ಸುಮಾರು 1 ಲಕ್ಷದ 80 ಸಾವಿರ ವಿದ್ಯಾರ್ಥಿಗಳು ಭಾಗವಹಿಸಿದ್ದ ‘ಡೂಡಲ್ 4 ಗೂಗಲ್’ ಸ್ಪರ್ಧೆ 7 ವರ್ಷ ಪ್ರಾಯದ 1ನೇ ತರಗತಿ ವಿದ್ಯಾರ್ಥಿನಿ ಸಾರಾ ಬಿಡಿಸಿರುವ ಚಿತ್ರ ಡೂಡಲ್ಗಾಗಿ ಆಯ್ಕೆ
ಬೆಂಗಳೂರು: ಸಾಫ್ಟ್ವೇರ್ ದೈತ್ಯ ಗೂಗಲ್ನ 10ನೇ ವಾರ್ಷಿಕ ‘ಡೂಡಲ್ 4 ಗೂಗಲ್’ ಸ್ಪರ್ಧೆಯಲ್ಲಿ 7 ವರ್ಷ ಪ್ರಾಯದ ಸಾರಾ ಗೊಮೆಜ್ ಲೇನ್ ವಿಜೇತರಾಗಿದ್ದಾರೆಂದು ಗೂಗಲ್ ಪ್ರಕಟಿಸಿದೆ.
ಅಮೆರಿಕಾದ ವರ್ಜಿನಿಯಾದಲ್ಲಿ 1ನೇ ತರಗತಿ ವಿದ್ಯಾರ್ಥಿನಿಯಾಗಿರುವ ಸಾರಾ ಬಿಡಿಸಿರುವ ಡೂಡಲ್ ಚಿತ್ರವನ್ನು ತನ್ನ ಹೋಮ್ ಪೇಜ್ನಲ್ಲಿ ಪ್ರಕಟಿಸುವುದಾಗಿ ಗೂಗಲ್ ಹೇಳಿದೆ.
ಸುಮಾರು 1 ಲಕ್ಷದ 80 ಸಾವಿರ ಅಮೆರಿಕನ್ ವಿದ್ಯಾರ್ಥಿಗಳು ಈ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದು, ಈವರೆಗೆ ವಿಜೇತರಾದವರ ಪೈಕಿ ಸಾರಾ ಅತೀ ಕಿರಿಯಳು ಎಂದು ಹೇಳಲಾಗಿದೆ.
ಗೂಗಲ್ ಕಂಪನಿಯು ಸಾರಾ ಕಾಲೇಜು ಶಿಕ್ಷಣಕ್ಕಾಗಿ $30000 ಹಾಗೂ ಶಾಲೆಗೆ $50000 ಬಹುಮಾನ ನೀಡಲಿದೆ. ಜೊತೆಗೆ, ಸಾರಾಗೆ ‘ಮೌಂಟನ್ ವೀವ್’ಗೆ ಪ್ರವಾಸದ ಬಹುಮಾನವನ್ನೂ ಗೂಗಲ್ ನೀಡಿದೆ. 2014ರಿಂದ ಪ್ರತಿವರ್ಷ ಸ್ಪರ್ಧಾ ವಿಜೇತರಿಗೆ ಗೂಗಲ್ $80000 ಬಹುಮಾನ ನೀಡುತ್ತಾ ಬಂದಿದೆ.
ನನ್ನಿಷ್ಟದ ಡೈನೋಸರ್ಗಳು ಡೂಡಲ್ನ ಭಾಗವಾಗಿವೆ. ನಾನು ಪಳಯುಳಿಕೆ ತಜ್ಞಳಾಗಬಯಸುತ್ತೇನೆ, ಅದಕ್ಕೆ ಹೆಚ್ಚೆಚ್ಚು ಓದಲು ಈ ಡೈನೋಸರ್ಗಳೇ ಸ್ಫೂರ್ತಿ, ಎಂದು ಸಾರಾ ಈ ಸಂದರ್ಭದಲ್ಲಿ ಹೇಳಿದ್ದಾರೆ.
ತಾನು ಬಿಡಿಸಿರುವ ಈ ಚಿತ್ರದಲ್ಲಿರುವ ಕಾಣುವ ಸಲಿಕೆಯು ತನ್ನ ಭವಿಷ್ಯದ ಉದ್ಯೋಗಕ್ಕಾಗಿ ಎಂದು ಸಾರಾ ಅಂಬೋಣ.
1998ರಲ್ಲಿ ಗೂಗಲ್ ತನ್ನ ಹೋಮ್ ಪೇಜಿನಲ್ಲಿ ಡೂಡಲ್ಗಳನ್ನು ಬಳಸಲು ಆರಂಭಿಸಿತ್ತು. ಮೊದಲ ಬಾರಿಗೆ ಲೋಗೋವನ್ನು ಬಳಸಲಾಗಿತ್ತು, ಬಳಿಕದ ವರ್ಷಗಳಲ್ಲಿ ಅದಕ್ಕೆ ಕಲಾ ಮೆರುಗನ್ನು ನೀಡಲಾಯಿತು. ಈ ನಿಟ್ಟಿನಲ್ಲಿ ವಿದ್ಯಾರ್ಥಿಗಳಿಗಾಗಿ ಗೂಗಲ್ ಕಂಪನಿಯು, ಡೂಡಲ್ 4 ಗೂಗಲ್ ಸ್ಪರ್ಧೆಯನ್ನು ಆಯೋಜಿಸುತ್ತದೆ.
