ನಿಮ್ಮ ಧಮ್ಮಯ್ಯ ಸಿಲ್ಕ್ ರೋಡ್ ಬೇಡ: ಅಂಗಲಾಚಿದ ಪಾಕ್!
ಒನ್ ಬೆಲ್ಟ್ ಒನ್ ರೋಡ್ ಯೋಜನೆ ಬೇಡ ಅಂತಿದೆ ಪಾಕ್! ಚೀನಾದ ಸಾಲದ ಸುಳಿಗೆ ಸಿಕ್ಕು ಒದ್ದಾಡುತ್ತಿರುವ ಪಾಕಿಸ್ತಾನ! ಅರೇಬಿಯನ್ ಸಮುದ್ರದ ರೈಲ್ವೇ ಹಳಿ ಯೋಜನೆ ಏನಾಗುತ್ತೆ?! ಅಧಿಕ ವೆಚ್ಚ ಮಾಡಲು ಹಿಂದೇಟು ಹಾಕುತ್ತಿರುವ ಇಮ್ರಾನ್ ಸರ್ಕಾರ
ಇಸ್ಲಾಮಾಬಾದ್(ಸೆ.30): ಚೀನಾ-ಪಾಕಿಸ್ತಾನ ಸ್ನೇಹದ ಪ್ರತೀಕ ಎಂದು ಬಿಂಬಿತವಾಗಿದ್ದ ಸಿಲ್ಕ್ ರೋಡ್ ಯೋಜನೆಗೆ ಕುತ್ತು ಬಂದಿದ್ದು, ಪಾಕಿಸ್ತಾನಕ್ಕೆ ದುಬಾರಿ ಸಾಲದ ಶೂಲದ ಭೀತಿ ಎದುರಾಗಿದ್ದರಿಂದ ಯೋಜನೆಯಿಂದ ಹಿಂದೆ ಸರಿಯುವ ಲಕ್ಷಣ ಕಂಡುಬರುತ್ತಿದೆ.
ಚೀನಾ-ಪಾಕ್ ಒಪ್ಪಂದದ ಅನ್ವಯ ಪಾಕಿಸ್ತಾನದಲ್ಲಿ ಚೀನಾ ಭಾರೀ ಪ್ರಮಾಣದ ಬಂಡವಾಳ ಹೂಡಿಕೆ ಮಾಡುತ್ತಿದೆ. ಆದರೆ ಈ ಅಭಿವೃದ್ಧಿ ಕಾರ್ಯಗಳೇ ಪಾಕಿಸ್ತಾನ ಸರ್ಕಾರಕ್ಕೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಪ್ರಮುಖವಾಗಿ ಅರೇಬಿಯನ್ ಸಮುದ್ರದ ರೈಲ್ವೇ ಹಳಿ ಯೋಜನೆ ತಡವಾದ ಕಾರಣ 8.2 ಬಿಲಿಯನ್ ಡಾಲರ್ ಹೆಚ್ಚುವರಿ ಸಾಲದ ಹೊಣೆ ಪಾಕ್ ಸರ್ಕಾರದ ಮೇಲೆ ಬಿದ್ದಿದೆ.
ಕರಾಚಿ ಮತ್ತು ಪೇಶಾವರ ನಡುವಿನ ಈ ಮೆಗಾ ರೈಲು ಹಳಿ ಸಂಪರ್ಕ ಜೋಡಣೆ ಚೀನಾದ ಒನ್ ಬೆಲ್ಟ್ ಒನ್ ರೋಡ್ ಯೋಜನೆಯ ಅಂಗವಾಗಿದ್ದು, ಇದೀಗ ಈ ಯೋಜನೆಗಾಗಿ ಪಾಕ್ ಸರ್ಕಾರ ದುಬಾರಿ ಹಣ ವ್ಯಯಿಸುವಂತಾಗಿದೆ. ಆದರೆ ಈ ಯೋಜನೆಗೆ ಅಧಿಕ ವೆಚ್ಚ ಮಾಡಲು ನೂತನ ಇಮ್ರಾನ್ ಖಾನ್ ಸರ್ಕಾರ ಹಿಂದೇಟು ಹಾಕುತ್ತಿದ್ದು, ಯೋಜನೆ ಸ್ಥಗಿತಗೊಳ್ಳುವ ಸಾಧ್ಯತೆ ಎನ್ನಲಾಗಿದೆ.
