ಅರ್ಧ ಶತಮಾನದ ನಂತರ ಕುಟುಂಬವೊಂದಕ್ಕೆ ಹೆಣ್ಣು ಮಗುವಿನ ಜನನ. ದೆಹಲಿಯಲ್ಲಿ ನಡೆದ ಈ ಸಂಭ್ರಮದಲ್ಲಿ ನೂರಾರು ಕಾರುಗಳ ಮೆರವಣಿಗೆ, ದೀಪಾಲಂಕಾರ, ಹೂವಿನ ಅಲಂಕಾರ, ಪಟಾಕಿಗಳೊಂದಿಗೆ ಅದ್ದೂರಿಯಾಗಿ ಮಗುವನ್ನು ಸ್ವಾಗತಿಸಲಾಯಿತು. ಈ ಹೃದಯಸ್ಪರ್ಶಿ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಇತ್ತೀಚಿನ ದಿನಗಳಲ್ಲಿ ಹೆಣ್ಣು ಮಕ್ಕಳು ಹುಟ್ಟಿದರೆ ಅದನ್ನು ಸಂಭ್ರಮಿಸುವ ಕುಟುಂಬಗಳ ಸಂಖ್ಯೆ ಹೆಚ್ಚಾಗಿದೆ. ಆದರೆ, ಇಲ್ಲೊಂದು ಶ್ರೀಮಂತ ಕುಟುಂಬದಲ್ಲಿ ಅರ್ಧ ಶತಮಾನಗಳವರೆಗೆ ಹೆಣ್ಣು ಮಗುವೇ ಹುಟ್ಟಿರಲಿಲ್ಲ. ಬರೋಬ್ಬರಿ 56 ವರ್ಷಗಳ ಬಳಿಕ ಈ ಕುಟುಂಬದಲ್ಲಿ ಹೆಣ್ಣು ಮಗು ಹುಟ್ಟಿದ್ದಕ್ಕೆ ಆಸ್ಪತ್ರೆಯಿಂದ ಮಗುವನ್ನು ಮನೆಗೆ ಕರೆದುಕೊಂಡು ಬರುವಾಗ ಅದ್ಧೂರಿ ಮೆರವಣಿಗೆ ಮಾಡಿದ್ದಾರೆ. ನೂರಾರು ಕಾರುಗಳ ಸಾಲು, ಎಲ್ಲ ಕಾರುಗಳಿಗೂ ಅಲಂಕಾರ, ರಸ್ತೆಗೆ ಲೈಟಿಂಗ್ಸ್, ಮನೆಗೆ ತೋರಣ ಮತ್ತು ಹೂವಿನ ಅಲಂಕಾರ, ಇಡೀ ಏರಿಯಾದಲ್ಲಿ ಪಟಾಕಿ ಹಚ್ಚಿ ಮನೆಯವರು ಸಂಭ್ರಮಿಸಿದ್ದಾರೆ. ಈ ಕುರಿತ ವಿಡಿಯೋ ವೈರಲ್ ಆಗಿದ್ದು, ವೈಭವದ ಸ್ವಾಗತವನ್ನೊಮ್ಮೆ ನೀವೂ ನೋಡಿ ಕಣ್ತುಂಬಿಕೊಳ್ಳಿ...
ಸಾಮಾಜಿಕ ಜಾಲತಾಣಗಳಲ್ಲಿ ಕೆಲವು ಅದ್ಭುತ ವೀಡಿಯೊಗಳು ನಮ್ಮ ಹೃದಯವನ್ನು ಗೆಲ್ಲುತ್ತವೆ. ಅಂತಹದ್ದೇ ಒಂದು ವೀಡಿಯೊ ಈಗ ವೈರಲ್ ಆಗುತ್ತಿದೆ. ಐದು ದಶಕಗಳ ನಂತರ ಒಂದು ಕುಟುಂಬಕ್ಕೆ ಹೆಣ್ಣು ಮಗು ಬಂದ ಸಂತೋಷವನ್ನು ವೀಡಿಯೊದಲ್ಲಿ ಕಾಣಬಹುದು. ಈ ಸುಂದರ ವೀಡಿಯೊವನ್ನು dr.chahatrawal ಎಂಬ ಬಳಕೆದಾರರು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ದೆಹಲಿಯಲ್ಲಿ ಈ ವೀಡಿಯೊ ಚಿತ್ರೀಕರಿಸಲಾಗಿದೆ ಎಂದು ಭಾವಿಸಲಾಗಿದೆ. ಬಲೂನ್ಗಳಿಂದ ಅಲಂಕರಿಸಲ್ಪಟ್ಟ ಕಾರನ್ನು ವೀಡಿಯೊದ ಆರಂಭದಲ್ಲಿ ಕಾಣಬಹುದು. 56 ವರ್ಷಗಳ ನಂತರ ಆ ಕುಟುಂಬದಲ್ಲಿ ಜನಿಸಿದ ಹೆಣ್ಣು ಮಗುವನ್ನು ಮನೆಗೆ ಸ್ವಾಗತಿಸುವುದನ್ನು ವೀಡಿಯೊದಲ್ಲಿ ಕಾಣಬಹುದು.
ಸ್ವಲ್ಪ ಸಮಯದ ನಂತರ, ಗುಲಾಬಿ ಬಲೂನ್ಗಳಿಂದ ಅಲಂಕರಿಸಲ್ಪಟ್ಟ ಮನೆಯನ್ನು ಕಾಣಬಹುದು. ಹೂವುಗಳಿಂದಲೂ ಮನೆಯನ್ನು ಅಲಂಕರಿಸಲಾಗಿದೆ. ಮಗುವಿನೊಂದಿಗೆ ಬರುವ ದಾರಿಯುದ್ದಕ್ಕೂ ಹೂವುಗಳನ್ನು ಹಾಕಿ ಅಲಂಕರಿಸಿರುವುದನ್ನು ಕಾಣಬಹುದು. ನಂತರ, ತಾಯಿ ಮತ್ತು ತಂದೆ ಮಗುವಿನೊಂದಿಗೆ ಒಳಗೆ ಹೋಗುವುದನ್ನು ಕಾಣಬಹುದು. ಮನೆಯ ಒಳಗೆ ಹೋಗುವ ಮುನ್ನ ಆರತಿ ಎತ್ತುವುದು, ಕೆಂಪು ನೀರು ಮಾಡಿ ಕಾಲಿನ ಗುರುತನ್ನು ಒಂದು ಬಟ್ಟೆಗೆ ಒತ್ತಿಸುವುದು, ಮಗುವಿನ ಕಾಲಿನಿಂದ ಅಕ್ಕಿಯ ಸೇರು ಇಟ್ಟು ಅದನ್ನು ಒದೆಸುವ ಮೂಲಕ ಮನೆಯೊಳಗೆ ಸ್ವಾಗತ ಮಾಡುತ್ತಾರೆ. ಮನೆಗೆ ಮಹಾಲಕ್ಷ್ಮಿಯೇ ಬಂದಿದ್ದಾಳೆ ಎಂಬಂತೆ ಅದ್ಧೂರಿಯಾಗಿ ಸ್ವಾಗತ ಮಾಡಿ, ಹಬ್ಬದಂತೆ ಆಚರಣೆ ಮಾಡಿದ್ದಾರೆ.
Related Articles
‘ನಮ್ಮ ಕುಟುಂಬದಲ್ಲಿ 56 ವರ್ಷಗಳ ನಂತರ ಹೆಣ್ಣು ಮಗು ಜನಿಸಿದೆ’ ಎಂದು ವಿಡಿಯೋದಲ್ಲಿ ಬರೆದಿರುವುದನ್ನು ಕಾಣಬಹುದು. ಇದು ಹೃದಯಸ್ಪರ್ಶಿ ದೃಶ್ಯ ಎಂಬುದರಲ್ಲಿ ಸಂದೇಹವಿಲ್ಲ. ಜನರು ಬೇಗನೆ ವೀಡಿಯೊವನ್ನು ನೋಡಿ ಕಾಮೆಂಟ್ಗಳನ್ನು ನೀಡಿದ್ದಾರೆ.‘ಈ ಮಗುವನ್ನು ರಾಜಕುಮಾರಿಯಂತೆ ನೋಡಿಕೊಳ್ಳುತ್ತಾರೆ’ ಎಂದು ಕೆಲವರು ಕಾಮೆಂಟ್ ಮಾಡಿದ್ದಾರೆ. ‘ಈ ಮಗುವಿನ ಬಗ್ಗೆ ಯಾವುದೇ ನಿರ್ಧಾರ ತೆಗೆದುಕೊಳ್ಳಲು ಆಕೆಯ ಪೋಷಕರಿಗೆ ಅವಕಾಶ ನೀಡಬೇಕೆಂದು ಎಲ್ಲಾ ಕುಟುಂಬ ಸದಸ್ಯರನ್ನು ವಿನಂತಿಸುತ್ತೇನೆ. ಇತರರ ಹಸ್ತಕ್ಷೇಪವನ್ನು ತಪ್ಪಿಸಬೇಕು’ ಎಂದು ಒಬ್ಬ ಬಳಕೆದಾರರು ಕಾಮೆಂಟ್ ಮಾಡಿದ್ದಾರೆ.