ವೈರಲ್ ಆಯ್ತು ಬೆಂಕಿ ಜಲಪಾತದ ವಿಡಿಯೋ| ಆತಂಕಗೊಂಡ ಜನರನ್ನು ನಿರಾಳರನ್ನಾಗಿಸಿದ ವರದಿಗಳು| ಈ ಜಲಪಾತದ ಹಿಂದಿನ ವಾಸ್ತವವೇನು? ಇಲ್ಲಿದೆ ವಿವರ
ಕ್ಯಾಲಿಫೋರ್ನಿಯಾ[ಜ.21]: ಸೋಶಿಯಲ್ ಮೀಡಿಯಾದಲ್ಲೊಂದು ವಿಡಿಯೋ ವೈರಲ್ ಆಗುತ್ತಿದ್ದು, ಇದರಲ್ಲಿ 'ಬೆಂಕಿಯ ಜಲಪಾತ' ಬಂಡೆಯಂಚಿನಿಂದ ಕೆಳಗೆ ಹರಿಯುತ್ತಿರುವ ದೃಶ್ಯಗಳಿವೆ. ಈ ವಿಡಿಯೋವನ್ನು ಭಾನುವಾರ ಟ್ವಿಟ್ ಮಾಡಲಾಗಿದ್ದು, ಭಾರೀ ವೈರಲ್ ಆಗಿದೆ. ಆದರೀಗ ಈ ವಿಡಿಯೋ ಕುರಿತು ಹಲವಾರು ಸವಾಲುಗಳು ಎದ್ದಿವೆ. ಇದು ನಿಜಾನಾ? 'ಬೆಂಕಿ ಜಲಪಾತ' ನಿಜಕ್ಕೂ ಇದೆಯಾ? ಇಲ್ಲಿದೆ ವಿವರ
ವಿಡಿಯೋದಲ್ಲಿರುವ ದೃಶ್ಯಗಳು ಕ್ಯಾಲಿಫೋರ್ನಿಯಾದ Yosemite National Parkನಲ್ಲಿರುವ ಜಲಪಾತದ್ದಾಗಿದೆ. ಇದನ್ನು ಹಾರ್ಸ್ ಟೈಲ್ ವಾಟರ್ ಫಾಲ್ ಎಂದು ಕರೆಯಲಾಗುತ್ತದೆ. ಕ್ಯಾಲಿಫೋರ್ನಿಯಾದಲ್ಲಿರುವ ಈ ಜಲಪಾತ ಪ್ರತಿವರ್ಷ, ಫೆಬ್ರವರಿಯ ಎರಡು ವಾರ ಕಿತ್ತಳೆ ಹಾಗೂ ಕೆಂಪು ಬಣ್ಣಕ್ಕೆ ತಿರುಗುತ್ತದೆ. ವರದಿಗಳನ್ವಯ ಯಾವಾಗ ಸೂರ್ಯನ ಕಿರಣಗಳು ಸರಿಯಾಗಿ ಜಲಪಾತದ ಮೇಲೆ ಬೀಳುತ್ತದೋ ಆ ಸಂದರ್ಭದಲ್ಲಿ ಜಲಪಾತ ಹೀಗೆ ಕಾಣಿಸಿಕೊಳ್ಳುತ್ತದೆ ಎನ್ನಲಾಗಿದೆ. ಇದೇ ಕಾರಣದಿಂದ ನೀರಿನ ಜಲಪಾತ, ಜ್ವಾಲಾಮುಖಿಯಿಂದ ಹೊರ ಬೀಳುತ್ತಿರುವ ಬೆಂಕಿಯಂತೆ ಭಾಸವಾಗುತ್ತದೆ.
ಫೆಬ್ರವರಿಯಲ್ಲಿ ಕೇವಲ 2 ವಾರವಷ್ಟೇ ಈ ಜಲಪಾತ ಕಿತ್ತಳೆ ಹಾಗೂ ಕೆಂಪು ಬಣ್ಣದಲ್ಲಿ ಕಾಣಿಸಿಕೊಳ್ಳುತ್ತದೆ. ಅಲ್ಲದೇ ಇದು ಕೇವಲ ಕೆಲ ನಿಮಿಷಗಳವರೆಗೆ ಇರುತ್ತದೆ. ಸಂಜೆ ವೇಳೆ ಆಕಾಶ ಶುಭ್ರವಾಗಿದ್ದರಷ್ಟೇ ಇಂತಹ ಮನಮೋಹಕ ದೃಶ್ಯ ಕಾಣಲು ಸಿಗುತ್ತದೆ ಎಂಬುವುದು ಇಲ್ಲಿನ ಸಿಬ್ಬಂದಿಯ ಮಾತಾಗಿದೆ.
