ಐಸಿಸಿ ಏಕದಿನ ವಿಶ್ವಕಪ್ ಪ್ರಧಾನ ಸುತ್ತಿಗೆ ನೆದರ್ಲೆಂಡ್ಸ್ ಲಗ್ಗೆಅರ್ಹತಾ ಸುತ್ತಿನಲ್ಲಿ ಸ್ಕಾಟ್ಲೆಂಡ್ ಎದುರು ಭರ್ಜರಿ ಜಯಭೇರಿನವೆಂಬರ್ 11ರಂದು ಭಾರತ-ನೆದರ್ಲೆಂಡ್ಸ್ ಮುಖಾಮುಖಿಗೆ ಬೆಂಗಳೂರು ಆತಿಥ್ಯ
ಹರಾರೆ(ಜು.07): ಬಸ್ ಡಿ ಲೀಡೆ ಅವರ ಆಲ್ರೌಂಡ್ ಆಟದ ನೆರವಿನಿಂದ ನೆದರ್ಲೆಂಡ್ಸ್ 2023ರ ಐಸಿಸಿ ಏಕದಿನ ವಿಶ್ವಕಪ್ಗೆ ಪ್ರವೇಶ ಪಡೆದಿದೆ. ಗುರುವಾರ ನಡೆದ ಅರ್ಹತಾ ಸುತ್ತಿನ ಸೂಪರ್-6 ಪಂದ್ಯದಲ್ಲಿ ಸ್ಕಾಟ್ಲೆಂಡ್ ವಿರುದ್ಧ ನೆದರ್ಲೆಂಡ್ಸ್ 4 ವಿಕೆಟ್ ರೋಚಕ ಗೆಲುವು ಸಾಧಿಸಿತು. ಜಿಂಬಾಬ್ವೆಗೆ ಆಘಾತ ನೀಡಿದ್ದ ಸ್ಕಾಟ್ಲೆಂಡ್ ವಿಶ್ವಕಪ್ಗೆ ಪ್ರವೇಶ ಪಡೆಯುವ ನೆಚ್ಚಿನ ತಂಡವೆನಿಸಿತ್ತು. ಆದರೆ ಡಚ್ ಪಡೆ ತನ್ನ ಆಕ್ರಮಣಕಾರಿ ಆಟದ ಮೂಲಕ ಅಚ್ಚರಿ ಮೂಡಿಸಿತು.
ಸೂಪರ್-6 ಹಂತದಲ್ಲಿ ಎರಡೂ ತಂಡಗಳಿಗೆ ಇದು ಕೊನೆಯ ಪಂದ್ಯವಾಗಿತ್ತು. ಈ ಪಂದ್ಯಕ್ಕೂ ಮುನ್ನ ಸ್ಕಾಟ್ಲೆಂಡ್ 6 ಅಂಕ ಹೊಂದಿದ್ದರೆ, ನೆದರ್ಲೆಂಡ್ಸ್ 4 ಅಂಕದೊಂದಿಗೆ 3ನೇ ಸ್ಥಾನದಲ್ಲಿತ್ತು. ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಸ್ಕಾಟ್ಲೆಂಡ್ ಬ್ರೆಂಡನ್ ಮೆಕ್ಮ್ಯುಲನ್(106)ರ ಶತಕದ ನೆರವಿನಿಂದ 50 ಓವರಲ್ಲಿ 9 ವಿಕೆಟ್ಗೆ 277 ರನ್ ಕಲೆಹಾಕಿತು. ಡಿ ಲೀಡೆ 52 ರನ್ಗೆ 5 ವಿಕೆಟ್ ಕಿತ್ತರು.
ಜಿಂಬಾಬ್ವೆ ವಿಶ್ವಕಪ್ ಕನಸನ್ನು ಛಿದ್ರಗೊಳಿಸಿದ ಸ್ಕಾಟ್ಲೆಂಡ್..! ಪ್ರಧಾನ ಸುತ್ತಿಗೇರುವ 10ನೇ ತಂಡ ಯಾವುದು..?:
ನೆದರ್ಲೆಂಡ್ಸ್ ನೆಟ್ ರನ್ರೇಟ್ ಆಧಾರದಲ್ಲಿ ಸ್ಕಾಟ್ಲೆಂಡನ್ನು ಹಿಂದಿಕ್ಕಿ 2ನೇ ಸ್ಥಾನಕ್ಕೇರಬೇಕಿದ್ದರೆ 278 ರನ್ ಗುರಿಯನ್ನು 44 ಓವರಲ್ಲಿ ಬೆನ್ನತ್ತಬೇಕಿತ್ತು. 40 ಓವರ್ ಅಂತ್ಯಕ್ಕೆ 233 ರನ್ ಗಳಿಸಿದ್ದ ಡಚ್, ವಿಶ್ವಕಪ್ಗೆ ಪ್ರವೇಶಿಸಬೇಕಿದ್ದರೆ 4 ಓವರಲ್ಲಿ 45 ರನ್ ಗಳಿಸಬೇಕಿತ್ತು. 41ನೇ ಓವರಲ್ಲಿ 22 ರನ್ ಚಚ್ಚಿದ ಡಚ್, 42ನೇ ಓವರಲ್ಲಿ 20 ರನ್ ಸಿಡಿಸಿತು. 42.5 ಓವರಲ್ಲಿ 6 ವಿಕೆಟ್ ಕಳೆದುಕೊಂಡು 278 ರನ್ ಕಲೆಹಾಕಿತು. ಡಿ ಲೀಡೆ 92 ಎಸೆತದಲ್ಲಿ 7 ಬೌಂಡರಿ, 5 ಸಿಕ್ಸರ್ನೊಂದಿಗೆ 123 ರನ್ ಚಚ್ಚಿದರು.
ಸ್ಕೋರ್:
ಸ್ಕಾಟ್ಲೆಂಡ್ 50 ಓವರಲ್ಲಿ 277/9(ಮೆಕ್ಮ್ಯುಲನ್ 106, ಬೆರಿಂಗ್ಟನ್ 64, ಲೀಡೆ 5-52)
ನೆದರ್ಲೆಂಡ್ಸ್ 42.5 ಓವರಲ್ಲಿ 278/6(ಲೀಡೆ 123, ವಿಕ್ರಮ್ಜಿತ್ 40, ಲೀಸ್ಕ್ 2-42)
ಬೆಂಗಳೂರಲ್ಲಿ ನಡೆಯಲಿದೆ ಭಾರತ-ನೆದರ್ಲೆಂಡ್ಸ್
ನೆದರ್ಲೆಂಡ್ಸ್ ಹಾಗೂ ಶ್ರೀಲಂಕಾ ಅರ್ಹತಾ ಸುತ್ತಿನ ಫೈನಲ್ನಲ್ಲಿ ಸೆಣಸಲಿವೆ. ಶ್ರೀಲಂಕಾ ಕ್ವಾಲಿಫೈಯರ್-2 ಆಗಿ ವಿಶ್ವಕಪ್ನಲ್ಲಿ ಆಡಲಿದ್ದು, ನೆದರ್ಲೆಂಡ್ಸ್ಗೆ ಕ್ವಾಲಿಫೈಯರ್-1 ಸ್ಥಾನ ಸಿಕ್ಕಿದೆ. ನವೆಂಬರ್ 11ರಂದು ಬೆಂಗಳೂರಲ್ಲಿ ಭಾರತ ಹಾಗೂ ನೆದರ್ಲೆಂಡ್ಸ್ ಮುಖಾಮುಖಿಯಾಗಲಿವೆ.
ಆ್ಯಷಸ್ ಟೆಸ್ಟ್: ಮಾರ್ಷ್ ಶತಕದ ಹೊರತಾಗಿಯೂ ಆಸೀಸ್ 263 ರನ್ಗೆ ಆಲೌಟ್
ಲೀಡ್ಸ್: ಮಿಚೆಲ್ ಮಾರ್ಷ್ ಸ್ಫೋಟಕ ಶತಕದ ಹೊರತಾಗಿಯೂ ಮಾರ್ಕ್ ವುಡ್ರ ಮಾರಕ ಬೌಲಿಂಗ್ ದಾಳಿಗೆ ತತ್ತರಿಸಿದ ಆಸ್ಟ್ರೇಲಿಯಾ, ಇಂಗ್ಲೆಂಡ್ ವಿರುದ್ಧದ ಆ್ಯಷಸ್ ಸರಣಿಯ 3ನೇ ಪಂದ್ಯದಲ್ಲಿ 263 ರನ್ಗೆ ಆಲೌಟಾಗಿದೆ.
ಆಸೀಸ್ ಭೋಜನ ವಿರಾಮಕ್ಕೂ ಮುನ್ನವೇ 85 ರನ್ಗೆ ಪ್ರಮುಖ 4 ವಿಕೆಟ್ ಕಳೆದುಕೊಂಡಿತು. ವಾರ್ನರ್(04), ಖವಾಜ(13), ಲಬುಶೇನ್(21) ಸ್ಟೀವ್ ಸ್ಮಿತ್(22) ಬೇಗನೇ ನಿರ್ಗಮಿಸಿದರು. ಆದರೆ ಮಾರ್ಷ್ 118 ಎಸೆತಗಳಲ್ಲಿ 17 ಬೌಂಡರಿ, 4 ಸಿಕ್ಸರ್ನೊಂದಿಗೆ 118 ರನ್ ಸಿಡಿಸಿ ತಂಡವನ್ನು ಕಾಪಾಡಿದರು. ಹೆಡ್ 39 ರನ್ ಕೊಡುಗೆ ನೀಡಿದರು. ಆಸೀಸ್ 23 ರನ್ಗೆ ಕೊನೆಯ 6 ವಿಕೆಟ್ ಕಳೆದುಕೊಂಡಿತು. ವುಡ್ 5, ಕ್ರಿಸ್ ವೋಕ್ಸ್ 3 ವಿಕೆಟ್ ಕಿತ್ತರು.
ಸ್ಮಿತ್ಗೆ 100ನೇ ಪಂದ್ಯ: ಆಸ್ಟ್ರೇಲಿಯಾ ಮಾಜಿ ನಾಯಕ ಸ್ಟೀವ್ ಸ್ಮಿತ್ 100ನೇ ಟೆಸ್ಟ್ ಪಂದ್ಯ ಆಡುತ್ತಿದ್ದು, ಈ ಮೈಲಿಗಲ್ಲು ಸಾಧಿಸಿದ ಆಸ್ಟ್ರೇಲಿಯಾದ 15ನೇ ಆಟಗಾರ ಎಂಬ ಹಿರಿಮೆಗೆ ಪಾತ್ರರಾದರು.
