* ಕಾನೂನುಬಾಹಿರ ಕೃತ್ಯ ಎಸಗಿದರೆ ಇದೇ ಗತಿ: ಉಗ್ರರ ಎಚ್ಚರಿಕೆ* ಹೆರಾತ್ ಪ್ರಾಂತ್ಯದಲ್ಲಿ ಪಾಶವೀ ಕೃತ್ಯ* 4 ಶವ ತಂದು, ಅದರಲ್ಲಿ ಒಂದನ್ನು ಕ್ರೇನ್ಗೆ ನೇತುಹಾಕಿದರು
ಕಾಬೂಲ್(ಸೆ.26): 1990ರ ದಶಕದಲ್ಲಿ ಅಷ್ಘಾನಿಸ್ತಾನದಲ್ಲಿ(Afghanistan) ತಾಲಿಬಾನ್(Taliban) ನಡೆಸುತ್ತಿದ್ದ ಹೇಯ ಕೃತ್ಯಗಳನ್ನು ಈಗಲೂ ಮುಂದುವರೆಸುತ್ತಿದ್ದಾರೆ. ಪಶ್ಚಿಮ ಅಷ್ಘಾನಿಸ್ತಾನದ ಹೆರಾತ್(Herat) ನಗರದ ಮುಖ್ಯ ಚೌಕದಲ್ಲಿ ಶನಿವಾರ ಅಪಹರಣಕಾರ ಎನ್ನಲಾದ ವ್ಯಕ್ತಿಯೊಬ್ಬನನ್ನು ಕೊಂದು ಶವವನ್ನು ಕ್ರೇನ್ನ ಸಹಾಯದಿಂದ ತೂಗುಹಾಕಿದ್ದಾರೆ.
‘ನಾವು ಗಲ್ಲು ಹಾಗೂ ಕೈ-ಕಾಲು ಕತ್ತರಿಸುವ ಶಿಕ್ಷೆ ಆರಂಭಿಸುತ್ತೇವೆ. ಇಂಥ ಕಠಿಣ ಕ್ರಮಗಳನ್ನು ಕೈಗೊಳ್ಳದೇ ಇದ್ದರೆ ತಪ್ಪು ಮಾಡುವುದರಿಂದ ಜನರನ್ನು ತಡೆಯುವುದು ಕಷ್ಟ’ ಎಂದು 2 ದಿನದ ಹಿಂದೆ ತಾಲಿಬಾನ್ ಸಂಸ್ಥಾಪಕರಲ್ಲಿ ಒಬ್ಬನಾದ ಮುಲ್ಲಾ ನೂರುದ್ದೀನ್ ತುರಾಬಿ ಇತ್ತೀಚೆಗೆ ಹೇಳಿದ್ದ. ಆದರೆ ಸಾರ್ವಜನಿಕವಾಗಿ ತಾವು ಹೀಗೆ ಮಾಡುವುದಿಲ್ಲ ಎಂದು ಆತ ಸ್ಪಷ್ಟಪಡಿಸಿದ್ದ. ಅದರ ಬೆನ್ನಲ್ಲೇ ಈ ಭಯ ಹುಟ್ಟಿಸುವ ಘಟನೆ ನಡೆದಿದೆ.
4 ಶವಗಳಲ್ಲಿ 1 ಪ್ರದರ್ಶನ:
‘ತಾಲಿಬಾನ್(Taliban) ಉಗ್ರಗಾಮಿಗಳು ಚೌಕಕ್ಕೆ 4 ಶವಗಳನ್ನು ತಂದಿದ್ದರು. ಅದರಲ್ಲಿ ಒಂದನ್ನು ಕ್ರೇನ್ ಸಹಾಯದಿಂದ ತೂಗು ಹಾಕಿ ಉಳಿದ ಶವಗಳನ್ನು ಬೇರೆ ಬೇರೆ ಚೌಕಗಳಲ್ಲಿ ಪ್ರದರ್ಶನಕ್ಕಾಗಿ ಕೊಂಡೊಯ್ದರು’ ಎಂದು ಘಟನೆಯ ಪ್ರತ್ಯಕ್ಷದರ್ಶಿಯಾದ ವಜೀರ್ ಅಹ್ಮದ್ ಹೇಳಿದ್ದಾರೆ.
ಹತ್ಯೆಯಾಗಿರುವ ನಾಲ್ಕು ಜನರು ಅಪಹರಣ ಪ್ರಕರಣದಲ್ಲಿ ಭಾಗಿಯಾಗಿದ್ದಾರೆ. ಹಾಗಾಗಿ ಅವರಿಗೆ ಮರಣದಂಡನೆ ನೀಡಿ ಉಳಿದವರಿಗೆ ಎಚ್ಚರಿಕೆ ನೀಡಲು ಈ ರೀತಿ ಅವರನ್ನು ನೇತುಹಾಕುತ್ತಿರುವುದಾಗಿ ತಾಲಿಬಾನ್ ಹೇಳಿದ್ದಾಗಿ ವಜೀರ್ ತಿಳಿಸಿದ್ದಾರೆ. ನೇತಾಡುತ್ತಿರುವ ಶವದ ಮೇಲೆ ಅಪರಾಧಿಗಳ ಮೇಲೆ ಅಂಟಿಸುವ ಅಪರಾಧ ವಿವರದ ಕಾಗದವನ್ನು ಅಂಟಿಸಲಾಗಿದೆ.
ಕ್ರೇನ್ ಮೇಲೆ ಶವ ನೇತಾಡುತ್ತಿರುವುದನ್ನು ನೂರಾರು ಜನರು ಭಯದಿಂದ ನೋಡುತ್ತಿರುವ ದೃಶ್ಯಗಳು ಹಾಗೂ ಚಿತ್ರಗಳು ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗಿವೆ. ಆದರೆ, ಈ ಬಗ್ಗೆ ತಾಲಿಬಾನ್ ವಕ್ತಾರರು ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.
ಆಗಸ್ಟ್ 15ರಂದು ಅಷ್ಘಾನಿಸ್ತಾನವನ್ನು ವಶಪಡಿಸಿಕೊಂಡ ನಂತರ 1990ರ ದಶಕದ ಹೇಯ ಕೃತ್ಯಗಳನ್ನು ನಡೆಸುವುದಿಲ್ಲ ತಾಲಿಬಾನ್ ಬದಲಾಗಿದೆ ಎಂದು ತಾಲಿಬಾನ್ ನಾಯಕರು ಹೇಳಿದ್ದರು. ಆದರೆ, ಅಧಿಕಾರಕ್ಕೆ ಬಂದ ನಂತರ ತಾಲಿಬಾನ್ ವರಸೆ ನಿಧಾನವಾಗಿ ಬದಲಾಗುತ್ತಿದ್ದು, ಮಹಿಳೆಯರ ಮೇಲೆ ದೌರ್ಜನ್ಯ ನಡೆಸುತ್ತಿದ್ದಾರೆ ಹಾಗೂ ತಮ್ಮ ಮಾತು ಕೇಳದ ಜನರಿಗೆ ನಾನಾ ಥರದ ಚಿತ್ರಹಿಂಸೆ ನೀಡುತ್ತಿದ್ದಾರೆ ಎಂದು ಸತತವಾಗಿ ವರದಿ ಆಗುತ್ತಲೇ ಇವೆ.
