ನವದೆಹಲಿ[ಜು.04]: ಭತ್ತ, ರಾಗಿ, ಜೋಳ, ತೊಗರಿ, ಉದ್ದು, ಸೋಯಾಬಿನ್‌, ಹತ್ತಿ ಬೆಂಬಲ ಬೆಲೆಯನ್ನು ಕೇಂದ್ರ ಸರ್ಕಾರ ಹೆಚ್ಚಳ ಮಾಡಿದೆ.

ಪ್ರಧಾನಿ ಅಧ್ಯಕ್ಷತೆಯಲ್ಲಿ ಬುಧವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಈ ಕುರಿತು ನಿರ್ಧಾರ ಕೈಗೊಳ್ಳಲಾಗಿದೆ. ಭತ್ತದ ಬೆಂಬಲ ಬೆಲೆಯನ್ನು ಕ್ವಿಂಟಲ್‌ಗೆ 65 ರು. ಹೆಚ್ಚಿಸಲಾಗಿದೆ. ಇದರಿಂದಾಗಿ ಕ್ವಿಂಟಲ್‌ ಭತ್ತಕ್ಕೆ 1815 ರು. ಬೆಂಬಲ ಬೆಲೆ ದೊರೆಯಲಿದೆ.

ಇದೇ ವೇಳೆ, ರಾಗಿಯ ಕನಿಷ್ಠ ಬೆಂಬಲ ಬೆಲೆಯನ್ನು ಕ್ವಿಂಟಲ್‌ಗೆ 253 ರು.ನಷ್ಟುಏರಿಕೆ ಮಾಡಲಾಗಿದ್ದು, ಕ್ವಿಂಟಲ್‌ ರಾಗಿಯ ಬೆಲೆ 2897 ರು.ನಿಂದ 3150 ರು.ಗೆ ಏರಿಕೆಯಾಗಿದೆ.

ಜೋಳದ ಬೆಂಬಲ ಬೆಲೆ 120 ರು. ಹೆಚ್ಚಳವಾಗಿದ್ದು, ಹೈಬ್ರಿಡ್‌ ಜೋಳದ ಬೆಲೆ ಕ್ವಿಂಟಲ್‌ಗೆ 2550, ಮಾಲ್ದಂಡಿ ಜೋಳದ ಬೆಲೆ ಕ್ವಿಂಟಲ್‌ಗೆ 2570 ರು.ಗೆ ಏರಿಕೆಯಾಗಿದೆ. ಮುಸುಕಿನ ಜೋಳದ ಬೆಂಬಲ ಬೆಲೆಯನ್ನು 60 ರು. ಹೆಚ್ಚಿಸಲಾಗಿದೆ. ಇದರಿಂದಾಗಿ ರೈತರಿಗೆ ಇನ್ನು 1760 ರು. ಸಿಗಲಿದೆ. ಸಜ್ಜೆ ಬೆಂಬಲ ಬೆಲೆಯನ್ನು 50 ರು. ಏರಿಕೆ ಮಾಡಲಾಗಿದ್ದು, ಇದರಿಂದ ಕ್ವಿಂಟಲ್‌ಗೆ 2000 ರು. ಸಿಗಲಿದೆ. ತೊಗರಿ ಬೆಂಬಲ ಬೆಲೆಯನ್ನು 125 ರು. ಹೆಚ್ಚಳ ಮಾಡಿ, 5800 ರು.ಗೆ ಏರಿಸಲಾಗಿದೆ.

ಉದ್ದು ಬೆಂಬಲ ಬೆಲೆ 100 ರು. ಏರಿಕೆಯಾಗಿ 5700 ರು.ಗೆ ತಲುಪಿದೆ. ಹೆಸರು ಕಾಳಿನ ಬೆಂಬಲ ಬೆಲೆ 75 ರು. ಏರಿಕೆಯಾಗಿ 7050ಕ್ಕೆ ಹೆಚ್ಚಳಗೊಂಡಿದೆ. ಸೋಯಾಬಿನ್‌ (ಹಳದಿ) ಬೆಂಬಲ ಬೆಲೆಯನ್ನು 311 ರು. ಹೆಚ್ಚಳ ಮಾಡಿದ್ದು, 3710 ರು.ಗೆ ಏರಿಕೆ ಮಾಡಲಾಗಿದೆ. ಸೂರ್ಯಕಾಂತಿಯ ಬೆಲೆ 262 ರು. ಏರಿಕೆ ಕಂಡಿದ್ದು, 5650 ರು.ಗೆ ಹೆಚ್ಚಳಗೊಂಡಿದೆ. ನೆಲಗಡಲೆ ಬೆಂಬಲ ಬೆಲೆ 200 ರು. ಏರಿಕೆಯೊಂದಿಗೆ ಕ್ವಿಂಟಲ್‌ಗೆ 5090 ರು. ತಲುಪಿದೆ. ಹತ್ತಿಯ ಬೆಂಬಲ ಬೆಲೆಯನ್ನು 100ರಿಂದ 105 ರು.ನಷ್ಟುಏರಿಸಲಾಗಿದೆ.

ಯಾವುದು ಎಷ್ಟು?[ಕ್ವಿಂಟಲ್‌ಗೆ]
ಬೆಳೆ ಏರಿಕೆ ಎಷ್ಟು?
ರಾಗಿ 253 ರೂ. 3150 ರೂ.
ಭತ್ತ 65 ರೂ. 1815 ರೂ.
ಜೋಳ 120 ರೂ. 2550 ರೂ.
ತೊಗರಿ 125 ರೂ. 5800 ರೂ.
ಉದ್ದು 100 ರೂ. 5700 ರೂ.

ಬಾಡಿಗೆ ತಾಯ್ತನ ನಿಷೇಧ ಮಸೂದೆಗೆ ಸಂಪುಟ ಓಕೆ

ನವದೆಹಲಿ: ಬಾಡಿಗೆ ತಾಯ್ತನ ನಿಷೇಧಿಸುವ, ಹತ್ತಿರದ ಬಂಧುಗಳಿಗೆ ಮಾತ್ರ ಬಾಡಿಗೆ ತಾಯಂದಿರಾಗುವ ಅನುಕೂಲ ಕಲ್ಪಿಸುವ ಮಸೂದೆಗೆ ಕೇಂದ್ರ ಸಚಿವ ಸಂಪುಟ ಸಭೆ ಒಪ್ಪಿಗೆ ನೀಡಿದೆ. 2018ರ ಡಿಸೆಂಬರ್‌ನಲ್ಲಿ ಈ ಕುರಿತ ಮಸೂದೆ ಲೋಕಸಭೆಯಲ್ಲಿ ಅಂಗೀಕಾರವಾಗಿತ್ತು. ಲೋಕಸಭೆ ವಿಸರ್ಜನೆಯೊಂದಿಗೆ ಅಸ್ತಿತ್ವ ಕಳೆದುಕೊಂಡಿತ್ತು. ಹೀಗಾಗಿ ಹೊಸದಾಗಿ ಸರ್ಕಾರ ಮಸೂದೆ ತರುತ್ತಿದೆ.

ಮಾಲ್ಡೀವ್ಸ್ಗೆ ಇನ್ನು ಹಡಗಲ್ಲೂ ಹೋಗಿ

ಸಮುದ್ರ ಮಾರ್ಗದ ಮೂಲಕ ಪ್ರಯಾಣಿಕರ ಸಂಚಾರ ಮತ್ತು ಕಾರ್ಗೋ ಸೇವೆ ಕುರಿತಾಗಿ ಮಾಲ್ಡೀವ್‌್ಸ ಹಾಗೂ ಭಾರತ ನಡುವೆ ಏರ್ಪಟ್ಟಿದ್ದ ಒಪ್ಪಂದಕ್ಕೆ ಕೇಂದ್ರ ಸಚಿವ ಸಂಪುಟ ಅಸ್ತು ನೀಡಿದೆ. ಹೀಗಾಗಿ, ಭಾರತೀಯ ಪ್ರವಾಸಿಗರು ಇನ್ನು ಮುಂದಿನ ದಿನಗಳಲ್ಲಿ ಹಡಗಿನ ಮೂಲಕವೇ ಮಾಲ್ಡೀವ್ಸ್ ಪ್ರವಾಸ ಕೈಗೊಳ್ಳಬಹುದಾಗಿದೆ.