೆ ಮರೆಯಲ್ಲಿ ಆ ಕುರಿತಂತೆ ಚಟುವಟಿಕೆಗಳು ಪ್ರಾರಂಭವಾಗಿದ್ದು ಯಶ್‌ ನಿರ್ಮಾಣಕ್ಕೆ ಆಸಕ್ತಿ ತೋರಿದ್ದಾರಂತೆ.
ಬೆಂಗಳೂರು(ಎ.06): ಎಲ್ಲಾ ಸರಿ ಹೋದರೆ ನಟ ರಾಕಿಂಗ್ ಸ್ಟಾರ್ ಯಶ್ ಕಿರುತೆರೆಯ ದೊಡ್ಡ ಶೋ ಒಂದನ್ನು ನಿರ್ಮಿಸಲಿದ್ದಾರೆ!
ಅಂದಹಾಗೆ ಅವರು ನಿರ್ಮಾಣ ಮಾಡಲು ಆಸಕ್ತಿ ತೋರಿಸಿದ್ದು ಕಲರ್ಸ್ ಚಾನಲ್ನಲ್ಲಿ. ಕಲರ್ಸ್ ಸೂಪರ್ ಹೊಸ ಚಾನಲ್ ಪ್ರಾರಂಭವಾದಾಗ ಆ ಚಾನಲ್ನ ಬ್ರಾಂಡ್ ಅಂಬಾಸಿಡರ್ ಆಗಿದ್ದ ಯಶ್, ಅನಂತರ ಕೂಡ ಚಾನಲ್ ಜೊತೆ ಸೌಹಾರ್ದ ಸಂಬಂಧ ಇಟ್ಟುಕೊಂಡಿದ್ದರು. ಆಗಾಗ ಬೇರೆ ಬೇರೆ ಕಾರ್ಯಕ್ರಮಗಳಿಗೆ ಅತಿಥಿಗಳಾಗಿ ಹೋಗುತ್ತಿದ್ದರು. ಇತ್ತೀಚೆಗೆ ಬಹಳಷ್ಟುಹೀರೋಗಳು ಕಿರುತೆರೆ ನಿರ್ಮಾಣದಲ್ಲೂ ತಮ್ಮನ್ನು ತಾವು ತೊಡಗಿಸಿಕೊಂಡಿರುವ ಹಿನ್ನೆಲೆಯಲ್ಲಿ ಯಶ್ ಕೂಡ ನಿರ್ಮಾಣದ ಕುರಿತಂತೆ ಗಂಭೀರವಾಗಿ ಯೋಚನೆ ಮಾಡಿದ್ದಾರೆನ್ನಲಾಗಿದೆ. ಎಲ್ಲಾ ಸುಸೂತ್ರವಾಗಿ ನಡೆದರೆ ಒಂದು ಸೋಶಿಯೋ-ಮೈಥೋ (ಸಾಮಾಜಿಕ- ಪೌರಾಣಿಕ) ಕಥಾನಕವನ್ನು ದೊಡ್ಡ ಮಟ್ಟದಲ್ಲಿ ನಿರ್ಮಾಣ ಮಾಡಲಿದ್ದಾರೆ ಅನ್ನಲಾಗುತ್ತಿದೆ. ಆದರೆ ಅದು ಯಾವಾಗ ಪ್ರಾರಂಭವಾಗಲಿದೆ ಎಂಬ ಬಗೆಗೆ ಇನ್ನೂ ಮಾಹಿತಿ ಲಭ್ಯವಾಗಿಲ್ಲ. ಒಟ್ಟಿನಲ್ಲಿ ಕಿರುತೆರೆಯಲ್ಲೇ ದೊಡ್ಡ ಫಿಕ್ಷನ್ ಶೋ ಅದಾಗಿರಲಿದೆ ಎನ್ನುತ್ತವೆ ಮೂಲಗಳು.
