ಮಹಿಳಾ ಟಿ20: ಸೊನ್ನೆಗೆ 6 ವಿಕೆಟ್ ಅಂಜಲಿ ವಿಶ್ವ ದಾಖಲೆ!
ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ದಾಖಲೆ ನಿರ್ಮಾಣವಾಗಿದೆ. ಪುರುಷರ ತಂಡ ಹಾಗೂ ಮಹಿಳಾ ತಂಡ ಮಾಡದ ದಾಖಲೆಯನ್ನು ಅಂಜಲಿ ಚಾಂದ್ ಮಾಡಿದ್ದಾರೆ. ಟಿ20 ಪಂದ್ಯದಲ್ಲಿ ಯಾವುದೇ ರನ್ ನೀಡಿದೆ 6 ವಿಕೆಟ್ ಕಬಳಿಸಿದ್ದಾರೆ.
ಕಾಠ್ಮಂಡು (ನೇಪಾಳ): ಟಿ20 ಕ್ರಿಕೆಟ್ ಟೂರ್ನಿಯೊಂದರಲ್ಲಿ ನೇಪಾಳ ತಂಡದ ಆಟಗಾರ್ತಿ ವಿಶ್ವ ದಾಖಲೆ ನಿರ್ಮಿಸಿದ್ದಾರೆ. ಇದು ಪುರುಷ/ಮಹಿಳಾ ಟಿ20 ಕ್ರಿಕೆಟ್‌ನಲ್ಲೇ ನೂತನ ದಾಖಲೆಯಾಗಿದೆ. ಇಲ್ಲಿನ ಪೊಕಹರಾದಲ್ಲಿ ಸೋಮವಾರ ನಡೆದ 13ನೇ ದಕ್ಷಿಣ ಏಷ್ಯನ್‌ ಗೇಮ್ಸ್‌ನ ಟಿ20 ಕ್ರಿಕೆಟ್ ಟೂರ್ನಿಯ ಪಂದ್ಯವೊಂದರಲ್ಲಿ ನೇಪಾಳ ತಂಡದ ಆಟಗಾರ್ತಿ ಅಂಜಲಿ ಚಾಂದ್, ಯಾವುದೇ ರನ್ ನೀಡದೆ 6 ವಿಕೆಟ್ ಪಡೆದಿದ್ದಾರೆ.
ಇದನ್ನೂ ಓದಿ: ಸಂತಸದ ಅಲೆಯಲ್ಲಿ ಇನ್‌ಸ್ಟಾಗ್ರಾಂ ಪೋಸ್ಟ್; ಆಸೀಸ್ ಆಟಗಾರ್ತಿಗೆ 1 ನಿಷೇಧ!
ಮಾಲ್ಡೀವ್ಸ್ ವಿರುದ್ಧದ ಮಹಿಳಾ ಟಿ20ಕ್ರಿಕೆಟ್ ಪಂದ್ಯದಲ್ಲಿ ಅಂಜಲಿ, ಹ್ಯಾಟ್ರಿಕ್‌ ಸಹಿತ ಸೊನ್ನೆಗೆ 6 ವಿಕೆಟ್ ಕಿತ್ತರು. ಮಹಿಳಾ ಟಿ20 ಕ್ರಿಕೆಟ್‌ನ ಉದ್ಘಾಟನಾ ಪಂದ್ಯದಲ್ಲೇ ಅಂಜಲಿ ವಿಶ್ವದಾಖಲೆಗೆ ಸಾಕ್ಷಿಯಾಗಿದೆ. ಪಂದ್ಯದಲ್ಲಿ 13 ಎಸೆತಗಳಲ್ಲಿ 6 ವಿಕೆಟ್ ಕಿತ್ತ ಅಂಜಲಿ, ಕೊನೆಯ 3 ಎಸೆತಗಳಲ್ಲಿ ಹ್ಯಾಟ್ರಿಕ್‌ ವಿಕೆಟ್ ಪಡೆದರು. ಅವರ 2.1 ಓವರ್‌ಗಳಲ್ಲಿ 2 ಮೇಡನ್‌ ಒಳಗೊಂಡಿದ್ದವು. ಪುರುಷರ ಅಥವಾ ಮಹಿಳಾ ಟಿ20ಯಲ್ಲಿ ದಾಖಲಾದ ಅತ್ಯುತ್ತಮ ಬೌಲಿಂಗ್ ಪ್ರದರ್ಶನವಿದು. 2019ರ ಜನವರಿಯಲ್ಲಿ ಚೀನಾ ವಿರುದ್ಧದ ಟಿ20 ಪಂದ್ಯವೊಂದರಲ್ಲಿ ಮಲೇಷ್ಯಾ ಬೌಲರ್‌ ಮಸ್‌ ಎಲೈಸಾ 6 ರನ್‌ಗಳಿಗೆ 3 ವಿಕೆಟ್ ಪಡೆದಿದ್ದರು.
ಇದನ್ನೂ ಓದಿ: 15 ವರ್ಷದ ಶಫಾಲಿ ವರ್ಮಾ ಅಬ್ಬರ; ಭಾರತಕ್ಕೆ ಸುಲಭ ಜಯ
ಮಾಲ್ಡೀವ್‌್ಸ 10.1 ಓವರ್‌ಗಳಲ್ಲಿ 16 ರನ್‌ಗಳಿಸಿ ಆಲೌಟಾಯಿತು. ನೇಪಾಳ ತಂಡ, ಮಾಲ್ಡೀವ್‌್ಸ ನೀಡಿದ ಈ ಅಲ್ಪ ಗುರಿಯನ್ನು ಕೇವಲ 5 ಎಸೆತಗಳಲ್ಲಿ 17 ರನ್ ಗಳಿಸುವ ಮೂಲಕ ಜಯದ ನಗೆ ಬೀರಿತು. ಇತ್ತೀಚೆಗೆ ಬಾಂಗ್ಲಾ ವಿರುದ್ಧದ ಟಿ20 ಪಂದ್ಯದಲ್ಲಿ ಭಾರತದ ವೇಗದ ಬೌಲರ್‌ ದೀಪಕ್‌ ಚಹರ್‌ 7 ರನ್ ನೀಡಿ 6 ವಿಕೆಟ್ ಪಡೆದು ದಾಖಲೆ ನಿರ್ಮಿಸಿದ್ದರು.
