* ರೇಡಿಯೋ ಫ್ರೀಕ್ವೆನ್ಸಿ ಬಳಸಿ ಸಾನಿಕ್ ದಾಳಿ ಮೂಲಕ ಕೃತ್ಯ ಶಂಕೆ* ಭಾರತಕ್ಕೆ ಬಂದಿದ್ದ ಅಮೆರಿಕ ಅಧಿಕಾರಿಯಲ್ಲಿ ಹವಾನಾ ಸಿಂಡ್ರೋಮ್ ಪತ್ತೆ* ತವರಿಗೆ ಮರಳಿದ ಬಳಿಕ ಸಿಐಎ ಹಿರಿಯ ಅಧಿಕಾರಿಗೆ ಅಗತ್ಯ ಚಿಕಿತ್ಸೆ
ವಾಷಿಂಗ್ಟನ್(ಸೆ.22): ಇತ್ತೀಚೆಗೆ ಭಾರತ(India) ಪ್ರವಾಸ ಕೈಗೊಂಡಿದ್ದ ಅಮೆರಿಕದ ಗುಪ್ತಚರ ಸಂಸ್ಥೆ ಸಿಐಎ ಹಿರಿಯ ಅಧಿಕಾರಿಯೊಬ್ಬರಲ್ಲಿ ‘ಹವಾನಾ ಸಿಂಡ್ರೋಮ್’(Havana Syndrome) ಕಾಯಿಲೆ ಪತ್ತೆಯಾಗಿದೆ. ಅವರ ಮೇಲೆ ಡೆಡ್ಲಿ ಸೋನಿಕ್ ದಾಳಿ ನಡೆಸಿ ‘ಹವಾನಾ ಸಿಂಡ್ರೋಮ್’ ಬರಿಸಲಾಗಿದೆ ಎಂದು ಹೇಳಲಾಗಿದೆ. ಭಾರತದಲ್ಲಿ ಈ ಕಾಯಿಲೆ ಕಾಣಿಸಿದ್ದು ಇದೇ ಮೊದಲು.
ಸಿಐಎ ಮುಖ್ಯಸ್ಥ ವಿಲಿಯಂ ಬರ್ನ್ (William Burns), ಅಫ್ಘಾನಿಸ್ತಾನ ಬೆಳವಣಿಗೆಗಳ ಕುರಿತು ಚರ್ಚಿಸಲು ಇತ್ತೀಚೆಗೆ ಭಾರತಕ್ಕೆ 2 ದಿನಗಳ ಭೇಟಿ ನೀಡಿದ್ದರು. ಈ ವೇಳೆ ಅವರೊಂದಿಗೆ ಹಲವು ಹಿರಿಯ ಅಧಿಕಾರಿಗಳೂ ಬಂದಿದ್ದರು. ಈ ಪೈಕಿ ಒಬ್ಬರಲ್ಲಿ ಹವಾನಾ ಸಿಂಡ್ರೋಮ್ ಹೋಲುವ ಅನಾರೋಗ್ಯ ಕಾಣಿಸಿಕೊಂಡಿದೆ. ತವರಿಗೆ ಮರಳಿದ ಕೂಡಲೇ ಅಧಿಕಾರಿಗೆ ಅಗತ್ಯ ಚಿಕಿತ್ಸೆ ಕೊಡಿಸಲಾಗಿದೆ ಎಂದು ಮೂಲಗಳನ್ನು ಉಲ್ಲೇಖಿಸಿ ಅಮೆರಿಕದ ಸಿಎನ್ಎನ್ ಮತ್ತು ನ್ಯೂಯಾರ್ಕ್ ಟೈಮ್ಸ್ ಪತ್ರಿಕೆಗಳು ವರದಿ ಮಾಡಿವೆ. ಅದರೆ ತೊಂದರೆಗೆ ಒಳಗಾದ ಅಧಿಕಾರಿ ಹೆಸರು ಬಹಿರಂಗಪಡಿಸಿಲ್ಲ.
ಏನಿದು ಹವಾನಾ ಸಿಂಡ್ರೋಮ್?’(Havana Syndrome):
ಕೆಲವೊಮ್ಮೆ ಯಾವುದೇ ವ್ಯಕ್ತಿಯಲ್ಲಿ ದಿಢೀರ್ ಭಾರೀ ತಲೆನೋವು, ನೆನಪಿನ ಶಕ್ತಿ ಕುಂಠಿತ, ಬಳಲಿಕೆ, ಮಂಪರಿನ ಸಮಸ್ಯೆ ಕಾಣಿಸುತ್ತದೆ. ಇದನ್ನು ಹವಾನಾ ಸಿಂಡ್ರೋಮ್ ಎಂದು ಹೇಳಲಾಗುತ್ತದೆ. ಜನ ಸಾಮಾನ್ಯರಲ್ಲೂ ಇಂಥ ಸಮಸ್ಯೆ ಸಾಮಾನ್ಯವಾದರೂ ಗುಪ್ತಚರ ಅಧಿಕಾರಿಗಳು, ರಾಜತಾಂತ್ರಿಕ ಸಿಬ್ಬಂದಿಯಲ್ಲಿ ಈ ಸಮಸ್ಯೆ ಕಾಣಿಸಿಕೊಂಡಾಗ ಅದನ್ನು ಬೇರೆ ದೃಷ್ಟಿಕೋನದಲ್ಲಿ ಪರಿಗಣಿಸಿ ಅವರನ್ನು ಪರಿಶೀಲಿಸಿ ಚಿಕಿತ್ಸೆ ನೀಡಲಾಗುತ್ತದೆ. ಏಕೆಂದರೆ, ಗುಪ್ತಚರ ಅಧಿಕಾರಿಗಳನ್ನೇ ಗುರಿಯಾಗಿಸಿ ಇಂಥ ದಾಳಿ ನಡೆಯುತ್ತವೆ ಎಂದು ಹೇಳಲಾಗಿದೆ.
ಇಂಥ ಮೊದಲ ಘಟನೆ 2016ರಲ್ಲಿ ಕ್ಯೂಬಾದ ರಾಜಧಾನಿ ಹವಾನಾದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಅಮೆರಿಕದ ರಾಜತಾಂತ್ರಿಕ ಸಿಬ್ಬಂದಿಯಲ್ಲಿ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಇದನ್ನು ಹವಾನಾ ಸಿಂಡ್ರೋಮ್ ಎಂದು ಕರೆಯಲಾಗುತ್ತದೆ.
ಹವಾನಾ ಸಿಂಡ್ರೋಮ್ ತಗಲುವುದು ಹೇಗೆ?:
‘ರಷ್ಯಾವೇ ಹವಾನಾ ಸಿಂಡ್ರೋಮ್ ’(Havana Syndrome) ಸೃಷ್ಟಿಕರ್ತ. ಸಾನಿಕ್ ದಾಳಿ ಮೂಲಕ ಈ ಕಾಯಿಲೆ ಬರುವಂತೆ ಮಾಡಲಾಗುತ್ತದೆ’ ಎಂದು ಅಮೆರಿಕ ಆಗಾಗ ಆರೋಪಿಸುತ್ತದೆ. ಅಂದರೆ ರೇಡಿಯೋ ಫ್ರೀಕ್ವೆನ್ಸಿ ಬಳಸಿ ದೂರದಿಂದಲೇ ದಾಳಿ ನಡೆಸಲಾಗುತ್ತದೆ. ಇಂಥ ದಾಳಿಗಳು ಕಿಟಕಿ ಗಾಜು ಒಡೆಯುವ ಸಾಮರ್ಥ್ಯದ ಜೊತೆಗೆ ದಾಳಿಗೊಳಗಾದ ವ್ಯಕ್ತಿಯಲ್ಲಿ ಸಮಸ್ಯೆಗೆ ಕಾರಣವಾಗುತ್ತವೆ.
200ಕ್ಕೂ ಹೆಚ್ಚು ದಾಳಿ:
ಇದುವರೆಗೆ ಅಮೆರಿಕದ ಅಧಿಕಾರಿಗಳು ಮತ್ತು ಅವರ ಕುಟುಂಬ ಸದಸ್ಯರ ಮೇಲೆ ಇಂಥ 200ಕ್ಕೂ ಹೆಚ್ಚು ದಾಳಿ ನಡೆದಿವೆ. ಅಮೆರಿಕ, ಕ್ಯೂಬಾ, ಚೀನಾ, ರಷ್ಯಾ, ಜರ್ಮನಿಯಲ್ಲಿ ಸೇವೆ ಸಲ್ಲಿಸುತ್ತಿರುವ ಅಮೆರಿಕ ಅಧಿಕಾರಿಗಳ ಮೇಲೆ ಇಂಥ ದಾಳಿ ನಡೆದಿದೆ. ದಾಳಿ ನಡೆದಾಗಲೆಲ್ಲಾ ಅಮೆರಿಕದ ಅನುಮಾನ ರಷ್ಯಾ, ಕ್ಯೂಬಾದಂಥ ಕಮ್ಯನಿಸ್ಟ್ ದೇಶಗಳ ಕಡೆಯೇ ಇರುತ್ತದೆ. ಆದರೆ ಭಾರತದಲ್ಲಿ ಇಂಥ ದಾಳಿ ವರದಿಯಾಗಿದ್ದು ಇದೇ ಮೊದಲು.
