Nepal UPI Payments: ಡಿಜಿಟಲ್ ವಹಿವಾಟಿನಲ್ಲಿ ಮಹತ್ವದ ಹೆಜ್ಜೆ: ಇದೀಗ ನೇಪಾಳದಲ್ಲೂ ಭಾರತದ ಯುಪಿಐ ಎಂಟ್ರಿ!
*ನೇಪಾಳದಲ್ಲೂ ಭಾರತದ ಯುಪಿಐ ವ್ಯವಸ್ಥೆ ಬಳಕೆ
*ಉಭಯ ದೇಶಗಳ ಜನತೆ ನಡುವೆ ಹಣ ವರ್ಗಾವಣೆಗೆ ಅವಕಾಶ
*ಎನ್‌ಪಿಸಿಐ ವ್ಯವಸ್ಥೆ ಅಳವಡಿಸಿಕೊಂಡ ಮೊದಲ ವಿದೇಶ
ನವದೆಹಲಿ (ಫೆ. 18): ಭಾರತದಲ್ಲಿ ಡಿಜಿಟಲ್ ಪಾವತಿಯ ವ್ಯವಸ್ಥೆಯಲ್ಲಿನ ಕ್ರಾಂತಿಗೆ ಕಾರಣವಾದ ಯುಪಿಐ (Unified Payments Interface) ವ್ಯವಸ್ಥೆಯನ್ನು ಇದೀಗ ನೆರೆಯ ನೇಪಾಳ (Nepal ಕೂಡ ಅಳವಡಿಸಿಕೊಳ್ಳಲು ಮುಂದಾಗಿದೆ. ಭಾರತದಲ್ಲಿ ಯುಪಿಐ (UPI) ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಿರುವ ನ್ಯಾಷನಲ್‌ ಪೇಮೆಂಟ್‌ ಕಾರ್ಪೊರೇಷನ್‌ ಆಫ್‌ ಇಂಡಿಯಾ (NPCI)ದ ಅಂತಾರಾಷ್ಟ್ರೀಯ ಅಂಗವಾದ ಎನ್ಐಪಿಎಲ್ (NIPL), ನೇಪಾಳದ ಗೇಟ್‌ವೇ ಪೇಮೆಂಟ್ಸ್‌ ಸವೀರ್ಸ್ ಮತ್ತು ಮನಂ ಇನ್ಪೋಟೆಕ್‌ ಸಹಯೋಗದಲ್ಲಿ ಈ ವ್ಯವಸ್ಥೆ ಜಾರಿಗೊಳಿಸಲು ಒಪ್ಪಂದ ಮಾಡಿಕೊಂಡಿದೆ.
ಹೀಗಾಗಿ ವ್ಯವಸ್ಥೆ ಜಾರಿಯಾದ ಬಳಿಕ ನೇಪಾಳದಲ್ಲೂ ಇಬ್ಬರು ವ್ಯಕ್ತಿಗಳ ನಡುವೆ ತತ್‌ಕ್ಷಣದ ಹಣ ಪಾವತಿ ಸಾಧ್ಯವಾಗಲಿದೆ. ಅಷ್ಟುಮಾತ್ರವಲ್ಲ ಭಾರತ ಮತ್ತು ನೇಪಾಳಿ ನಾಗರಿಕರೂ ಪರಸ್ಪರ ಈ ವ್ಯವಸ್ಥೆ ಬಳಸಿಕೊಂಡು ಹಣ ಪಾವತಿ ಮಾಡಬಹುದಾಗಿದೆ.
ನೇಪಾಳ ಪಾಲುದಾರಿಕೆಯು ನೇಪಾಳದಲ್ಲಿ ಯುಪಿಐ ನೈಜಸಮಯದ ಆಧಾರಿತ (Real Time) ಪಾವತಿ ವ್ಯವಸ್ಥೆಯನ್ನು ರಚಿಸಲು ಸಕ್ರಿಯಗೊಳಿಸುತ್ತದೆ. ನೇಪಾಳವು ತನ್ನದೇ ಆದ ಯುಪಿಐ, ಸ್ವಂತ ಅಪ್ಲಿಕೇಶನ್‌ಗಳನ್ನು ಹೊಂದಿದ್ದು, ಭಾರತದಂತಹ ತಮ್ಮದೇ ಬ್ಯಾಂಕ್‌ಗಳನ್ನು ಹೊಂದಿರುತ್ತದೆ.
ಇದನ್ನೂ ಓದಿ: UPI payment fraud ಹಣ ಪಾವತಿ ಸೇರಿ ಡಿಜಿಟಲ್ ವಹಿವಾಟು ಸುರಕ್ಷಿತವಾಗಿಸುವುದು ಹೇಗೆ? ಇಲ್ಲಿವೆ ಟಿಪ್ಸ್!
ತ್ವರಿತವಾಗಿ ವಹಿವಾಟು ನಡೆಸಲು ಅನುವು: "ನೇಪಾಳದಲ್ಲಿ ಎನ್‌ಪಿಸಿಐನ ಪ್ರಮುಖ ಏಕೀಕೃತ ಪಾವತಿಗಳ ಇಂಟರ್‌ಫೇಸ್‌ನ ನಿಯೋಜನೆಯನ್ನು ಸುಲಭಗೊಳಿಸಲು ಜಿಪಿಎಸ್ ಮತ್ತು ಮನಮ್ ಇನ್ಫೋಟೆಕ್‌ನೊಂದಿಗೆ ಕೈಜೋಡಿಸಲು ನಾವು ಸಂತೋಷಪಡುತ್ತೇವೆ. ಈ ಪಾಲುದಾರಿಕೆಯು ನೇಪಾಳದೊಳಗಿನ ಗ್ರಾಹಕರಿಗೆ ಯುಪಿಐ ಪ್ಲಾಟ್‌ಫಾರ್ಮ್ ಅನ್ನು ಬಳಸಿಕೊಂಡು ತ್ವರಿತವಾಗಿ ವಹಿವಾಟು ನಡೆಸಲು ಅನುವು ಮಾಡಿಕೊಡುತ್ತದೆ." ಎಂದು ಎನ್‌ಐಪಿಎಲ್‌ನ ಸಿಇಒ ರಿತೇಶ್ ಶುಕ್ಲಾ ಹೇಳಿದ್ದಾರೆ.
65 ಪ್ರತಿಶತದಷ್ಟು ಸ್ಮಾರ್ಟ್‌ಫೋನ್ ಬಳಕೆ: "ನೇಪಾಳವು ಸುಮಾರು 30 ಮಿಲಿಯನ್ ಜನಸಂಖ್ಯೆಯನ್ನು ಹೊಂದಿದ್ದು, ಜನಸಂಖ್ಯೆಯ ಸುಮಾರು 45 ಪ್ರತಿಶತದಷ್ಟು ಜನರು ಬ್ಯಾಂಕಿಂಗ್‌ ಸೇವೆ ಬಳಸುತ್ತಾರೆ. ದೇಶವು 135 ಪ್ರತಿಶತದಷ್ಟು ಮೊಬೈಲ್ ಬಳಕೆಯಲ್ಲಿ ಏರಿಕೆ ಕಾಣುತ್ತಿದೆ ಮತ್ತು ಜನಸಂಖ್ಯೆಯ 65 ಪ್ರತಿಶತದಷ್ಟು ಜನರು ಸ್ಮಾರ್ಟ್‌ಫೋನ್‌ಗಳನ್ನು ಬಳಸುತ್ತಿದ್ದಾರೆ" ಎಂದು ಎನ್ಐಪಿಎಲ್ ಹೇಳಿಕೆ ತಿಳಿಸಿದೆ.
"ಇದು ಭಾರತದಲ್ಲಿ ಡಿಜಿಟಲ್ ಕ್ರಾಂತಿಯ ತಡೆರಹಿತ ಸೇವೆಯನ್ನು ನೇಪಾಳದಲ್ಲಿ ಪುನರಾವರ್ತಿಸಲು ತಳಹದಿಯನ್ನು ಒದಗಿಸುತ್ತದೆ.. ಮುಂದಿನ ಕೆಲವು ತಿಂಗಳುಗಳಲ್ಲಿ, ಎಲ್ಲಾ ಮೂರು ಕಂಪನಿಗಳು ನೇಪಾಳದಲ್ಲಿ ಏಕೀಕೃತ ಪಾವತಿಗಳ ಇಂಟರ್ಫೇಸ್ ಅನ್ನು ನಿಯೋಜಿಸಲು ಮತ್ತು ಭಾರತದಲ್ಲಿ ಪ್ರಸ್ತುತ ಲಭ್ಯವಿರುವ ಎಲ್ಲಾ ಕಾರ್ಯಗಳು ಮತ್ತು ವೈಶಿಷ್ಟ್ಯಗಳ ಸೇವೆ ನಿಕಟವಾಗಿ ಕೆಲಸ ಮಾಡುತ್ತವೆ ”ಎಂದು ಹೇಳಿಕೆ ತಿಳಿಸಿದೆ
ಇದನ್ನೂ ಓದಿ: Karnataka Bank:ಯುಪಿಐ ಗುರಿಮೀರಿದ ಸಾಧನೆ, ಕರ್ಣಾಟಕ ಬ್ಯಾಂಕಿಗೆ ಕೇಂದ್ರದ 2 ಪ್ರತಿಷ್ಠಿತ ಪ್ರಶಸ್ತಿ
2021ರಲ್ಲಿ ಭಾರತದಲ್ಲಿ ಯುಪಿಐ ವ್ಯವಸ್ಥೆಯ ಮೂಲಕ 3900 ಕೋಟಿ ಹಣಕಾಸು ವ್ಯವಹಾರ ನಡೆದಿದ್ದು, ಒಟ್ಟಾರೆ 7 ಲಕ್ಷ ಕೋಟಿ ರು. ಹಣ ಒಂದೆಡೆಯಿಂದ ಇನ್ನೊಂದೆಡೆಗೆ ಪಾವತಿಯಾಗಿದೆ. ಇದು ದೇಶದ ಜಿಡಿಪಿಯ ಶೇ.31ರಷ್ಟುಎಂಬುದು ಗಮನಾರ್ಹ.
ಇದಕ್ಕೂ ಮೊದಲು, ಯುಪಿಐ ಕ್ಯೂಆರ್ ಆಧಾರಿತ ಪಾವತಿಗಳನ್ನು ಸ್ವೀಕರಿಸಲು ಎನ್ಐಪಿಎಲ್ ಸಿಂಗಾಪುರ ಮತ್ತು ಭೂತಾನ್‌ ದೇಶಗಳೊಂದಿಗೆ ಪಾಲುದಾರಿಕೆಯನ್ನು ಸಹ ಮಾಡಿಕೊಂಡಿದೆ. ಸಿಂಗಾಪುರದ ಪೇನೌ (PayNow) ಜೊತೆಗಿನ ಪಾಲುದಾರಿಕೆಯು ಗಡಿಯಾಚೆಗಿನ ಪಾವತಿಗಳನ್ನು ಸಹ ಅನುಮತಿಸುತ್ತದೆ. ಭಾರತೀಯ ಪ್ರಯಾಣಿಕರು ಯುಪಿಐ ಬಳಸಿಕೊಂಡು ತಮ್ಮ ಖರೀದಿಗಳಿಗೆ ಪಾವತಿಸಲು ಅನುವು ಮಾಡಿಕೊಡಲು ಎನ್ಐಪಿಎಲ್ ಯುಎಇಯ ಮಶ್ರೆಕ್ ಬ್ಯಾಂಕ್‌ನೊಂದಿಗೆ ಸಹ ಒಪ್ಪಂದ ಮಾಡಿಕೊಂಡಿದೆ.
ಏನಿದು ಯುಪಿಐ ವ್ಯವಸ್ಥೆ?: ಇದು ಹಲವು ಬ್ಯಾಂಕ್‌ಗಳನ್ನು ಒಂದೇ ಮೊಬೈಲ್ ಆ್ಯಪ್‌ಗೆ ತಂದು, ಸುಲಭವಾಗಿ ಇಬ್ಬರು ವ್ಯಕ್ತಿಗಳ ನಡುವೆ ಹಣ ವರ್ಗಾವಣೆಗೆ ಅವಕಾಶ ಮಾಡಿಕೊಡುವ ವ್ಯವಸ್ಥೆ. 2016ರಲ್ಲಿ ಭಾರತದಲ್ಲಿ ಇದನ್ನು ಮೊದಲ ಬಾರಿಗೆ ಜಾರಿಗೊಳಿಸಲಾಯ್ತು. ಪಾವತಿ ಮಾಡಬೇಕಾದ ವ್ಯಕ್ತಿಯ ಬ್ಯಾಂಕ್‌ ಖಾತೆ ನಂಬರ್‌ ಗೊತ್ತಿಲ್ಲದೇ ಇದ್ದರೂ, ಅವರ ಬ್ಯಾಂಕ್‌ ಖಾತೆಗೆ ಜೋಡಣೆಯಾಗಿರುವ ಮೊಬೈಲ್ ಸಂಖ್ಯೆ ಬಳಸಿಕೊಂಡೇ ಸುರಕ್ಷಿತವಾಗಿ ಹಣ ಪಾವತಿ ಇಲ್ಲಿ ಸಾಧ್ಯ.
