ಕೊರೋನಾ ವಿರುದ್ಧ ಚೀನಾ ಗೆದ್ದಿದ್ದು ಹೇಗೆ?
ಕೊರೋನಾ ವಿರುದ್ಧದ ಯುದ್ಧ ಚೀನಾ ಗೆದ್ದಿದ್ದು ಹೇಗೆ?| ಚೀನಾ ಜೊತೆ ಸಿಂಗಾಪುರ, ತೈವಾನ್, ದ.ಕೊರಿಯಾ ಕೂಡ ಜಗತ್ತಿಗೇ ಮಾದರಿ| ತಿಂಗಳ ಹಿಂದೆ ಒಬ್ಬನಿಂದ 3.8 ಜನರಿಗೆ ಹರಡುತ್ತಿದ್ದ ಸೋಂಕು ಈಗ 0.32ಗೆ ಇಳಿಕೆ
ಬೀಜಿಂಗ್[ಮಾ.14]: ಚೀನಾದ ಮೂಲದ ಕೊರೋನಾ ವೈರಸ್ಗೆ ಇಡೀ ಜಗತ್ತೇ ತಲ್ಲಣಿಸುತ್ತಿದೆ. ಮಾರಣಾಂತಿಕ ಕೊರೋನಾ ವೈರಸ್ ವಿರುದ್ಧ ಹೋರಾಡುವ ಲಸಿಕೆ ಲಭ್ಯವಾಗಬೇಕೆಂದರೆ ಇನ್ನೂ ಕನಿಷ್ಠ 2 ವರ್ಷ ಬೇಕಾಗಬಹುದು ಎನ್ನಲಾಗುತ್ತಿದೆ. ಈ ನಡುವೆ ಯಾವುದೇ ಲಸಿಕೆ, ಔಷಧಗಳು ಇಲ್ಲದಿದ್ದರೂ ಚೀನಾದಲ್ಲಿ ಸೋಂಕಿತರ ಸಂಖ್ಯೆ ಬಹುತೇಕ ನಗಣ್ಯ ಪ್ರಮಾಣಕ್ಕೆ ಇಳಿಕೆಯಾಗಿದೆ. ಕೊರೋನಾವೈರಸ್ನ ಕೇಂದ್ರವಾಗಿದ್ದ ವುಹಾನ್ ಪ್ರಾಂತವು ತಾನೀಗ ಈ ವೈರಸ್ ಸೋಂಕನ್ನು ಗೆದ್ದಿರುವುದಾಗಿ ಘೋಷಿಸಿಕೊಂಡಿದೆ. ಹಿಂದೆ ದಿನವೊಂದಕ್ಕೆ ಸಾವಿರಾರು ಜನರು ಸೋಂಕಿತರಾಗುತ್ತಿದ್ದರೆ, ಇದೀಗ ಈ ಸಂಖ್ಯೆ 10ಕ್ಕಿಂತ ಕಡಿಮೆಗೆ ಇಳಿದಿದೆ.
ಚೀನಾದಲ್ಲಿ ಒಂದಂಕಿಗೆ ಇಳಿದ ಸೋಂಕಿತರ ಸಂಖ್ಯೆ
ಮಾರಣಾಂತಿಕ ಕೊರೋನಾ ಸೋಂಕು ನಿಯಂತ್ರಣಕ್ಕೆ ಇಡೀ ಜಗತ್ತು ಟೊಂಕ ಕಟ್ಟಿನಿಂತಿದೆ. ಅತ್ತ ಕೊರೋನಾದಿಂದ ಅತಿ ಹೆಚ್ಚು ಹಾನಿಗೆ ಒಳಗಾದ ಚೀನಾ ವೈರಸ್ ಬಗ್ಗುಬಡಿಯುವಲ್ಲಿ ಯಶಸ್ಸು ಕಾಣುತ್ತಿದೆ. ಚೀನಾದಲ್ಲಿ ವೈರಸ್ಗೆ ಬಲಿಯಾಗುತ್ತಿರುವ ಮತ್ತು ತುತ್ತಾಗುತ್ತಿರುವವರ ಸಂಖ್ಯೆ ದಿನದಿಂದ ದಿನಕ್ಕೆ ಇಳಿಮುಖದತ್ತ ಸಾಗಿದೆ. ಸೋಂಕಿತರ ಸಂಖ್ಯೆ ಮೊದಲ ಬಾರಿಗೆ ಒಂದಂಕಿಗೆ ಕುಸಿದಿದೆ. ವುಹಾನ್ನಲ್ಲಿ ಕೇವಲ 8 ಮಂದಿಯಲ್ಲಿ ಸೋಂಕು ಕಂಡುಬಂದಿದೆ. ಇದೇ ವೇಳೆ ಮೃತರ ಸಂಖ್ಯೆ 11ಕ್ಕೆ ಕುಸಿದಿದೆ. ಹುಬೇ ಪ್ರಾಂತ್ಯದ 16 ನಗರಗಳಲ್ಲಿ ಕಳೆದ 7 ದಿನಗಳಿಂದಲೂ ಹೊಸದಾಗಿ ಕೊರೋನಾಕ್ಕೆ ಸಿಲುಕಿದ ಬಗ್ಗೆ ವರದಿಗಳಿಲ್ಲ. ಇಡೀ ದೇಶದಲ್ಲಿ ಮಾಚ್ರ್ 12ರಂದು ಬರೀ 15 ಹೊಸ ಪ್ರಕರಣಗಳು ಮಾತ್ರ ಪತ್ತೆಯಾಗಿವೆ. ಆರಂಭದಲ್ಲಿ ಕೊರೋನಾವೈರಸ್ ಒಬ್ಬ ಸೋಂಕಿತನಿಂದ ಸರಾಸರಿ 3.8 ಜನರಿಗೆ ಹರಡುತ್ತಿತ್ತು. ಈಗ ಅದು ಒಬ್ಬ ಸೋಂಕಿತನಿಂದ 0.32 ಜನರಿಗೆ ಮಾತ್ರ ಹರಡುತ್ತಿದೆ. ಈ ದರ 1ಕ್ಕಿಂತ ಇಳಿಕೆಯಾದಾಗಲೇ ಮಾರಣಾಂತಿಕ ಸೋಂಕು ಕಡಿಮೆಯಾಗಿದೆ ಎಂದು ಪರಿಗಣಿಸಲಾಗಿದೆ.
ಕರ್ನಾಟಕದಷ್ಟು ಜನಸಂಖ್ಯೆಯ ಇಟಲಿಯಲ್ಲೇಕೆ ಇಷ್ಟು ಸಾವು?
ಚೀನಾ ಮಾಡಿದ್ದೇನು?
ವ್ಯಾಪಕವಾಗಿ ಹರಡಿ ಸಾವಿರಾರು ಜೀವಗಳನ್ನು ಬಲಿ ಪಡೆಯುತ್ತಿದ್ದ ಕೊರೋನಾ ವೈರಸ್ ನಿಯಂತ್ರಣಕ್ಕೆ ಪಣ ತೊಟ್ಟಚೀನಾ ಕ್ರಮವನ್ನು ‘ಸಾಮಾಜಿಕ ಪರಮಾಣು ಶಸ್ತ್ರಾಸ್ತ್ರ’ ಎಂದೇ ಬಣ್ಣಿಸಲಾಗುತ್ತಿದೆ. ವೈರಸ್ ವ್ಯಾಪಕವಾಗುತ್ತಿದ್ದಂತೆಯೇ ಅಲ್ಲಿನ ಸರ್ಕಾರ ತುರ್ತು ಕ್ರಮ ಜರುಗಿಸಿತ್ತು. ಅದರಲ್ಲೂ ಮುಖ್ಯವಾಗಿ ಇಡೀ ಚೀನಾ ಒಗ್ಗಟ್ಟಿನಿಂದ ಮುಂಜಾಗ್ರತಾ ಕ್ರಮ ಕೈಗೊಂಡಿದ್ದೇ ವೈರಸ್ ನಿಯಂತ್ರಣಕ್ಕೆ ಬರಲು ಪ್ರಮುಖ ಕಾರಣ ಎನ್ನಲಾಗುತ್ತಿದೆ. ವೈರಸ್ ವಿರುದ್ಧ ಚೀನಾ ಕೈಗೊಂಡ ಪ್ರಮುಖ ಮಾರ್ಗೋಪಾಯಗಳೆಂದರೆ..
- ಜನವರಿ 23ರಿಂದ 93 ಕೋಟಿ ಜನರ ಚಲನವಲನಗಳ ಮೇಲೆ ನಿರ್ಬಂಧ ವಿಧಿಸಿತ್ತು.
- ವಸತಿ ಪ್ರದೇಶ ಮತ್ತು ಕಚೇರಿಗಳ ಆವರಣದಲ್ಲಿ ಅಥವಾ ಪ್ರವೇಶದ್ವಾರಗಳಲ್ಲಿ ದೇಹದ ಉಷ್ಣಾಂಶ ಮತ್ತು ಪ್ರವಾಸದ ಇತಿಹಾಸವನ್ನು ಪರಿಶೀಲನೆ ನಡೆಸಲಾಗುತ್ತಿತ್ತು.
- ಒಂದು ಮನೆಗೆ ಒಬ್ಬ ವ್ಯಕ್ತಿ ಮಾತ್ರ ಹೊರಬರಲು ಅವಕಾಶ ನೀಡಲಾಗಿತ್ತು.
- ಪ್ರತಿ ಮನೆ ಮನೆಗಳಿಗೆ ಆಹಾರ, ಆಸ್ಪತ್ರೆಗಳಿಗೆ ಔಷಧಗಳನ್ನು ಒದಗಿಸಲು ಚಾಲಕರನ್ನು ನಿಯೋಜಿಸಲಾಗಿತ್ತು.
- ಎಲ್ಲಾ ಶಾಲೆಗಳನ್ನು ಮುಚ್ಚಿ ಆನ್ಲೈನ್ ಮೂಲಕ ಪಾಠ ಮಾಡಲಾಗುತ್ತಿತ್ತು.
ಕೊರೋನಾ ತಗುಲಿಸಿಕೊಂಡರೆ, ಈ ಕಂಪನಿ ಕೊಡುತ್ತೆ ದೊಡ್ಡ ಮೊತ್ತ!
ಮೊಬೈಲ್ ಬಳಸಿ ಜನರ ಮೇಲೆ ನಿಗಾ
ಸೀನು, ಕೆಮ್ಮಿನ ಮೂಲಕವೂ ಮನುಷ್ಯರ ದೇಹದೊಳಗೆ ಸೇರಿ ವ್ಯಾಪಕವಾಗಿ ಹಬ್ಬುತ್ತಿದ್ದ ಕೊರೋನಾ ವೈರಸ್ ನಿಯಂತ್ರಣಕ್ಕೆ ಗುಂಪು ಗೂಡದಿರುವುದು ಮತ್ತು ಶುಚಿಯಾಗಿರುವುದೇ ಮೂಲ ಮಂತ್ರ. ಈ ಹಿನ್ನೆಲೆಯಲ್ಲಿ ಜನರ ಚಲನವಲನಗಳ ವೀಕ್ಷಣೆಗೆ ಮತ್ತು ನಿರ್ಬಂಧಕ್ಕೆ ಚೀನಾಗೆ ಸಹಾಯಕವಾಗಿದ್ದು ಟೆಲಿಕಾಂ ಕಂಪನಿಗಳು. ಜನರ ಪ್ರವಾಸದ ಇತಿಹಾಸ, ಕೊರೋನಾ ಸೋಂಕಿತ ಪ್ರದೇಶಗಳಲ್ಲಿ ಎಷ್ಟುಸಮಯ ಕಳೆದಿದ್ದಾರೆ, ವೈರಸ್ ಹರಡುವ ಸಂಭವ ಎಷ್ಟಿದೆ ಇತ್ಯಾದಿಗಳನ್ನು ಆಧರಿಸಿ ಮೊಬೈಲ್ ಮೂಲಕ ವ್ಯಕ್ತಿಗಳನ್ನು ಪತ್ತೆ ಹಚ್ಚಿ ಪರೀಕ್ಷೆಗೆ ಒಳಪಡಿಸಲಾಗಿತ್ತು. ಈ ಅಂಶಗಳ ಆಧಾರದ ಮೇಲೆ ಅವರ ಆರೋಗ್ಯ ಸ್ಥಿತಿಯನ್ನು ಪರಿಶೀಲಿಸಿ ಹಸಿರು, ಹಳದಿ ಮತ್ತು ಕೆಂಪು ಪಟ್ಟಿಯನ್ನು ನೀಡಲಾಗುತ್ತಿತ್ತು. ಹಲವಾರು ಚೀನಾ ಕಂಪನಿಗಳು ಮಾಸ್ಕ್ ಧರಿಸದ ಜನರಿಗೆ ಜ್ವರ ಇರುವುದನ್ನು ಪತ್ತೆ ಹಚ್ಚಲು ಅಥವಾ ರೋಗ ಲಕ್ಷಣಗಳನ್ನು ಪತ್ತೆ ಹಚ್ಚಲು ಫೇಶಿಯಲ್ ರೆಕಗ್ನಿಷನ್ ತಂತ್ರಜ್ಞಾನವನ್ನು ಬಳಕೆ ಮಾಡಿದ್ದವು.
ಡ್ರೋನ್ ಮತ್ತು ಡೇಟಾ ಮೂಲಕ ಜನರಿಗೆ ಎಚ್ಚರಿಕೆ
ಒಂದು ವಾರದಿಂದೀಚೆಗೆ ಚೀನಾದಲ್ಲಿ ಸೋಂಕಿತರ ಪ್ರಮಾಣ ಗಣನೀಯವಾಗಿ ಇಳಿಕೆಯಾಗುತ್ತಿದೆ. ಈ ಇಳಿಕೆಗೆ ಮೂಲ ಕಾರಣ ಚೀನಾ ಸರ್ಕಾರ ಕೈಗೊಂಡ ಕಟ್ಟನಿಟ್ಟಿನ ಕ್ರಮ. ಅದರಲ್ಲೂ ಪ್ರತಿ ಬೀದಿ ಬೀದಿಯಲ್ಲಿ ಡ್ರೋನ್ ಕಾರಾರಯಚರಣೆ ಮೂಲಕ, ಯಾರು ಮಾಸ್ಕ್ ಧರಿಸಿದ್ದಾರೆ, ಯಾರು ನಿಯಮ ಉಲ್ಲಂಘಿಸುತ್ತಿದ್ದಾರೆ, ಯಾರು ಗುಂಪುಗೂಡಿದ್ದಾರೆ ಎಂಬ ಬಗ್ಗೆ ಕಣ್ಗಾವಲಿಟ್ಟು ಕ್ಷಣ ಕ್ಷಣದ ಮಾಹಿತಿಯನ್ನು ಕಲೆ ಹಾಕಲಾಗುತ್ತಿತ್ತು.
10 ದಿನದಲ್ಲಿ ಆಸ್ಪತ್ರೆ ನಿರ್ಮಾಣ!
ಕೊರೋನಾ ವೈರಸ್ ಸಾರ್ಸ್ನ ಇನ್ನೊಂದು ರೂಪ ಎನ್ನುವುದು ಖಚಿತವಾಗುತ್ತಿದ್ದಂತೆ ಮತ್ತು ಸೋಂಕಿತರ ಪ್ರಮಾಣ ದಿನದಿಂದ ದಿನಕ್ಕೆ ಸಾವಿರಾರು ಸಂಖ್ಯೆಯಲ್ಲಿ ಹೆಚ್ಚುತ್ತಿದ್ದಂತೆಯೇ ಚೀನಾ ಕೊರೋನಾ ಚಿಕಿತ್ಸೆಗಾಗಿಯೇ ಬರೀ 10 ದಿನದಲ್ಲಿ ವುಹಾನ್ನಲ್ಲಿ 1000 ಹಾಸಿಗೆ ಸಾಮರ್ಥ್ಯದ, 25,000 ಚ.ಮೀ ವಿಸ್ತೀರ್ಣದ ಆಸ್ಪತ್ರೆಯನ್ನೇ ನಿರ್ಮಿಸಿತು. ಬರೀ 10 ದಿನದಲ್ಲಿ ಆಸ್ಪತ್ರೆ ನಿರ್ಮಾಣ ಎಂದರೆ ಅದು ಸುಲಭದ ಮಾತಲ್ಲ. 7000ಕ್ಕೂ ಹೆಚ್ಚು ಕಾರ್ಮಿಕರು ದಿನದ ಮೂರು ಪಾಳಿಯಲ್ಲಿ ಕೆಲಸ ಮಾಡಿ ಆಸ್ಪತ್ರೆ ನಿರ್ಮಿಸಿದ್ದರು. ಅದರ ಜೊತೆಗೆ ಉದ್ಘಾಟನೆಯಾದ ಬಳಿಕವೇ ಇಲ್ಲಿಗೆ 1400ಕ್ಕೂ ಹೆಚ್ಚು ವೈದ್ಯರು, ದಾದಿಯರು ಮತ್ತು ಇತರ ಸಿಬ್ಬಂದಿಗಳನ್ನೂ ನಿಯೋಜಿಸಿತ್ತು. ಜೊತೆಗೆ ಎಲ್ಲಾ ರೀತಿಯ ಅತ್ಯಾಧುನಿಕ ಸೌಲಭ್ಯಗಳನ್ನು ಒದಗಿಸಲಾಗಿತ್ತು.
10 ದಿನದಲ್ಲಿ ತಲೆ ಎತ್ತಿದ ಅತ್ಯಾಧುನಿಕ ಚೀನಾ ಆಸ್ಪತ್ರೆ, ರೋಗಿಗಳು ದಾಖಲು!
ನಿಯಮ ಉಲ್ಲಂಘಿಸಿದವರಿಗೆ ಶಿಕ್ಷೆ
ಕೊರೋನಾ ಸೋಂಕು ತಡೆಗಟ್ಟಲು ಸರ್ಕಾರ ಸೂಚಿಸಿರುವ ಮುಂಜಾಗ್ರತಾ ಕ್ರಮಗಳನ್ನು ಪಾಲಿಸದಿದ್ದರೆ ಅಂಥವರಿಗೆ 3-7 ವರ್ಷ ಕಾರಾಗೃಹ ಶಿಕ್ಷೆ ಎಂದೂ ಚೀನಾ ಸರ್ಕಾರ ಪ್ರಕಟಿಸಿತ್ತು. ಸಾಮಾಜಿಕ ಜಾಲತಾಣಗಳ ಬಳಕೆಗೆ ಅನುಮತಿ ನೀಡಿ, ಸೋಂಕಿತರ ಬಗ್ಗೆ ಮಾಹಿತಿ ನೀಡಲು ಅಥವಾ ನಿಯಮಗಳನ್ನು ಪಾಲಿಸದಿದ್ದವರ ಬಗ್ಗೆ ಮಾಹಿತಿ ನೀಡಲು ಸೂಚಿಸಲಾಗಿತ್ತು. ಕೆಲ ನಗರಗಳಲ್ಲಿ ಈ ಬಗ್ಗೆ ಮಾಹಿತಿ ನೀಡಿದವರಿಗೆ ಬಹುಮಾನ ಎಂದೂ ಘೋಷಿಸಲಾಗಿತ್ತು.
ಜಗತ್ತಿಗೆ ವೈರಸ್ ಹರಡಲು ಚೀನಾ ವೈಫಲ್ಯವೇ ಕಾರಣ?
ಕೊರೋನಾ ವೈರಸ್ ನಿಯಂತ್ರಣಕ್ಕೆ ಚೀನಾ ಕೈಗೊಂಡ ತುರ್ತು ಕ್ರಮವನ್ನು ವಿಶ್ವ ಆರೋಗ್ಯ ಸಂಸ್ಥೆ ಶ್ಲಾಘಿಸಿದೆ. ಆದರೆ ವೈರಸ್ ಆರಂಭಿಕ ಹಂತದಲ್ಲಿದ್ದಾಗ ಚೀನಾದ ನಿರ್ಲಕ್ಷ್ಯ, ಕೆಟ್ಟನಿರ್ವಹಣೆಯೇ ಇಷ್ಟೊಂದು ಸಂಖ್ಯೆಯಲ್ಲಿ ಜನರು ಬಲಿಯಾಗಲು ಕಾರಣ ಎನ್ನಲಾಗುತ್ತಿದೆ. ಏಕೆಂದರೆ ಕಳೆದ ವರ್ಷ ಡಿಸೆಂಬರ್ 8ರಂದೇ ಚೀನಾದ ವುಹಾನ್ನಲ್ಲಿ ಮೊದಲ ಪ್ರಕರಣ ಪತ್ತೆಯಾಗಿತ್ತು. ಆದರೆ ಕೊರೋನಾ ನಿಯಂತ್ರಣಕ್ಕೆ ಕ್ರಮ ಕೈಗೊಂಡಿದ್ದು ಜನವರಿ 14ರಿಂದ. ಚೀನಾ ಎಡವಿದ್ದೇ ಇಲ್ಲಿ. ವುಹಾನ್ನ ನೇತ್ರತಜ್ಞ ಡಾ.ಲೀ ವೆನ್ಲಿಯಂಗ್ ಎಂಬವರು ಇದು ಸಾರ್ಸ್ ರೀತಿಯ ವೈರಸ್ ಎಂದು ಎಚ್ಚರಿಸಿದ್ದರೂ, ವದಂತಿ ಹರಡುವವರ ವಿರುದ್ಧ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಚೀನಾ ಸರ್ಕಾರ ಆದೇಶಿಸಿತ್ತು. ಕೊನೆಗೆ ಲೀ ಸೋಂಕಿತರಿಗೆ ಚಿಕಿತ್ಸೆ ಮಾಡುತ್ತಲೇ ಮೃತಪಟ್ಟರು.
ಮುಚ್ಚಿಟ್ಟಿದ್ದೇ ಮಾರಕವಾಯ್ತು!
ವೈರಸ್ನ ತೀವ್ರತೆಯನ್ನು ಕಡಿಮೆ ಮಾಡಲು ಸರ್ಕಾರ ಸೆನ್ಸಾರ್ಶಿಪ್ ಮತ್ತು ಪ್ರಚಾರವನ್ನು ಬಳಸಿತು. ಆದರೆ ಮುಂಚಿನ ಎಚ್ಚರಿಕೆಗಳು ನಿಜವೆಂದು ಸಾಬೀತಾದಾಗ ಸಾರ್ವಜನಿಕರ ಕೋಪಕ್ಕೆ ತುತ್ತಾಯಿತು. ಅಲ್ಲದೆ ಮೊದಮೊದಲು ಅಧಿಕಾರಿಗಳು ಆನ್ಲೈನ್ ಅಥವಾ ಆಫ್ಲೈನ್ ಮೂಲಕ ಕೂಡ ವೈರಸ್ ಬಗ್ಗೆ ಯಾವುದೇ ರೀತಿಯ ಚರ್ಚೆ ಮಾಡಲಿಲ್ಲ. ಜನವರಿಯಲ್ಲಿ ಹೊಸ ವೈರಸ್ ಸಾರ್ಸ್ ರೂಪದ್ದು ಎಂದಿದ್ದ 8 ಜನರ ಮೇಲೆ ವದಂತಿ ಹಬ್ಬಿಸಿದ ಆರೋಪದ ಮೇಲೆ ಬಂಧಿಸಲಾಗಿತ್ತು. ಆದರೆ ತಜ್ಞರು ಅನಂತರ ಕೊರೋನಾ ಅಥವಾ ಕೋವಿಡ್-19, ಸಾರ್ಸ್ನ ಇನ್ನೊಂದು ರೂಪ ಎನ್ನುವುದನ್ನು ಸಾಬೀತುಪಡಿಸಿದರು.
ಚೀನಾ ಮಾಡಿದಂತೆ ಭಾರತ ಮಾಡಬಹುದೇ?
ಕೊರೋನಾ ಮಹಾಮಾರಿ ನಿಯಂತ್ರಣಕ್ಕೆ ಚೀನಾ ಕೈಗೊಂಡ ತುರ್ತು ಕ್ರಮವನ್ನು ವಿಶ್ವ ಆರೋಗ್ಯ ಸಂಸ್ಥೆಯೇ ಶ್ಲಾಘಿಸಿದೆ. ಆದರೆ ವೈರಸ್ ತಡೆಗಟ್ಟಲು ಸರ್ಕಾರ ಕೈಗೊಂಡ ತೀವ್ರತರಹದ ಕ್ರಮಗಳು ಚೀನಾ ಜನರ ಜೀವನೋಪಾಯ ಮತ್ತು ವೈಯಕ್ತಿಕ ಸ್ವಾತಂತ್ರ್ಯದ ಮೇಲೆ ಪರಿಣಾಮ ಬೀರಿರುವುದರಿಂದ ಬೇರೆ ದೇಶಗಳು ಈ ರೀತಿಯ ಕ್ರಮಗಳನ್ನು ಅನುಸರಿಸುವುದು ಸುಲಭವಿಲ್ಲ.
'ಕೊರೋನಾ ವೈರಸ್ ಮೂಲ ಚೀನಾ ಅಲ್ಲ, ಅಮೆರಿಕಾ!'
ದ.ಕೊರಿಯಾ, ಸಿಂಗಾಪುರ, ತೈವಾನ್, ಹಾಂಕಾಂಗ್ ಮಾದರಿ
ಚೀನಾಗಿಂತಲೂ ವೈರಸ್ ಬಗ್ಗುಬಡಿಯಲು ದಕ್ಷಿಣ ಕೊರಿಯಾ, ಸಿಂಗಾಪುರ ತೈವಾನ್ ಮತ್ತು ಹಾಂಕಾಂಗ್ ಕೈಗೊಂಡ ವ್ಯವಸ್ಥಿತ ಕ್ರಮಗಳು ಇತರ ದೇಶಗಳಿಗೆ ಮಾದರಿ ಎನ್ನಲಾಗುತ್ತಿದೆ. ಏಕೆಂದರೆ ಯುರೋಪ್, ಮಧ್ಯಪ್ರಾಚ್ಯ, ಅಮೆರಿಕದಲ್ಲಿ ವೈರಸ್ ವ್ಯಾಪಿಸುತ್ತಿದ್ದಂತೆಯೇ ಸಿಂಗಾಪುರದಲ್ಲಿ ಮುಂಜಾಗ್ರತಾ ಕ್ರಮಗಳನ್ನು ಕೈಗೊಳ್ಳಲಾಗಿತ್ತು. ಪರಿಣಾಮ ಅಲ್ಲಿನ 116 ಜನರಲ್ಲಿ ಸೋಂಕು ಕಾಣಿಸಿಕೊಂಡರೂ ಇದುವರೆಗೆ ಯಾರೂ ಮೃತಪಟ್ಟಿಲ್ಲ. ಈಗಾಗಲೇ 93 ಜನರು ಸೋಂಕಿನಿಂದ ಗುಣಮುಖರಾಗಿ ಡಿಸ್ಚಾಜ್ರ್ ಆಗಿದ್ದಾರೆ. ಅಲ್ಲಿನ ಆರೋಗ್ಯ ವ್ಯವಸ್ಥೆ, ನೈರ್ಮಲ್ಯ, ಟ್ರೇಸಿಂಗ್, ಕಡಮೆ ಜನಸಂಖ್ಯೆ ಇದಕ್ಕೆ ಮೂಲ ಕಾರಣ. ಹಾಗೆಯೇ ಹಾಂಕಾಂಗ್, ತೈವಾನ್ ಕೂಡ ವ್ಯವಸ್ಥಿತ ಕ್ರಮ ರೂಪಿಸಿವೆ. ಮೂರೂ ದೇಶಗಳು ಜನವರಿಯಿಂದಲೇ ಚೀನಾದೊಂದಿಗಿನ ಸಂಪರ್ಕವನ್ನು ಕಡಿತ ಮಾಡಿವೆ. ಗುಂಪುಗೂಡುವುದನ್ನು ನಿಷೇಧಿಸಿವೆ, ಸ್ಕ್ರೀನಿಂಗ್ ವ್ಯವಸ್ಥೆಯನ್ನು ಬಲ ಪಡಿಸಿವೆ. ಎಲ್ಲದಕ್ಕಿಂತ ಮುಖ್ಯವಾಗಿ ಜನರು ಭಯಭೀತರಾಗದಂತೆ ಕ್ಷಣಕ್ಷಣದ ಮಾಹಿತಿಯನ್ನು ಒದಗಿಸಲಾಗುತ್ತಿದೆ. ಸಿಂಗಾಪುರ ಪ್ರಧಾನಿ ಜನರನ್ನು ಉದ್ದೇಶಿಸಿ 4 ಅಧಿಕೃತ ಭಾಷೆಗಳಲ್ಲಿ ಮಾತನಾಡಿ, ಜನರಿಗೆ ಅಭಯ ನೀಡಿದ್ದಾರೆ. ದಕ್ಷಿಣ ಕೊರಿಯಾ ಟೆಲಿಫೋನ್ ಸಮಾಲೋಚನೆ, ಸಂಚಾರಿ ಪರೀಕ್ಷಾ ಕೇಂದ್ರ ಮತ್ತು ಸೋಂಕು ಪತ್ತೆಗೆ ಥರ್ಮಲ್ ಕ್ಯಾಮರಾಗಳನ್ನು ಬಳಸುತ್ತಿದೆ. ಈ ಮೂಲಕ ಒಂದು ದಿನದಲ್ಲಿ 20,000 ಜನರನ್ನು ಪರೀಕ್ಷೆಗೆ ಒಳಪಡಿಸುತ್ತಿದೆ. ಹಾಗೆಯೇ ಕೊರೋನಾ ಸೋಂಕಿತರಿಗೆ ಉಚಿತವಾಗಿ ಚಿಕಿತ್ಸೆ ನೀಡಲಾಗುತ್ತಿದೆ