ಮೆಗಾಸ್ಟಾರ್ ಚಿರಂಜೀವಿ ಮಗಳು ನಿಹಾರಿಕಾ ಕೊಣಿದೆಲ ನಿರ್ಮಾಪಕಿಯಾಗಿ ಮತ್ತೊಂದು ಸಿನಿಮಾ ತರ್ತಿದ್ದಾರೆ. ಪಿಂಕ್ ಎಲಿಫೆಂಟ್ ಪಿಕ್ಚರ್ಸ್ ಬ್ಯಾನರ್ನಲ್ಲಿ ನಿರ್ಮಾಣವಾಗ್ತಿರೋ ಈ ಚಿತ್ರಕ್ಕೆ ನಾಯಕಿ ಯಾರು ಅನ್ನೋದು ಈಗ ಖಚಿತವಾಗಿದೆ.
2024ರಲ್ಲಿ ಬಿಡುಗಡೆಯಾಗಿ ವಿಮರ್ಶಕರ ಮೆಚ್ಚುಗೆ ಗಳಿಸಿ, ಬಾಕ್ಸ್ ಆಫೀಸ್ನಲ್ಲೂ ಸೂಪರ್ ಹಿಟ್ ಆದ ಚಿತ್ರ ‘ಕಮಿಟಿ ಕುರ್ರೊಳು’. ಎಲ್ಲಾ ವರ್ಗದ ಪ್ರೇಕ್ಷಕರನ್ನೂ ರಂಜಿಸಿದ ಈ ಚಿತ್ರ ಇತ್ತೀಚೆಗೆ ತೆಲಂಗಾಣ ಸರ್ಕಾರ ನೀಡುವ ಗದ್ದರ್ ಪ್ರಶಸ್ತಿಯನ್ನೂ ಪಡೆದಿದೆ. ಈ ಚಿತ್ರದ ನಿರ್ದೇಶಕ ಯದು ವಂಶಿ ಅವರಿಗೆ ಅತ್ಯುತ್ತಮ ಚೊಚ್ಚಲ ನಿರ್ದೇಶಕ ಪ್ರಶಸ್ತಿ ಕೂಡ ಸಿಕ್ಕಿದೆ. ಈ ಯಶಸ್ವಿ ಬ್ಯಾನರ್ನಲ್ಲಿ ಈಗ ಎರಡನೇ ಸಿನಿಮಾ ಸೆಟ್ಟೇರಲಿದೆ. ಚಿತ್ರದ ಪೂರ್ವ ನಿರ್ಮಾಣ ಕಾರ್ಯಗಳು ಭರದಿಂದ ಸಾಗ್ತಿವೆ.
ಪಿಂಕ್ ಎಲಿಫೆಂಟ್ ಪಿಕ್ಚರ್ಸ್ ಬ್ಯಾನರ್ನಲ್ಲಿ ನಿಹಾರಿಕಾ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಮಾನಸ ಶರ್ಮಾ ನಿರ್ದೇಶನ. ‘ಮ್ಯಾಡ್’, ‘ಮ್ಯಾಡ್ ಸ್ಕ್ವೇರ್’ ಚಿತ್ರಗಳಲ್ಲಿ ನಟಿಸಿ ಮೆಚ್ಚುಗೆ ಗಳಿಸಿರುವ ಸಂಗೀತ್ ಶೋಭನ್ ಈ ಚಿತ್ರದ ನಾಯಕ. ಸಂಗೀತ್ ಏಕವ್ಯಕ್ತಿ ನಾಯಕನಾಗಿ ನಟಿಸುತ್ತಿರುವ ಮೊದಲ ಚಿತ್ರ ಇದು. ನಿಹಾರಿಕಾ ನಿರ್ಮಿಸಿದ ವೆಬ್ ಪ್ರಾಜೆಕ್ಟ್ಗಳಲ್ಲಿ ಸಂಗೀತ್ ಮತ್ತು ಮಾನಸ ಈ ಹಿಂದೆಯೇ ಭಾಗಿಯಾಗಿದ್ದರು.
ಈ ಚಿತ್ರದಲ್ಲಿ ಸಂಗೀತ್ಗೆ ಜೋಡಿಯಾಗಿ ನಯನ್ ಸಾರಿಕಾ ನಟಿಸುತ್ತಿದ್ದಾರೆ. ‘ಆಯ್’, ‘ಕ’ ಚಿತ್ರಗಳಲ್ಲಿ ನಟಿಸಿರುವ ನಯನ್, ಪಿಂಕ್ ಎಲಿಫೆಂಟ್ ಪಿಕ್ಚರ್ಸ್ ನಿರ್ಮಿಸಿದ ‘ಹಲೋ ವರ್ಲ್ಡ್’, ‘ಬೆಂಚ್ ಲೈಫ್’ ವೆಬ್ ಸೀರಿಸ್ಗಳ ಮೂಲಕ ತೆಲುಗು ಪ್ರೇಕ್ಷಕರಿಗೆ ಪರಿಚಿತ. ಈ ಚಿತ್ರದಲ್ಲಿ ವೆನ್ನೆಲ ಕಿಶೋರ್, ಬ್ರಹ್ಮಾಜಿ, ತನಿಕೆಳ್ಳ ಭರಣಿ, ಆಶಿಶ್ ವಿದ್ಯಾರ್ಥಿ, ಗೆಟಪ್ ಶ್ರೀನು, ಸುಖ್ವಿಂದರ್ ಸಿಂಗ್, ಅರುಣ್ ಭಿಕ್ಷು ಮುಂತಾದವರು ನಟಿಸುತ್ತಿದ್ದಾರೆ.
Related Articles
‘ಒಂದು ಚಿಕ್ಕ ಫ್ಯಾಮಿಲಿ ಸ್ಟೋರಿ’ ವೆಬ್ ಸೀರಿಸ್ಗೆ ಮಾನಸ ಶರ್ಮಾ ಬರಹಗಾರ್ತಿಯಾಗಿದ್ದರು. ‘ಬೆಂಚ್ ಲೈಫ್’ಗೆ ನಿರ್ದೇಶಕಿ. ಈ ಚಿತ್ರದ ಮೂಲಕ ಮಾನಸ ಚೊಚ್ಚಲ ಬಾರಿಗೆ ಚಲನಚಿತ್ರ ನಿರ್ದೇಶಕಿಯಾಗುತ್ತಿದ್ದಾರೆ. ಸಂಗೀತ್ ‘ಒಂದು ಚಿಕ್ಕ ಫ್ಯಾಮಿಲಿ ಸ್ಟೋರಿ’ಯಲ್ಲಿ ನಟಿಸಿದ್ದರು. ನಿಹಾರಿಕಾ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಮಾನಸ ಕಥೆ ಬರೆದಿದ್ದಾರೆ. ಮಹೇಶ್ ಉಪ್ಪಲ ಸಹ-ಬರಹಗಾರರಾಗಿ ಚಿತ್ರಕಥೆ, ಸಂಭಾಷಣೆ ಬರೆದಿದ್ದಾರೆ.