ಭಾರತಕ್ಕೆ 5ನೇ ಸ್ವರ್ಣ ಪದಕ: ಪ್ಯಾರಾಒಲಿಂಪಿಕ್ಸ್‌ನಲ್ಲಿ ಚಿನ್ನ ಗೆದ್ದ ಕೃಷ್ಣಾ ನಾಗರ್!
* ಭಾರತದ ಪಾಲಿಗೆ ಮತ್ತೊಂದು ಚಿನ್ನ ಗೆದ್ದು ಕೊಟ್ಟ ಕೃಷ್ಣಾ ನಾಗರ್
* ಎಸ್‌ಎಚ್ 6 ಫೈನಲ್ ಪಂದ್ಯದಲ್ಲಿ ಚಿನ್ನ ಬೇಟೆಯಾಡಿದ ನಾಗರ್
* ಪ್ಯಾರಾಒಲಿಂಪಿಕ್ಸ್‌ನಲ್ಲಿ ಭಾರತಕ್ಕೆ 19 ನೇ ಪದಕ
Followಟೋಕಿಯೋ(ಸೆ.-05): ಟೋಕಿಯೊ ಪ್ಯಾರಾಲಿಂಪಿಕ್ಸ್ 2020ರ ಕೊನೆಯ ದಿನ ಭಾರತದ ಪದಕಗಳ ಬೇಟೆ ಮುಂದುವರೆದಿದೆ. ಒಂದೆಡೆ ಕನ್ನಡಿಗ, ನೋಯ್ಡಾ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಮತ್ತು ಪ್ಯಾರಾ-ಬ್ಯಾಡ್ಮಿಂಟನ್ ಆಟಗಾರ ಸುಹಾಸ್ ಯತಿರಾಜ್ ಪುರುಷರ ಸಿಂಗಲ್ಸ್ ಎಸ್‌ಎಲ್ 4 ಈವೆಂಟ್ ಫೈನಲ್‌ನಲ್ಲಿ ಬೆಳ್ಳಿ ಪದಕ ಗೆದ್ದರೆ, ಇತ್ತ ಪುರುಷರ ಸಿಂಗಲ್ಸ್ ಎಸ್‌ಎಚ್ 6 ಫೈನಲ್ ಪಂದ್ಯದಲ್ಲಿ ಹಾಂಗ್ ಕಾಂಗ್‌ನ ಚು ಮನ್ ಕೈರನ್ನು ಭಾರತೀಯ ಶೆಟ್ಲರ್ ಕೃಷ್ಣಾ ನಾಗರ್ 2-1 ರ ಅಂತರದಲ್ಲಿ ಸೋಲಿಸಿ ಚಿನ್ನದ ಪದಕ ತಮ್ಮದಾಗಿಸಿಕೊಂಡಿದ್ದಾರೆ. ಈ ಮೂಲಕ ಭಾರತಕ್ಕೆ 19 ನೇ ಪದಕವನ್ನು ತಂದುಕೊಟ್ಟಿದ್ದಾರೆ. ಭಾರತದ ಪಾಳಿಗೆ ಈವರೆಗೆ ಒಟ್ಟು ಐದು ಚಿನ್ನದ ಪದಕಗಳು ಸೇರಿವೆ.
ಇತಿಹಾಸ ನಿರ್ಮಿಸಿದ ಕನ್ನಡಿಗ ಸುಹಾಸ್: ಪ್ಯಾರಾಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಗೆದ್ದ IAS ಅಧಿಕಾರಿ!
ಇನ್ನು ಚಿನ್ನ ಗೆದ್ದ ಕೃಷ್ಣಾ ನಾಗರ್‌ರನ್ನು ಪಿಎಂ ಮೋದಿ ಅಭಿನಂದಿಸಿದ್ದಾರೆ. ಈ ಬಗ್ಗೆ ಟ್ವೀಟ್ ಮಾಡಿರುವ ಮೋದಿ- ಟೋಕಿಯೊ ಪ್ಯಾರಾಲಿಂಪಿಕ್ಸ್‌ನಲ್ಲಿ ನಮ್ಮ ಬ್ಯಾಡ್ಮಿಂಟನ್ ಆಟಗಾರರು ಉತ್ತಮ ಪ್ರದರ್ಶನ ನೀಡುತ್ತಿರುವುದನ್ನು ನೋಡಿ ಸಂತೋಷವಾಗಿದೆ. ಕೃಷ್ಣಾ ನಾಗರ್ ಅತ್ಯುತ್ತಮ ಪ್ರದರ್ಶನ ಪ್ರತಿಯೊಬ್ಬ ಭಾರತೀಯನಿಗೂ ಖುಷಿ ಕೊಟ್ಟಿದೆ. ಚಿನ್ನದ ಪದಕ ಗೆದ್ದ ಅವರಿಗೆ ಅಭಿನಂದನೆಗಳು. ಅವರ ಮುಂದಿನ ಬದುಕಿಗೆ ಶುಭ ಕೋರುತ್ತೇನೆ ಎಂದಿದ್ದಾರೆ.
ಈ ಪಂದ್ಯದ ಮೊದಲ ಸುತ್ತಿನಲ್ಲಿ ಇಬ್ಬರೂ ಆಟಗಾರರು ಅತ್ಯುತ್ತಮ ಪ್ರದರ್ಶನ ನೀಡಿದ್ದರು. ಆಟದ ಕೊನೆಯಲ್ಲಿ, ಚು ಮಾನ್ ಕೈ ಸಾಧಾರಣ 11-10 ಮುನ್ನಡೆ ಸಾಧಿಸಿದ್ದರು. ಆದರೆ 15-17ರಲ್ಲಿ ರ ಬಳಿಕ ಕೃಷ್ಣಾ ನಾಗರ್ ಒಂದೇ ಬಾರಿ 6 ಅಂಕ ಗಳಿಸಿ, ಕೇವಲ 14 ನಿಮಿಷಗಳಲ್ಲಿ 21-17ರ ಅಂತರ ಸಾಧಿಸಿ ಮೊದಲ ಗೇಮ್ ತಮ್ಮದಾಗಿಸಿಕೊಂಡರು. ಎರಡನೇ ಸೆಟ್‌ನಲ್ಲಿ ಚು ಮಾನ್ ಕೈ ಮತ್ತೆ 11-7ರ ಅಂತರದಲ್ಲಿ ಮುನ್ನಡೆ ಸಾಧಿಸಿದ್ದರು. ಮನ್ ಕೈ ಅದ್ಭುತ ಪ್ರದರ್ಶನದೊಂದಿಗೆ ತನ್ನ ಆಟ ಮುಂದುವರಿಸಿದರು. ಅಲ್ಲದೇ ಎರಡನೇ ಸುತ್ತನ್ನು 14 ನಿಮಿಷಗಳಲ್ಲಿ 21-16ರ ಅಂತರದಲ್ಲಿ ಗೆದ್ದು ಪಂದ್ಯವನ್ನು ಅಂತಿಮ ಸುತ್ತಿಗೆ ಕೊಂಡೊಯ್ದರು.
ಟೋಕಿಯೋ ಪ್ಯಾರಾಲಿಂಪಿಕ್ಸ್: ಬ್ಯಾಡ್ಮಿಂಟನ್‌ನಲ್ಲಿ ಪ್ರಮೋದ್ ಭಗತ್‌ಗೆ ಚಿನ್ನ, ಮನೋಜ್‌ಗೆ ಕಂಚು
ಮೂರನೇ ಮತ್ತು ನಿರ್ಣಾಯಕ ಆಟದಲ್ಲಿ, ಕೃಷ್ಣಾ ನಾಗರ್ ಅದ್ಭುತ ಪ್ರದರ್ಶನ ನೀಡಿ 7-2 ರ ಅಂತರ ಸಾಧಿಸಿದರು. ಈ ಮುನ್ನಡೆಯನ್ನು ಹಾಗೆಯೇ ಉಳಿಸಿಕೊಂಡ ನಾಗರ್ ಹಾಫ್‌ ಟೈಂವರೆಗೆ 11-7 ಮುನ್ನಡೆ ಕಾಪಾಡಿಕೊಂಡರು. ಇದಾದ ಬಳಿಕ ಮತ್ತೆ ಅತ್ಯುತ್ತಮ ಪ್ರದರ್ಶನ ತೋರಿದ ಚು ಮಾನ್ ಕೈ ಅಂಕಗಳನ್ನು ಗಳಿಸಿ 14-14ರಲ್ಲಿ ಸಮಗೊಳಿಸಿದರು. ಆದರೆ ಕೃಷ್ಣಾ ನಾಗರ್ ಮೂರನೇ ಆಟವನ್ನು 21-17ರ ಅಂತರದಲ್ಲಿ 15 ನಿಮಿಷಗಳಲ್ಲಿ ಗೆದ್ದು ಚಿನ್ನದ ಪದಕ ತಮ್ಮದಾಗಿಸಿಕೊಂಡರು.
